໖. ຊຣາສຸຕ຺ຕນິທ຺ເທສວຓ຺ຓນາ

໓໙. ຉຏ຺ເຐ ຊຣາສຸຕ຺ເຕ ອປ຺ປໍ ວຕ ຊີວິຕໍ ອິທນ຺ຕິ ອິທໍ ວຕ ມນຸສ຺ສານໍ ຊີວິຕໍ ອປ຺ປກໍ ປຣິຕ຺ຕໍ ຐິຕິປຣິຕ຺ຕຕາຍ ສຣສປຣິຕ຺ຕຕາຍາຕິ ຄຸຫຏ຺ຐກສຸຕ຺ເຕປິ ວຸຕ຺ຕນຍເມຕໍ. ໂອຣໍ ວສ຺ສສຕາປິ ມິຍ຺ຍຕີຕິ ວສ຺ສສຕາ ໂອຣໍ ກລລາທິກາເລປິ ມິຍ຺ຍຕິ. ອຕິຈ຺ຈາຕິ ວສ຺ສສຕໍ ອຕິກ຺ກມິຕ຺ວາ. ຊຣສາປິ ມິຍ຺ຍຕີຕິ ຊຣາຍ ມິຍ຺ຍຕິ. ອິໂຕ ປຣໍ ຄຸຫຏ຺ຐກສຸຕ຺ຕວຓ຺ຓນາຍ ວຸຕ຺ຕນເຍເນວ ຄເຫຕພ຺ພໍ.

ອປ຺ປນ຺ຕິ ມນ຺ທໍ. ຄມນີໂຍ ສມ຺ປຣາໂຍຕິ ປຣໂລໂກ ຄນ຺ຕພ຺ໂພ. ກລລກາເລປີຕິ ເອຕ຺ຖ ກລລກາລໍ ນາມ ປຏິສນ຺ຘິກ຺ຂເຓ ຕີຫິ ຊາຕິອຸຓ຺ຓໍສູຫິ ກຕສຸຕ຺ຕຄ຺ເຄ ຐິຕເຕລພິນ຺ທຸປ຺ປມາຓໍ ອຈ຺ຉໍ ວິປ຺ປສນ຺ນກລລໍ ໂຫຕິ. ຍໍ ສນ຺ຘາຍ ວຸຕ຺ຕໍ –

‘‘ຕິລເຕລສ຺ສ ຍຖາ ພິນ຺ທຸ, ສປ຺ປິມຓ຺ໂຑ ອນາວິໂລ;

ເອວໍ ວຓ຺ຓປ຺ປຏິຠາຄໍ, ກລລໍ ສມ຺ປວຸຈ຺ຈຕີ’’ຕິ. (ສໍ. ນິ. ອຏ຺ຐ. ໑.໑.໒໓໕; ວິຠ. ອຏ຺ຐ. ໒໖ ປກິຓ຺ຓກກຖາ);

ຕສ຺ມິໍ ກລລກາເລປິ. ຈວຕີຕິ ຊີວິຕໍ ຄຬຕິ. ມຣຕີຕິ ຊີວິຕວິໂຍຄໍ ອາປຊ຺ຊຕິ. ອນ຺ຕຣຘາຍຕີຕິ ອທສ຺ສນໍ ປາປຸຓາຕິ. ວິປ຺ປລຸຊ຺ຊຕີຕິ ຉິຊ຺ຊຕິ. ‘‘ອຓ຺ຑຊໂຍນິຍາ ຈວຕິ. ຊລາພຸຊໂຍນິຍາ ມຣຕິ. ສໍເສທຊໂຍນິຍາ ອນ຺ຕຣຘາຍຕິ. ໂອປປາຕິກໂຍນິຍາ ວິປ຺ປລຸຊ຺ຊຕີ’’ຕິ ເອວເມເກ ວຓ຺ຓຍນ຺ຕິ. ອພ຺ພຸທກາເລປີຕິ ອພ຺ພຸທໍ ນາມ ກລລໂຕ ສຕ຺ຕາຫຈ຺ຈເຍນ ມໍສໂຘວນອຸທກວຓ຺ຓໍ ໂຫຕິ, ກລລນ຺ຕິ ນາມໍ ອນ຺ຕຣຘາຍຕິ. ວຸຕ຺ຕມ຺ປິ ເຈຕໍ –

‘‘ສຕ຺ຕາຫໍ ກລລໍ ໂຫຕິ, ປຣິປກ຺ກໍ ສມູຫຕໍ;

ວິວຏ຺ຏມານໍ ຕພ຺ຠາວໍ, ອພ຺ພຸທໍ ນາມ ຊາຍຕີ’’ຕິ. (ສໍ. ນິ. ອຏ຺ຐ. ໑.໑.໒໓໕);

ຕສ຺ມິໍ ອພ຺ພຸທກາເລປິ. ເປສິກາເລປີຕິ ຕສ຺ມາປິ ອພ຺ພຸທາ ສຕ຺ຕາຫຈ຺ຈເຍນ ວິລີນຕິປຸສທິສາ ເປສິ ນາມ ສຎ຺ຊາຍຕິ. ສາ ມຣິຈຜາຓິເຕນ ທີເປຕພ຺ພາ. ຄາມທາຣິກາ ຫິ ສຸປກ຺ການິ ມຣິຈານິ ຄເຫຕ຺ວາ ສາຏກນ຺ເຕ ຠຓ຺ຑິກໍ ກຕ຺ວາ ປີເຬຕ຺ວາ ມຓ຺ຑໍ ອາທາຍ ກປາເລ ປກ຺ຂິປິຕ຺ວາ ອາຕເປ ຐເປນ຺ຕິ, ຕໍ ສຸກ຺ຂມານໍ ສພ຺ພຠາເຄຫິ ມຸຈ຺ຈຕິ. ເອວຣູປາ ເປສິ ໂຫຕິ, ອພ຺ພຸທນ຺ຕິ ນາມໍ ອນ຺ຕຣຘາຍຕິ. ວຸຕ຺ຕມ຺ປິ ເຈຕໍ –

‘‘ສຕ຺ຕາຫໍ ອພ຺ພຸທໍ ໂຫຕິ, ປຣິປກ຺ກໍ ສມູຫຕໍ;

ວິວຏ຺ຏມານໍ ຕພ຺ຠາວໍ, ເປສິ ນາມ ປຊາຍຕີ’’ຕິ. (ສໍ. ນິ. ອຏ຺ຐ. ໑.໑.໒໓໕);

ຕສ຺ມິໍ ເປສິກາເລປິ. ຆນກາເລປີຕິ ຕໂຕປິ ເປສິໂຕ ສຕ຺ຕາຫຈ຺ຈເຍນ ກຸກ຺ກຸຏຓ຺ຑສຓ຺ຐາໂນ ຆໂນ ນາມ ມໍສປິຓ຺ໂຑ ນິພ຺ພຕ຺ຕຕິ, ເປສີຕິ ນາມໍ ອນ຺ຕຣຘາຍຕິ. ວຸຕ຺ຕມ຺ປິ ເຈຕໍ –

‘‘ສຕ຺ຕາຫໍ ເປສິ ຠວຕິ, ປຣິປກ຺ກໍ ສມູຫຕໍ;

ວິວຏ຺ຏມານໍ ຕພ຺ຠາວໍ, ຆໂນຕິ ນາມ ຊາຍຕິ.

‘‘ຍຖາ ກຸກ຺ກຸຏິຍາ ອຓ຺ຑໍ, ສມນ຺ຕາ ປຣິມຓ຺ຑລໍ;

ເອວໍ ຆນສ຺ສ ສຓ຺ຐານໍ, ນິພ຺ພຕ຺ຕໍ ກມ຺ມປຈ຺ຈຍາ’’ຕິ. (ສໍ. ນິ. ອຏ຺ຐ. ໑.໑.໒໓໕);

ຕສ຺ມິໍ ຆນກາເລປິ. ປສາຂກາເລປີຕິ ປຎ຺ຈເມ ສຕ຺ຕາເຫ ທ຺ວິນ຺ນໍ ທ຺ວິນ຺ນໍ ຫຕ຺ຖປາທານໍ ສີສສ຺ສ ຈຕ຺ຖາຍ ປຎ຺ຈ ປີຬກາ ຊາຍນ຺ຕິ, ຍໍ ສນ຺ຘາຍ ວຸຕ຺ຕໍ – ‘‘ປຎ຺ຈເມ, ຠິກ຺ຂເວ, ສຕ຺ຕາເຫ ປຎ຺ຈ ປີຬກາ ສຓ຺ຐຫນ຺ຕິ ກມ຺ມໂຕ’’ຕິ. ຕສ຺ມິໍ ປສາຂກາເລປິ. ຕໂຕ ປຣໍ ຉຏ຺ຐສຕ຺ຕມາທີນິ ສຕ຺ຕາຫານິ ອຕິກ຺ກມ຺ມ ເທສນໍ ສງ຺ຂິປິຕ຺ວາ ທ຺ວາຈຕ຺ຕາລີສສຕ຺ຕາເຫ ປຣິຓຕກາເລ ເກສໂລມນຂາທີນໍ ອຸປ຺ປຕ຺ຕິກາລຎ຺ຈ. ຕສ຺ສ ຈ ນາຠິໂຕ ອຸຏ຺ຐິໂຕ ນາໂຬ ມາຕຸ ອຸທຣປຏເລນ ເອກາພທ຺ໂຘ ໂຫຕິ, ໂສ ອຸປ຺ປລທຓ຺ຑໂກ ວິຍ ຉິທ຺ໂທ, ເຕນ ອາຫາຣຣໂສ ສໍສຣິຕ຺ວາ ອາຫາຣສມຸຏ຺ຐານຣູປໍ ສມຸຏ຺ຐາເປຕິ. ເອວໍ ໂສ ທສມາເສ ຍາເປຕິ, ຕໍ ສພ຺ພໍ ອວຕ຺ວາ ‘‘ສູຕິຆເຣ’’ຕິ ອາຫ. ຍໍ ສນ຺ຘາຍ ວຸຕ຺ຕໍ –

