໑໒. ຈູຬພ຺ຍູຫສຸຕ຺ຕນິທ຺ເທສວຓ຺ຓນາ

ທ຺ວາທສເມ ຈູຬພ຺ຍູຫສຸຕ຺ຕນິທ຺ເທເສ ສກໍສກໍທິຏ຺ຐິປຣິພ຺ພສານາຕິ ອິທມ຺ປິ ຕສ຺ມິໍເຍວ ມຫາສມເຍ ‘‘ສພ຺ເພປິເມ ທິຏ຺ຐິຄຕິກາ ‘ສາຘຸຣູປາມ຺ຫາ’ຕິ ຠຓນ຺ຕິ, ກິໍ ນຸ ໂຂ ສາຘຸຣູປາວ ອິເມ ອຕ຺ຕໂນ ເອວ ທິຏ຺ຐິຍາ ປຕິຏ຺ຐຫນ຺ຕິ, ອຸທາຫຸ ອຎ຺ຎມ຺ປິ ທິຏ຺ຐິໍ ຄຓ຺ຫນ຺ຕີ’’ຕິ ອຸປ຺ປນ຺ນຈິຕ຺ຕານໍ ເອກຈ຺ຈານໍ ເທວຕານໍ ຕມຕ຺ຖໍ ປກາເສຕຸໍ ປຸຣິມນເຍເນວ ນິມ຺ມິຕພຸທ຺ເຘນ ອຕ຺ຕານໍ ປຸຈ຺ຉາເປຕ຺ວາ ວຸຕ຺ຕໍ.

໑໑໓. ຕຕ຺ຖ ອາທິໂຕ ທ຺ເວປິ ຄາຖາ ປຸຈ຺ຉາຄາຖາເຍວ. ຕາສຸ ສກໍ ສກໍ ທິຏ຺ຐິປຣິພ຺ພສານາຕິ ອຕ຺ຕໂນ ອຕ຺ຕໂນ ທິຏ຺ຐິຍາ ວສມານາ. ວິຄ຺ຄຍ຺ຫ ນານາ ກຸສລາ ວທນ຺ຕີຕິ ຕໍ ທິຏ຺ຐິໍ ພລວຄ຺ຄາຫໍ ຄເຫຕ຺ວາ ‘‘ຕຕ຺ຖ ກຸສລາມ຺ຫາ’’ຕິ ປຏິຊານມານາ ປຸຖຸ ປຸຖຸ ວທນ຺ຕິ, ເອກໍ ນ ວທນ຺ຕິ. ໂຍ ເອວໍ ຊານາຕິ ສ ເວທິ ຘມ຺ມໍ, ອິທໍ ປຏິກ຺ໂກສມເກວລີ ໂສຕິ ຕຎ຺ຈ ທິຏ຺ຐິໍ ສນ຺ຘາຍ ໂຍ ເອວໍ ຊານາຕິ, ໂສ ຘມ຺ມໍ ເວທິຍິ. ອິທໍ ປນ ປຏິກ຺ໂກສນ຺ໂຕ ຫີໂນ ໂຫຕີຕິ ຈ ວທນ຺ຕິ.

ນານາ ວທນ຺ຕີຕິ ນານາກາຣຓໍ ຠຓນ຺ຕິ. ວິວິຘໍ ວທນ຺ຕີຕິ ນານາວິຘໍ ຠຓນ຺ຕິ. ອຎ຺ໂຎຎ຺ຎໍ ວທນ຺ຕີຕິ ເອກໍ ອວຕ຺ວາ ອຎ຺ຎໍ ອຎ຺ຎໍ ຄເຫຕ຺ວາ ວທນ຺ຕິ. ອເກວລີ ໂສຕິ ໂຍ ອກຸສໂລ ອຍໍ. ອສມຕ຺ໂຕຕິ ນ ປຣິປູໂຣ. ອປຣິປຸຓ຺ໂຓຕິ ນ ສມ຺ປຸຓ຺ໂຓ.

໑໑໔. ພາໂລຕິ ຫີໂນ. ອກ຺ກຸສໂລຕິ ອວິທ຺ວາ.

