໑໑. ກລຫວິວາທສຸຕ຺ຕນິທ຺ເທສວຓ຺ຓນາ

໙໗. ເອກາທສເມ ກລຫວິວາທສຸຕ຺ຕນິທ຺ເທເສ ກຸໂຕປຫູຕາ ກລຫາ ວິວາທາຕິ ກລໂຫ ຈ ຕສ຺ສ ປຸພ຺ພຠາໂຄ ວິວາໂທ ຈາຕິ ອິເມ ກຸໂຕ ຊາຕາ. ປຣິເທວໂສກາ ສຫມຈ຺ຉຣາ ຈາຕິ ປຣິເທວໂສກາ ຈ ສຫມຈ຺ຉຣາ ຈ ກຸໂຕ ປຫູຕາ. ມານາຕິມານາ ສຫເປສຸຓາ ຈາຕິ ມານາ ຈ ອຕິມານາ ຈ ເປສຸຓາ ຈ ກຸໂຕ ປຫູຕາ. ເຕຕິ ເຕ ສພ຺ເພປິ ອຏ຺ຐ ກິເລສຘມ຺ມາ. ຕທິງ຺ຆ ພ຺ຍູຫີຕິ ຕໍ ມຍາ ປຸຈ຺ຉິຕມຕ຺ຖໍ ພ຺ຣູຫິ, ຍາຈາມິ ຕໍ ອຫນ຺ຕິ. ຍາຈນຕ຺ໂຖ ຫິ ອິງ຺ຆາຕິ ນິປາໂຕ.

ເອເກນ ອາກາເຣນາຕິ ເອເກນ ກາຣເຓນ. ອປເຣນ ອາກາເຣນາຕິ ອປເຣນ ກາຣເຓນ. ອາຄາຣິກາ ທຓ຺ຑປສຸຕາຕິ ຄຫປຕິໂນ ວິເຫສມານາ. ປພ຺ພຊິຕາ ອາປຕ຺ຕິໍ ອາປຊ຺ຊນ຺ຕາຕິ ອນຄາຣິກາ ສຕ຺ຕສຸ ອາປຕ຺ຕິກ຺ຂນ຺ເຘສຸ ອຎ຺ຎຕຣໍ ອາປຊ຺ຊມານາ.

ກຸໂຕປຫູຕາຕິ ກຸໂຕຠູຕາ. ກຸໂຕຊາຕາຕິ ກຸໂຕ ປຏິລທ຺ຘຠາວາ. ກຸໂຕສຎ຺ຊາຕາຕິ ອຸປສຄ຺ເຄນ ປທໍ ວຑ຺ຒິຕໍ. ກຸໂຕນິພ຺ພຕ຺ຕາຕິ ກຸໂຕ ນິພ຺ພຕ຺ຕລກ຺ຂຓໍ ປຕ຺ຕາ. ອຸປສຄ຺ເຄນ ປທໍ ວຑ຺ເຒຕ຺ວາ ‘‘ກຸໂຕອຠິນິພ຺ພຕ຺ຕາ’’ຕິ ວຸຕ຺ຕໍ. ກຸໂຕປາຕຸຠູຕາຕິ ກຸໂຕປາກຏີຠູຕາ. ກິໍ ນິທານາຕິອາທີສຸ ອຕ຺ຕໂນ ຜລໍ ນິເທຕີຕິ ນິທານໍ. ເອຕສ຺ມາ ຜລໍ ສມຸເທຕີຕິ ສມຸທໂຍ. ເອຕສ຺ມາ ຜລໍ ຊາຍຕີຕິ ຊາຕິ. ເອຕສ຺ມາ ຜລໍ ປຠວຕີຕິ ປຠໂວ. ມູລໍ ປຸຈ຺ຉຕີຕິ ກລຫສ຺ສ ກາຣຓໍ ປຸຈ຺ຉຕິ. ກາຣຓຎ຺ຫິ ປຕິຏ຺ຐຏ຺ເຐນ ມູລໍ. ອຕ຺ຕໂນ ຜລນິປ຺ຜາທນຕ຺ຖໍ ຫິໂນຕິ ປວຕ຺ຕຕີຕິ ເຫຕຸ. ‘‘ຫນ຺ທ ນໍ ຄຓ຺ຫຖາ’’ຕິ ທສ຺ເສນ຺ຕໍ ວິຍ ອຕ຺ຕໂນ ຜລໍ ນິເທຕີຕິ ນິທານໍ. ເອຕສ຺ມາ ຜລໍ ສມ຺ຠວຕີຕິ ສມ຺ຠໂວ. ປຠວຕິ ຜລໍ ເອຕສ຺ມາຕິ ປຠໂວ. ສມຸຏ຺ຐາຕິ ເອຕ຺ຖ ຜລໍ, ເອເຕນ ວາ ສມຸຏ຺ຐາຕີຕິ ສມຸຏ຺ຐານໍ. ອຕ຺ຕໂນ ຜລໍ ອາຫຣຕີຕິ ອາຫາໂຣ. ອປຏິກ຺ຂິປິຕພ຺ພຏ຺ເຐນ ອຕ຺ຕໂນ ຜລໍ ອາຣເມຕີຕິ ອາຣມ຺ມຓໍ. ເອຕໍ ປຏິຈ຺ຈ ອປຏິກ຺ຂິປິຕ຺ວາ ຜລໍ ເອຕິ ປວຕ຺ຕຕີຕິ ປຈ຺ຈໂຍ. ເອຕສ຺ມາ ຜລໍ ສມຸເທຕີຕິ ສມຸທໂຍຕິ ເອວເມເຕສໍ ປທານໍ ວຈນຕ຺ໂຖ ເວທິຕພ຺ໂພ. ຕໍ ສນ຺ຘາຍ ‘‘ກລຫສ຺ສ ຈ ວິວາທສ຺ສ ຈ ມູລໍ ປຸຈ຺ຉຕີ’’ຕິອາທິນາ ນເຍນ ເທສນາ ວຸຕ຺ຕາ.

