໑໐. ກປ຺ປມາຓວສຸຕ຺ຕນິທ຺ເທສວຓ຺ຓນາ

໖໑. ທສເມ ກປ຺ປສຸຕ຺ຕນິທ຺ເທເສ – ມຊ຺ເຌ ສຣສ຺ມິນ຺ຕິ ປຸຣິມປຈ຺ຉິມໂກຏິປຎ຺ຎາຓາຠາວໂຕ ມຊ຺ຌຠູເຕ ສໍສາເຣຕິ ວຸຕ຺ຕໍ ໂຫຕິ. ຕິຏ຺ຐຕນ຺ຕິ ຕິຏ຺ຐມານານໍ. ຍຖາຍິທໍ ນາປຣໍ ສິຍາຕິ ຍຖາ ອິທໍ ທຸກ຺ຂໍ ປຸນ ນ ຠເວຍ຺ຍ.

ອາຄມນນ຺ຕິ ປຸພ຺ພນ຺ຕໂຕ ອິຘາຄມນໍ. ຄມນນ຺ຕິ ອິໂຕ ປຣໂລກຄມນໍ. ຄມນາຄມນນ຺ຕິ ຕທຸຠຍວເສນ ວຸຕ຺ຕໍ. ກາລນ຺ຕິ ມຣຓກາລໍ. ຄຕີຕິ ນິພ຺ພຕ຺ຕິ. ຠວາຠໂວຕິ ຠວໂຕ ຠໂວ. ຈຸຕິ ຈາຕິ ຠວໂຕ ຈວນຎ຺ຈ. ອຸປປຕ຺ຕິ ຈາຕິ ຈຸຕສ຺ສ ອຸປປຕ຺ຕິ ຈ. ນິພ຺ພຕ຺ຕິ ຈາຕິ ປາຕຸຠາໂວ ຈ. ເຠໂທ ຈາຕິ ຂນ຺ຘເຠໂທ ຈ. ຊາຕິ ຈາຕິ ຊນນຎ຺ຈ. ຊຣາ ຈາຕິ ຫານິ ຈ. ມຣຓຎ຺ຈາຕິ ຊີວິຕິນ຺ທ຺ຣິຍສ຺ສ ຈາໂຄ ຈ. ປຸຣິມາປິ ໂກຏິ ນ ປຎ຺ຎາຍຕີຕິ ປຸພ຺ພາປິ ໂກຏິ ນຕ຺ຖິ ນ ສໍວິຊ຺ຊຕິ. ຕຖາ ປຈ຺ຉິມາປິ ໂກຏິ.

ເອຕ຺ຕກາ ຊາຕິໂຍຕິ ເອຕປຣມາ ຊາຕິໂຍ. ວຏ຺ຏໍ ວຕ຺ຕີຕິ ສໍສາຣປວຕ຺ຕິ. ຕໂຕ ປຣໍ ນ ວຕ຺ຕຕີຕິ ຕໂຕ ອຸທ຺ຘໍ ນປ຺ປວຕ຺ຕຕິ. ເຫວໍ ນຕ຺ຖີຕິ ເອວໍ ນຕ຺ຖິ ນ ສໍວິຊ຺ຊຕິ. ຫິ-ອິຕິ ນິປາໂຕ. ອນມຕຄ຺ໂຄຍນ຺ຕິ ອຍໍ ສໍສາໂຣ ອວິທິຕຄ຺ໂຄ.