‘‘ເກສາ ໂລມາ ນຂານິ ຈ’’;

‘‘ຍຎ຺ຈສ຺ສ ຠຸຎ຺ຊຕີ ມາຕາ, ອນ຺ນໍ ປານຎ຺ຈ ໂຠຊນໍ;

ເຕນ ໂສ ຕຕ຺ຖ ຍາເປຕິ, ມາຕຸກຸຈ຺ຉິຄໂຕ ນໂຣ’’ຕິ. (ສໍ. ນິ. ໑.໒໓໕; ກຖາ. ໖໙໒);

ຕຕ຺ຖ ສູຕິຆເຣຕິ ສູຕິກຆເຣ, ວິຊາຍນຆເຣຕິ ອຕ຺ໂຖ. ‘‘ສູຕິກາຆເຣ’’ຕິ ວາ ປາໂຐ, ສູຕິກາຍາຕິ ປທຈ຺ເຉໂທ. ອທ຺ຘມາສິໂກປີຕິ ຊາຕທິວສໂຕ ປຏ຺ຐາຍ ອທ຺ຘມາໂສ ເອຕສ຺ສ ອຕ຺ຖີຕິ ອທ຺ຘມາສິໂກ. ທ຺ເວມາສິກາທີສຸປິ ເອເສວ ນໂຍ. ຊາຕທິວສໂຕ ປຏ຺ຐາຍ ເອກໍ ສໍວຈ຺ຉຣໍ ເອຕສ຺ສ ອຕ຺ຖີຕິ ສໍວຈ຺ຉຣິໂກ. ອຸປຣິ ທ຺ເວວສ຺ສິກາທີສຸປິ ເອເສວ ນໂຍ.

ຍທາ ຊິຓ຺ໂຓ ໂຫຕີຕິ ຍສ຺ມິໍ ກາເລ ຊຣາຊິຓ຺ໂຓ ຠວຕິ ຊຊ຺ຊຣີຠູໂຕ. ວຸທ຺ໂຘຕິ ວໂຍວຸທ຺ໂຘ. ມຫລ຺ລໂກຕິ ຊາຕິມຫລ຺ລໂກ. ອທ຺ຘຄໂຕຕິ ຕໂຍ ອທ຺ເຘ ອຕິກ຺ກນ຺ໂຕ. ວໂຍອນຸປ຺ປຕ຺ໂຕຕິ ຕຕິຍໍ ວຍໍ ອນຸປ຺ປຕ຺ໂຕ. ຂຓ຺ຑທນ຺ໂຕຕິ ອນ຺ຕຣນ຺ຕຣາ ປຕິຕາ ທນ຺ຕາ ຜາລິຕາ ຈ ຊຣານຸຠາເວນ ຂຓ຺ຑາ ທນ຺ຕາ ຊາຕາ ອສ຺ສາຕິ ຂຓ຺ຑທນ຺ໂຕ. ປລິຕເກໂສຕິ ປຓ຺ຑຣເກໂສ. ວິລູນນ຺ຕິ ລຸຎ຺ຈິຕ຺ວາ ຄຫິຕເກສາ ວິຍ ຂລ຺ລາຏສີໂສ. ຂລິຕສິໂຣຕິ ມຫາຂລ຺ລາຏສີໂສ. ວລິນນ຺ຕິ ສຎ຺ຊາຕວລິ. ຕິລກາຫຕຄຕ຺ໂຕຕິ ເສຕຕິລກກາຬຕິລເກຫິ ວິກິຓ຺ຓສຣີໂຣ. ໂຠຄ຺ໂຄຕິ ຠຄ຺ໂຄ, ອິມິນາປິສ຺ສ ວງ຺ກຠາວໍ ທີເປຕິ. ທຓ຺ຑປຣາຍໂຓຕິ ທຓ຺ຑປຏິສ຺ສຣໂຓ ທຓ຺ຑທຸຕິໂຍ. ໂສ ຊຣາຍປີຕິ ໂສ ປຸຄ຺ຄໂລ ຊຣາຍປິ ອຠິຠູໂຕ ມຣຕິ. ນຕ຺ຖິ ມຣຓມ຺ຫາ ໂມກ຺ໂຂຕິ ມຣຓໂຕ ມຸຎ຺ຈນຸປາໂຍ ນຕ຺ຖິ ນຸປລພ຺ຠຕິ.

ຜລານມິວ ປກ຺ການໍ, ປາໂຕ ປຕນໂຕ ຠຍນ຺ຕິ ປຣິປາກຄຕານໍ ສິຖິລວຓ຺ຏານໍ ປນສຜລາທິປກ຺ການໍ ປຈ຺ຈູສກາເລ ອວສ຺ສໍ ປຕິສ຺ສນ຺ຕີຕິ ຜລສາມິການໍ ຠາຍມານານໍ ວິຍ. ເອວໍ ຊາຕານ ມຈ຺ຈານໍ, ນິຈ຺ຈໍ ມຣຓໂຕ ຠຍນ຺ຕິ ເອວເມວ ອຸປ຺ປນ຺ນານໍ ສຕ຺ຕານໍ ມຈ຺ຈຸສງ຺ຂາຕມຣຓໂຕ ສຕຕໍ ກາລໍ ຠຍໍ.

ຍຖາປິ ກຸມ຺ຠກາຣສ຺ສາຕິ ຍຖາ ນາມ ມຕ຺ຕິກາຠາຊນໍ ກໂຣນ຺ຕສ຺ສ. ກຕໍ ມຕ຺ຕິກຠາຊນນ຺ຕິ (ສຸ. ນິ. ໕໘໒) ເຕນ ນິຏ຺ຐາປິຕຠາຊນໍ. ສພ຺ພໍ ເຠທນປຣິຍນ຺ຕນ຺ຕິ ປກ຺ກາປກ຺ກໍ ສພ຺ພໍ ເຠທນໍ ຠິຊ຺ຊປຣິຍນ຺ຕໍ ອວສານໍ ອສ຺ສາຕິ ເຠທນປຣິຍນ຺ຕໍ. ເອວໍ ມຈ຺ຈານ ຊີວິຕນ຺ຕິ ເອວເມວ ສຕ຺ຕານໍ ອາຍຸສງ຺ຂາຣໍ.

ທຫຣາ ຈ ມຫນ຺ຕາ ຈາຕິ ຕຣຸຓາ ຈ ມຫລ຺ລກາ ຈ. ເຍ ພາລາ ເຍ ຈ ປຓ຺ຑິຕາຕິ ເຍ ຈ ອສ຺ສາສປສ຺ສາສາຍຕ຺ຕາ ຊີວິຕາ ພາລາ ເຍ ຈ ປຓ຺ຑິຈ຺ເຈນ ສມນ຺ນາຄຕາ ພຸທ຺ຘາທໂຍ. ສພ຺ເພ ມຈ຺ຈຸວສໍ ຍນ຺ຕີຕິ ເອເຕ ວຸຕ຺ຕປ຺ປກາຣາ ທຫຣາທໂຍ ສພ຺ເພ ມຈ຺ຈຸໂນ ອິສ຺ສຣິຍໍ ອຸປຄຈ຺ຉນ຺ຕິ.

ເຕສໍ ມຈ຺ຈຸປເຣຕານນ຺ຕິ ເອເຕສໍ ມຈ຺ຈຸນາ ປຣິວາຣິຕານໍ. ຄຈ຺ຉຕໍ ປຣໂລກໂຕຕິ ອິໂຕ ມນຸສ຺ສໂລກໂຕ ປຣໂລກໍ ຄຈ຺ຉນ຺ຕານໍ. ນ ປິຕາ ຕາຍເຕ ປຸຕ຺ຕນ຺ຕິ ປິຕາ ປຸຕ຺ຕໍ ນ ຣກ຺ຂຕິ. ຎາຕີ ວາ ປນ ຎາຕເກຕິ ມາຕາປິຕິປກ຺ຂິກາ ຎາຕີ ວາ ເຕເຍວ ຎາຕເກ ຣກ຺ຂິຕຸໍ ນ ສກ຺ໂກນ຺ຕິ.

ເປກ຺ຂຕຎ຺ເຎວ ຎາຕີນນ຺ຕິ ວຸຕ຺ຕວິຘານໍເຍວ ຎາຕີນໍ ເປກ຺ຂນ຺ຕານໍເຍວ ໂອໂລເກນ຺ຕານໍເຍວ. ປສ຺ສ ລາລປ຺ປຕໍ ປຸຖູຕິ ປສ຺ສາຕິ ອາລປນໍ. ລາລປນ຺ຕານໍ ວິລປນ຺ຕານໍ ປຸຖູນໍ ນານປ຺ປກາຣານໍ. ເອກເມໂກວ ມຈ຺ຈານໍ, ໂຄວຊ຺ໂຌ ວິຍ ນິຍ຺ຍຕີຕິ ສຕ຺ຕານໍ ເອກເມໂກ ວຘາຍ ນິຍ຺ຍມານໂຄໂຓ ວິຍ ມຣຓາຍ ນິຍ຺ຍຕິ ປາປຸຓີຍຕິ. ເອວມພ຺ຠາຫໂຕ ໂລໂກຕິ ເອວເມວ ສຕ຺ຕໂລໂກ ຠຸສໍ ອາຫໂຕ. ມຈ຺ຈຸນາ ຈ ຊຣາຍ ຈາຕິ ມຣເຓນ ຈ ຊຣາຍ ຈ ອຠິຠູໂຕ.

