໑໓. ມຫາພ຺ຍູຫສຸຕ຺ຕນິທ຺ເທສວຓ຺ຓນາ

໑໓໐. ເຕຣສເມ ມຫາພ຺ຍູຫສຸຕ຺ຕນິທ຺ເທເສ ເຍ ເກຈິເມ ທິຏ຺ຐິປຣິພ຺ພສານາຕິ ອິທມ຺ປິ ‘‘ກິໍ ນຸ ໂຂ ອິເມ ທິຏ຺ຐິປຣິພ຺ພສານາ ວິຎ຺ຎູນໍ ສນ຺ຕິກາ ນິນ຺ທເມວ ລຠນ຺ຕິ, ອຸທາຫຸ ປສໍສມ຺ປີ’’ຕິ ອຸປ຺ປນ຺ນຈິຕ຺ຕານໍ ເອກຈ຺ຈານໍ ເທວຕານໍ ຕມຕ຺ຖໍ ອາວິກາຕຸໍ ປຸຣິມນເຍເນວ ນິມ຺ມິຕພຸທ຺ເຘນ ອຕ຺ຕານໍ ປຸຈ຺ຉາເປຕ຺ວາ ວຸຕ຺ຕໍ. ຕຕ຺ຖ ອນ຺ວານຍນ຺ຕີຕິ ອນຸ ອານຍນ຺ຕິ ປຸນປ຺ປຸນໍ ອາຫຣນ຺ຕິ.

ນິນ຺ທເມວ ອນ຺ເວນ຺ຕີຕິ ຄຣຫເມວ ອຸປຄຈ຺ຉນ຺ຕິ.

໑໓໑. ອິທານິ ຍສ຺ມາ ເຕ ‘‘ອິທເມວ ສຈ຺ຈ’’ນ຺ຕິ ວທນ຺ຕາປິ ທິຏ຺ຐິຄຕິກວາທິໂນ ກທາຈິ ກຕ຺ຖຈິ ປສໍສມ຺ປິ ລຠນ຺ຕິ, ຍໍ ເອຕໍ ປສໍສາສງ຺ຂາຕໍ ວາທຜລໍ, ຕໍ ອປ຺ປໍ, ຣາຄາທີນໍ ສມາຍ ສມຕ຺ຖໍ ນ ໂຫຕິ, ໂກ ປນ ວາໂທ ທຸຕິເຍ ນິນ຺ທາຜເລ, ຕສ຺ມາ ເອຕມຕ຺ຖໍ ທສ຺ເສນ຺ໂຕ ອິມໍ ຕາວ ວິສ຺ສຊ຺ຊນຄາຖໍ ອາຫ ‘‘ອປ຺ປຎ຺ຫິ ເອຕໍ ນ ອລໍ ສມາຍ, ທຸເວ ວິວາທສ຺ສ ຜລານິ ພ຺ຣູມີ’’ຕິ. ຕຕ຺ຖ ທຸເວ ວິວາທສ຺ສ ຜລານີຕິ ນິນ຺ທາ ຈ ປສໍສາ ຈ ຊຍປຣາຊຍາທີນິ ວາ ຕໍສຠາຄານິ. ເອຕມ຺ປິ ທິສ຺ວາຕິ ‘‘ນິນ຺ທາ ອນິຏ຺ຐາ ເອວ, ປສໍສາ ນາລໍ ສມາຍາ’’ຕິ ເອຕມ຺ປິ ວິວາທຜເລ ອາທີນວໍ ທິສ຺ວາ. ເຂມາຠິປສ຺ສໍ ອວິວາທຠູມິນ຺ຕິ ອວິວາທຠູມິໍ ນິພ຺ພານໍ ເຂມນ຺ຕິ ປສ຺ສມາໂນ.

ອປ຺ປກນ຺ຕິ ມນ຺ທໍ. ປຣິຕ຺ຕກນ຺ຕິ ໂຖກໍ. ໂອມກນ຺ຕິ ເຫຏ຺ຐິມກໍ. ລາມກນ຺ຕິ ປາປກໍ. ສມາຍາຕິ ຣາຄາທີນໍ ສມນຕ຺ຖາຍ. ອຸປສມາຍາຕິ ອຸປຣູປຣິ ສມນຕ຺ຖາຍ. ວູປສມາຍາຕິ ສນ຺ນິສີທາປນຕ຺ຖາຍ. ນິພ຺ພານາຍາຕິ ອມຕມຫານິພ຺ພານຕ຺ຖາຍ. ປຏິນິສ຺ສຄ຺ຄາຍາຕິ ມຄ຺ເຄນ ກິເລສານໍ ນິສ຺ສຊ຺ຊນຕ຺ຖາຍ. ປຏິປສ຺ສທ຺ຘິຍາຕິ ຜເລນ ປຏິປສ຺ສທ຺ຘານໍ ອນຸປ຺ປຊ຺ຊນຕ຺ຖາຍ ນາລໍ.