ອວິຊ຺ຊານີວຣຓານນ຺ຕິ ອວິຊ຺ຊາຍ ອາວຣິຕານໍ. ຕຓ຺ຫາສໍໂຍຊນານນ຺ຕິ ກາມຣາຄສງ຺ຂາຕຕຓ຺ຫາພນ຺ຘນພທ຺ຘານໍ. ສນ຺ຘາວຕນ຺ຕິ ກາມຘາຕຸຍາ ປຸນປ຺ປຸນໍ ຘາວນ຺ຕານໍ. ສໍສຣຕນ຺ຕິ ຣູປາຣູປຘາຕຸຍາ ສໍສຣນ຺ຕານໍ. ທຸກ຺ຂໍ ປຈ຺ຈນຸຠູຕນ຺ຕິ ກາຍິກເຈຕສິກທຸກ຺ຂໍ ອນຸຠູຕໍ ວິນ຺ທິຕໍ. ຕິພ຺ພນ຺ຕິ ພຫລໍ. ພ຺ຍສນນ຺ຕິ ອວຑ຺ຒິ ວິນາໂສ. ກຏສີ ວຑ຺ຒິຕາຕິ ສຸສານວຑ຺ຒິຕໍ. ອລເມວາຕິ ຍຸຕ຺ຕເມວ. ສພ຺ພສງ຺ຂາເຣສູຕິ ເຕຠູມກສງ຺ຂາເຣສຸ. ນິພ຺ພິນ຺ທິຕຸນ຺ຕິ ອຸກ຺ກຓ຺ຐິຕຸໍ. ວິຣຊ຺ຊິຕຸນ຺ຕິ ວິຣາຄໍ ອຸປ຺ປາເທຕຸໍ. ວິມຸຈ຺ຈິຕຸນ຺ຕິ ໂມເຈຕຸໍ. ວຏ຺ຏໍ ວຕ຺ຕິສ຺ສຕີຕິ ສໍສາຣປວຕ຺ຕໍ ເຕຠູມກວຏ຺ຏໍ ອນາຄເຕ ປວຕ຺ຕິສ຺ສຕິ. ຕໂຕ ປຣໍ ນ ວຕ຺ຕິສ຺ສຕີຕິ ຕໂຕ ອຸທ຺ຘໍ ອນາຄເຕ ສໍສາຣປວຕ຺ຕໍ ນປ຺ປວຕ຺ຕິສ຺ສຕິ. ຊາຕິຠເຍຕິ ຊາຕິໍ ປຏິຈ຺ຈ ອຸປ຺ປຊ຺ຊນກຠເຍ. ຊຣາຠຍາທີສຸປິ ເອເສວ ນໂຍ.

໖໒-໓. ອຖສ຺ສ ຠຄວາ ຕມຕ຺ຖໍ ພ຺ຍາກໂຣນ຺ໂຕ ອຸປຣູປຣິຄາຖາໂຍ ອຠາສິ. ທຸຕິຍຄາຖາ ວຸຕ຺ຕຕ຺ຖາເຍວ. ຕຕິຍຄາຖາຍ ອກິຎ຺ຈນນ຺ຕິ ກິຎ຺ຈນປຏິປກ຺ຂໍ. ອນາທານນ຺ຕິ ອາທານປຏິປກ຺ຂໍ, ກິຎ຺ຈນາທານວູປສມນ຺ຕິ ວຸຕ຺ຕໍ ໂຫຕິ. ອນາປຣນ຺ຕິ ອປຣປຏິຠາຄທີປວິຣຫິຕໍ, ເສຏ຺ຐນ຺ຕິ ວຸຕ຺ຕໍ ໂຫຕິ.

໖໔. ຈຕຸຕ຺ຖຄາຖາຍ ນ ເຕ ມາຣສ຺ສ ປທ຺ຘຄູຕິ ເຕ ມາຣສ຺ສ ປທ຺ຘຈຣາ ປຣິຈາຣິກາ ສິສ຺ສາ ນ ໂຫນ຺ຕິ.

ມຫາຊນໍ ປາເສ ນິໂຍເຊຕ຺ວາ ມາເຣຕີຕິ ມາໂຣ. ອກຸສລກມ຺ເມ ນິຍຸຕ຺ຕຕ຺ຕາ ກຓ຺ໂຫ. ຉສຸ ເທວໂລເກສຸ ອຘິປຕິຕ຺ຕາ ອຘິປຕິ. ອກຸສລານໍ ຘມ຺ມານໍ ອນ຺ຕໍ ຄຕຕ຺ຕາ ອນ຺ຕຄູ. ປາປຊນໍ ນ ມຸຎ຺ຈຕີຕິ ນມຸຈິ. ສຕິວິປ຺ປວາສປ຺ປມຕ຺ຕປຸຄ຺ຄລານໍ ຎາຕໂກຕິ ປມຕ຺ຕພນ຺ຘຸ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິທມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ, ເທສນາປຣິໂຍສາເນ ຈ ປຸພ຺ພສທິໂສວ ຘມ຺ມາຠິສມໂຍ ອໂຫສີຕິ.

ສທ຺ຘມ຺ມປ຺ປຊ຺ໂຊຕິກາຍ ຈູຬນິທ຺ເທສ-ອຏ຺ຐກຖາຍ

ກປ຺ປມາຓວສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.