໔໐. ມມາຍິເຕຕິ ມມາຍິຕວຕ຺ຖຸກາຣຓາ. ວິນາຠາວໍ ສນ຺ຕເມວິທນ຺ຕິ ສນ຺ຕໍ ວິຊ຺ຊມານໍ ວິນາຠາວເມວ ອິທໍ, ນ ສກ຺ກາ ອວິນາຠາເວນ ຠວິຕຸນ຺ຕິ ວຸຕ຺ຕໍ ໂຫຕິ.

ໂສຈນ຺ຕີຕິ ຈິຕ຺ເຕນ ໂສຈນໍ ກໂຣນ຺ຕິ. ກິລມນ຺ຕີຕິ ກາເຍນ ກິລມຖໍ ປາປຸຓນ຺ຕິ. ປຣິເທວນ຺ຕີຕິ ນານາວິຘໍ ວາຈາວິລາປໍ ຠຓນ຺ຕິ. ອຸຣຕ຺ຕາຬິໍ ກນ຺ທນ຺ຕີຕິ ອຸຣໍ ຕາເຬຕ຺ວາ ຕາເຬຕ຺ວາ ກນ຺ທນ຺ຕິ. ສມ຺ໂມຫໍ ອາປຊ຺ຊນ຺ຕີຕິ ສມ຺ໂມຫຠາວໍ ປາປຸຓນ຺ຕິ.

ອນິຈ຺ໂຈຕິ ຫຸຕ຺ວາ ອຠາວຏ຺ເຐນ. ສງ຺ຂໂຕຕິ ປຈ຺ຈເຍຫິ ສງ຺ຄມ຺ມ ກໂຕ. ປຏິຈ຺ຈສມຸປ຺ປນ຺ໂນຕິ ປຈ຺ຈຍສາມຄ຺ຄິໍ ປຏິຈ຺ຈ ນ ປຈ຺ຈກ຺ຂາຍ ສຫ ສມ຺ມາ ຈ ອຸປ຺ປນ຺ໂນ. ຂຍຘມ຺ໂມຕິ ຂຍໍ ຄມນສຠາໂວ. ວຍຘມ຺ໂມຕິ ວຍໍ ຄມນສຠາໂວ, ຠງ຺ຄວເສນ ຠງ຺ຄຄມນສຠາໂວຕິ ອຕ຺ໂຖ. ວິຣາຄຘມ຺ໂມຕິ ວິຣຊ຺ຊນສຠາໂວ. ນິໂຣຘຘມ຺ໂມຕິ ນິຣຸຊ຺ຌນສຠາໂວ. ຍ຺ວາຍໍ ປຣິຄ຺ຄໂຫຕິ ໂຍ ອຍໍ ປຣິຄ຺ຄໂຫ. ‘‘ຍາຍ ປຣິຄ຺ຄໂຫ’’ຕິປິ ປາໂຐ, ອຍເມວ ປທຈ຺ເຉໂທ. ນິຈ຺ໂຈຕິ ສຕຕກາລິໂກ. ຘຸໂວຕິ ຖິໂຣ. ສສ຺ສໂຕຕິ ອຈວໂນ. ອວິປຣິຓາມຘມ຺ໂມຕິ ປກຕິອຊຫນສຠາໂວ. ສສ຺ສຕິ ສມໍ ຕເຖວ ຐສ຺ສຕີຕິ ຈນ຺ທສູຣິຍສິເນຣຸມຫາສມຸທ຺ທປຖວີປພ຺ພຕາທໂຍ ວິຍ ຕິຏ຺ເຐຍ຺ຍ.

ນານາຠາໂວຕິ ຊາຕິຍາ ນານາຠາໂວ. ວິນາຠາໂວຕິ ມຣເຓນ ວິໂຍຄຠາໂວ. ອຎ຺ຎຖາຠາໂວຕິ ສພ຺ຠາວໂຕ ອຎ຺ຎຖາຠາໂວ. ປຸຣິມານໍ ປຸຣິມານໍ ຂນ຺ຘານນ຺ຕິ ອນນ຺ຕເຣ ປຸເຣ ອຸປ຺ປນ຺ນານໍ ຂນ຺ຘານໍ. ວິປຣິຓາມຎ຺ຎຖາຠາວາຕິ ປກຕິຠາວໍ ຊຫິຕ຺ວາ ອຎ຺ຎຖາຠາເວນ. ປຈ຺ຉິມາ ປຈ຺ຉິມາ ຂນ຺ຘາທໂຍ ປວຕ຺ຕນ຺ຕິ ອຸປ຺ປຊ຺ຊນ຺ຕີຕິ ສມ຺ພນ຺ໂຘ.

ສພ຺ພໍ ຆຣາວາສປລິໂພຘນ຺ຕິ ສກລໍ ຄິຫິຠາວຊຏໍ. ຎາຕິມິຕ຺ຕາມຈ຺ຈປລິໂພຘນ຺ຕິ ມາຕາປິຕຸປກ຺ຂິກາ ຎາຕີ, ມິຕ຺ຕາ ສຫາຍາ, ອມຈ຺ຈາ ຠຈ຺ຈາ. ສນ຺ນິຘິປລິໂພຘນ຺ຕິ ນິຘານຊຏໍ ຉິນ຺ທິຕ຺ວາ. ເກສມສ຺ສຸໍ ໂອຫາເຣຕ຺ວາຕິ ເກເສ ຈ ມສ຺ສູນິ ຈ ໂອໂຣປຍິຕ຺ວາ. ກາສາຍານິ ວຕ຺ຖານີຕິ ກສາຍຣສປີຕານິ ວຕ຺ຖານິ.

໔໑. ມາມໂກຕິ ມມ ອຸປາສໂກ ຠິກ຺ຂຸ ວາຕິ ສງ຺ຂໍ ຄໂຕ, ພຸທ຺ຘາທີນິ ວາ ວຕ຺ຖູນິ ມມາຍມາໂນ.

ເຕສໍ ເຕສໍ ສຕ຺ຕານນ຺ຕິ ອເນເກສໍ ສຕ຺ຕານໍ ສາຘາຣຓນິທ຺ເທໂສ. ‘‘ຍຎ຺ຎທຕ຺ຕສ຺ສ ມຣຓໍ, ໂສມທຕ຺ຕສ຺ສ ມຣຓ’’ນ຺ຕິ ເອວຎ຺ຫິ ທິວສມ຺ປິ ກຖິຍມາເນ ເນວ ສຕ຺ຕາ ປຣິຍາທານໍ ຄຈ຺ຉນ຺ຕິ, ນ ສພ຺ພໍ ອປຣຕ຺ຕທີປນໍ ສິຊ຺ຌຕິ. ອິເມຫິ ປນ ທ຺ວີຫິ ປເທຫິ ນ ໂກຈິ ສຕ຺ໂຕ ອປຣິຍາທິນ຺ໂນ ໂຫຕິ, ນ ກິຎ຺ຈິ ອປຣຕ຺ຕາທີປນໍ ນ ສິຊ຺ຌຕິ. ຕມ຺ຫາ ຕມ຺ຫາຕິ ອຍໍ ຄຕິວເສນ ອເນເກສໍ ນິກາຍານໍ ສາຘາຣຓນິທ຺ເທໂສ. ສຕ຺ຕນິກາຍາຕິ ສຕ຺ຕານໍ ນິກາຍາ, ສຕ຺ຕຆຏາ ສຕ຺ຕສມູຫາຕິ ອຕ຺ໂຖ. ຈຸຕີຕິ ຈວນວເສນ ວຸຕ຺ຕໍ. ເອກຈຕຸປຎ຺ຈກ຺ຂນ຺ຘາຍ ຈຸຕິຍາ ສາມຎ຺ຎວຈນເມຕໍ. ຈວນຕາຕິ ຠາວວຈເນນ ລກ຺ຂຓນິທສ຺ສນໍ. ເຠໂທຕິ ຈຸຕິຂນ຺ຘານໍ ຠງ຺ຄຸປ຺ປຕ຺ຕິປຣິທີປນໍ. ອນ຺ຕຣຘານນ຺ຕິ ຆຏສ຺ສ ວິຍ ຠິນ຺ນສ຺ສ ຠິນ຺ນານໍ ຂນ຺ຘານໍ ເຍນ ເກນຈິ ປຣິຍາເຍນ ຐານາຠາວປຣິທີປນໍ. ມຈ຺ຈຸມຣຓນ຺ຕິ ມຈ຺ຈຸສງ຺ຂາຕໍ ມຣຓໍ, ນ ຂຓິກມຣຓໍ. ກາໂລ ນາມ ອນ຺ຕໂກ, ຕສ຺ສ ກິຣິຍາຕິ ກາລໍກິຣິຍາ. ເອຕ຺ຕາວຕາ ສມ຺ມຸຕິມຣຓໍ ທີປິຕໍ. ອິທານິ ປຣມຕ຺ເຖນ ທີເປຕຸໍ ‘‘ຂນ຺ຘານໍ ເຠໂທ’’ຕິອາທິມາຫ. ປຣມຕ຺ເຖນ ຫິ ຂນ຺ຘາເຍວ ຠິຊ຺ຊນ຺ຕິ, ນ ສຕ຺ໂຕ ນາມ ໂກຈິ ມຣຕິ. ຂນ຺ເຘສຸ ປນ ຠິຊ຺ຊມາເນສຸ ສຕ຺ໂຕ ມຣຕິ, ຠິນ຺ເນສຸ ‘‘ມໂຕ’’ຕິ ໂວຫາໂຣ ໂຫຕິ.