໑໓໒. ເອວຎ຺ຫິ ອວິວາທມາໂນ – ຍາ ກາຈິມາຕິ ຄາຖາ. ຕຕ຺ຖ ສມ຺ມຸຕິໂຍຕິ ທິຏ຺ຐິໂຍ. ປຸຖຸຊ຺ຊາຕິ ປຸຖຸຊ຺ຊນສມ຺ຠວາ. ໂສ ອຸປຍໍ ກິເມຍ຺ຍາຕິ ໂສ ອຸປຄນ຺ຕພ຺ພຏ຺ເຐນ ອຸປຍໍ ຣູປາທີສຸ ເອກມ຺ປິ ຘມ຺ມໍ ກິໍ ອຸເປຍ຺ຍ, ເກນ ວາ ກາຣເຓນ ອຸເປຍ຺ຍ. ທິຏ຺ເຐ ສຸເຕ ຂນ຺ຕິມກຸພ຺ພມາໂນຕິ ທິຏ຺ຐສຸຕສຸທ຺ຘີສຸ ເປມໍ ອກໂຣນ຺ໂຕ.

ປຸຖຸຊ຺ຊເນຫິ ຊນິຕາຕິ ປຸຖຸຊ຺ຊເນຫິ ອຸປ຺ປາທິຕາ. ສມ຺ມຸຕິໂຍຕິ ທິຏ຺ຐິໂຍ. ປຸຖຸ ນານາຊເນຫິ ຊນິຕາ ວາຕິ ອເນກວິເຘຫິ ທິຏ຺ຐິຄຕິເກຫິ ອຸປ຺ປາທິຕາ ວາ. ເນຕີຕິ ນ ເອຕິ. ນ ອຸເປຕີຕິ ສມີປໍ ນ ເອຕິ. ນ ອຸປຄຈ຺ຉຕີຕິ ນິວຕ຺ຕຕິ. ນາຠິນິວິສຕີຕິ ປວິສິຕ຺ວາ ນປ຺ປຕິຏ຺ຐຕິ.

໑໓໓. ອິໂຕ ພາຫິຣາ ປນ – ສີລຸຕ຺ຕມາຕິ ຄາຖາ ຕສ຺ສຕ຺ໂຖ – ສີລໍເຍວ ‘‘ອຸຕ຺ຕມ’’ນ຺ຕິ ມຎ຺ຎມານາ ສີລຸຕ຺ຕມາຕິ ເອເກ ໂຠນ຺ໂຕ ສໍຍມມຕ຺ເຕນ ສຸທ຺ຘິໍ ວທນ຺ຕິ, ຫຕ຺ຖິວຕາທິຎ຺ຈ ວຕໍ ສມາທາຍ ອຸປຏ຺ຐິຕາເສ. ອິເຘວ ທິຏ຺ຐິຍໍ ອສ຺ສ ສຕ຺ຖຸໂນ ສຸທ຺ຘິໍ ຠວູປນີຕາ ຠວຊ຺ໂຌສິຕາ ສມານາ ວທນ຺ຕິ, ອປິ ຈ ເຕ ກຸສລາວທານາ ‘‘ກຸສລາ ມຍ’’ນ຺ຕິ ເອວໍວາທາ.

໑໓໔. ເອວໍ ສີລຸຕ຺ຕເມສຸ ຈ ເຕສຸ ຕຖາ ປຏິປນ຺ໂນ ໂຍ ໂກຈິ – ສເຈ ຈຸໂຕຕິ ຄາຖາ. ຕສ຺ສຕ຺ໂຖ – ສເຈ ຕໂຕ ສີລວຕໂຕ ປຣວິຈ຺ຉິນ຺ທເນນ ວາ ອນຠິສມ຺ຠຸຓນ຺ໂຕ ວາ ຈຸໂຕ ໂຫຕິ, ໂສ ຕໍ ສີລພ຺ພຕກມ຺ມໍ ປຸຎ຺ຎາຠິສງ຺ຂາຣາທິກມ຺ມໍ ວາ ວິຣາຘຍິຕ຺ວາ ເວຘຕີ. ນ ເກວລຎ຺ຈ ເວຘຕິ, ອປິ ຈ ໂຂ ຕໍ ສີລພ຺ພຕສຸທ຺ຘິໍ ປຊປ຺ປຕີ ຈ ວິປ຺ປລປຕິ ຈ ປຕ຺ຖຍຕີ ຈ. ກິມິວ? ສຕ຺ຖາວ ຫີໂນ ປວສໍ ຆຣມ຺ຫາ, ຆຣມ຺ຫາ ປວສນ຺ໂຕ ສຕ຺ຖໂຕ ຫີໂນ ຍຖາ ຕໍ ຆຣໍ ວາ ສຕ຺ຖໍ ວາ ປຕ຺ຖຍຕີຕິ.