໙໘. ປິຍປ຺ປຫູຕາຕິ ປິຍວຕ຺ຖຸໂຕ ຊາຕາ. ມຈ຺ເຉຣຍຸຕ຺ຕາ ກລຫາ ວິວາທາຕິ ອິມິນາ ກລຫວິວາທາທີນໍ ນ ເກວລໍ ປິຍວຕ຺ຖຸເມວ, ມຈ຺ຉຣິຍມ຺ປິ ປຈ຺ຈຍໍ ທສ຺ເສຕິ. ກລຫວິວາທສີເສນ ເຈຕ຺ຖ ສພ຺ເພປິ ເຕ ຘມ຺ມາ ວຸຕ຺ຕາຕິ ເວທິຕພ຺ພາ. ຍຖາ ຈ ເອເຕສໍ ມຈ຺ຉຣິຍໍ, ຕຖາ ເປສຸຓານຎ຺ຈ ວິວາທໍ. ເຕນາຫ ‘‘ວິວາທຊາເຕສຸ ຈ ເປສຸຓານີ’’ຕິ. ອິມິສ຺ສາ ຄາຖາຍ ນິທ຺ເທໂສ ອຸຕ຺ຕານຕ຺ໂຖເຍວ.

໙໙. ປິຍາ ສຸ ໂລກສ຺ມິໍ ກຸໂຕນິທານາ, ເຍ ຈາປິ ໂລຠາ ວິຈຣນ຺ຕິ ໂລເກຕິ ‘‘ປິຍປ຺ປຫູຕາ ກລຫາ’’ຕິ ເຍ ເອຕ຺ຖ ວຸຕ຺ຕາ, ເຕ ປິຍາ ໂລກສ຺ມິໍ ກຸໂຕນິທານາ, ນ ເກວລຎ຺ຈ ປິຍາ, ເຍ ຈາປິ ຂຕ຺ຕິຍາທໂຍ ໂລເກ ວິຈຣນ຺ຕິ ໂລຠເຫຕຸ ໂລເຠນາຠິຠູຕາ ວິຈຣນ຺ຕິ, ເຕສໍ ໂສ ໂລໂຠ ຈ ກຸໂຕນິທາໂນຕິ ທ຺ເວ ອຕ຺ເຖ ເອກາຍ ປຸຈ຺ຉາຍ ປຸຈ຺ຉຕິ. ກຸໂຕນິທານາຕິ ເຈຕ຺ຖ ກິໍນິທານາ ກິໍເຫຕຸກາຕິ ປຈ຺ຈຕ຺ຕວຈນສ຺ສ ໂຕອາເທໂສ ເວທິຕພ຺ໂພ, ສມາເສ ຈສ຺ສ ໂລປາຠາໂວ. ອຖ ວາ ນິທານາຕິ ຊາຕາ, ອຸປ຺ປນ຺ນາຕິ ອຕ຺ໂຖ. ຕສ຺ມາ ກຸໂຕ ຊາຕາ ກຸໂຕ ອຸປ຺ປນ຺ນາຕິ ວຸຕ຺ຕໍ ໂຫຕິ. ອາສາ ຈ ນິຏ຺ຐາ ຈາຕິ ອາສາ ຈ ຕສ຺ສາ ອາສາຍ ສມິທ຺ຘິ ຈ. ເຍ ສມ຺ປຣາຍາຍ ນຣສ຺ສ ໂຫນ຺ຕີຕິ ເຍ ນຣສ຺ສ ສມ຺ປຣາຍາຍ ໂຫນ຺ຕິ, ປຣາຍນາ ໂຫນ຺ຕີຕິ ວຸຕ຺ຕໍ ໂຫຕິ. ເອກາ ເອວາຍມ຺ປິ ປຸຈ຺ຉາ.

ທີປາ ໂຫນ຺ຕີຕິ ປຕິຏ຺ຐາ ຠວນ຺ຕິ. ສຣຓາ ໂຫນ຺ຕີຕິ ທຸກ຺ຂນາສນາ ໂຫນ຺ຕິ. ນິຏ຺ຐາປຣາຍນາ ໂຫນ຺ຕີຕິ ສມິທ຺ຘິປຣາຍນາ ໂຫນ຺ຕິ.

໑໐໐. ຉນ຺ທານິທານານີຕິ ກາມຈ຺ຉນ຺ທາທິຉນ຺ທນິທານານິ. ເຍ ຈາປິ ໂລຠາ ວິຈຣນ຺ຕີຕິ ເຍ ຈາປິ ຂຕ຺ຕິຍາທໂຍ ໂລຠາ ວິຈຣນ຺ຕິ, ເຕສໍ ໂລໂຠປິ ຉນ຺ທນິທາໂນຕິ ທ຺ເວປິ ອຕ຺ເຖ ເອກໂຕ ວິສ຺ສຊ຺ເຊຕິ. ອິໂຕນິທານາຕິ ຉນ຺ທນິທານາ ເອວາຕິ ວຸຕ຺ຕໍ ໂຫຕິ. ‘‘ອິໂຕນິທານາ’’ຕິ ຫິ ຉນ຺ທໍ ສນ຺ຘາຍາຫ. ຉນ຺ທນິທານາ ຫິ ໂລຠາທໂຍ. ‘‘ອິໂຕນິທານາ’’ຕິ ສທ຺ທສິທ຺ຘິ ເຈຕ຺ຖ ‘‘ກຸໂຕນິທານາ’’ຕິ ເອຕ຺ຖ ວຸຕ຺ຕນເຍນ ເວທິຕພ຺ພາ. ອາສາຍ ສມິທ຺ຘິ ວຸຈ຺ຈຕິ ນິຏ຺ຐາຕິ ອຊ຺ຌາສຍນິພ຺ພຕ຺ຕິປຏິລາໂຠ ກຖີຍຕິ.

໑໐໑. ວິນິຈ຺ຉຍາຕິ ຕຓ຺ຫາທິຏ຺ຐິວິນິຈ຺ຉຍາ. ເຍ ຈາປິ ຘມ຺ມາ ສມເຓນ ວຸຕ຺ຕາຕິ ເຍ ຈ ອຎ຺ເຎປິ ໂກຘາທີຫິ ສມ຺ປຍຸຕ຺ຕາ, ຕຖາຣູປາ ວາ ອກຸສລາ ຘມ຺ມາ ພຸທ຺ຘສມເຓນ ວຸຕ຺ຕາ, ເຕ ກຸໂຕປຫູຕາຕິ.