ເອຕ຺ຖ ຈ ຈຕຸໂວກາຣປຎ຺ຈໂວກາຣວເສນ ຂນ຺ຘານໍ ເຠໂທ, ເອກໂວກາຣວເສນ ກເຬວຣສ຺ສ ນິກ຺ເຂໂປ. ຈຕຸໂວກາຣວເສນ ວາ ຂນ຺ຘານໍ ເຠໂທ, ເສສທ຺ວຍວເສນ ກເຬວຣສ຺ສ ນິກ຺ເຂໂປ ເວທິຕພ຺ໂພ. ກສ຺ມາ? ກາມຣູປຠວທ຺ວເຍປິ ຣູປກາຍສງ຺ຂາຕສ຺ສ ກເຬວຣສ຺ສ ສພ຺ຠາວໂຕ. ຍສ຺ມາ ວາ ຈາຕຸມຫາຣາຊິກາທີສຸ ຂນ຺ຘາ ຠິຊ຺ຊນ຺ເຕວ, ນ ກິຎ຺ຈິ ນິກ຺ຂິປນ຺ຕິ, ຕສ຺ມາ ເຕສໍ ວເສນ ຂນ຺ຘານໍ ເຠໂທ, ມນຸສ຺ສາທີສຸ ກເຬວຣສ຺ສ ນິກ຺ເຂໂປ. ເອຕ຺ຖ ຈ ກເຬວຣສ຺ສ ນິກ຺ເຂປກຣຓໂຕ ມຣຓໍ ‘‘ກເຬວຣສ຺ສ ນິກ຺ເຂໂປ’’ຕິ ວຸຕ຺ຕໍ. ຊີວິຕິນ຺ທ຺ຣິຍສ຺ສຸປຈ຺ເຉໂທຕິ ອິມິນາ ອິນ຺ທ຺ຣິຍພທ຺ຘສ຺ເສວ ມຣຓໍ ນາມ ໂຫຕິ, ອນິນ຺ທ຺ຣິຍພທ຺ຘສ຺ສ ມຣຓໍ ນາມ ນຕ຺ຖີຕິ ທສ຺ເສຕິ. ‘‘ສສ຺ສໍ ມຕໍ, ຣຸກ຺ໂຂ ມໂຕ’’ຕິ ອິທໍ ປນ ໂວຫາຣມຕ຺ຕເມວ. ອຕ຺ຖໂຕ ປນ ເອວຣູປານິ ວຈນານິ ສສ຺ສາທີນໍ ຂຍວຍຠາວເມວ ທີເປນ຺ຕິ. ຣູປຄຕນ຺ຕິ ຣູປເມວ ຣູປຄຕໍ. ເວທນາຄຕນ຺ຕິອາທີສຸປິ ເອເສວ ນໂຍ.

ຕຕ຺ຖ ປຸພ຺ເພວ ມຈ຺ຈນ຺ຕິ ມຈ຺ຈໍ ວາ ໂຠຄາ ປຸພ຺ເພວ ປຐມຕຣຎ຺ເຎວ ວິຊຫນ຺ຕິ. ມຈ຺ໂຈ ວາ ເຕ ໂຠເຄ ປຸພ຺ພຕຣໍ ຊຫຕິ. ກາມກາມີຕິ ໂຈຣຣາຊານໍ ອາລປຕິ. ອມ຺ໂຠ ກາເມ ກາມຍມານ ກາມກາມິ ໂຠຄິໂນ ນາມ ໂລເກ ອສສ຺ສຕາ, ໂຠເຄສຸ ວາ ນຏ຺ເຐສຸ ຊີວມານາ ຈ ອໂຠຄິໂນ ໂຫນ຺ຕິ. ໂຠເຄ ວາ ປຫາຍ ສຍໍ ນສ຺ສນ຺ຕິ, ຕສ຺ມາ ອຫໍ ມຫາຊນສ຺ສ ໂສກກາເລປິ ນ ໂສຈາມີຕິ ອຕ຺ໂຖ.

ວິທິຕາ ມຍາ ສຕ຺ຕຸກ ໂລກຘມ຺ມາຕິ ໂຈຣຣາຊານໍ ອາລປນ຺ໂຕ ອາຫ. ອມ຺ໂຠ ສຕ຺ຕຸກ ມຍາ ລາໂຠ ອລາໂຠ ຍໂສ ອຍໂສຕິອາທໂຍ ໂລກຘມ຺ມາ ວິທິຕາ. ຍເຖວ ຫິ ຈນ຺ໂທ ອຸເທຕິ ຈ ປູຣຕິ ຈ ປຸນ ຈ ຂີຍຕິ, ຍຖາ ຈ ສູຣິໂຍ ອນ຺ຘກາຣໍ ວິຘເມນ຺ໂຕ ມຫນ຺ຕໍ ໂລກປ຺ປເທສໍ ຕປິຕ຺ວານ ປຸນ ສາຍໍ ອຕ຺ຖໍ ປເລຕິ ອຕ຺ຖໍ ຄຈ຺ຉຕິ ນ ທິສ຺ສຕິ, ເອວເມວ ໂຠຄາ ອຸປ຺ປຊ຺ຊນ຺ຕິ ຈ ວິນສ຺ສນ຺ຕິ ຈ, ຕຕ຺ຖ ກິໍ ໂສເກນ, ຕສ຺ມາ ນ ໂສຈາມີຕິ ອຕ຺ໂຖ.

ຕຓ຺ຫາມຎ຺ຎນາຍ ມຎ຺ຎຕີຕິ ຕຓ຺ຫາຍ ຊນິຕມານມຎ຺ຎນາຍ ມຎ຺ຎຕິ. ມານໍ ກໂຣຕິ ທິຏ຺ຐິມຎ຺ຎນາຍາຕິ ທິຏ຺ຐິໍ ອຸປນິສ຺ສຍໍ ກຕ຺ວາ ອຸປ຺ປນ຺ນາຍ ມຎ຺ຎນາຍ. ມານມຎ຺ຎນາຍາຕິ ສຫຊາຕມານມຎ຺ຎນາຍ. ກິເລສມຎ຺ຎນາຍາຕິ ວຸຕ຺ຕປ຺ປກາຣາຍ ອຸປຕາປນຏ຺ເຐນ ກິເລສມຎ຺ຎນາຍ ມຎ຺ຎຕິ.

ກຸຫາຕິ ວິມ຺ຫາປກາ. ຖທ຺ຘາຕິ ຂາຓຸ ວິຍ ຖທ຺ຘາ. ລປາຕິ ປຈ຺ຈຍນິມິຕ຺ເຕນ ລປນກາ.

໔໒. ສງ຺ຄຕນ຺ຕິ ສມາຄຕໍ, ທິຏ຺ຐໍ ຜຸຏ຺ຐໍ ວາ. ປິຍາຍິຕນ຺ຕິ ປິຍກຕໍ.

ສງ຺ຄຕນ຺ຕິ ສມ຺ມຸຂີຠູຕໍ. ສມາຄຕນ຺ຕິ ສມີປໍ ອາຄຕໍ. ສມາຫິຕນ຺ຕິ ເອກີຠູຕໍ. ສນ຺ນິປຕິຕນ຺ຕິ ປິຓ຺ຑິຕໍ. ສຸປິນຄໂຕຕິ ສຸປິນໍ ປວິຏ຺ໂຐ. ເສນາພ຺ຍູຫໍ ປສ຺ສຕີຕິ ເສນາສນ຺ນິເວສໍ ທກ຺ຂຕິ. ອາຣາມຣາມເຓຍ຺ຍກນ຺ຕິ ປຸປ຺ຜາຣາມາທີນໍ ຣມຓີຍຠາວໍ. ວນຣາມເຓຍ຺ຍກາທີສຸປິ ເອເສວ ນໂຍ. ເປຕນ຺ຕິ ອິໂຕ ປຣໂລກໍ ຄຕໍ. ກາລງ຺ກຕນ຺ຕິ ມຕໍ.

໔໓. ນາມໍເຍວາວສິສ຺ສຕິ, ອກ຺ເຂຍ຺ຍນ຺ຕິ ສພ຺ພໍ ຣູປາທິຘມ຺ມຊາຕໍ ປຫີຍຕິ, ນາມມຕ຺ຕເມວ ຕຸ ອວສິສ຺ສຕິ ‘‘ພຸທ຺ຘຣກ຺ຂິໂຕ ຘມ຺ມຣກ຺ຂິໂຕ’’ຕິ ເອວໍ ອກ຺ຂາຕຸໍ ກເຖຕຸໍ.

ເຍ ຈກ຺ຂຸວິຎ຺ຎາຓາຠິສມ຺ຠູຕາຕິ ເຍ ສຍໍ ຈກ຺ຂຸວິຎ຺ຎາເຓນ ອຠິສມ຺ຠູຕາ ຣາສິກຕາ ທິຏ຺ຐາ ຈຕຸສມຸຏ຺ຐານິກາ ຣູປາ. ໂສຕວິຎ຺ຎາຓາຠິສມ຺ຠູຕາຕິ ປຣໂຕໂຆເສນ ໂສຕວິຎ຺ຎາເຓນ ຣາສິກຕາ ສຸຕາ ທ຺ວິສມຸຏ຺ຐານິກາ ສທ຺ທາ.

໔໔. ມຸນໂຍຕິ ຂີຓາສວມຸນໂຍ. ເຂມທສ຺ສິໂນຕິ ນິພ຺ພານທສ຺ສິໂນ.