ປຣວິຈ຺ຉິນ຺ທນາຍ ວາຕິ ປເຣນ ວາຣິຍມາໂນ ວາ. ອນຠິສມ຺ຠຸຓນ຺ໂຕ ວາຕິ ຕໍ ປຏິປຕ຺ຕິໍ ອສມ຺ປາເທນ຺ໂຕ ວາ.

ອຎ຺ຎາຍ ອປຣທ຺ໂຘຕິ ນິພ຺ພາເນນ ປຣິຫີໂນ ມຄ຺ຄໂຕ ວາ. ຕໍ ວາ ສຕ຺ຖໍ ອນຸພນ຺ຘຕີຕິ ຕໍ ວາ ສຕ຺ຖໍ ສພ຺ພຕ຺ຖ ປຈ຺ຉໂຕ ຄຈ຺ຉຕິ.

໑໓໕. ເອວໍ ປນ ສີລຸຕ຺ຕມານໍ ປເວຘນກາຣຓໍ ອຣິຍສາວໂກ ສີລພ຺ພຕໍ ວາປິ ປຫາຍ ສພ຺ພນ຺ຕິ ຄາຖາ. ຕຕ຺ຖ ສາວຊ຺ຊານວຊ຺ຊນ຺ຕິ ສພ຺ພາກຸສລໍ ໂລກິຍກຸສລຎ຺ຈ. ເອຕໍ ສຸທ຺ຘິໍ ອສຸທ຺ຘິນ຺ຕິ ອປຕ຺ຖຍາໂນຕິ ປຎ຺ຈກາມຄຸຓາທິເຠທໍ ສຸທ຺ຘິໍ ອກຸສລາທິເຠທໍ ອສຸທ຺ຘິຎ຺ຈ ອປຕ຺ຖຍມາໂນ. ວິຣໂຕ ຈເຣຕິ ສຸທ຺ຘິຍາ ອສຸທ຺ຘິຍາ ຈ ວິຣໂຕ ຈເຣຍ຺ຍ. ສນ຺ຕິ ມນຸຄ຺ຄຫາຍາຕິ ທິຏ຺ຐິໍ ອຄ຺ຄເຫຕ຺ວາ.

ກຓ຺ຫໍ ກຓ຺ຫວິປາກນ຺ຕິ ອກຸສລກມ຺ມໍ ອກຸສລວິປາກທາຍກໍ. ສຸກ຺ກໍ ສຸກ຺ກວິປາກນ຺ຕິ ໂລກິຍກຸສລໍ ອຕ຺ຕນາ ສທິສໍ ສຸກ຺ກວິປາກທາຍກໍ.

ນິຍາມາວກ຺ກນ຺ຕິນ຺ຕິ ມຄ຺ຄປວິສນໍ. ເສກ຺ຂາຕິ ສຕ຺ຕ ເສກ຺ຂາ. ອຄ຺ຄຘມ຺ມນ຺ຕິ ອຸຕ຺ຕມຘມ຺ມໍ, ອຣຫຕ຺ຕຜລໍ.

໑໓໖. ເອວໍ ອິໂຕ ພາຫິຣເກ ສີລຸຕ຺ຕເມ ສໍຍເມນ ວິສຸທ຺ຘິວາເທ ເຕສຎ຺ຈ ວິປາກໍ ສີລພ຺ພຕປຫາຍິໂນ ອຣຫໂຕ ຈ ປຏິປຕ຺ຕິໍ ທສ຺ເສຕ຺ວາ ອິທານິ ອຎ຺ຎຖາປິ ສຸທ຺ຘິວາເທ ພາຫິຣເກ ທສ຺ເສນ຺ໂຕ ‘‘ຕມູປນິສ຺ສາຍາ’’ຕິ ຄາຖມາຫ. ຕສ຺ສຕ຺ໂຖ – ສນ຺ຕຎ຺ເຎປິ ສມຓພ຺ຣາຫ຺ມຓາ, ເຕ ຊິຄຸຈ຺ຉິຕໍ ອມຣນ຺ຕປໍ ວາ ທິຏ຺ຐສຸທ຺ຘິອາທີສຸ ວາ ອຎ຺ຎຕຣຎ຺ຎຕຣໍ ອຸປນິສ຺ສາຍອກິຣິຍທິຏ຺ຐິຍາ ວາ ອຸທ຺ຘໍສຣາ ຫຸຕ຺ວາ ຠວາຠເວສຸ ອວີຕຕຓ຺ຫາ ສຸທ຺ຘິ’ມນຸຕ຺ຖຸນນ຺ຕິ ວທນ຺ຕິ ກເຖນ຺ຕີຕິ.