໑໑໕. ອິທານິ ຕິສ຺ໂສ ວິສ຺ສຊ຺ຊນຄາຖາ ໂຫນ຺ຕີຕິ. ຕາ ປຸຣິມຑ຺ເຒນ ວຸຕ຺ຕມຕ຺ຖໍ ປຈ຺ຉິມຑ຺ເຒນ ປຏິພ຺ຍູຫິຕ຺ວາ ຐິຕາ. ເຕນ ພ຺ຍູເຫນ ອຸຕ຺ຕຣສຸຕ຺ຕໂຕ ຈ ອປ຺ປກຕ຺ຕາ ອິທໍ ສຸຕ຺ຕໍ ‘‘ຈູຬພ຺ຍູຫ’’ນ຺ຕິ ນາມໍ ລຠິ. ຕຕ຺ຖ ປຐມຄາຖາຍໍ ຕາວ ປຣສ຺ສ ເຈ ຘມ຺ມນ຺ຕິ ປຣສ຺ສ ທິຏ຺ຐິໍ. ສພ຺ເພວິເມ ພາລາຕິ ເອວໍ ສນ຺ເຕ ສພ຺ເພວ ອິເມ ພາລາ ໂຫນ຺ຕີຕິ ອຘິປ຺ປາໂຍ. ກິໍກາຣຓາ? ສພ຺ເພວິເມ ທິຏ຺ຐິປຣິພ຺ພສານາຕິ.

໑໑໖. ສນ຺ທິຏ຺ຐິຍາ ເຈວ ນ ວີວທາຕາ, ສໍສຸທ຺ຘປຎ຺ຎາ ກຸສລາ ມຸຕີມາຕິ ສກາຍ ທິຏ຺ຐິຍາ ອນວີວທາຕາ ອໂວທາຕາ ສໍກິລິຏ຺ຐາວ ສມານາ ສໍສຸທ຺ຘປຎ຺ຎາ ຈ ກຸສລາ ຈ ມຸຕິມນ຺ໂຕ ຈ ເຕ ໂຫນ຺ຕິ ເຈ. ອຖ ວາ ‘‘ສນ຺ທິຏ຺ຐິຍາ ເຈ ວທາຕາ’’ຕິ ປາໂຐ, ຕສ຺ສຕ຺ໂຖ – ສກາຍ ປນ ທິຏ຺ຐິຍາ ໂວທາຕາ ສໍສຸທ຺ຘປຎ຺ຎາ ກຸສລາ ມຸຕິມນ຺ໂຕ ໂຫນ຺ຕິ ເຈ, ນ ເຕສໍ ໂກຈີຕິ ເອວໍ ສນ຺ເຕ ເຕສໍ ເອໂກປິ ນິຫີນປຎ຺ໂຎ ນ ໂຫຕິ, ກິໍກາຣຓາ? ທິຏ຺ຐີ ຫິ ເຕສມ຺ປິ ຕຖາ ສມຕ຺ຕາ, ຍຖາ ອິຕເຣສນ຺ຕິ.

໑໑໗. ນ ວາຫເມຕນ຺ຕິ ຄາຖາຍ ສງ຺ເຂປຕ຺ໂຖ – ຍໍ ເຕ ມິຖຸ ທ຺ເວ ທ຺ເວ ຊນາ ອຎ຺ຎມຎ຺ຎໍ ‘‘ພາໂລ’’ຕິ ອາຫຸ, ອຫໍ ເອຕໍ ຕຖິຍນ຺ຕິ ຕຈ຺ຉນ຺ຕິ ເນວ ພ຺ຣູມິ. ກິໍກາຣຓາ? ຍສ຺ມາ ສພ຺ເພວ ເຕ ສກໍ ສກໍ ທິຏ຺ຐິໍ ‘‘ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ອກໍສຸ, ເຕນ ຈ ກາຣເຓນ ປຣໍ ‘‘ພາໂລ’’ຕິ ທຫນ຺ຕິ. ເອຕ຺ຖ ຈ ຕຖິຍໍ, ຕເຖວນ຺ຕິ (ສຸ. ນິ. ອຏ຺ຐ. ໒.໘໘໙) ທ຺ເວປິ ປາຐາ.