ໂສໂກຕິ ໂສກນິທ຺ເທເສ – ພ຺ຍສຕີຕິ ພ຺ຍສນໍ, ຫິຕສຸຂໍ ຂິປຕິ ວິທ຺ຘໍເສຕີຕິ ອຕ຺ໂຖ. ຎາຕີນໍ ພ຺ຍສນໍ ຎາຕິພ຺ຍສນໍ, ໂຈຣໂຣຄຠຍາທີຫິ ຎາຕິກ຺ຂໂຍ ຎາຕິວິນາໂສຕິ ອຕ຺ໂຖ. ເຕນ ຎາຕິພ຺ຍສເນນ. ຜຸຏ຺ຐສ຺ສາຕິ ອຊ຺ໂຌຕ຺ຖຏສ຺ສ, ອຠິຠູຕສ຺ສ ສມນ຺ນາຄຕສ຺ສາຕິ ອຕ຺ໂຖ. ເສເສສຸປິ ເອເສວ ນໂຍ. ອຍໍ ປນ ວິເສໂສ – ໂຠຄານໍ ພ຺ຍສນໍ ໂຠຄພ຺ຍສນໍ, ຣາຊໂຈຣາທິວເສນ ໂຠຄກ຺ຂໂຍ ໂຠຄວິນາໂສຕິ ອຕ຺ໂຖ. ໂຣໂຄເຍວ ພ຺ຍສນໍ ໂຣຄພ຺ຍສນໍ. ໂຣໂຄ ຫິ ອາໂຣຄ຺ຍໍ ພ຺ຍສຕິ ວິນາເສຕີຕິ ພ຺ຍສນໍ. ສີລສ຺ສ ພ຺ຍສນໍ ສີລພ຺ຍສນໍ, ທຸສ຺ສິລ຺ຍສ຺ເສຕໍ ນາມໍ. ສມ຺ມາທິຏ຺ຐິໍ ວິນາສຍມານາ ອຸປ຺ປນ຺ນາ ທິຏ຺ຐິເຍວ ພ຺ຍສນໍ ທິຏ຺ຐິພ຺ຍສນໍ. ເອຕ຺ຖ ຈ ປຸຣິມານິ ທ຺ເວ ອນິປ຺ຜນ຺ນານິ, ປຈ຺ຉິມານິ ຕີຓິ ນິປ຺ຜນ຺ນານິ ຕິລກ຺ຂຓພ຺ຠາຫຕານິ. ປຸຣິມານິ ຈ ຕີຓິ ເນວ ກຸສລານິ ນາກຸສລານິ, ສີລທິຏ຺ຐິພ຺ຍສນທ຺ວຍໍ ອກຸສລໍ.

ອຎ຺ຎຕຣຎ຺ຎຕເຣນາຕິ ຄຫິເຕສຸ ວາ ເຍນ ເກນຈິ ອຄ຺ຄຫິເຕສຸ ວາ ມິຕ຺ຕາມຈ຺ຈພ຺ຍສນາທີສຸ ເຍນ ເກນຈິ. ສມນ຺ນາຄຕສ຺ສາຕິ ສມນຸພນ຺ຘສ຺ສ ອປຣິມຸຈ຺ຈມານສ຺ສ. ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນາຕິ ເຍນ ເກນຈິ ໂສກທຸກ຺ຂສ຺ສ ອຸປ຺ປຕ຺ຕິເຫຕຸນາ. ໂສໂກຕິ ໂສຈນກວເສນ ໂສໂກ. ອິທໍ ເຕຫິ ກາຣເຓຫິ ອຸປ຺ປຊ຺ຊນກໂສກສ຺ສ ສຠາວປຈ຺ຈຕ຺ຕໍ. ໂສຈນາຕິ ໂສຈນາກາໂຣ. ໂສຈິຕຕ຺ຕນ຺ຕິ ໂສຈິຕຠາໂວ. ອນ຺ໂຕໂສໂກຕິ ອພ຺ຠນ຺ຕຣໂສໂກ. ທຸຕິຍປທໍ ອຸປສຄ຺ເຄນ ວຑ຺ຒິຕໍ. ໂສ ຫິ ອພ຺ຠນ຺ຕຣໍ ສຸກ຺ຂາເປນ຺ໂຕ ວິຍ ປຣິສຸກ຺ຂາເປນ຺ໂຕ ວິຍ ອຸປ຺ປຊ຺ຊຕີຕິ ‘‘ອນ຺ໂຕໂສໂກ ອນ຺ໂຕປຣິໂສໂກ’’ຕິ ວຸຈ຺ຈຕິ. ອນ຺ໂຕທາໂຫຕິ ອພ຺ຠນ຺ຕຣທາໂຫ. ທຸຕິຍປທໍ ອຸປສຄ຺ເຄນ ວຑ຺ຒິຕໍ. ເຈຕໂສ ປຣິຊ຺ຌາຍນາຕິ ຈິຕ຺ຕສ຺ສ ຌານນາກາໂຣ. ໂສໂກ ຫິ ອຸປ຺ປຊ຺ຊມາໂນ ອຄ຺ຄິ ວິຍ ຈິຕ຺ຕໍ ຌາເປຕິ ທຫຕິ, ‘‘ຈິຕ຺ຕໍ ເມ ຌາມໍ, ນ ເມ ກິຎ຺ຈິ ປຏິຠາຕີ’’ຕິ ວທາເປຕິ. ທຸກ຺ຂິໂຕ ມໂນ ທຸມ຺ມໂນ, ຕສ຺ສ ຠາໂວ ໂທມນສ຺ສໍ. ອນຸປວິຏ຺ຐຏ຺ເຐນ ໂສໂກວ ສລ຺ລນ຺ຕິ ໂສກສລ຺ລໍ.

ປຣິເທວນິທ຺ເທເສ – ‘‘ມຍ຺ຫໍ ຘີຕາ, ມຍ຺ຫໍ ປຸຕ຺ໂຕ’’ຕິ ເອວໍ ອາທິສ຺ສ ອາທິສ຺ສ ເທວນ຺ຕິ ໂຣທນ຺ຕິ ເອເຕນາຕິ ອາເທໂວ. ຕໍ ຕໍ ວຓ຺ຓໍ ປຣິກິຕ຺ເຕຕ຺ວາ ປຣິກິຕ຺ເຕຕ຺ວາ ເທວນ຺ຕິ ເອເຕນາຕິ ປຣິເທໂວ. ຕໂຕ ປຣານິ ທ຺ເວ ທ຺ເວ ປທານິ ປຸຣິມທ຺ວຍສ຺ເສວ ອາກາຣຠາວນິທ຺ເທສວເສນ ວຸຕ຺ຕານິ. ວາຈາຕິ ວຈນໍ. ປລາໂປຕິ ຕຸຈ຺ຉໍ ນິຣຕ຺ຖກວຈນໍ. ອຸປ຺ປຑ຺ຒຠຓິຕອຎ຺ຎຠຓິຕາທິວເສນ ວິຣູໂປ ປລາໂປ ວິປ຺ປລາໂປ. ລາລປ຺ໂປຕິ ປຸນປ຺ປຸນໍ ລປນໍ. ລາລປ຺ປນາກາໂຣ ລາລປ຺ປນາ. ລາລປ຺ປິຕສ຺ສ ຠາໂວ ລາລປ຺ປິຕຕ຺ຕໍ. ມຈ຺ຉຣິຍາທີນິ ວຸຕ຺ຕຕ຺ຖາເນວ.

໔໕. ສຕ຺ຕມຄາຖາ ເອວໍ ມຣຓພ຺ຠາຫເຕ ໂລເກ ອນຸຣູປປຏິປຕ຺ຕິທສ຺ສນຕ຺ຖໍ ວຸຕ຺ຕາ. ຕຕ຺ຖ ປຕິລີນຈຣສ຺ສາຕິ ຕໂຕ ຕໂຕ ປຕິລີນໍ ຈິຕ຺ຕໍ ກຕ຺ວາ ຈຣນ຺ຕສ຺ສ. ຠິກ຺ຂຸໂນຕິ ກລ຺ຍາຓປຸຖຸຊ຺ຊນສ຺ສ ວາ ເສກ຺ຂສ຺ສ ວາ. ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍຕິ ຕສ຺ເສຕໍ ປຕິຣູປມາຫຸ, ໂຍ ເອວໍປຏິປນ຺ໂນ ນິຣຍາທິເຠເທ ຠວເນ ອຕ຺ຕານໍ ນ ທສ຺ສເຍ. ເອວຎ຺ຫິ ໂສ ອິມມ຺ຫາ ມຣຓາ ມຸຈ຺ເຈຍ຺ຍາຕິ ອຘິປ຺ປາໂຍ.