ອຎ຺ຎຊາຕິກາຕິ ອຎ຺ຎສຠາວາ. ອຎ຺ຎວິຫິຕກາຕິ ອຎ຺ເຎນາກາເຣນ ຐິຕາ. ສມິຕປາເປນາຕິ ນິພ຺ພາປິຕປາເປນ. ພາຫິຕປາປຘມ຺ເມນາຕິ ປຫີນລາມກຘມ຺ເມນ. ຠິນ຺ນກິເລສມູເລນາຕິ ກິເລສມູລານິ ຠິນ຺ທິຕ຺ວາ ຐິເຕນ. ສພ຺ພາກຸສລມູລພນ຺ຘນາ ປມຸຕ຺ເຕນາຕິ ທ຺ວາທສອກຸສລພນ຺ຘນໍ ໂມເຈຕ຺ວາ ຐິເຕນ. ວຸຕ຺ຕາຕິ ກຖິຕາ. ປວຸຕ຺ຕາຕິ ປກາເຣນ ກຖິຕາ.

໑໐໒. ຕມູປນິສ຺ສາຍ ປໂຫຕິ ຉນ຺ໂທຕິ ຕໍ ສຸຂທຸກ຺ຂເວທນໍ ຕທຸຠຍວຕ຺ຖຸສງ຺ຂາຕໍ ສາຕາສາຕໍ ອຸປນິສ຺ສາຍ ສໍໂຍຄວິໂຍຄປຕ຺ຖນາວເສນ ຉນ຺ໂທ ປໂຫຕິ. ເອຕ຺ຕາວຕາ ‘‘ຉນ຺ໂທ ນຸ ໂລກສ຺ມິໍ ກຸໂຕນິທາໂນ’’ຕິ ອຍໍ ປຎ຺ໂຫ ວິສ຺ສຊ຺ຊິໂຕ ໂຫຕິ. ຣູເປສຸ ທິສ຺ວາ ວິຠວໍ ຠວຎ຺ຈາຕິ ຣູເປສຸ ວຍຎ຺ຈ ອຸປ຺ປາທຎ຺ຈ ທິສ຺ວາ. ວິນິຈ຺ຉຍໍ ກຸພ຺ພຕິ ຊນ຺ຕຸ ໂລເກຕິ ອປາຍາທິເກ ໂລເກ ອຍໍ ຊນ຺ຕຸ ໂຠຄາຘິຄມຕ຺ຖໍ ຕຓ຺ຫາວິນິຈ຺ຉຍໍ ‘‘ອຕ຺ຕາ ເມ ອຸປ຺ປນ຺ໂນ’’ຕິອາທິນາ ນເຍນ ທິຏ຺ຐິວິນິຈ຺ຉຍຎ຺ຈ ກຸຣຸເຕ. ເອຕ຺ຕາວຕາ ‘‘ວິນິຈ຺ຉຍາ ຈາປິ ກຸໂຕປຠູຕາ’’ຕິ ອຍໍ ປຎ຺ໂຫ ວິສ຺ສຊ຺ຊິໂຕ ໂຫຕິ.

ສາຕາສາຕໍ ນິສ຺ສາຍາຕິ ມຘຸຣຎ຺ຈ ອມຘຸຣຎ຺ຈ ອຸປນິສ຺ສຍໍ ກຕ຺ວາ. ອິຏ຺ຐານິຏ຺ຐນ຺ຕິ ອິຏ຺ຐາຣມ຺ມຓຎ຺ຈ ອນິຏ຺ຐາຣມ຺ມຓຎ຺ຈ.

ສຸຣາເມຣຍມຊ຺ຊປ຺ປມາທຏ຺ຐານານຸໂຍຄນ຺ຕິ ເອຕ຺ຖ ສຸຣາຕິ ປິຏ຺ຐສຸຣາ ປູວສຸຣາ ໂອທນສຸຣາ ກິຓ຺ຓປກ຺ຂິຕ຺ຕາ ສມ຺ຠາຣສໍຍຸຕ຺ຕາຕິ ປຎ຺ຈ ສຸຣາ. ເມຣຍນ຺ຕິ ປຸປ຺ຜາສໂວ ຜລາສໂວ ມຘ຺ວາສໂວ ຄຸຬາສໂວ ສມ຺ຠາຣສໍຍຸຕ຺ໂຕຕິ ປຎ຺ຈ ອາສວາ. ຕໍ ສພ຺ພມ຺ປິ ມທກຣຓວເສນ ມຊ຺ຊໍ. ປມາທຏ຺ຐານນ຺ຕິ ປມາທກາຣຓໍ, ຍາຍ ເຈຕນາຍ ຕໍ ມຊ຺ຊໍ ປິວຕິ, ຕສ຺ເສຕໍ ອຘິວຈນໍ. ອນຸໂຍຄນ຺ຕິ ຕໍ ສຸຣາເມຣຍມຊ຺ຊປ຺ປມາທຏ຺ຐານານຸໂຍຄໍ ອນຸອາໂຍຄໍ ປຸນປ຺ປຸນໍ ກຣຓໍ. ຍສ຺ມາ ຈ ປນ ຕໍ ອນຸຍຸຕ຺ຕສ຺ສ ເມ ອຸປ຺ປນ຺ນາ ເຈວ ໂຠຄາ ປຣິຫາຍນ຺ຕິ, ອນຸປ຺ປນ຺ນາ ຈ ນຸປ຺ປຊ຺ຊນ຺ຕິ, ຕສ຺ມາ ‘‘ເມ ໂຠຄາ ປຣິກ຺ຂຍໍ ຂີຓຠາວໍ ຄຈ຺ຉນ຺ຕີ’’ຕິ ຊານາຕິ. ເອວໍ ສພ຺ພຕ຺ຖ. ວິກາລວິສິຂາຈຣິຍານຸໂຍຄນ຺ຕິ ອເວລາຍ ວິສິຂາສຸ ຈຣິຍານຸຍຸຕ຺ຕໍ. ສມຊ຺ຊາຠິຈຣຓນ຺ຕິ ນຈ຺ຈາທິທສ຺ສນວເສນ ສມຊ຺ຊາຠິຄມນໍ. ອາລສ຺ຍານຸໂຍຄນ຺ຕິ ກາຍາລສິຍຕາຍ ຍຸຕ຺ຕປ຺ປຍຸຕ຺ຕຕໍ. ອປາຍມຸຂານິ ນ ເສວຕີຕິ ໂຠຄານໍ ວິນາສທ຺ວາຣານິ ນ ເສວຕິ.