ຕຈ຺ຉນ຺ຕິ ອຕຸຈ຺ຉໍ. ຕຖນ຺ຕິ ອວິປຣີຕໍ, ຠູຕນ຺ຕິ ສນ຺ຕໍ. ຍາຖາວນ຺ຕິ ສໍວິຊ຺ຊມານໍ. ອວິປຣິຕນ຺ຕິ ນ ວິສງ຺ເກຕໍ.

໑໑໘. ຍມາຫູຕິ ປຸຈ຺ຉາຄາຖາຍ ‘‘ຍໍ ທິຏ຺ຐິສຈ຺ຈໍ ຕຖິຍ’’ນ຺ຕິ ເອເກ ອາຫຸ.

໑໑໙. ເອກຎ຺ຫິ ສຈ຺ຈນ຺ຕິ ວິສ຺ສຊ຺ຊນຄາຖາຍ ເອກໍ ສຈ຺ຈໍ ນິໂຣໂຘ ມຄ຺ໂຄ ວາ. ຍສ຺ມິໍ ປຊາ ໂນ ວິວເທ ປຊານນ຺ຕິ ຍມ຺ຫິ ສຈ຺ເຈ ປຊານນ຺ໂຕ ປຊາ ໂນ ວິວເທຍ຺ຍຸໍ. ສຍໍ ຖຸນນ຺ຕີຕິ ອຕ຺ຕນາ ວທນ຺ຕິ.

໑໒໐. ກສ຺ມາ ນູຕິ ປຸຈ຺ຉາຄາຖາຍ ປວາທິຍາເສຕິ ວາທິໂນ. ອຸທາຫຸ ເຕ ຕກ຺ກມນຸສ຺ສຣນ຺ຕີຕິ ເຕ ວາທິໂນ ອຸທາຫຸ ອຕ຺ຕໂນ ຕກ຺ກມຕ຺ຕໍ ອນຸຄຈ຺ຉນ຺ຕິ.

ຕກ຺ກປຣິຍາຫຕນ຺ຕິ ວິຕກ຺ເກນ ສມນ຺ຕໂຕ ອາຫຕໍ. ວີມໍສານຸຈຣິຕນ຺ຕິ ອຕ຺ຕໂນ ອຸປຏ຺ຐິຕປຎ຺ຎາຍ ວິຈຣິຕໍ. ສຍໍປຏິຠານນ຺ຕິ ອຕ຺ຕໂນ ປຏິຠານໍ.

໑໒໑. ນ ເຫວາຕິ ວິສ຺ສຊ຺ຊນຄາຖາຍ ອຎ຺ຎຕ຺ຣ ສຎ຺ຎາຍ ນິຈ຺ຈານີຕິ ຐເປຕ຺ວາ ສຎ຺ຎາມຕ຺ເຕນ ນິຈ຺ຈນ຺ຕິ ຄຫິຕຄ຺ຄຫຓານິ. ຕກ຺ກຎ຺ຈ ທິຏ຺ຐີສຸ ປກປ຺ປຍິຕ຺ວາຕິ ອຕ຺ຕໂນ ນິຈ຺ຈສງ຺ກປ຺ປມຕ຺ຕໍ ທິຏ຺ຐີສຸ ຊເນຕ຺ວາ.

ຍສ຺ມາ ປນ ທິຏ຺ຐີສຸ ວິຕກ຺ກໍ ຊເນນ຺ຕາ ທິຏ຺ຐິໂຍ ສຎ຺ຊເນນ຺ຕິ, ຕສ຺ມາ ວຸຕ຺ຕໍ ‘‘ທິຏ຺ຐິຄຕານິ ຊເນນ຺ຕິ ສຎ຺ຊເນນ຺ຕີ’’ຕິອາທິ. ຊເນນ຺ຕີຕິ ອຸປຣູປຣິ ທິຏ຺ຐິໍ ອຸປ຺ປາເທນ຺ຕາ ຊເນນ຺ຕິ. ສຎ຺ຊເນນ຺ຕີຕິອາທີນິ ອຸປສຄ຺ຄວເສນ ປທໍ ວຑ຺ເຒຕ຺ວາ ວຸຕ຺ຕານິ. ມຍ຺ຫໍ ສຈ຺ຈນ຺ຕິ ມມ ວຈນໍ ຕຈ຺ຉໍ.