ປຕິລີນຈຣາ ວຸຈ຺ຈນ຺ຕີຕິ ຕໂຕ ຕໂຕ ລີນຈິຕ຺ຕາຈາຣາ ກຖີຍນ຺ຕິ. ສຕ຺ຕ ເສກ຺ຂາຕິ ອຘິສີລາທີສຸ ຕີສຸ ສິກ຺ຂາສຸ ສິກ຺ຂນ຺ຕີຕິ ໂສຕາປຕ຺ຕິມຄ຺ຄຏ຺ຐໍ ອາທິໍ ກຕ຺ວາ ຍາວ ອຣຫຕ຺ຕມຄ຺ຄຏ຺ຐາ ສຕ຺ຕ ເສກ຺ຂາ. ອຣຫາຕິ ຜລຏ຺ໂຐ. ໂສ ນິຏ຺ຐິຕຈິຕ຺ຕຕ຺ຕາ ປຕິລີໂນ. ເສກ຺ຂານໍ ປຕິລີນຈຣຓຠາເວ ກາຣຓໍ ທສ຺ເສນ຺ໂຕ ‘‘ກິໍ ກາຣຓາ’’ຕິອາທິມາຫ. ເຕ ຕໂຕ ຕໂຕຕິ ເຕ ສຕ຺ຕ ເສກ຺ຂາ ເຕຫິ ເຕຫິ ອາຣມ຺ມເຓຫິ ຈິຕ຺ຕໍ ປຕິລີເນນ຺ຕາຕິ ອຕ຺ຕໂນ ຈິຕ຺ຕໍ ນິລີເນນ຺ຕາ. ປຕິກຸເຏນ຺ຕາຕິ ສງ຺ໂກເຈນ຺ຕາ. ປຕິວຏ຺ເຏນ຺ຕາຕິ ກຏສາຣກໍ ວິຍ ອາຠຸເຊນ຺ຕາ. ສນ຺ນິຣຸທ຺ຘນ຺ຕາຕິ ສນ຺ນິຣຸຊ຺ຌນ຺ຕາ. ສນ຺ນິຄຓ຺ຫນ຺ຕາຕິ ນິຄ຺ຄຫໍ ກຸຣຸມານາ. ສນ຺ນິວາເຣນ຺ຕາຕິ ວາຣຍມານາ. ຣກ຺ຂນ຺ຕາຕິ ຣກ຺ຂໍ ກຸຣຸມານາ. ໂຄເປນ຺ຕາຕິ ຈິຕ຺ຕມຎ຺ຊູສາຍ ໂຄປຍມານາ.

ອິທານິ ທ຺ວາຣວເສນ ທສ຺ເສນ຺ໂຕ ‘‘ຈກ຺ຂຸທ຺ວາເຣ’’ຕິອາທິມາຫ. ຕຕ຺ຖ ຈກ຺ຂຸທ຺ວາເຣຕິ ຈກ຺ຂຸວິຎ຺ຎາຓທ຺ວາເຣ. ໂສຕທ຺ວາຣາທີສຸປິ ເອເສວ ນໂຍ. ຠິກ຺ຂຸໂນຕິ ປຸຖຸຊ຺ຊນກລ຺ຍາຓກສ຺ສ ວາ ຠິກ຺ຂຸໂນ, ເສກ຺ຂສ຺ສ ວາ ຠິກ຺ຂຸໂນຕິ ຠິກ຺ຂຸສທ຺ທສ຺ສ ວຈນຕ຺ຖໍ ອວຕ຺ວາ ອິຘາຘິປ຺ເປຕຠິກ຺ຂຸເຍວ ທສ຺ສິໂຕ. ຕຕ຺ຖ ປຸຖຸຊ຺ຊໂນ ຈ ໂສ ກິເລສານໍ ອສມຸຈ຺ຉິນ຺ນຕ຺ຕາ, ກລ຺ຍາໂຓ ຈ ສີລາທິປຏິປຕ຺ຕິຍຸຕ຺ຕຕ຺ຕາຕິ ປຸຖຸຊ຺ຊນກລ຺ຍາໂຓວ ປຸຖຸຊ຺ຊນກລ຺ຍາຓໂກ, ຕສ຺ສ ປຸຖຸຊ຺ຊນກລ຺ຍາຓກສ຺ສ. ອຘິສີລາທີນິ ສິກ຺ຂຕີຕິ ເສກ຺ໂຂ, ຕສ຺ສ ເສກ຺ຂສ຺ສ ວາ ໂສຕາປນ຺ນສ຺ສ ວາ ສກທາຄາມິໂນ ວາ ອນາຄາມິໂນ ວາ.

ອາສນ຺ຕິ ນິສີທນ຺ຕິ ເອຕ຺ຖາຕິ ອາສນໍ. ຍຕ຺ຖາຕິ ເຍສຸ ມຎ຺ຈປີຐາທີສຸ. ມຎ຺ໂຈຕິອາທີນິ ອາສນສ຺ສ ປເຠທວຈນານິ. ມຎ຺ໂຈປິ ຫິ ນິສຊ຺ຊາຍປິ ໂອກາສຕ຺ຕາ ອິຘ ອາສເນສຸ ວຸຕ຺ໂຕ, ໂສ ປນ ມສາຣກພຸນ຺ທິກາພທ຺ຘກຸຬີຣປາທກອາຫຈ຺ຈປາທການໍ ອຎ຺ຎຕໂຣ. ປີຐມ຺ປິ ເຕສໍ ອຎ຺ຎຕຣເມວ. ຠິສີຕິ ອຸຓ຺ຓຠິສິ ໂຈຬຠິສິ ວາກຠິສິ ຕິຓຠິສິ ປຓ຺ຓຠິສີນໍ ອຎ຺ຎຕຣາ. ຕຏ຺ຏິກາຕິ ຕາລປຓ຺ຓາທີຫິ ວິນິຕ຺ວາ ກຕາ. ຈມ຺ມຂຓ຺ໂຑຕິ ນິສຊ຺ຊາຣໂຫ ໂຍ ໂກຈິ ຈມ຺ມຂຓ຺ໂຑ. ຕິຓສນ຺ຖາຣາທໂຍ ຕິຓາທີນິ ຄຸມ຺ເພຕ຺ວາ ກຕາ. ອສປ຺ປາຍຣູປທສ຺ສເນນາຕິ ອສປ຺ປາຍານໍ ອິຏ຺ຐຣູປານໍ ໂອໂລກເນນ. ຣິຕ຺ຕນ຺ຕິ ອພ຺ຠນ຺ຕຣໂຕ ຕຸຈ຺ຉໍ. ວິວິຕ຺ຕນ຺ຕິ ພຫິທ຺ຘາປເວສເນນ ສຸຎ຺ຎໍ. ປວິວິຕ຺ຕນ຺ຕິ ໂກຈິ ຄຫຏ຺ໂຐ ຕຕ຺ຖ ນຕ຺ຖີຕິ ອຕິເຣເກນ ສຸຎ຺ຎໍ. ອສປ຺ປາຍສທ຺ທສ຺ສວເນປິ ເອເສວ ນໂຍ. ປຎ຺ຈຫິ ກາມຄຸເຓຫີຕິ ອິຕ຺ຖິຣູປສທ຺ທຄນ຺ຘຣສໂຜຏ຺ຐພ຺ເພຫິ ປຎ຺ຈຫິ ກາມໂກຏ຺ຐາເສຫິ. ວຸຕ຺ຕມ຺ປິ ເຈຕໍ –

‘‘ຣູປາ ສທ຺ທາ ຣສາ ຄນ຺ຘາ, ໂຜຏ຺ຐພ຺ພາ ຈ ມໂນຣມາ;

ປຎ຺ຈ ກາມຄຸຓາ ໂລເກ, ອິຕ຺ຖິຣູປສ຺ມິໍ ທິສ຺ສເຣ’’ຕິ. (ອ. ນິ. ໕.໕໕);

ຠຊໂຕຕິ ຈິຕ຺ເຕນ ເສວນໍ ກໂຣນ຺ຕສ຺ສ. ສມ຺ຠຊໂຕຕິ ສມ຺ມາ ເສວນ຺ຕສ຺ສ. ເສວໂຕຕິ ອຸປສງ຺ກມນ຺ຕສ຺ສ. ນິເສວໂຕຕິ ນິສ຺ສຍໍ ກຕ຺ວາ ເສວນ຺ຕສ຺ສ. ສໍເສວໂຕຕິ ສຸຏ຺ຐຸ ເສວນ຺ຕສ຺ສ. ປຏິເສວໂຕຕິ ປຸນປ຺ປຸນໍ ອຸປສງ຺ກມນ຺ຕສ຺ສ.

ຄຓສາມຄ຺ຄີຕິ ສມຓານໍ ເອກີຠາໂວ ສມຄ຺ຄຠາໂວ. ຘມ຺ມສາມຄ຺ຄີຕິ ສຕ຺ຕຕິໍສໂພຘິປກ຺ຂິຍຘມ຺ມານໍ ສມູຫຠາໂວ. ອນຠິນິພ຺ພຕ຺ຕິສາມຄ຺ຄີຕິ ອນິພ຺ພຕ຺ຕມານານໍ ອນຸປ຺ປຊ຺ຊມານານໍ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພຸຕານໍ ອຣຫນ຺ຕານໍ ສມູໂຫ. ສມຄ຺ຄາຕິ ກາເຍນ ອວິໂຍຄາ. ສມ຺ໂມທມານາຕິ ຈິຕ຺ເຕນ ສຸຏ຺ຐຸ ໂມທມານາ ຕຸສ຺ສມານາ. ອວິວທມານາຕິ ວາຈາຍ ວິວາທໍ ອກຸຣຸມານາ. ຂີໂຣທກີຠູຕາຕິ ຂີເຣນ ສໍສຏ຺ຐອຸທກສທິສາ.

ເຕ ເອກໂຕ ປກ຺ຂນ຺ທນ຺ຕີຕິ ເຕ ໂພຘິປກ຺ຂິຍຘມ຺ມາ ເອກໍ ອາຣມ຺ມຓໍ ປວິສນ຺ຕິ. ປສີທນ຺ຕີຕິ ຕສ຺ມິໍເຍວ ອາຣມ຺ມເຓ ປສາທມາປຊ຺ຊນ຺ຕິ. ອນຸປາທິເສສາຍາຕິ ອຸປາທິວິຣຫິຕາຍ.

ນິພ຺ພານຘາຕຸຍາຕິ ອມຕມຫານິພ຺ພານຘາຕຸຍາ. ອູນຕ຺ຕໍ ວາຕິ ເອຕ຺ຖ ອຸນຠາໂວ ອູນຕ຺ຕໍ, ອປຣິປຸຓ຺ຓຠາໂວຕິ ອຕ຺ໂຖ. ປຸຓ຺ຓຕ຺ຕໍ ວາຕິ ປຣິປຸຓ຺ຓຠາໂວ ປຸຓ຺ຓຕ຺ຕໍ, ປຸຓ຺ຓຠາໂວ ວາ ນ ປຎ຺ຎາຍຕິ ນຕ຺ຖີຕິ ອຕ຺ໂຖ.

