໔໙. ປໍສຸກູລວຄ຺ໂຄ

໑-໑໐. ປໍສຸກູລສຎ຺ຎກຕ຺ເຖຣອປທານາທິວຓ຺ຓນາ

ເອກູນປຎ຺ຎາສມວຄ຺ເຄ ປຐມາປທານໍ ສຸວິຎ຺ເຎຍ຺ຍເມວ.

໑໔. ທຸຕິຍາປທາເນ ອຘິຈ຺ຈຸປ຺ປຕ຺ຕິກາ ພຸທ຺ຘາຕິ ອຘິຈ຺ເຈນ ອກາຣເຓນ ອຸປ຺ປຕ຺ຕິກາ ສຍມ຺ຠູຕາ, ອຎ຺ເຎຫິ ເທວພ຺ຣຫ຺ມມາຣາທີຫິ ອຸປເທສທາຍເກຫິ ຣຫິຕາ ສຍມ຺ຠູຎາເຓນ ອຸປ຺ປນ຺ນາ ຊາຕາ ປາຕຸຠູຕາຕິ ອຕ຺ໂຖ.

໑໖. ໂອທຸມ຺ພຣິກປຸປ຺ຜໍ ວາຕິ ອຸທຸມ຺ພຣຣຸກ຺ເຂ ປຸປ຺ຜໍ ທຸລ຺ລຠໍ ທຸລ຺ລຠຸປ຺ປຕ຺ຕິກໍ ອິວ. ຈນ຺ທມ຺ຫິ ສສກໍ ຍຖາຕິ ຈນ຺ທມຓ຺ຑເລ ສສເລຂາຍ ຣູປໍ ທຸລ຺ລຠໍ ຍຖາ. ວາຍສານໍ ຍຖາ ຂີຣນ຺ຕິ ກາການໍ ນິຈ຺ຈໍ ຣຕ຺ຕິນ຺ທິວໍ ຂຸທ຺ທາປີຬິຕຠາເວນ ຂີຣໍ ທຸລ຺ລຠໍ ຍຖາ, ເອວໍ ທຸລ຺ລຠໍ ໂລກນາຍກໍ ຈຕຸຣາສງ຺ຂ຺ເຍຍ຺ຍໍ ວາ ອຏ຺ຐາສງ຺ຂ຺ເຍຍ຺ຍໍ ວາ ໂສຬສາສງ຺ຂ຺ເຍຍ຺ຍໍ ວາ ກປ຺ປສຕສຫສ຺ສໍ ປາຣມິໂຍ ປູເຣຕ຺ວາ ພຸທ຺ຘຠາວໂຕ ທຸລ຺ລໂຠ ໂລກນາຍໂກຕິ ອຕ຺ໂຖ.

໓໐. ຕຕິຍາປທາເນ ມຘຸໍ ຠິເສຫິ ສວຕີຕິ ໂປກ຺ຂຣມຘຸປທຸມເກສເຣຫິ ສວຕິ ປຄ຺ຆຣຕິ. ຂີຣໍ ສປ຺ປິໍ ມຸຬາລິຠີຕິ ຂີຣຎ຺ຈ ສປ຺ປິຣສຎ຺ຈ ປທຸມມຸຬາເລຫິ ສວຕິ ປຄ຺ຆຣຕິ. ຕສ຺ມາ ຕທຸຠຍໍ ມມ ສນ຺ຕກໍ ພຸທ຺ໂຘ ປຏິຄ຺ຄຓ຺ຫຕູຕິ ອຕ຺ໂຖ.

ຈຕຸຕ຺ຖປຎ຺ຈມຉຏ຺ຐາປທານານິ ອຸຕ຺ຕານາເນວ.

໑໑໙. ສຕ຺ຕມາປທາເນ ຈຕ຺ຕາລີສທິຊາປິ ຈາຕິ ທ຺ວິກ຺ຂຕ຺ຕຸໍ ຊາຕາຕິ ທິຊາ. ກຸມາຣວເຍ ອຸຏ຺ຐິຕທນ຺ຕານໍ ປຕິຕຕ຺ຕາ ປຸນ ອຸຏ຺ຐິຕທນ຺ຕາ ທິຊາ, ເຕ ຈ ທນ຺ຕາ. ພ຺ຍາກຣຓຎ຺ຈ ເຫຏ຺ຐາ ນິທານກຖາຍໍ ວຸຕ຺ຕເມວ.