ຕໂປຊິຄຸຈ຺ຉວາທາຕິ ກາຍປີຬນາທິຕເປນ ປາປຫິຣີຍນວາທາ. ຕໂປຊິຄຸຈ຺ຉສາຣາຕິ ເຕເນວ ຕເປນ ຫິຣີຍນສາຣວນ຺ໂຕ. ອຸທ຺ຘໍສຣາວາທາຕິ ສໍສາເຣນ ສຸທ຺ຘິໍ ກຖຍນ຺ຕາ.

໑໓໗. ເອວໍ ເຕສໍ ອວີຕຕຓ຺ຫານໍ ສຸທ຺ຘິໍ ອນຸຕ຺ຖຸນນ຺ຕານໍ ໂຍປິ ສຸທ຺ຘິປ຺ປຕ຺ຕເມວ ອຕ຺ຕານໍ ມຎ຺ເຎຍ຺ຍ, ຕສ຺ສາປິ ອວີຕຕຓ຺ຫຕ຺ຕາ ຠວາຠເວສຸ ຕໍ ຕໍ ວຕ຺ຖຸໍ ປຕ຺ຖຍມານສ຺ສ ຫິ ຊປ຺ປິຕານິ ປຸນປ຺ປຸນໍ ໂຫນ຺ຕິເຍວາຕິ ອຘິປ຺ປາໂຍ. ຕຓ຺ຫາ ຫິ ອາເສວິຕາ ຕຓ຺ຫໍ ວຑ຺ຒຍເຕວ, ນ ເກວລຎ຺ຈ ຊປ຺ປິຕານິ, ປເວຘິຕໍ ວາປິ ປກປ຺ປິເຕສຸ, ຕຓ຺ຫາທິຏ຺ຐີຫິ ຈສ຺ສ ປກປ຺ປິເຕສຸ ວຕ຺ຖູສຸ ປເວຘິຕມ຺ປິ ໂຫຕີຕິ ວຸຕ຺ຕໍ ໂຫຕິ. ຠວາຠເວສຸ ປນ ວີຕຕຓ຺ຫຕ຺ຕາ ອາຍຕິໍ ຈຸຕູປປາໂຕ ອິຘ ຍສ຺ສ ນຕ຺ຖິ, ສ ເກນ ເວເຘຍ຺ຍ ກຸຫິໍ ວ ຊປ຺ເປຕິ ອຍເມຕິສ຺ສາ ຄາຖາຍ ສມ຺ພນ຺ໂຘ.

ອາຄມນນ຺ຕິ ປຸນ ອາຄມນໍ. ຄມນນ຺ຕິ ອິໂຕ ອຎ຺ຎຕ຺ຖ ຄມນໍ. ຄມນາຄມນນ຺ຕິ ອິໂຕ ຄນ຺ຕ຺ວາ ປຸນ ນິວຕ຺ຕນໍ. ກາລນ຺ຕິ ມຣຓໍ. ຄຕີຕິ ຄມນວເສນ ຄຕິຍາ ຄນ຺ຕພ຺ພໍ.

໑໓໘. ຍມາຫຸ ຘມ຺ມນ຺ຕິ ປຸຈ຺ຉາຄາຖາ.

໑໓໙. ອິທານິ ຍສ຺ມາ ເອໂກປິ ເອຕ຺ຖ ວາໂທ ສຈ຺ໂຈ ນຕ຺ຖິ, ເກວລໍ ທິຏ຺ຐິມຕ຺ຕເກນ ຫິ ເຕ ວທນ຺ຕິ, ຕສ຺ມາ ຕມຕ຺ຖໍ ທສ຺ເສນ຺ໂຕ ‘‘ສກໍ ຫີ’’ຕິ ອິມໍ ຕາວ ວິສ຺ສຊ຺ຊນຄາຖມາຫ. ຕຕ຺ຖ ສມ຺ມຸຕິນ຺ຕິ ທິຏ຺ຐິໍ. ອໂນມນ຺ຕິ ອນູນໍ.

໑໔໐. ເອວເມເຕສຸ ສກໍ ຘມ຺ມໍ ປຣິປຸຓ຺ຓໍ ພ຺ຣູວນ຺ເຕສຸ ອຎ຺ຎສ຺ສ ຘມ຺ມໍ ປນ ຫີນນ຺ຕິ ວທນ຺ເຕສຸ ຍສ຺ສ ກສ຺ສຈິ – ປຣສ຺ສ ເຈ ວມ຺ຠຍິເຕນ ຫີໂນຕິ ຄາຖາ. ຕສ຺ສຕ຺ໂຖ – ຍທິ ປຣສ຺ສ ນິນ຺ທິຕກາຣຓາ ຫີໂນ ຠເວຍ຺ຍ, ນ ໂກຈິ ຘມ຺ເມສຸ ວິເສສິ ອຄ຺ໂຄ ຠເວຍ຺ຍ. ກິໍກາຣຓາ? ປຸຖູ ຫິ ອຎ຺ຎສ຺ສ ວທນ຺ຕິ ຘມ຺ມໍ ນິຫີນໂຕ ສພ຺ເພວ ເຕ ສມ຺ຫິ ທຬ຺ຫໍ ວທານາສກຘມ຺ເມ ທຬ຺ຫວາທາ ເອວ.