ເນຣຍິການນ຺ຕິ ນິຣເຍ ນິພ຺ພຕ຺ຕນກກມ຺ມານໍ ອຕ຺ຖິຠາເວນ. ນິຣຍໍ ອຣຫນ຺ຕີຕິ ເນຣຍິກາ, ເຕສໍ ເນຣຍິການໍ. ນິຣໂຍ ຠວນນ຺ຕິ ນິຣໂຍ ເອວ ເຕສໍ ວສນຏ຺ຐານໍ ຆຣໍ. ຕິຣຈ຺ຉານໂຍນິການນ຺ຕິອາທີສຸປິ ເອເສວ ນໂຍ. ຕສ຺ເສສາ ສາມຄ຺ຄີຕິ ຕສ຺ສ ຂີຓາສວສ຺ສ ເອສາ ນິພ຺ພານສາມຄ຺ຄີ. ເອຕໍ ຉນ຺ນນ຺ຕິ ເອຕໍ ອນຸຈ຺ຉວິກໍ. ປຕິຣູປນ຺ຕິ ສທິສໍ ປຏິຠາຄໍ, ອສທິສໍ ອປ຺ປຏິຠາຄໍ ນ ໂຫຕິ. ອນຸຈ຺ຉວິກນ຺ຕິ ເອຕໍ ສມຓພ຺ຣາຫ຺ມຓານໍ ວາ ຘມ຺ມານໍ, ມຄ຺ຄຜລນິພ຺ພານສາສນຘມ຺ມານໍ ວາ ອນຸຈ຺ຉວິກໍ. ເຕສໍ ຉວິໍ ຉາຍໍ ສຸນ຺ທຣຠາວໍ ອນ຺ເວຕິ ອນຸຄຈ຺ຉຕິ, ອຖ ໂຂ ສນ຺ຕິກາວ ເຕຫິ ຘມ຺ເມຫິ ອນຸຈ຺ຉວິກຕ຺ຕາ ເອວ ຈ ອນຸໂລມໍ. ເຕສຎ຺ຈ ອນຸໂລເມຕິ, ອຖ ໂຂ ນ ວິໂລມໍ ນ ປຈ຺ຈນີກຠາເວ ຐິຕໍ.

໔໖. ອິທານິ ‘‘ໂຍ ອຕ຺ຕານໍ ຠວເນ ນ ທສ຺ສເຍ’’ຕິ ເອວໍ ຂີຓາສໂວ ວິຠາວິໂຕ, ຕສ຺ສ ວຓ຺ຓຠຓນຕ຺ຖໍ ອິໂຕ ປຣາ ຕິສ຺ໂສ ຄາຖາໂຍ ອາຫ. ຕຕ຺ຖ ປຐມຄາຖາຍ ສພ຺ພຕ຺ຖາຕິ ທ຺ວາທສສຸ ອາຍຕເນສຸ. ນ ປິຍໍ ກຸພ຺ພຕິ ໂນປິ ອປ຺ປິຍນ຺ຕິ ນິທ຺ເທເສ ປິຍາຕິ ຈິຕ຺ເຕ ປີຕິກຣາ. ເຕ ວິຠາຄໂຕ ທສ຺ເສນ຺ໂຕ ‘‘ກຕເມ ສຕ຺ຕາ ປິຍາ, ອິຘ ຍສ຺ສ ເຕ ໂຫນ຺ຕີ’’ຕິ ອາຫ. ຕຕ຺ຖ ຍສ຺ສ ເຕຕິ ເຍ ອສ຺ສ ເຕ. ໂຫນ຺ຕີຕິ ຠວນ຺ຕິ. ອຕ຺ຖກາມາຕິ ວຑ຺ຒິກາມາ. ຫິຕກາມາຕິ ສຸຂກາມາ. ຜາສຸກາມາຕິ ສຸຂວິຫາຣກາມາ. ໂຍຄກ຺ເຂມກາມາຕິ ຈຕູຫິ ໂຍເຄຫິ ເຂມໍ ນິພ຺ຠຍໍ ກາມາ. ມມາຍຕີຕິ ມາຕາ. ປິຍາຍຕີຕິ ປິຕາ. ຠຊຕີຕິ ຠາຕາ. ຠຄິນີຕິ ເອຕ຺ຖາປິ ເອເສວ ນໂຍ. ປຸໍ ຕາຍຕິ ຣກ຺ຂຕີຕິ ປຸຕ຺ໂຕ. ກຸລວໍສໍ ຘາເຣຕີຕິ ຘີຕາ. ມິຕ຺ຕາ ສຫາຍາ. ອມຈ຺ຈາ ຠຈ຺ຈາ. ຎາຕີ ປິຕຸປກ຺ຂິກາ. ສາໂລຫິຕາ ມາຕິປກ຺ຂິກາ. ອິເມ ສຕ຺ຕາ ປິຍາຕິ ອິເມ ສຕ຺ຕາ ປີຕິຊນກາ. ວຸຕ຺ຕວິປຣິຍາເຍນ ອປ຺ປິຍາ ເວທິຕພ຺ພາ.

໔໗. ຍທິທໍ ທິຏ຺ຐສຸຕມຸເຕສຸ ວາຕິ ເອຕ຺ຖ ປນ ຍທິທໍ ທິຏ຺ຐສຸຕໍ, ເອຕ຺ຖ ວາ ມຸເຕສຸ ວາ ຘມ຺ເມສຸ; ເອວໍ ມຸນິ ນ ອຸປລິມ຺ປຕີຕິ ເອວໍ ສມ຺ພນ຺ໂຘ ເວທິຕພ຺ໂພ.

ອຸທກເຖໂວຕິ ອຸທກສ຺ສ ເຖໂວ. ‘‘ອຸທກຕ຺ເຖວໂກ’’ຕິປິ ປາໂຐ. ປທຸມປຕ຺ເຕຕິ ປທຸມິນິປຕ຺ເຕ.

໔໘. ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕມຸເຕສຸ ວາຕິ ອຕ຺ຣາປິ ຍທິທໍ ທິຏ຺ຐສຸຕໍ, ເຕນ ວຕ຺ຖຸນາ ນ ມຎ຺ຎຕິ, ມຸເຕສຸ ວາ ຘມ຺ເມສຸ ນ ມຎ຺ຎຕີຕິ ເອວເມວ ສມ຺ພນ຺ໂຘ ເວທິຕພ຺ໂພ. ນ ຫິ ໂສ ຣຊ຺ຊຕິ, ໂນ ວິຣຊ຺ຊຕີຕິ ພາລປຸຖຸຊ຺ຊໂນ ວິຍ ນ ຣຊ຺ຊຕິ, ກລ຺ຍາຓປຸຖຸຊ຺ຊນເສກ຺ຂາ ວິຍ ນ ວິຣຊ຺ຊຕິ, ຣາຄສ຺ສ ຂີຓຕ຺ຕາ ‘‘ວິຣຕ຺ໂຕ’’ຕ຺ເວວ ສງ຺ຂໍ ຄຈ຺ຉຕິ. ເສສໍ ປາກຏເມວາຕິ.

ຕາຍ ປຎ຺ຎາຍ ກາຍທຸຈ຺ຈຣິຕນ຺ຕິ ສມ຺ປຍຸຕ຺ຕາຍ ປຸພ຺ພຠາຄາເຍວ ວາ ປຎ຺ຎາຍ ປຣິຄ຺ຄເຫຕພ຺ເພ ປຣິຄ຺ຄຓ຺ຫນ຺ໂຕ ໂຍຄີ ຕິວິຘໍ ກາຍທຸຈ຺ຈຣິຕໍ ສມຸຈ຺ເຉທວເສນ ຘຸນາຕິ. ອຍຎ຺ຈ ປຸຄ຺ຄໂລ ວິປນ຺ນຘມ຺ມໍ ເທສນາຘມ຺ເມສຸ ຘຸນນ຺ເຕສຸ ຕໍຘມ຺ມສມງ຺ຄີປຸຄ຺ຄໂລປິ ຘຸນາຕິ ນາມ. ເຕ ຈ ຘມ຺ເມ ປຎ຺ຎາຍ ອຕ຺ຕໂນ ປວຕ຺ຕິກ຺ຂເຓ ຘຸນິຕຸມາຣທ຺ໂຘ ຘຸຕາຕິ ວຸຈ຺ຈຕິ, ຍຖາ ຠຸຎ຺ຊິຕຸມາຣທ຺ໂຘ ຠຸຕ຺ໂຕຕິ ວຸຈ຺ຈຕິ. ລກ຺ຂຓໍ ປເນຕ຺ຖ ສທ຺ທສຕ຺ຖໂຕ ເວທິຕພ຺ພໍ. ຘຸຕນ຺ຕິ ກຕ຺ຕຸສາຘນໍ. ຘຸຕໍ ປຐມມຄ຺ເຄນ. ໂຘຕໍ ທຸຕິຍມຄ຺ເຄນ. ສນ຺ໂຘຕໍ ຕຕິຍມຄ຺ເຄນ. ນິທ຺ໂຘຕໍ ຈຕຸຕ຺ຖມຄ຺ເຄນ.