໑໒໒. ອິທານິ ເອວໍ ນານາສຈ຺ເຈສຸ ອສນ຺ເຕສຸ ຕກ຺ກມຕ຺ຕໍ ອນຸສ຺ສຣນ຺ຕານໍ ທິຏ຺ຐິຄຕິການໍ ວິປ຺ປຏິປຕ຺ຕິໍ ທສ຺ເສຕຸໍ ‘‘ທິຏ຺ເຐ ສຸເຕ’’ຕິອາທິກາ ຄາຖາໂຍ ອຠາສິ. ຕຕ຺ຖ ທິຏ຺ເຐຕິ ທິຏ຺ຐໍ, ທິຏ຺ຐສຸທ຺ຘິນ຺ຕິ ອຘິປ຺ປາໂຍ. ເອສ ນໂຍ ສຸຕາທີສຸ. ເອເຕ ຈ ນິສ຺ສາຍ ວິມານທສ຺ສີຕິ ເອເຕ ທິຏ຺ຐິຘມ຺ເມ ນິສ຺ສຍິຕ຺ວາ ສຸທ຺ຘິຠາວສງ຺ຂາຕໍ ວິມານໍ ອສມ຺ມານໍ ປສ຺ສນ຺ໂຕປິ. ວິນິຈ຺ຉເຍ ຐຕ຺ວາ ປຫສ຺ສມາໂນ, ພາໂລ ປໂຣ ອກ຺ກຸສໂລຕິ ຈາຫາຕິ ເອວໍ ວິມານທສ຺ສີປິ ຕສ຺ມິໍ ທິຏ຺ຐິວິນິຈ຺ຉເຍ ຐຕ຺ວາ ຕຸຏ຺ຐິຊາໂຕ ຫາສຊາໂຕ ຫຸຕ຺ວາ ປໂຣ ‘‘ຫີໂນ ຈ ອວິທ຺ວາ ຈາ’’ຕິ ເອວໍ ວທຕິເຍວ.

ນ ສມ຺ມາເນຕີຕິປິ ວິມານທສ຺ສີຕິ ນ ພຫຸມານໍ ກໂຣຕີຕິ ເອວມ຺ປິ ວິມານທສ຺ສີ ນ ພຫຸມານທສ຺ສີ. ໂທມນສ຺ສໍ ຊເນຕີຕິ ປຐມໍ ທິຏ຺ຐິນິສ຺ສຍໍ ອລ຺ລີຍິຕ຺ວາ ໂທມນສ຺ສໍ ປຕ຺ວາ ປຈ຺ຉາ ທິຏ຺ຐິວິນິຈ຺ຉເຍ ຐິຕກາເລ ໂສມນສ຺ສໍ ອຸປ຺ປາເທຕີຕິ ອຕ຺ໂຖ.

ວິນິຈ຺ຉຍທິຏ຺ຐິຍາ ຐຕ຺ວາຕິ ສນ຺ນິຏ຺ຐານໍ ກຕ຺ວາ ຄຫິຕທິຏ຺ຐິຍາ ຐຕ຺ວາ.

໑໒໓. ເອວໍ ສນ຺ເຕ ເຍເນວາຕິ ຄາຖາ. ຕຕ຺ຖ ສຍມຕ຺ຕນາຕິ ສຍເມວ ອຕ຺ຕານໍ. ວິມາເນຕີຕິ ຄຣຫຕິ. ຕເທວ ປາວາຕິ ຕເທວ ວຈນໍ ທິຏ຺ຐິໍ ວທຕິ, ຕໍ ວາ ປຸຄ຺ຄລໍ.