ກສິຍາ ວາຕິ ກສິກມ຺ເມນ ວາ. ວຓິຊ຺ຊາຍ ວາຕິ ຘມ຺ມິກວຓິຊ຺ຊກມ຺ເມນ ວາ. ໂຄຣກ຺ເຂນ ວາຕິ ໂຄປາລກມ຺ເມນ ວາ. ອິສ຺ສຕ຺ເຖນ ວາຕິ ຘນຸສິປ຺ເປນ ວາ. ຣາຊໂປຣິເສນ ວາຕິ ຣາຊເສວກກມ຺ເມນ ວາ. ສິປ຺ປຎ຺ຎຕເຣນ ວາຕິ ກຸມ຺ຠກາຣາທິສິປ຺ປານໍ ອຎ຺ຎຕເຣນ ວາ. ປຏິປຊ຺ຊຕີຕິ ປໂຍຄໍ ກໂຣຕິ. ຈກ຺ຂຸສ຺ມິໍ ອຸປ຺ປນ຺ເນ ຊານາຕີຕິ ສສມ຺ຠາຣຈກ຺ຂຸສ຺ມິໍ ອຸປ຺ປນ຺ເນ ຊານາຕິ. ‘‘ອຕ຺ຕາ ເມ ອຸປ຺ປນ຺ໂນ’’ຕິ ທິຏ຺ຐິໍ ຄຓ຺ຫາຕິ. ຈກ຺ຂຸສ຺ມິໍ ອນ຺ຕຣຫິເຕຕິ ຕສ຺ມິໍ ວິນຏ຺ເຐ. ອຕ຺ຕາ ເມ ອນ຺ຕຣຫິໂຕຕິ ‘‘ມມ ອຕ຺ຕາ ວິນຏ຺ໂຐ’’ຕິ ທິຏ຺ຐິໍ ຄຓ຺ຫາຕິ. ວິຄໂຕ ເມ ອຕ຺ຕາຕິ ວີຕິກ຺ກນ຺ໂຕ ມມ ອຕ຺ຕາ. ໂສຕສ຺ມິນ຺ຕິອາທີສຸປິ ເອເສວ ນໂຍ.

໑໐໓. ເອເຕປິ ຘມ຺ມາ ທ຺ວຍເມວ ສນ຺ເຕຕິ ເອເຕ ໂກຘາທໂຍ ຘມ຺ມາ ສາຕາສາຕທ຺ວເຍ ສນ຺ເຕ ເອວ ໂຫນ຺ຕິ ອຸປ຺ປຊ຺ຊນ຺ຕິ. ເອຕ຺ຕາວຕາ ຕຕິຍປຎ຺ໂຫປິ ວິສ຺ສຊ຺ຊິໂຕ ໂຫຕິ. ອິທານິ ໂຍ ເອວໍ ວິສ຺ສຊ຺ຊິເຕສຸ ເອເຕສຸ ປຎ຺ເຫສຸ ກຖໍກຖີ ຠເວຍ຺ຍ, ຕສ຺ສ ກຖໍກຖາປຫານູປາຍໍ ທສ຺ເສນ຺ໂຕ ອາຫ ‘‘ກຖໍກຖີ ຎາຓປຖາຍ ສິກ຺ເຂ’’ຕິ, ຎາຓທສ຺ສນຎາຓາຘິຄມນຕ຺ຖໍ ຕິສ຺ໂສ ສິກ຺ຂາ ສິກ຺ເຂຍ຺ຍາຕິ ວຸຕ຺ຕໍ ໂຫຕິ. ກິໍກາຣຓາ? ຎຕ຺ວາ ປວຸຕ຺ຕາ ສມເຓນ ຘມ຺ມາ. ພຸທ຺ຘສມເຓນ ຫິ ຎຕ຺ວາ ຘມ຺ມາ ວຸຕ຺ຕາ, ນຕ຺ຖິ ຕສ຺ສ ຘມ຺ເມສຸ ອຎ຺ຎາຓໍ, ອຕ຺ຕໂນ ປນ ຎາຓານຸຠາເວນ ເຕ ອຊານນ຺ໂຕ ນ ຊາເນຍ຺ຍ, ນ ເທສນາໂທເສນ. ຕສ຺ມາ ກຖໍກຖີ ຎາຓປຖາຍ ສິກ຺ເຂ, ຎຕ຺ວາ ປວຸຕ຺ຕາ ສມເຓນ ຘມ຺ມາຕິ.

ປກ຺ເຂປພນ຺ຘເນນ ວາ ພທ຺ໂຘຕິ ນາຄຣິກພນ຺ເຘນ ພທ຺ໂຘ. ປຣິກ຺ເຂປພນ຺ຘເນນ ວາຕິ ວຕິປຣິກ຺ເຂປພນ຺ຘເນນ ວາ. ຄາມພນ຺ຘເນນາຕິອາທີສຸ ຕສ຺ມາ ຕສ຺ມາ ຐານໂຕ ນິກ຺ຂມິຕຸໍ ອລຠນ຺ໂຕ ຄາມພນ຺ຘນາທີຫິ ພທ຺ໂຘ ນາມ ໂຫຕິ. ຕສ຺ສ ພນ຺ຘນສ຺ສ ໂມກ຺ຂຕ຺ຖາຍາຕິ ເອຕສ຺ສ ວຸຕ຺ຕປ຺ປກາຣສ຺ສ ພນ຺ຘນສ຺ສ ໂມຈນຕ຺ຖໍ.

ຎາຓມ຺ປິ ຎາຓປໂຖຕິ ປຸເຣ ອຸປ຺ປນ຺ນໍ ຎາຓໍ ອປຣາປຣຸປ຺ປນ຺ນສ຺ສ ຎາຓມ຺ປິ ຎາຓສ຺ສ ສຎ຺ຈຣຓມຄ຺ໂຄຕິ ຎາຓມ຺ປິ ຎາຓປໂຖ. ຎາຓສ຺ສ ອາຣມ຺ມຓມ຺ປິ ຎາຓປໂຖຕິ ຎາຓສ຺ສ ປຈ຺ຈໂຍປິ ຕໍ ອາລມ຺ພິຕ຺ວາ ອຸປ຺ປຊ຺ຊນໂຕ ຎາຓປໂຖ. ຎາຓສຫຠຸໂນປິ ຘມ຺ມາ ຎາຓປໂຖຕິ ຎາເຓນ ສຫຸປ຺ປນ຺ນາ ອວເສສາ ຈິຕ຺ຕເຈຕສິກາ ຘມ຺ມາປິ ຎາຓປໂຖ. ອິທານິ ອຸປມາຍ ສາເຘນ຺ໂຕ ‘‘ຍຖາ ອຣິຍມຄ຺ໂຄ ອຣິຍປໂຖ’’ຕິອາທິມາຫ.