ໂຘໂນ ທິຏ຺ຐໍ ນ ມຎ຺ຎຕີຕິ ອຣຫາ ມໍສຈກ຺ຂຸນາ ທິຏ຺ຐໍ ທິພ຺ພຈກ຺ຂຸນາ ທິຏ຺ຐໍ ຣູປາຍຕນໍ ນ ມຎ຺ຎຕິ ຕີຫິ ມຎ຺ຎນາຫິ, ກຖໍ? ຣູປາຍຕນໍ ສຸຠສຎ຺ຎາຍ ສຸຂສຎ຺ຎາຍ ຈ ປສ຺ສນ຺ໂຕ ນ ຕຕ຺ຖ ຉນ຺ທຣາຄໍ ຊເນຕິ ນ ຕໍ ອສ຺ສາເທຕິ ນາຠິນນ຺ທຕິ, ເອວໍ ທິຏ຺ຐໍ ຕຓ຺ຫາມຎ຺ຎນາຍ ນ ມຎ຺ຎຕິ. ‘‘ອິຕິ ເມ ຣູປໍ ສິຍາ ອນາຄຕມທ຺ຘານ’’ນ຺ຕິ ວາ ປເນຕ຺ຖ ນນ຺ທິໍ ນ ສມນ຺ນາເນຕິ. ຣູປສມ຺ປທໍ ວາ ອາກງ຺ຂມາໂນ ທານໍ ນ ເທຕິ, ສີລໍ ນ ສມາທິຍຕິ, ອຸໂປສຖກມ຺ມໍ ນ ກໂຣຕິ. ເອວມ຺ປິ ທິຏ຺ຐໍ ຕຓ຺ຫາມຎ຺ຎນາຍ ນ ມຎ຺ຎຕິ, ອຕ຺ຕໂນ ປນ ປຣສ຺ສ ຈ ຣູປສມ຺ປຕ຺ຕິວິປຕ຺ຕິໍ ນິສ຺ສາຍ ມານໍ ນ ຊເນຕິ. ‘‘ອິມິນາຫໍ ເສຍ຺ໂຍສ຺ມີຕິ ວາ, ສທິໂສສ຺ມີຕິ ວາ, ຫີໂນສ຺ມີຕິ ວາ’’ຕິ ເອວໍ ທິຏ຺ຐໍ ມານມຎ຺ຎນາຍ ນ ມຎ຺ຎຕິ. ຣູປາຍຕນໍ ປນ ‘‘ນິຈ຺ຈໍ ຘຸວໍ ສສ຺ສຕ’’ນ຺ຕິ ນ ມຎ຺ຎຕິ. ອຕ຺ຕານໍ ‘‘ອຕ຺ຕນິຍ’’ນ຺ຕິ ນ ມຎ຺ຎຕິ. ມງ຺ຄລໍ ‘‘ອມງ຺ຄລ’’ນ຺ຕິ ນ ມຎ຺ຎຕິ. ເອວໍ ທິຏ຺ຐໍ ທິຏ຺ຐິມຎ຺ຎນາຍ ນ ມຎ຺ຎຕິ. ທິຏ຺ຐສ຺ມິໍ ນ ມຎ຺ຎຕີຕິ ຣູປສ຺ມິໍ ອຕ຺ຕານໍ ສມນຸປສ຺ສນນເຍນ ອມຎ຺ຎນ຺ໂຕ ທິຏ຺ຐສ຺ມິໍ ນ ມຎ຺ຎຕິ. ຍຖາ ວາ ຖເນ ຖຎ຺ຎໍ, ເອວໍ ຣູປສ຺ມິໍ ຣາຄາທໂຍຕິ ອມຎ຺ຎນ຺ໂຕປິ ທິຏ຺ຐສ຺ມິໍ ນ ມຎ຺ຎຕິ. ຕສ຺ມິໍເຍວ ປນສ຺ສ ທິຏ຺ຐິມຎ຺ຎນາຍ ອມຎ຺ຎິເຕ ວຕ຺ຖຸສ຺ມິໍ ສິເນຫໍ ມານຎ຺ຈ ນ ອຸປ຺ປາທຍໂຕ ຕຓ຺ຫາມານມຎ຺ຎນາປິ ນຕ຺ຖີຕິ ເວທິຕພ຺ພາ. ເອວໍ ທິຏ຺ຐສ຺ມິໍ ນ ມຎ຺ຎຕິ. ທິຏ຺ຐໂຕ ນ ມຎ຺ຎຕີຕິ ເອຕ຺ຖ ປນ ທິຏ຺ຐໂຕຕິ ນິສ຺ສກ຺ກວຈນໍ. ຕສ຺ມາ ສອຸປກາຣຓສ຺ສ ອຕ຺ຕໂນ ວາ ປຣສ຺ສ ວາ ຍຖາວຸຕ຺ຕປ຺ປເຠທໂຕ ທິຏ຺ຐໂຕ ອຸປປຕ຺ຕິ ວາ ນິຄ຺ຄມນໍ ວາ ທິຏ຺ຐໂຕ ວາ ອຎ຺ໂຎ ອຕ຺ຕາຕິ ອມຎ຺ຎມາໂນ ທິຏ຺ຐໂຕ ນ ມຎ຺ຎຕີຕິ ເວທິຕພ຺ໂພ. ອຍມສ຺ສ ນ ທິຏ຺ຐິມຎ຺ຎນາ. ຕສ຺ມິໍເຍວ ປນສ຺ສ ທິຏ຺ຐິມຎ຺ຎນາຍ ອມຎ຺ຎິເຕ ວຕ຺ຖຸສ຺ມິໍ ສິເນຫໍ ມານຎ຺ຈ ນ ອຸປ຺ປາທຍໂຕ ນ ຕຓ຺ຫາມານມຎ຺ຎນາປິ ເວທິຕພ຺ພາ.

ທິຏ຺ຐາ ເມຕິ ນ ມຎ຺ຎຕີຕິ ເອຕ຺ຖ ປນ ‘‘ເອຕໍ ມມາ’’ຕິ ຕຓ຺ຫາວເສນ ອມມາຍມາໂນ ທິຏ຺ຐໍ ຕຓ຺ຫາມຎ຺ຎນາຍ ນ ມຎ຺ຎຕິ. ສຸຕນ຺ຕິ ມໍສໂສເຕນປິ ສຸຕໍ, ທິພ຺ພໂສເຕນປິ ສຸຕໍ, ສທ຺ທາຍຕນສ຺ເສຕໍ ອຘິວຈນໍ. ມຸຕນ຺ຕິ ມຸຕ຺ວາ ມຸນິຕ຺ວາ ຈ ຄຫິຕໍ ອາຫຈ຺ຈ ອຸປຄນ຺ຕ຺ວາຕິ ອຕ຺ໂຖ. ອິນ຺ທ຺ຣິຍານໍ ອາຣມ຺ມຓານຎ຺ຈ ອຎ຺ຎມຎ຺ຎໍ ສໍກິເລເສ ວິຎ຺ຎາຕນ຺ຕິ ວຸຕ຺ຕໍ ໂຫຕິ. ຄນ຺ຘຣສໂຜຏ຺ຐພ຺ພາຍຕນານໍ ເອຕໍ ອຘິວຈນໍ. ວິຎ຺ຎາຕນ຺ຕິ ມນສາ ວິຎ຺ຎາຕໍ, ເສສານໍ ສຕ຺ຕານໍ ອາຍຕນານເມຕໍ ອຘິວຈນໍ, ຘມ຺ມາຣມ຺ມຓສ຺ສ ວາ, ອິຘ ປນ ສກ຺ກາຍປຣິຍາປນ຺ນເມວ ລພ຺ຠຕິ. ວິຕ຺ຖາໂຣ ປເນຕ຺ຖ ທິຏ຺ຐວາເຣ ວຸຕ຺ຕນເຍນ ເວທິຕພ຺ໂພ.

ອິທານິ ຠຄວຕາ ວຸຕ຺ຕສຸຕ຺ຕວເສນ ທສ຺ເສນ຺ໂຕ ‘‘ອສ຺ມີຕິ ຠິກ຺ຂເວ’’ຕິອາທິມາຫ. ຕຕ຺ຖ ອສ຺ມີຕິ ຠວາມິ, ນິຈ຺ຈສ຺ເສຕໍ ອຘິວຈນໍ. ມຎ຺ຎິຕເມຕນ຺ຕິ ທິຏ຺ຐິກປ຺ປນໍ ເອຕໍ. ອຍມຫມສ຺ມີຕິ ອຍໍ ອຫໍ ອສ຺ມິ ຠວາມິ.

ອຎ຺ຎຕ຺ຣ ສຕິປຏ຺ຐາເນຫີຕິ ຐເປຕ຺ວາ ຈຕຸສຕິປຏ຺ຐາເນ.

ສພ຺ເພ ພາລປຸຖຸຊ຺ຊນາ ຣຊ຺ຊນ຺ຕີຕິ ສກລາ ອນ຺ຘພາລາ ນານາຊນາ ລຄ຺ຄນ຺ຕິ. ສຕ຺ຕ ເສກ຺ຂາ ວິຣຊ຺ຊນ຺ຕີຕິ ໂສຕາປນ຺ນາທໂຍ ສຕ຺ຕ ອຣິຍຊນາ ວິຣາຄໍ ອາປຊ຺ຊນ຺ຕິ. ອຣຫາ ເນວ ຣຊ຺ຊຕິ ໂນ ວິຣຊ຺ຊຕີຕິ ກິເລສານໍ ປຣິນິພ຺ພາປິຕຕ຺ຕາ ອຸຠຍມ຺ປິ ນ ກໂຣຕິ. ຂຍາ ຣາຄສ຺ສາຕິອາທໂຍ ຕິວິຘາປິ ນິພ຺ພານເມວ.

ສທ຺ຘມ຺ມປ຺ປຊ຺ໂຊຕິກາຍ ມຫານິທ຺ເທສຏ຺ຐກຖາຍ

ຊຣາສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.