໑໒໔. ອຕິສາຣທິຏ຺ຐິຍາຕິ ຄາຖາຍຕ຺ໂຖ – ໂສ ເອວໍ ຕາຍ ລກ຺ຂຓາຕິສາຣິນິຍາ ອຕິສາຣທິຏ຺ຐິຍາ ສມຕ຺ໂຕ ປຣິປຸຓ຺ໂຓ ອຸທ຺ຘຸມາໂຕ, ເຕນ ຈ ທິຏ຺ຐິມາເນນ ມຕ຺ໂຕ ‘‘ປຣິປຸຓ຺ໂຓ ອຫໍ ເກວລີ’’ຕິ ເອວໍ ປຣິປຸຓ຺ຓມານີ. ສຍເມວ ອຕ຺ຕານໍ ມນສາ ‘‘ອຫໍ ປຓ຺ຑິໂຕ’’ຕິ ອຠິສິຎ຺ຈຕິ. ກິໍກາຣຓາ? ທິຏ຺ຐີ ຫິ ສາ ຕສ຺ສ ຕຖາ ສມຕ຺ຕາຕິ.

ສພ຺ພາ ຕາ ທິຏ຺ຐິໂຍ ລກ຺ຂຓາຕິກ຺ກນ຺ຕາຕິ ຕາ ສພ຺ພາ ທ຺ວາສຏ຺ຐິທິຏ຺ຐິໂຍ ລກ຺ຂຓໍ ອຕີຕາ ອຕິສຣນ຺ຕີຕິ ອຕິກ຺ກນ຺ຕາ. ອໂນໂມຕິ ອນູໂນ.

໑໒໕. ປຣສ຺ສ ເຈຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ກິຎ຺ຈ ຠິຍ຺ໂຍ? ໂຍ ໂສ ວິນິຈ຺ຉເຍ ຐຕ຺ວາ ປຫສ຺ສມາໂນ ‘‘ພາໂລ ປໂຣ ອກ຺ກຸສໂລ’’ຕິ ຈາຫ, ຕສ຺ສ ປຣສ຺ສ ເຈ ຫິ ວຈສາ ໂສ ເຕນ ວຸຈ຺ຈມາໂນ ນິຫີໂນ ໂຫຕິ, ຕຸໂມ ສຫາ ໂຫຕິ ນິຫີນປຎ຺ໂຎ, ໂສປິ ເຕເນວ ສຫ ນິຫີນປຎ຺ໂຎ ໂຫຕິ. ໂສປິ ຫິ ຕໍ ‘‘ພາໂລ’’ຕິ ວທຕິ. ອຖ ຕສ຺ສ ວຈນໍ ອປ຺ປມາຓໍ, ໂສ ປນ ສຍເມວ ເວທຄູ ຈ ຘີໂຣ ຈ ໂຫຕິ. ເອວໍ ສນ຺ເຕ ນ ໂກຈິ ພາໂລ ສມເຓສຸ ອຕ຺ຖິ. ສພ຺ເພປິ ຫິ ເຕ ອຕ຺ຕໂນ ອິຈ຺ຉາຍ ປຓ຺ຑິຕາ.

ວາຈາຍາຕິ ກຖເນນ. ວຈເນນາຕິ ຠາສິເຕນ. ນິນ຺ທິຕກາຣຓາຕິ ຄຣຫເຫຕຸນາ. ຄຣຫິຕກາຣຓາຕິ ອວຎ຺ຎາຕເຫຕຸນາ. ອຸປວທິຕກາຣຓາຕິ ອຸປວາທເຫຕຸນາ.