ກຖໍກຖີ ປຸຄ຺ຄໂລຕິ ວິຈິກິຈ຺ຉາວນ຺ໂຕ ປຸຄ຺ຄໂລ. ສກງ຺ໂຂຕິ ສທ຺ເວຬ຺ຫໂກ. ສວິເລໂຂຕິ ຈິຕ຺ຕຣາຊິວນ຺ໂຕ. ສທ຺ເວຬ຺ຫໂກຕິ ກງ຺ຂາວນ຺ໂຕ. ສວິຈິກິຈ຺ໂຉຕິ ສນ຺ເທຫວນ຺ໂຕ. ຎາຓາຘິຄມາຍາຕິ ຎາຓປຏິລາຠຕ຺ຖາຍ. ຎາຓຜຸສນາຍາຕິ ຎາຓປຏິວິຊ຺ຌນຕ຺ຖາຍ. ອຖ ວາ ຎາຓວິນ຺ທນຕ຺ຖາຍ. ຎາຓສຈ຺ຉິກິຣິຍາຍາຕິ ຎາຓສ຺ສ ປຈ຺ຈກ຺ຂກຣຓຕ຺ຖາຍ. ສນິທານາຫນ຺ຕິ ອຫໍ ສນິທານໍ ສປຈ຺ຈຍໍ ກຕ຺ວາ ຘມ຺ມເທສນໍ ກໂຣມິ. ສປ຺ປາຏິຫາຣິຍນ຺ຕິ ນິຍ຺ຍານິກໍ ກຕ຺ວາ. ໂນ ອປ຺ປາຏິຫາຣິຍນ຺ຕິ ອນິຍ຺ຍານິກໍ ອກຕ຺ວາ ຘມ຺ມເທສນໍ ກໂຣມິ.

໑໐໔. ສາຕໍ ອສາຕຎ຺ຈ ກຸໂຕນິທານາຕິ ເອຕ຺ຖ ສາຕາສາຕນ຺ຕິ ສຸຂທຸກ຺ຂເວທນາ ເອວ ອຘິປ຺ເປຕາ. ນ ຠວນ຺ຕິ ເຫເຕຕິ ນ ຠວນ຺ຕິ ເອເຕ. ວິຠວໍ ຠວຎ຺ຈາປິ ຍເມຕມຕ຺ຖໍ, ເອຕໍ ເມ ປພ຺ຣູຫິ ຍໂຕນິທານນ຺ຕິ ສາຕາສາຕານໍ ວິຠວໍ ຠວຎ຺ຈ ເອຕມ຺ປິ ຍໍ ອຕ຺ຖໍ. ລິງ຺ຄພ຺ຍຕ຺ຕໂຍ ເອຕ຺ຖ ກໂຕ. ອິທໍ ປນ ວຸຕ຺ຕໍ ໂຫຕິ – ສາຕາສາຕານໍ ວິຠໂວ ຠໂວ ຈາຕິ ໂຍ ເອສ ອຕ຺ໂຖ, ເອຕໍ ເມ ປພ຺ຣູຫິ ຍໂຕນິທານນ຺ຕິ. ເອຕ຺ຖ ຈ ສາຕາສາຕານໍ ວິຠວຠວວຕ຺ຖຸກາ ວິຠວຠວທິຏ຺ຐິໂຍ ເອວ ວິຠວຠວາຕິ ອຕ຺ຖໂຕ ເວທິຕພ຺ພາ. ຕຖາ ຫິ ອິມສ຺ສ ປຎ຺ຫສ຺ສ ວິສ຺ສຊ຺ຊນປກ຺ເຂ ‘‘ຠວທິຏ຺ຐິປິ ຜສ຺ສນິທານາ, ວິຠວທິຏ຺ຐິປິ ຜສ຺ສນິທານາ’’ຕິ ອຸປຣິ ນິທ຺ເທເສ (ມຫານິ. ໑໐໕) ວກ຺ຂຕິ. ອິມາຍ ຄາຖາຍ ນິທ຺ເທເສ ວຕ຺ຕພ຺ພໍ ນຕ຺ຖິ.

໑໐໕. ອິໂຕນິທານນ຺ຕິ ຜສ຺ສນິທານໍ. ອິມາຍປິ ວຕ຺ຕພ຺ພໍ ນຕ຺ຖິ.

໑໐໖. ກິສ຺ມິໍ ວິຠູເຕ ນ ຜຸສນ຺ຕິ ຜສ຺ສາຕິ ກິສ຺ມິໍ ວີຕິວຕ຺ເຕ ຈກ຺ຂຸສມ຺ຜສ຺ສາທໂຍ ປຎ຺ຈ ຜສ຺ສາ ນ ຜຸສນ຺ຕິ. ອິມາຍປິ ວຕ຺ຕພ຺ພໍ ນຕ຺ຖິ.

໑໐໗. ນາມຎ຺ຈ ຣູປຎ຺ຈ ປຏິຈ຺ຈາຕິ ສມ຺ປຍຸຕ຺ຕກນາມຎ຺ຈ ວຕ຺ຖາຣມ຺ມຓຣູປຎ຺ຈ ປຏິຈ຺ຈ. ຣູເປ ວິຠູເຕ ນ ຜຸສນ຺ຕິ ຜສ຺ສາຕິ ຣູເປ ວີຕິວຕ຺ເຕ ປຎ຺ຈ ຜສ຺ສາ ນ ຜຸສນ຺ຕິ.

ຕິຓ຺ຓໍ ສງ຺ຄຕິ ຜສ຺ໂສຕິ ຈກ຺ຂຸຣູປວິຎ຺ຎາຓານໍ ຕິຓ຺ຓນ຺ນໍ ສງ຺ຄຕິຍາ ຜສ຺ໂສ ຊາຍຕິ. ຈກ຺ຂຸ ຈ ຣູປາ ຈ ຣູປສ຺ມິນ຺ຕິ ປສາທຈກ຺ຂຸຎ຺ຈ ຣູປາຣມ຺ມຓານິ ຈ ຣູປຠາເຄ ຣູປໂກຏ຺ຐາເສ ກຕ຺ວາ. ຈກ຺ຂຸສມ຺ຜສ຺ສໍ ຐເປຕ຺ວາຕິ ຕິຓ຺ຓໍ ສງ຺ຄຕິຍາ ອຸປ຺ປນ຺ນຜສ຺ສໍ ມຸຎ຺ຈິຕ຺ວາ. ສມ຺ປຍຸຕ຺ຕກາ ຘມ຺ມາ ນາມສ຺ມິນ຺ຕິ ອວເສສາ ເວທນາທໂຍ ຜສ຺ເສນ ສຫຊາຕາ ຘມ຺ມາ ນາມຠາເຄ. ໂສຕຎ຺ຈ ປຏິຈ຺ຈາຕິອາທີສຸປິ ເອເສວ ນໂຍ.