ວມ຺ຠຍິຕກາຣຓາຕິ ຘໍສິຕກາຣຓາ. ຄຣຫິຕກາຣຓາຕິ ລາມກກຕກາຣຓາ. ອຸປວທິຕກາຣຓາຕິ ອກ຺ໂກສິຕກາຣຓາ. ສກາຍນນ຺ຕິ ສກມຄ຺ຄໍ.

໑໔໑. ກິຎ຺ຈ ຠິຍ຺ໂຍ – ສທ຺ຘມ຺ມປູຊາຕິ ຄາຖາ. ຕສ຺ສຕ຺ໂຖ – ເຕ ຈ ຕິຕ຺ຖິຍາ ຍຖາ ປສໍສນ຺ຕິ ສກາຍນານິ, ສທ຺ຘມ຺ມປູຊາປິ ເນສໍ ຕເຖວ ວຕ຺ຕຕິ. ເຕ ຫິ ອຕິວິຍ ສຕ຺ຖາຣາທີນິ ສຕ຺ຕໂຣນ຺ຕິ. ຕຕ຺ຖ ຍທິ ເຕ ປມາຓາ ສິຍຸໍ, ເອວໍ ສນ຺ເຕ ສພ຺ເພວ ວາທາ ຕຖິຍາ ຠເວຍ຺ຍຸໍ. ກິໍກາຣຓາ? ສຸທ຺ຘີ ຫິ ເນສໍ ປຈ຺ຈຕ຺ຕເມວ. ນ ສາ ອຎ຺ຎຕ຺ຖ ສິຊ຺ຌຕິ, ນາປິ ປຣມຕ຺ຖໂຕ. ອຕ຺ຕນິ ທິຏ຺ຐິຄາຫມຕ຺ຕເມວ ຫິ ຕໍ ເຕສໍ ປຣປຈ຺ຈຍເນຍ຺ຍພຸທ຺ຘີນໍ. ປຈ຺ຈຕ຺ຕເມວາຕິ ປາເຏກ຺ກເມວ.

໑໔໒. ໂຍ ປນ ວິປຣີຕໂຕ ພາຫິຕປາປຕ຺ຕາ ພ຺ຣາຫ຺ມໂຓ, ຕສ຺ສ ນ ພ຺ຣາຫ຺ມຓສ຺ສ ປຣເນຍ຺ຍມຕ຺ຖີຕິ ຄາຖາ. ຕສ຺ສຕ຺ໂຖ – ພ຺ຣາຫ຺ມຓສ຺ສ ຫິ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິອາທິນາ ນເຍນ ສຸທິຏ຺ຐຕ຺ຕາ ປເຣນ ເນຕພ຺ພໍ ຎາຓໍ ນຕ຺ຖິ. ທິຏ຺ຐິຘມ຺ເມສຸ ‘‘ອິທເມວ ສຈ຺ຈ’’ນ຺ຕິ ນິຈ຺ຉິນິຕ຺ວາ ສຸມຄ຺ຄຫີຕມ຺ປິ ນຕ຺ຖິ. ຕໍກາຣຓາ ໂສ ທິຏ຺ຐິກລຫານິ ອຕິກ຺ກນ຺ໂຕ, ນ ຫິ ໂສ ເສຏ຺ຐໂຕ ປສ຺ສຕິ ຘມ຺ມມຎ຺ຎໍ ອຎ຺ຎຕ຺ຣ ສຕິປຏ຺ຐານາທີຫິ.

ນ ປຣເນຍ຺ໂຍຕິ ປເຣນ ເນຕພ຺ໂພ ຊານາເປຕພ຺ໂພ ນ ໂຫຕິ. ນ ປຣປຕ຺ຕິໂຍ ນ ປຣປຈ຺ຈໂຍຕິ ປເຣສໍ ປຈ຺ເຈຕພ຺ໂພ ນ ໂຫຕິ. ນ ປຣປຏິພທ຺ຘຄູຕິ ປເຣສໍ ປຏິພທ຺ຘຄມໂນ ນ ໂຫຕິ.

