໘. ເຫມກມາຓວສຸຕ຺ຕນິທ຺ເທສວຓ຺ຓນາ

໕໓. ອຏ຺ຐເມ ເຫມກສຸຕ຺ເຕ – ເຍ ເມ ປຸພ຺ເພ ວິຍາກໍສູຕິ ເຍ ພາວຣິອາທໂຍ ປຸພ຺ເພ ມຍ຺ຫໍ ສກໍ ລທ຺ຘິໍ ວິຍາກໍສຸ. ຫຸຣໍ ໂຄຕມສາສນາຕິ ໂຄຕມສາສນໂຕ ປຸພ຺ພຕຣໍ. ສພ຺ພໍ ຕໍ ຕກ຺ກວຑ຺ຒນນ຺ຕິ ສພ຺ພໍ ຕໍ ກາມວິຕກ຺ກາທິວຑ຺ຒນໍ.

ເຍ ຈຎ຺ເຎ ຕສ຺ສ ອາຈຣິຍາຕິ ເຍ ຈ ອຎ຺ເຎ ຕສ຺ສ ພາວຣິຍສ຺ສ ອາຈາເຣ ສິກ຺ຂາປກາ ອາຈຣິຍາ. ເຕ ສກໍ ທິຏ຺ຐິນ຺ຕິ ເຕ ອາຈຣິຍາ ອຕ຺ຕໂນ ທິຏ຺ຐິໍ. ສກໍ ຂນ຺ຕິນ຺ຕິ ອຕ຺ຕໂນ ຂມນໍ. ສກໍ ຣຸຈິນ຺ຕິ ອຕ຺ຕໂນ ໂຣຈນໍ. ວິຕກ຺ກວຑ຺ຒນນ຺ຕິ ກາມວິຕກ຺ກາທິວິຕກ຺ການໍ ອຸປ຺ປາທນໍ ປຸນປ຺ປຸນໍ ປວຕ຺ຕນໍ. ສງ຺ກປ຺ປວຑ຺ຒນນ຺ຕິ ກາມສງ຺ກປ຺ປາທີນໍ ວຑ຺ຒນໍ. ອິມານິ ທ຺ເວ ປທານິ ສພ຺ພສງ຺ຄາຫິກວເສນ ວຸຕ຺ຕານິ. ອິທານິ ກາມວິຕກ຺ກາທິເກ ສຣູປໂຕ ທສ຺ເສຕຸໍ ‘‘ກາມວິຕກ຺ກວຑ຺ຒນ’’ນ຺ຕິອາທິນາ ນເຍນ ນວວິຕກ຺ເກ ທສ຺ເສສິ.

໕໔. ຕຓ຺ຫານິຄ຺ຆາຕນນ຺ຕິ ຕຓ຺ຫາວິນາສນໍ.

໕໕-໖. ອຖສ຺ສ ຠຄວາ ຕໍ ຘມ຺ມໍ ອາຈິກ຺ຂນ຺ໂຕ ‘‘ອິຘາ’’ຕິ ຄາຖາທ຺ວຍມາຫ. ຕຕ຺ຖ ເອຕທຎ຺ຎາຍ ເຍ ສຕາຕິ ເອຕໍ ນິພ຺ພານໍ ປທມຈ຺ຈຸຕໍ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິອາທິນາ (ຘ. ປ. ໒໗໗; ເຖຣຄາ. ໖໗໖; ກຖາ. ໗໕໓) ນເຍນ ວິປສ຺ສນ຺ຕາ ອນຸປຸພ຺ເພນ ຊານິຕ຺ວາ ເຍ ກາຍານຸປສ຺ສນາສຕິອາທີຫິ ສຕາ. ທິຏ຺ຐຘມ຺ມາຠິນິພ຺ພຸຕາຕິ ວິທິຕຘມ຺ມຕ຺ຕາ ທິຏ຺ຐຘມ຺ມາ ຈ ຣາຄາທິນິພ຺ພາເນນ ຈ ອຠິນິພ຺ພຸຕາ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິທມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ, ເທສນາປຣິໂຍສາເນ ຈ ປຸພ຺ພສທິໂສ ເອວ ຘມ຺ມາຠິສມໂຍ ອໂຫສີຕິ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ເຫມກມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.