ຈຕູຫາກາເຣຫິ ຣູປໍ ວິຠູຕໍ ໂຫຕີຕິ ຈຕູຫິ ກາຣເຓຫິ ຣູປໍ ວີຕິວຕ຺ຕໍ ໂຫຕິ. ຎາຕວິຠູເຕນາຕິ ປາກຏໍ ກຕ຺ວາ ວີຕິວຕ຺ເຕນ. ຕີຣຓວິຠູເຕນາຕິ ອນິຈ຺ຈາທິໂຕ ຕີຣຍິຕ຺ວາ ວີຕິວຕ຺ເຕນ. ປຫານວິຠູເຕນາຕິ ຉນ຺ທຣາຄປຫານໂຕ ວີຕິວຕ຺ເຕນ. ສມຕິກ຺ກມວິຠູເຕນາຕິ ຈຕຸນ຺ນໍ ອຣູປສມາປຕ຺ຕີນໍ ປຏິລາຠວເສນ ວີຕິວຕ຺ເຕນ.

໑໐໘. ກຖໍ ສເມຕສ຺ສາຕິ ກຖໍ ປຏິປນ຺ນສ຺ສ. ວິໂຠຕິ ຣູປນ຺ຕິ ຣູປໍ ວິຠວຕິ, ນ ຠເວຍ຺ຍ ວາ. ສຸຂໍ ທຸຂຎ຺ຈາຕິ ອິຏ຺ຐານິຏ຺ຐຣູປເມວ ປຸຈ຺ຉຕິ.

ຊາເນຍ຺ຍາມາຕິ ຊານິສ຺ສາມ. ອາຊາເນຍ຺ຍາມາຕິ ວິເສເສນ ຊານິສ຺ສາມ. ວິຊາເນຍ຺ຍາມາຕິ ອເນກວິເຘນ ຊານິສ຺ສາມ. ປຏິວິຊາເນຍ຺ຍາມາຕິ ສມ຺ມາ ຊານິສ຺ສາມ. ປຏິວິຊ຺ເຌຍ຺ຍາມາຕິ ຈິຕ຺ເຕນ ພຸຊ຺ຌິສ຺ສາມ.

໑໐໙. ນ ສຎ຺ຎສຎ຺ຎີຕິ ຍຖາ ສເມຕສ຺ສ ວິໂຠຕິ ຣູປໍ, ໂສ ປກຕິສຎ຺ຎາຍ ສຎ຺ຎີປິ ນ ໂຫຕິ. ນ ວິສຎ຺ຎສຎ຺ຎີຕິ ວິສຎ຺ຎາຍປິ ວິຣູປາຍ ສຎ຺ຎາຍ ວິສຎ຺ຎີ ນ ໂຫຕິ ອຸມ຺ມຕ຺ຕໂກ ວາ ຂິຕ຺ຕຈິຕ຺ໂຕ ວາ. ໂນປິ ອສຎ຺ຎີຕິ ສຎ຺ຎາວິຣຫິໂຕປິ ນ ໂຫຕິ ນິໂຣຘສມາປນ຺ໂນ ວາ ອສຎ຺ຎສຕ຺ໂຕ ວາ. ນ ວິຠູຕສຎ຺ຎີຕິ ‘‘ສພ຺ພໂສ ຣູປສຎ຺ຎານ’’ນ຺ຕິອາທິນາ (ວິຠ. ໕໐໘) ນເຍນ ສມຕິກ຺ກນ຺ຕສຎ຺ຎີປິ ນ ໂຫຕິ ອຣູປຊ຺ຌານລາຠີ. ເອວໍ ສເມຕສ຺ສ ວິໂຠຕິ ຣູປນ຺ຕິ ເອຕສ຺ມິໍ ສຎ຺ຎສຎ຺ຎິຕາທິຠາເວ ອຏ຺ຐຕ຺ວາ ຍເທຕໍ ວຸຕ຺ຕໍ ‘‘ໂສ ເອວໍ ສມາຫິເຕ ຈິຕ຺ເຕ…ເປ… ອາກາສານຎ຺ຈາຍຕນສມາປຕ຺ຕິປຏິລາຠຕ຺ຖາຍ ຈິຕ຺ຕໍ ອຠິນີຫຣຕີ’’ຕິ, ເອວໍ ສເມຕສ຺ສ ອຣູປມຄ຺ຄສມງ຺ຄິໂນ ວິໂຠຕິ ຣູປໍ. ສຎ຺ຎານິທານາ ຫິ ປປຎ຺ຈສງ຺ຂາຕິ ເອວໍ ປຏິປນ຺ນສ຺ສາປິ ຈ ຍາ ສຎ຺ຎາ, ຕໍນິທານາ ຕຓ຺ຫາທິຏ຺ຐິປປຎ຺ຈາສ຺ສ ອປ຺ປຫີນາວ ໂຫນ຺ຕີຕິ ທສ຺ເສຕິ.

ອສຎ຺ຎິໂນ ວຸຈ຺ຈນ຺ຕິ ນິໂຣຘສມາປນ຺ນາຕິ ສຎ຺ຎາເວທນາ ນິໂຣເຘຕ຺ວາ ນິໂຣຘສມາປນ຺ນາ ສຎ຺ຎາຠາເວນ ອສຎ຺ຎິໂນຕິ ກຖີຍນ຺ຕິ. ອສຎ຺ຎສຕ຺ຕາຕິ ສພ຺ເພນ ສພ຺ພໍ ສຎ຺ຎາຠາເວນ ອສຎ຺ຎຠເວ ນິພ຺ພຕ຺ຕາ.