ອຏ຺ຐມາປທານໍ ອຸຕ຺ຕານເມວາຕິ.

໑໗໑. ນວມາປທາເນ ຕທາຫໍ ມາຓໂວ ອາສິນ຺ຕິ ຍທາ ສຸເມຘປຓ຺ຑິໂຕ ທີປງ຺ກຣຠຄວໂຕ ສນ຺ຕິກາ ພ຺ຍາກຣຓໍ ລຠິ, ຕທາ ອຫໍ ເມໂຆ ນາມ ພ຺ຣາຫ຺ມຓມາຓໂວ ຫຸຕ຺ວາ ສຸເມຘຕາປເສນ ສຫ ອິສິປພ຺ພຊ຺ຊໍ ປພ຺ພຊິຕ຺ວາ ສິກ຺ຂາປເທສຸ ສິກ຺ຂິໂຕ ເກນຈິ ປາປສຫາເຍນ ສໍສຏ຺ໂຐ ສໍສຄ຺ຄໂທເສນ ປາປວິຕກ຺ກາທິວສໍ ຄໂຕ ມາຕຸຆາຕກມ຺ມວເສນ ນຣເກ ອຄ຺ຄິຊາລາທິທຸກ຺ຂມນຸຠວິຕ຺ວາ ຕໂຕ ຈຸໂຕ ສມຸທ຺ເທ ຕິມິງ຺ຄລມຫາມຈ຺ໂຉ ຫຸຕ຺ວາ ນິພ຺ພຕ຺ໂຕ, ສມຸທ຺ທມຊ຺ເຌ ຄຈ຺ຉນ຺ຕໍ ມຫານາວໍ ຄິລິຕຸກາໂມ ຄໂຕ. ທິສ຺ວາ ມໍ ວາຓິຊາ ຠີຕາ ‘‘ອໂຫ ໂຄຕໂມ ຠຄວາ’’ຕິ ສທ຺ທມກໍສຸ. ອຖ ມຫາມຈ຺ໂຉ ປຸພ຺ພວາສນາວເສນ ພຸທ຺ຘຄາຣວໍ ອຸປ຺ປາເທຕ຺ວາ ຕໂຕ ຈຸໂຕ ສາວຕ຺ຖິຍໍ ວິຠວສມ຺ປນ຺ເນ ພ຺ຣາຫ຺ມຓກຸເລ ນິພ຺ພຕ຺ໂຕ ສທ຺ໂຘ ປສນ຺ໂນ ສຕ຺ຖຸ ຘມ຺ມເທສນໍ ສຸຕ຺ວາ ປພ຺ພຊິຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິຕ຺ວາ ທິວສສ຺ສ ຕິກ຺ຂຕ຺ຕຸໍ ອຸປຏ຺ຐານໍ ຄນ຺ຕ຺ວາ ສຣມາໂນ ວນ຺ທຕິ. ຕທາ ຠຄວາ ‘‘ຈິຣໍ ຘມ຺ມຣຸຈີ’’ຕິ ມໍ ອາຫ.

໑໘໔. ອຖ ໂສ ເຖໂຣ ‘‘ສຸຈິຣໍ ສຕປຸຎ຺ຎລກ຺ຂຓ’’ນ຺ຕິອາທີຫິ ຄາຖາຫິ ໂຖເມສິ. ຠນ຺ເຕ, ສຕປຸຎ຺ຎລກ຺ຂຓຘຣ ໂຄຕມ. ປຕິປຸພ຺ເພນ ວິສຸທ຺ຘປຈ຺ຈຍນ຺ຕິ ປຸພ຺ເພ ທີປງ຺ກຣປາທມູເລ ປຣິປຸຓ຺ຓປາຣມີປຈ຺ຈຍສມ຺ຠາໂຣ ສຸຏ຺ຐຸ ຈິຣໍ ກາລໍ ມຍາ ນ ທິຏ຺ໂຐ ອສີຕິ ອຕ຺ໂຖ. ອຫມຊ຺ຊສຸເປກ຺ຂນນ຺ຕິ ອຊ຺ຊ ອິມສ຺ມິໍ ທິວເສ ອຫໍ ສຸເປກ຺ຂນໍ ສຸນ຺ທຣທສ຺ສນໍ, ສຸນ຺ທຣທິຏ຺ຐໍ ວາ ນິຣຸປມໍ ວິຄ຺ຄຫໍ ອຸປມາຣຫິຕສຣີຣໍ ໂຄຕມໍ ວຕ ເອກນ຺ເຕນ ປສ຺ສາມິ ທກ຺ຂາມີຕິ ອຕ຺ໂຖ.