໑໒໖. ອຎ຺ຎໍ ອິໂຕຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ‘‘ອຖ ເຈ ສຍໍ ເວທຄູ ໂຫຕິ ຘີໂຣ. ນ ໂກຈິ ພາໂລ ສມເຓສຸ ອຕ຺ຖີ’’ຕິ ເອວຎ຺ຫິ ວຸຕ຺ເຕປິ ສິຍາ ກສ຺ສຈິ ‘‘ກສ຺ມາ’’ຕິ. ຕຕ຺ຖ ວຸຈ຺ຈເຕ – ຍສ຺ມາ ອຎ຺ຎໍ ອິໂຕ ຍາຠິວທນ຺ຕິ ຘມ຺ມໍ, ອປຣທ຺ຘາ ສຸທ຺ຘິມເກວລີ ເຕ. ເອວມ຺ປິ ຕິຕ຺ຖ຺ຍາ ປຸຖຸໂສ ວທນ຺ຕິ, ເຍ ອິໂຕ ອຎ຺ຎໍ ທິຏ຺ຐິໍ ອຠິວທນ຺ຕິ, ເຕ ອປຣທ຺ຘາ ວິຣທ຺ຘາ ສຸທ຺ຘິມຄ຺ຄໍ, ອເກວລິໂນ ຈ ເຕຕິ ເອວໍ ປຸຖຸຕິຕ຺ຖິຍາ ຍສ຺ມາ ວທນ຺ຕີຕິ ວຸຕ຺ຕໍ ໂຫຕິ. ກສ຺ມາ ປເນວໍ ວທນ຺ຕີຕິ ເຈ? ສນ຺ທິຏ຺ຐິຣາເຄນ ຫິ ເຕຠິຣຕ຺ຕາ, ຍສ຺ມາ ສເກນ ທິຏ຺ຐິຣາເຄນ ເຕ ອຠິຣຕ຺ຕາຕິ ວຸຕ຺ຕໍ ໂຫຕິ.

ເຕ ສຸທ຺ຘິມຄ຺ຄນ຺ຕິ ເຕ ອຎ຺ຎຕິຕ຺ຖິຍາ ອກິລິຏ຺ຐມຄ຺ຄໍ. ວິສຸທ຺ຘິມຄ຺ຄນ຺ຕິ ນິທ຺ໂທສມຄ຺ຄໍ. ປຣິສຸທ຺ຘິມຄ຺ຄນ຺ຕິ ສຸກ຺ກມຄ຺ຄໍ. ໂວທາຕມຄ຺ຄນ຺ຕິ ປຓ຺ຑຣມຄ຺ຄໍ. ປຣິໂຍທາຕມຄ຺ຄນ຺ຕິ ປຠາວນ຺ຕມຄ຺ຄໍ. ວິຣທ຺ຘາຕິ ວຸຕ຺ຕວິຘິນາ ມຄ຺ເຄນ ວິຣຊ຺ຌິຕ຺ວາ ຐິຕາ. ອປຣທ຺ຘາຕິ ອປຣຊ຺ຌິຕ຺ວາ ຐິຕາ. ຂລິຕາຕິ ປຣິຫີນາ. ຄລິຕາຕິ ຕໂຕ ຠຏ຺ຐາ. ອຎ຺ຎາຍາຕິ ອຎ຺ຎາເຓນ. ອປຣທ຺ຘາຕິ ປຣາຊຍມາປນ຺ນາ. ອຖ ວາ ‘‘ຎາຍາປຣທ຺ຘາ’’ຕິປິ ປາໂຐ. ຎາເຍນ ມຄ຺ເຄນ ວິຣທ຺ຘາຕິ ອຕ຺ໂຖ.

໑໒໗. ເອວໍ ອຠິຣຕ຺ຕາ ຈ – ອິເຘວ ສຸທ຺ຘິນ຺ຕິ ຄາຖາ. ຕຕ຺ຖ ສກາຍເນຕິ ສກມຄ຺ເຄ. ທຬ຺ຫໍ ວທານາຕິ ທຬ຺ຫວາທາ.

ຖິຣວາທາຕິ ສນ຺ນິຏ຺ຐານວາທາ. ພລິກວາທາຕິ ພລວນ຺ຕວາທາ. ອວຏ຺ຐິຕວາທາຕິ ປຕິຏ຺ຐຫິຕ຺ວາ ກຖິຕວາທາ.