໑໔໓. ຊານາມີຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ເອວໍ ຕາວ ປຣມຕ຺ຖພ຺ຣາຫ຺ມໂຓ ນ ຫິ ເສຏ຺ຐໂຕ ປສ຺ສຕິ ຘມ຺ມມຎ຺ຎໍ, ອຎ຺ເຎ ປນ ຕິຕ຺ຖິຍາ ປຣຈິຕ຺ຕຎາຓາທີຫິ ຊານນ຺ຕາປິ ປສ຺ສນ຺ຕາປິ ‘‘ຊານາມິ ປສ຺ສາມິ ຕເຖວ ເອຕ’’ນ຺ຕິ ເອວໍ ວທນ຺ຕາປິ ຈ ທິຏ຺ຐິຍາ ສຸທ຺ຘິໍ ປຈ຺ເຈນ຺ຕິ. ກສ຺ມາ? ຍສ຺ມາ ເຕສຸ ເອໂກປິ ອທກ຺ຂິ ເຈ ອທ຺ທສ ເຈປິ ເຕນ ປຣຈິຕ຺ຕຎາຓາທິນາ ຍຖາຠູຕມຕ຺ຖໍ, ກິຎ຺ຫິ ຕຸມສ຺ສ ເຕນ ຕສ຺ສ ເຕນ ທສ຺ສເນນ ກິໍ ກຕໍ, ກິໍ ທຸກ຺ຂປຣິຎ຺ຎາ ສາຘິຕາ, ອຸທາຫຸ ສມຸທຍປ຺ປຫານາທີນໍ ອຎ຺ຎຕຣໍ, ຍໂຕ ສພ຺ພຖາປິ ອຕິກ຺ກມິຕ຺ວາ ອຣິຍມຄ຺ຄໍ ເຕ ຕິຕ຺ຖິຍາ ອຎ຺ເຎເນວ ວທນ຺ຕິ ສຸທ຺ຘິໍ, ອຕິກ຺ກມິຕ຺ວາ ວາ ເຕ ຕິຕ຺ຖິເຍ ພຸທ຺ຘາທໂຍ ອຎ຺ເຎເນວ ວທນ຺ຕິ ສຸທ຺ຘິນ຺ຕິ.

໑໔໔. ປສ຺ສໍ ນໂຣຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ກິຎ຺ຈ ຠິຍ຺ໂຍ? ຍ຺ວາຍໍ ປຣຈິຕ຺ຕຎາຓາທີຫິ ອທ຺ທກ຺ຂິ, ໂສ ປສ຺ສໍ ນໂຣ ທກ຺ຂຕິ ນາມຣູປໍ, ນ ຕໂຕ ປຣໍ, ທິສ຺ວານ ວາ ຎສ຺ສຕິ ຕານິເມວ ນາມຣູປານິ ນິຈ຺ຈໂຕ ສຸຂໂຕ ວາ, ນ ອຎ຺ຎຖາ; ໂສ ເອວໍ ປສ຺ສນ຺ໂຕ ກາມໍ ພຫຸໍ ປສ຺ສຕຸ ອປ຺ປກໍ ວາ ນາມຣູປໍ ນິຈ຺ຈໂຕ ສຸຂໂຕ ຈ ອຖສ຺ສ ເອວຣູເປນ ທສ຺ສເນນ ນ ຫິ ເຕນ ສຸທ຺ຘິໍ ກຸສລາ ວທນ຺ຕິ.

໑໔໕. ນິວິສ຺ສວາທີຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ເຕນ ຈ ທສ຺ສເນນ ສຸທ຺ຘິຍາ ອສຕິຍາປິ ໂຍ ‘‘ຊານາມິ ປສ຺ສາມິ ຕເຖວ ເອຕ’’ນ຺ຕິ ເອວໍ ນິວິສ຺ສວາທີ, ເອຕໍ ວາ ທສ຺ສນໍ ປຏິຈ຺ຈ ທິຏ຺ຐິຍາ ສຸທ຺ຘິໍ ປຈ຺ເຈນ຺ໂຕ ‘‘ອິທເມວ ສຈ຺ຈ’’ນ຺ຕິ ເອວໍ ນິວິສ຺ສວາທີ, ໂສ ສຸພ຺ພິນໂຍ ນ ໂຫຕິ ຕໍ ຕຖາ ປກປ຺ປິຕໍ ອຠິສງ຺ຂຕໍ ທິຏ຺ຐິໍ ປຸຣກ຺ຂຣາໂນ. ໂສ ຫິ ຍໍ ສຕ຺ຖາຣາທິໍ ນິສ຺ສິໂຕ, ຕຕ຺ເຖວ ສຸຠໍ ວທາໂນ ສຸທ຺ຘິໍ ວໂທ, ‘‘ປຣິສຸທ຺ຘິວາໂທ ປຣິສຸທ຺ຘິທສ຺ສໂນ ວາ ອຫ’’ນ຺ຕິ ອຕ຺ຕານໍ ມຎ຺ຎມາໂນ ຕຕ຺ຖ ຕຖທ຺ທສາ ໂສ, ຕຕ຺ຖ ສກາຍ ທິຏ຺ຐິຍາ ອວິປຣີຕເມວ ໂສ ອທ຺ທສ. ຍຖາ ສາ ທິຏ຺ຐິ ປວຕ຺ຕຕິ, ຕເຖວ ຕໍ ອທ຺ທສ, ນ ອຎ຺ຎຖາ ປສ຺ສິຕຸໍ ອິຈ຺ຉຕີຕິ ອຘິປ຺ປາໂຍ.