ໂສ ເອວໍ ສມາຫິເຕ ຈິຕ຺ເຕຕິ ຕຕ຺ຖ ໂສຕິ ໂສ ຠິກ຺ຂຸ. ເອວນ຺ຕິ ຈຕຸຕ຺ຖຊ຺ຌານກ຺ກມນິທສ຺ສນເມຕໍ, ອິມິນາ ກເມນ ຈຕຸຕ຺ຖຊ຺ຌານໍ ປຏິລຠິຕ຺ວາຕິ ວຸຕ຺ຕໍ ໂຫຕິ. ສມາຫິເຕຕິ ອິມິນາ ຈຕຸຕ຺ຖຊ຺ຌານສມາຘິນາ ສມາຫິເຕ. ປຣິສຸທ຺ເຘຕິອາທີສຸ ປນ ອຸເປກ຺ຂາສຕິປາຣິສຸທ຺ຘິຠາເວນ ປຣິສຸທ຺ເຘ. ປຣິສຸທ຺ຘຕ຺ຕາເຍວ ປຣິໂຍທາເຕ, ປຠສ຺ສເຣຕິ ວຸຕ຺ຕໍ ໂຫຕິ. ສຸຂາທີນໍ ປຈ຺ຈຍານໍ ຆາເຕນ ວິຫຕຣາຄາທິອງ຺ຄຓຕ຺ຕາ ອນງ຺ຄເຓ. ອນງ຺ຄຓຕ຺ຕາ ເອວ ຈ ວິຄຕູປກ຺ກິເລເສ. ອງ຺ຄເຓນ ຫິ ຈິຕ຺ຕໍ ອຸປກ຺ກິລິສ຺ສຕິ. ສຸຠາວິຕຕ຺ຕາ ມຸທຸຠູເຕ, ວສີຠາວປ຺ປຕ຺ເຕຕິ ວຸຕ຺ຕໍ ໂຫຕິ. ວເສ ວຕ຺ຕມານຎ຺ຫິ ຈິຕ຺ຕໍ ມຸທູຕິ ວຸຈ຺ຈຕິ. ມຸທຸຕ຺ຕາເຍວ ຈ ກມ຺ມນິເຍ, ກມ຺ມກ຺ຂເມ ກມ຺ມໂຍຄ຺ເຄຕິ ວຸຕ຺ຕໍ ໂຫຕິ. ມຸທຸ ຫິ ຈິຕ຺ຕໍ ກມ຺ມນິຍໍ ໂຫຕິ ສຸທ຺ຘນ຺ຕມິວ ສຸວຓ຺ຓໍ. ຕທຸຠຍມ຺ປິ ຈ ສຸຠາວິຕຕ຺ຕາເຍວ. ຍຖາຫ ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ, ຍໍ ເອວໍ ຠາວິຕໍ ກມ຺ມນິຍໍ ໂຫຕິ ຍຖຍິທໍ, ຠິກ຺ຂເວ, ຈິຕ຺ຕ’’ນ຺ຕິ (ອ. ນິ. ໑.໒໒).

ເອເຕສຸ ຫິ ປຣິສຸທ຺ຘຠາວາທີສຸ ຐິຕຕ຺ຕາ ຐິເຕ. ຐິຕຕ຺ຕາເຍວ ອາເນຎ຺ຊປ຺ປຕ຺ເຕ ອຈເລ ນິຣິຎ຺ຊເນຕິ ວຸຕ຺ຕໍ ໂຫຕິ. ມຸທຸກມ຺ມຎ຺ຎຠາເວນ ວາ ອຕ຺ຕໂນ ວເສ ຐິຕຕ຺ຕາ ຐິເຕ. ສທ຺ຘາທີຫິ ປຣິຄ຺ຄຫິຕຕ຺ຕາ ອາເນຎ຺ຊປ຺ປຕ຺ເຕ. ສທ຺ຘາປຣິຄ຺ຄຫິຕຎ຺ຫິ ຈິຕ຺ຕໍ ອສ຺ສທ຺ຘິເຍນ ນ ອິຎ຺ຊຕິ, ວີຣິຍປຣິຄ຺ຄຫິຕໍ ໂກສຊ຺ເຊນ ນ ອິຎ຺ຊຕິ, ສຕິປຣິຄ຺ຄຫິຕໍ ປມາເທນ ນ ອິຎ຺ຊຕິ, ສມາຘິປຣິຄ຺ຄຫິຕໍ ອຸທ຺ຘຈ຺ເຈນ ນ ອິຎ຺ຊຕິ, ປຎ຺ຎາປຣິຄ຺ຄຫິຕໍ ອວິຊ຺ຊາຍ ນ ອິຎ຺ຊຕິ, ໂອຠາສຄຕໍ ກິເລສນ຺ຘກາເຣນ ນ ອິຎ຺ຊຕິ. ອິເມຫິ ຉຫິ ຘມ຺ເມຫິ ປຣິຄ຺ຄຫິຕຸໍ ອາເນຎ຺ຊປ຺ປຕ຺ຕໍ ໂຫຕິ. ເອວໍ ອຏ຺ຐງ຺ຄສມນ຺ນາຄຕໍ ຈິຕ຺ຕໍ ອຠິນີຫາຣກ຺ຂມໍ ໂຫຕິ ອາກາສານຎ຺ຈາຍຕນສມາປຕ຺ຕິປຏິລາຠຕ຺ຖາຍ.

ອປໂຣ ນໂຍ – ຈຕຸຕ຺ຖຊ຺ຌານສມາຘິນາ ສມາຫິເຕ. ນີວຣຓທູຣີຠາເວນ ປຣິສຸທ຺ເຘ. ວິຕກ຺ກາທິສມຕິກ຺ກເມນ ປຣິໂຍທາເຕ. ຌານປຏິລາຠປຈ຺ຈນິການໍ ປາປການໍ ອິຈ຺ຉາວຈຣານຎ຺ຈ ອຠາເວນ ອນງ຺ຄເຓ. ອິຈ຺ຉາວຈຣານນ຺ຕິ ອິຈ຺ຉາຍ ອວຈຣານໍ, ອິຈ຺ຉາວເສນ ໂອຕິຓ຺ຓານໍ ປວຕ຺ຕານໍ ນານປ຺ປກາຣານໍ ໂກປອປ຺ປຈ຺ຈຍານນ຺ຕິ ອຕ຺ໂຖ. ອຠິຊ຺ຌາທີນໍ ຈິຕ຺ຕູປກ຺ກິເລສານໍ ວິຄເມນ ວິຄຕູປກ຺ກິເລເສ. ອຸຠຍມ຺ປິ ເຈຕໍ ອງ຺ຄຓສຸຕ຺ຕວຕ຺ຖສຸຕ຺ຕານຸສາເຣເນວ (ມ. ນິ. ໑.໕໗ ອາທໂຍ, ໗໐ ອາທໂຍ) ເວທິຕພ຺ພໍ. ວສິປ຺ປຕ຺ຕິຍາ ມຸທຸຠູເຕ. ອິທ຺ຘິປາທຠາວູປຄມເນນ ກມ຺ມນິເຍ. ຠາວນາປາຣິປູຣິຍາ ປຓີຕຠາວູປຄເມນ ຐິເຕ ອາເນຎ຺ຊປ຺ປຕ຺ເຕ, ຍຖາ ອາເນຎ຺ຊຠາວໍ ອາເນຎ຺ຊປ຺ປຕ຺ຕໍ ໂຫຕິ, ເອວໍ ຐິເຕຕິ ອຕ຺ໂຖ. ເອວມ຺ປິ ອຏ຺ຐງ຺ຄສມນ຺ນາຄເມນ ຈິຕ຺ຕໍ ອຠິນີຫາຣກ຺ຂມໍ ໂຫຕິ ອາກາສານຎ຺ຈາຍຕນສມາປຕ຺ຕິປຏິລາຠຕ຺ຖາຍ ປາທກໍ ປທຏ຺ຐານຠູຕໍ.