໑໒໘. ເຍ ເອວຎ຺ຈ ທຬ຺ຫວາທາ, ເຕສຸ ໂຍ ໂກຈິ ຕິຕ຺ຖິໂຍ ສກາຍເນ ວາປິ ທຬ຺ຫໍ ວທາໂນ ກເມຕ຺ຖ ພາໂລຕິ ປຣໍ ທເຫຍ຺ຍ, ສງ຺ເຂປໂຕ ຕຕ຺ຖ ສສ຺ສຕຸຈ຺ເຉທສງ຺ຂາເຕ ວິຕ຺ຖາຣໂຕ ນຕ຺ຖິກອິສ຺ສຣກາຣກນິຍຕິອາທິເຠເທ ສເກ ອຍເນ ‘‘ອິທເມວ ສຈ຺ຈ’’ນ຺ຕິ ທຬ຺ຫໍ ວທາໂນ ກໍ ປຣໍ ເອຕ຺ຖ ທິຏ຺ຐິຄເຕ ‘‘ພາໂລ’’ຕິ ສຫ ຘມ຺ເມນ ປສ຺ເສຍ຺ຍ, ນນຸ ສພ຺ໂພປິ ຕສ຺ສ ມເຕນ ປຓ຺ຑິໂຕ ເອວ ສຸປ຺ປຏິປນ຺ໂນ ເອວ ຈ. ເອວໍ ສນ຺ເຕ ສຍເມວ ໂສ ເມຘຄມາວເຫຍ຺ຍ, ປຣໍ ວທໍ ພາລມສຸທ຺ຘິຘມ຺ມໍ. ໂສປິ ປຣໍ ‘‘ພາໂລ ຈ ອສຸທ຺ຘິຘມ຺ໂມ ຈ ອຍ’’ນ຺ຕິ ວທນ຺ໂຕ ອຕ຺ຕນາວ ກລຫໍ ອາວເຫຍ຺ຍ. ກສ຺ມາ? ຍສ຺ມາ ສພ຺ໂພປິ ຕສ຺ສ ມເຕນ ປຓ຺ຑິໂຕເຍວ ສຸປ຺ປຏິປນ຺ໂນເຍວ ຈ.

໑໒໙. ເອວໍ ສພ຺ພຖາປິ ວິນິຈ຺ຉເຍ ຐຕ຺ວາ ສຍໍ ປມາຍ, ອຸທ຺ຘໍ ສ ໂລກສ຺ມິໍ ວິວາທເມຕີຕິ ທິຏ຺ຐິຍາ ຐຕ຺ວາ ສຍຎ຺ຈ ສຕ຺ຖາຣາທິໍ ມິນິຕ຺ວາ ໂສ ຠິຍ຺ໂຍ ວິວາທເມຕີຕິ. ເອວໍ ປນ ວິນິຈ຺ຉເຍສຸ ອາທີນວໍ ຎຕ຺ວາ ອຣິຍມຄ຺ເຄນ ຫິຕ຺ວານ ສພ຺ພານິ ວິນິຈ຺ຉຍານິ, ນ ເມຘຄໍ ກຸພ຺ພຕິ ຊນ຺ຕຸ ໂລເກຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ.

ສຍໍ ປມາຍາຕິ ອຕ຺ຕນາ ມິນິຕ຺ວາ. ປມິນິຕ຺ວາຕິ ປມາຓໍ ກຕ຺ວາ. ‘‘ປວິເນຕ຺ວາ’’ຕິປິ ປາໂຐ, ຕໍ ນ ສຸນ຺ທຣໍ. ອຸທ຺ຘໍ ວາເທນ ສທ຺ຘິນ຺ຕິ ອຕ຺ຕໂນ ອຸປຣິ ກເຖນ຺ເຕນ ສຫ. ເທສນາປຣິໂຍສາເນ ປຸຣາເຠທສຸຕ຺ເຕ (ມຫານິ. ໘໓) ວຸຕ຺ຕສທິໂສ ເອວ ອຠິສມໂຍ ອໂຫສີຕິ.

ສທ຺ຘມ຺ມປ຺ປຊ຺ໂຊຕິກາຍ ມຫານິທ຺ເທສຏ຺ຐກຖາຍ

ຈູຬພ຺ຍູຫສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.