ນິວິສ຺ສວາທີຕິ ປຕິຏ຺ຐຫິຕ຺ວາ ກເຖນ຺ໂຕ. ທຸພ຺ພິນໂຍຕິ ວິເນຕຸໍ ທຸກ຺ໂຂ. ທຸປ຺ປຎ຺ຎາປໂຍຕິ ຎາເປຕຸໍ ຈິຕ຺ເຕນ ລພ຺ຠາເປຕຸໍ ທຸກ຺ໂຂ. ທຸນ຺ນິຊ຺ຌາປໂຍຕິ ຈິຕ຺ເຕນ ວີມໍສິຕ຺ວາ ຄຫຓຕ຺ຖໍ ປຸນປ຺ປຸນໍ ນິຊ຺ຌາປຍິຕຸໍ ທຸກ຺ໂຂ. ທຸປ຺ເປກ຺ຂາປໂຍຕິ ອິກ຺ຂາປຍິຕຸໍ ທຸກ຺ໂຂ. ທຸປ຺ປສາທໂຍຕິ ຈິຕ຺ເຕ ປສາທໍ ອຸປ຺ປາເທຕຸໍ ທຸກ຺ໂຂ.

ອປ຺ປສ຺ສີຕິ ຎາເຓນ ປຏິເວຘໍ ປາປຸຓິ. ປຏິວິຊ຺ຌີຕິ ຈິຕ຺ເຕນ ອວໂພຘໍ ປາປຸຓິ.

໑໔໖. ເອວໍ ປກປ຺ປິຕໍ ທິຏ຺ຐິໍ ປຸຣກ຺ຂຣາເນສຸ ຕິຕ຺ຖິເຍສຸ – ນ ພ຺ຣາຫ຺ມໂຓ ກປ຺ປມຸເປຕິ ສງ຺ຂາຕິ ຄາຖາ. ຕຕ຺ຖ ສງ຺ຂາຕິ ສງ຺ຂາຍ, ຊານິຕ຺ວາຕິ ອຕ຺ໂຖ. ນປິ ຎາຓພນ຺ຘູຕິ ສມາປຕ຺ຕິຎາຓາທິນາ ອກຕຕຓ຺ຫາທິຏ຺ຐິພນ຺ຘຸ. ຕຕ຺ຖ ວິຄ຺ຄໂຫ – ນາປິ ອສ຺ສ ຎາເຓນ ກໂຕ ພນ຺ຘຸ ອຕ຺ຖີຕິ ນປິ ຎາຓພນ຺ຘຸ. ສມ຺ມຸຕິໂຍຕິ ທິຏ຺ຐິສມ຺ມຸຕິໂຍ. ປຸຖຸຊ຺ຊາຕິ ປຸຖຸຊ຺ຊນສມ຺ຠວາ. ອຸຄ຺ຄຫຓນ຺ຕິ ມຎ຺ເຎຕິ ອຸຄ຺ຄຫຓນ຺ຕິ ອຎ຺ເຎ, ອຎ຺ເຎ ຕາ ສມ຺ມຸຕິໂຍ ອຸຄ຺ຄຓ຺ຫນ຺ຕີຕິ ວຸຕ຺ຕໍ ໂຫຕິ.

ອຸເປກ຺ຂຕີຕິ ອຸປປຕ຺ຕິໂຕ ອປກ຺ຂປຕິໂຕ ຫຸຕ຺ວາ ປສ຺ສຕິ.

໑໔໗. ກິຎ຺ຈ ຠິຍ຺ໂຍ – ວິສ຺ສຊ຺ຊ ຄນ຺ຖານີຕິ ຄາຖາ. ຕຕ຺ຖ ອນຸຄ຺ຄໂຫຕິ ອຸຄ຺ຄຫຓວິຣຫິໂຕ, ໂສປິ ນາສ຺ສ ອຸຄ຺ຄໂຫຕິ ອນຸຄ຺ຄໂຫ. ນ ວາ ອຸຄ຺ຄຓ຺ຫາຕີຕິ ອນຸຄ຺ຄໂຫ.