ອາຣຸປ຺ປມຄ຺ຄສມງ຺ຄີຕິ ອຣູປສມາປຕ຺ຕິຍາ ຄມນມຄ຺ເຄນ ອປຣິຫີໂນ. ປປຎ຺ຈາເຍວ ປປຎ຺ຈສງ຺ຂາຕິ ຕຓ຺ຫາທິປປຎ຺ຈາເຍວ ປປຎ຺ຈສງ຺ຂາ.

໑໑໐. ເອຕ຺ຕາວຕຄ຺ຄໍ ນຸ ວທນ຺ຕິ ເຫເກ, ຍກ຺ຂສ຺ສ ສຸທ຺ຘິໍ ອິຘ ປຓ຺ຑິຕາເສ. ອຸທາຫຸ ອຎ຺ຎມ຺ປິ ວທນ຺ຕິ ເອຕ຺ໂຕຕິ ເອຕ຺ຕາວຕາ ນຸ ອິຘ ປຓ຺ຑິຕາ ສມຓພ຺ຣາຫ຺ມຓາ ອຄ຺ຄໍ ສຸທ຺ຘິໍ ສຕ຺ຕສ຺ສ ວທນ຺ຕິ, ອຸທາຫຸ ອຎ຺ຎມ຺ປິ ເອຕ຺ໂຕ ອຣູປສມາປຕ຺ຕິໂຕ ອຘິກຎ຺ຈ ວທນ຺ຕີຕິ ປຸຈ຺ຉຕິ.

ເອຕ຺ໂຕ ອຣູປສມາປຕ຺ຕິໂຕຕິ ເອຕສ຺ມາ ອຣູປສມາປຕ຺ຕິໂຕ.

໑໑໑. ເອຕ຺ຕາວຕຄ຺ຄມ຺ປິ ວທນ຺ຕິ ເຫເກຕິ ເອເກ ສສ຺ສຕວາທາ ສມຓພ຺ຣາຫ຺ມຓາ ປຓ຺ຑິຕມານິໂນ ເອຕ຺ຕາວຕາປິ ອຄ຺ຄໍ ສຸທ຺ຘິໍ ວທນ຺ຕິ. ເຕສໍ ປເນເກ ສມຍໍ ວທນ຺ຕີຕິ ເຕສຎ຺ເຎວ ເອເກ ອຸຈ຺ເຉທວາທາ ສມຍໍ ອຸຈ຺ເຉທໍ ວທນ຺ຕິ. ອນຸປາທິເສເສ ກຸສລາວທານາຕິ ອນຸປາທິເສເສ ກຸສລວາທາ ສມານາ.

ຠວຕຊ຺ຊິຕາຕິ ຠວໂຕ ຠີຕາ. ວິຠວໍ ອຠິນນ຺ທນ຺ຕີຕິ ອຸຈ຺ເຉທໍ ປຏິຈ຺ຈ ຕຸສ຺ສນ຺ຕິ. ເຕ ສຕ຺ຕສ຺ສ ສມນ຺ຕິ ເຕ ອຸຈ຺ເຉທວາທິໂນ ປຸຄ຺ຄລສ຺ສ ສມໍ ອນຸປ຺ປຕ຺ຕິໍ ວທນ຺ຕິ. ອຸປສມນ຺ຕິ ອຕີວ ສມໍ. ວູປສມນ຺ຕິ ສນ຺ຕໍ. ນິໂຣຘນ຺ຕິ ອນຸປ຺ປາທໍ. ປຏິປສ຺ສທ຺ຘິນ຺ຕິ ອປຸນຸປ຺ປຕ຺ຕິໍ.

໑໑໒. ເອເຕ ຈ ຎຕ຺ວາ ອຸປນິສ຺ສິຕາຕິ ເອເຕ ຈ ທິຏ຺ຐິຄຕິເກ ສສ຺ສຕຸຈ຺ເຉທທິຏ຺ຐິໂຍ ນິສ຺ສິຕາຕິ ຎຕ຺ວາ. ຎຕ຺ວາ ມຸນີ ນິສ຺ສເຍ ໂສ ວີມໍສີຕິ ນິສ຺ສເຍ ຈ ຎຕ຺ວາ ໂສ ວີມໍສີ ປຓ຺ຑິໂຕ ພຸທ຺ຘມຸນິ. ຎຕ຺ວາ ວິມຸຕ຺ໂຕຕິ ທຸກ຺ຂານິຈ຺ຈາທິໂຕ ຘມ຺ເມ ຎຕ຺ວາ ວິມຸຕ຺ໂຕ. ຠວາຠວາຍ ນ ສເມຕີຕິ ປຸນປ຺ປຸນໍ ອຸປປຕ຺ຕິຍາ ນ ສມາຄຈ຺ຉຕິ. ອປຣາມສນ຺ຕິ ອປຣາມສນ຺ໂຕ. ປຣາມາສໍ ນາປຊ຺ຊນ຺ໂຕຕິ ອຕ຺ໂຖ.

ສທ຺ຘມ຺ມປ຺ປຊ຺ໂຊຕິກາຍ ມຫານິທ຺ເທສຏ຺ຐກຖາຍ

ກລຫວິວາທສຸຕ຺ຕນິທ຺ເທສວຓ຺ຓນາ ນິຏ຺ຐິຕາ.