໑໘໕-໑໘໖. ສຸຈິຣໍ ວິຫຕຕໂມ ມຍາຕິ ວິເສເສນ ຫຕຕໂມ ວິທ຺ຘໍສິຕໂມໂຫ ຕ຺ວໍ ມຍາປິ ສຸຏ຺ຐຸ ຈິຣໍ ໂຖມິໂຕຕິ ອຕ຺ໂຖ. ສຸຈິຣກ຺ເຂນ ນທີ ວິໂສສິຕາຕິ ເອສາ ຕຓ຺ຫານທີ ສຸນ຺ທຣຣກ຺ເຂນ ໂຄປເນນ ວິເສເສນ ໂສສິຕາ, ອຠພ຺ພຸປ຺ປຕ຺ຕິກຕາ ຕຍາຕິ ອຕ຺ໂຖ. ສຸຈິຣໍ ອມລໍ ວິໂສຘິຕນ຺ຕິ ສຸຏ຺ຐຸ ຈິຣໍ ທີເຆນ ອທ຺ຘຸນາ ອມລໍ ນິພ຺ພານໍ ວິເສເສນ ໂສຘິຕໍ, ສຸຏ຺ຐຸ ກຕໍ ອຘິຄຕໍ ຕຍາຕິ ອຕ຺ໂຖ. ນຍນໍ ຎາຓມຍໍ ມຫາມຸເນ. ຈິຣກາລສມງ຺ຄິໂຕຕິ ມຫາມຸເນ ມຫາສມຓ ຎາຓມຍໍ ນຍນໍ ທິພ຺ພຈກ຺ຂຸໍ ຈິຣກາລໍ ສມຘິຄໂຕ ສມ຺ປຕ຺ໂຕ ຕ຺ວນ຺ຕິ ອຕ຺ໂຖ. ອວິນຏ຺ໂຐ ປຸນຣນ຺ຕຣນ຺ຕິ ອຫໍ ປຸນ ອນ຺ຕຣໍ ອນ຺ຕຣາຠເວ ມຊ຺ເຌ ປຣິນຏ຺ໂຐ ປຣິຫີໂນ ອໂຫສິນ຺ຕິ ອຕ຺ໂຖ. ປຸນຣຊ຺ຊສມາຄໂຕ ຕຍາຕິ ອຊ຺ຊ ອິມສ຺ມິໍ ກາເລ ຕຍາ ສທ຺ຘິໍ ປຸນປິ ສມາຄໂຕ ເອກີຠູໂຕ ສຫ ວສາມີຕິ ອຕ຺ໂຖ. ນ ຫິ ນສ຺ສນ຺ຕິ ກຕານິ ໂຄຕມາຕິ ໂຄຕມ ສພ຺ພຎ຺ຎຸພຸທ຺ຘ, ຕຍາ ສທ຺ຘິໍ ກຕານິ ສມາຄມາທີນິ ນ ຫິ ນສ຺ສນ຺ຕິ ຍາວ ຂນ຺ຘປຣິນິພ຺ພານາ ນ ວິນາ ຠວິສ຺ສນ຺ຕີຕິ ອຕ຺ໂຖ. ເສສໍ ອຸຕ຺ຕານເມວາຕິ.

ຘມ຺ມຣຸຈິຍຕ຺ເຖຣອປທານວຓ຺ຓນາ ສມຕ຺ຕາ.

ທສມາປທານໍ ສຸວິຎ຺ເຎຍ຺ຍເມວາຕິ.

ເອກູນປຎ຺ຎາສມວຄ຺ຄວຓ຺ຓນາ ສມຕ຺ຕາ.