ຄນ຺ເຖ ໂວສ຺ສຊ຺ຊິຕ຺ວາຕິ ອຠິຊ຺ຌາທິເກ ຄນ຺ເຖ ຈຊິຕ຺ວາ. ວິສ຺ສຊ຺ຊາຕິ ປຸນ ອນາທິຍນວເສນ ຊຫິຕ຺ວາ. ຄຘິເຕຕິ ຆຏິເຕ. ຄນ຺ຖິເຕຕິ ສຸຕ຺ເຕນ ສງ຺ຄຫິເຕ ວິຍ ຄນ຺ຖິເຕ. ພນ຺ເຘຕິ ສຸຏ຺ຐຸ ພນ຺ເຘ. ວິພນ຺ເຘຕິ ວິວິຘາ ພນ຺ເຘ. ປລິພຸທ຺ເຘຕິ ສມນ຺ຕໂຕ ພນ຺ຘເນນ ພນ຺ເຘ. ພນ຺ຘເນຕິ ກິເລສພນ຺ຘເນ. ໂຜຏຍິຕ຺ວາຕິ ປປ຺ໂຜເຏຕ຺ວາ. ສຈ຺ຈໍ ວິສ຺ສຊ຺ຊໍ ກໂຣນ຺ຕີຕິ ວິສງ຺ຂຣິຕ຺ວາ ອປຣິໂຠຄໍ ກໂຣນ຺ຕິ. ວິໂກເປນ຺ຕີຕິ ຈຸຓ຺ຓວິຈຸຓ຺ຓໍ ກໂຣນ຺ຕິ.

໑໔໘. ກິຎ຺ຈ ຠິຍ຺ໂຍ – ໂສ ເອວຣູໂປ – ປຸພ຺ພາສເວຕິ ຄາຖາ. ຕຕ຺ຖ ປຸພ຺ພາສເວຕິ ອຕີຕຣູປາທີນິ ອາຣພ຺ຠ ອຸປ຺ປຊ຺ຊນຘມ຺ມກິເລເສ. ນເວຕິ ປຈ຺ຈຸປ຺ປນ຺ນຣູປາທີນິ ອາຣພ຺ຠ ອຸປ຺ປຊ຺ຊນຘມ຺ເມ. ນ ຉນ຺ທຄູຕິ ຉນ຺ທາທິວເສນ ນ ຄຈ຺ຉຕິ. ອນຕ຺ຕຄຣຫີຕິ ກຕາກຕວເສນ ອຕ຺ຕານໍ ອຄຣຫນ຺ໂຕ.

໑໔໙. ເອວໍ ອນຕ຺ຕຄຣຫີ ຈ – ສ ສພ຺ພຘມ຺ເມສູຕິ ຄາຖາ. ຕຕ຺ຖ ສພ຺ພຘມ຺ເມສູຕິ ທ຺ວາສຏ຺ຐິທິຏ຺ຐິຘມ຺ເມສຸ ‘‘ຍໍ ກິຎ຺ຈິ ທິຏ຺ຐໍ ວາ’’ຕິ ເອວໍປເຠເທສຸ. ປນ຺ນຠາໂຣຕິ ປຕິຕຠາໂຣ. ນ ກປ຺ເປຕີຕິ ນ ກປ຺ປິໂຍ, ທຸວິຘມ຺ປິ ກປ຺ປໍ ນ ກໂຣຕີຕິ ອຕ຺ໂຖ. ນູປຣໂຕຕິ ປຸຖຸຊ຺ຊນກລ຺ຍາຓກເສກ຺ຂາ ວິຍ ອຸປຣຕິສມງ຺ຄີປິ ໂນ ໂຫຕິ. ນ ປຕ຺ຖິໂຍຕິ ນິຕ຺ຕຓ຺ໂຫ. ຕຓ຺ຫາ ຫິ ປຕ຺ຖຍຕີຕິ ປຕ຺ຖິຍາ, ນາສ຺ສ ປຕ຺ຖິຍາຕິ ນ ປຕ຺ຖິໂຍ. ອິໂຕ ປຣຎ຺ຈ ເຫຏ຺ຐາ ຈ ຕຕ຺ຖ ຕຕ຺ຖ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວ. ເອວໍ ອຣຫຕ຺ຕນິກູເຏເນວ ເທສນໍ ນິຏ຺ຐາເປສິ, ເທສນາປຣິໂຍສາເນ ປຸຣາເຠທສຸຕ຺ເຕ (ມຫານິ. ໘໓) ວຸຕ຺ຕສທິໂສ ເອວ ອຠິສມໂຍ ອໂຫສີຕິ.

ສທ຺ຘມ຺ມປ຺ປຊ຺ໂຊຕິກາຍ ມຫານິທ຺ເທສຏ຺ຐກຖາຍ

ມຫາພ຺ຍູຫສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.