ເຍ ອຣິຍສຈ຺ຈານີຕິຄາຖາວຓ຺ຓນາ

໙. ເອວໍ ອວິເສສໂຕ ໂສຕາປນ຺ນສ຺ສ ຄຸເຓນ ສງ຺ຆາຘິຏ຺ຐານໍ ສຈ຺ຈໍ ວຕ຺ວາ ອິທານິ ເຍ ເຕ ຕໂຍ ໂສຕາປນ຺ນາ ເອກພີຊີ ໂກລໍໂກໂລ ສຕ຺ຕກ຺ຂຕ຺ຕຸປຣໂມຕິ. ຍຖາຫ –

‘‘ອິເຘກຈ຺ໂຈ ປຸຄ຺ຄໂລ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ໂນ ໂຫຕິ…ເປ… ໂສ ເອກໍເຍວ ຠວໍ ນິພ຺ພຕ຺ຕິຕ຺ວາ ທຸກ຺ຂສ຺ສນ຺ຕໍ ກໂຣຕິ, ອຍໍ ເອກພີຊີ. ຕຖາ ທ຺ເວ ວາ ຕີຓິ ວາ ກຸລານິ ສນ຺ຘາວິຕ຺ວາ ສໍສຣິຕ຺ວາ ທຸກ຺ຂສ຺ສນ຺ຕໍ ກໂຣຕິ, ອຍໍ ໂກລໍໂກໂລ. ຕຖາ ສຕ຺ຕກ຺ຂຕ຺ຕຸໍ ເທເວສຸ ຈ ມນຸສ຺ເສສຸ ຈ ສນ຺ຘາວິຕ຺ວາ ສໍສຣິຕ຺ວາ ທຸກ຺ຂສ຺ສນ຺ຕໍ ກໂຣຕິ, ອຍໍ ສຕ຺ຕກ຺ຂຕ຺ຕຸປຣໂມ’’ຕິ (ປຸ. ປ. ໓໑-໓໓).

ເຕສໍ ສພ຺ພກນິຏ຺ຐສ຺ສ ສຕ຺ຕກ຺ຂຕ຺ຕຸປຣມສ຺ສ ຄຸເຓນ ວຕ຺ຕຸມາຣທ຺ໂຘ ‘‘ເຍ ອຣິຍສຈ຺ຈານີ’’ຕິ. ຕຕ຺ຖ ເຍ ອຣິຍສຈ຺ຈານີຕິ ເອຕໍ ວຸຕ຺ຕນຍເມວ. ວິຠາວຍນ຺ຕີຕິ ປຎ຺ຎາໂອຠາເສນ ສຈ຺ຈປ຺ປຏິຈ຺ຉາທກໍ ກິເລສນ຺ຘກາຣໍ ວິຘມິຕ຺ວາ ອຕ຺ຕໂນ ປກາສານິ ປາກຏານິ ກໂຣນ຺ຕິ. ຄມ຺ຠີຣປຎ຺ເຎນາຕິ ອປ຺ປເມຍ຺ຍປຎ຺ຎຕາຍ ສເທວກສ຺ສ ໂລກສ຺ສ ຎາເຓນ ອລພ຺ຠເນຍ຺ຍປ຺ປຕິຏ຺ຐປຎ຺ເຎນ, ສພ຺ພຎ຺ຎຸນາຕິ ວຸຕ຺ຕໍ ໂຫຕິ. ສຸເທສິຕານີຕິ ສມາສພ຺ຍາສສາກລ຺ຍເວກລ຺ຍາທີຫິ ເຕຫິ ເຕຫິ ນເຍຫິ ສຸຏ຺ຐຸ ເທສິຕານິ. ກິຎ຺ຈາປິ ເຕ ໂຫນ຺ຕິ ຠຸສໍ ປມຕ຺ຕາຕິ ເຕ ວິຠາວິຕອຣິຍສຈ຺ຈາ ປຸຄ຺ຄລາ ກິຎ຺ຈາປິ ເທວຣຊ຺ຊຈກ຺ກວຕ຺ຕິຣຊ຺ຊາທິປ຺ປມາທຏ຺ຐານໍ ອາຄມ຺ມ ຠຸສໍ ປມຕ຺ຕາ ໂຫນ຺ຕິ, ຕຖາປິ ໂສຕາປຕ຺ຕິມຄ຺ຄຎາເຓນ ອຠິສງ຺ຂາຣວິຎ຺ຎາຓສ຺ສ ນິໂຣເຘນ ຐເປຕ຺ວາ ສຕ຺ຕ ຠເວ ອນມຕຄ຺ເຄ ສໍສາເຣ ເຍ ອຸປ຺ປຊ຺ເຊຍ຺ຍຸໍ ນາມຎ຺ຈ ຣູປຎ຺ຈ, ເຕສໍ ນິຣຸທ຺ຘຕ຺ຕາ ອຕ຺ຖງ຺ຄຕຕ຺ຕາ ນ ອຏ຺ຐມໍ ຠວໍ ອາທິຍນ຺ຕິ, ສຕ຺ຕມຠເວ ເອວ ປນ ວິປສ຺ສນໍ ອາຣຠິຕ຺ວາ ອຣຫຕ຺ຕໍ ປາປຸຓນ຺ຕິ.

ເອວໍ ຠຄວາ ສຕ຺ຕກ຺ຂຕ຺ຕຸປຣມວເສນ ສງ຺ຆຣຕນສ຺ສ ຄຸຓໍ ວຕ຺ວາ ອິທານິ ຕເມວ ຄຸຓໍ ນິສ຺ສາຍ ສຈ຺ຈວຈນໍ ປຍຸຎ຺ຊຕິ ‘‘ອິທມ຺ປິ ສງ຺ເຆ’’ຕິ. ຕສ຺ສຕ຺ໂຖ ປຸພ຺ເພ ວຸຕ຺ຕນເຍເນວ ເວທິຕພ຺ໂພ. ອິມິສ຺ສາປິ ຄາຖາຍ ອາຓາ ໂກຏິສຕສຫສ຺ສຈກ຺ກວາເຬສຸ ອມນຸສ຺ເສຫິ ປຏິຄ຺ຄຫິຕາຕິ.