໖. ພາກຸລຕ຺ເຖຣອປທານວຓ຺ຓນາ

ຉຏ຺ຐາປທາເນ ຫິມວນ຺ຕສ຺ສາວິທູເຣຕິອາທິກໍ ພາກຸລຕ຺ເຖຣສ຺ສ ອປທານໍ. ອຍໍ ກິຣ ເຖໂຣ ອຕີເຕ ອິໂຕ ກປ຺ປສຕສຫສ຺ສາຘິກສ຺ສ ອສງ຺ຂ຺ເຍຍ຺ຍສ຺ສ ມຕ຺ຖເກ ອໂນມທສ຺ສິສ຺ສ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ຕໂຍ ເວເທ ອຸຄ຺ຄຓ຺ຫິຕ຺ວາ ຕຕ຺ຖ ສາຣໍ ອປສ຺ສນ຺ໂຕ ‘‘ສມ຺ປຣາຍິກຕ຺ຖໍ ຄເວສິສ຺ສາມີ’’ຕິ ອິສິປພ຺ພຊ຺ຊໍ ປພ຺ພຊິຕ຺ວາ ປພ຺ພຕປາເທ ວິຫຣນ຺ໂຕ ປຎ຺ຈາຠິຎ຺ຎາອຏ຺ຐສມາປຕ຺ຕີນໍ ລາຠີ ຫຸຕ຺ວາ ວິຫຣນ຺ໂຕ ພຸທ຺ຘຸປ຺ປາທໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ສຣເຓສຸ ປຕິຏ຺ຐິໂຕ ສຕ຺ຖຸ ວາຕາພາເຘ ອຸປ຺ປນ຺ເນ ອຣຎ຺ຎໂຕ ເຠສຊ຺ຊານິ ອາເນຕ຺ວາ ຕໍ ວູປສເມຕ຺ວາ ຕໍ ປຸຎ຺ຎໍ ອາໂຣຄ຺ຍຕ຺ຖາຍ ປຣິຓາເມຕ຺ວາ ຕໂຕ ຈຸໂຕ ພ຺ຣຫ຺ມໂລເກ ນິພ຺ພຕ຺ໂຕ ເອກໍ ອສງ຺ຂ຺ເຍຍ຺ຍໍ ເທວມນຸສ຺ເສສຸ ສໍສຣນ຺ໂຕ ປທຸມຸຕ຺ຕຣພຸທ຺ຘກາເລ ຫໍສວຕີນຄເຣ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ສຕ຺ຖາຣໍ ເອກໍ ຠິກ຺ຂຸໍ ອປ຺ປາພາຘານໍ ອຄ຺ຄຏ຺ຐາເນ ຐເປນ຺ຕໍ ທິສ຺ວາ ສຍໍ ຕໍ ຐານນ຺ຕຣໍ ອາກງ຺ຂນ຺ໂຕ ປຓິຘານໍ ກຕ຺ວາ ຍາວຊີວໍ ກຸສລກມ຺ມໍ ອຸປຈິນິຕ຺ວາ ສຸຄຕີສຸເຍວ ສໍສຣນ຺ໂຕ ວິປສ຺ສິສ຺ສ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ພນ຺ຘຸມຕີນຄເຣ ພ຺ຣາຫ຺ມຓກຸເລ ນິພ຺ພຕ຺ໂຕ ສພ຺ພສິປ຺ເປສຸ ນິປ຺ຜຕ຺ຕິໍ ປຕ຺ໂຕ ຕຕ຺ຖ ສາຣໍ ອປສ຺ສນ຺ໂຕ ອິສິປພ຺ພຊ຺ຊໍ ປພ຺ພຊິຕ຺ວາ ຌານາຠິຎ຺ຎາລາຠີ ຫຸຕ຺ວາ ປພ຺ພຕປາເທ ວສນ຺ໂຕ ພຸທ຺ຘຸປ຺ປາທໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ສຣເຓສຸ ປຕິຏ຺ຐາຍ ຠິກ຺ຂູນໍ ຕິຓປຸປ຺ຜກໂຣເຄ ອຸປ຺ປນ຺ເນ ຕໍ ວູປສເມຕ຺ວາ ຕຕ຺ຖ ຍາວຕາຍຸກໍ ຐຕ຺ວາ ຕໂຕ ຈຸໂຕ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ຕໂຕ ເອກນວຸຕິກປ຺ເປ ເທວມນຸສ຺ເສສຸ ສໍສຣນ຺ໂຕ ກສ຺ສປສ຺ສ ຠຄວໂຕ ກາເລ ພາຣາຓສິຍໍ ກຸລເຄເຫ ນິພ຺ພຕ຺ຕິຕ຺ວາ ຆຣາວາສໍ ວສນ຺ໂຕ ເອກໍ ຊິຓ຺ຓໍ ວິນສ຺ສມານໍ ມຫາວິຫາຣໍ ທິສ຺ວາ ຕຕ຺ຖ ອຸໂປສຖາຄາຣາທິກໍ ສພ຺ພໍ ອາວສຖໍ ກາຣາເປຕ຺ວາ ຕຕ຺ຖ ຠິກ຺ຂຸສງ຺ຆສ຺ສ ສພ຺ພໍ ເຠສຊ຺ຊໍ ປຏິຍາເທຕ຺ວາ ຍາວຊີວໍ ກຸສລໍ ກຕ຺ວາ ເອກໍ ພຸທ຺ຘນ຺ຕຣໍ ເທວມນຸສ຺ເສສຸ ສໍສຣນ຺ໂຕ ອມ຺ຫາກໍ ຠຄວໂຕ ອຸປ຺ປຕ຺ຕິໂຕ ປຸເຣຕຣເມວ ໂກສມ຺ພິຍໍ ເສຏ຺ຐິກຸເລ ນິພ຺ພຕ຺ຕິ.

ໂສ ມາຕຸກຸຈ຺ຉິໂຕ ນິກ຺ຂມິຕ຺ວາ ຘາຕີຫິ ອໂຣຄຠາວາຍ ຍມຸນາຍໍ ນ຺ຫາປິຍມາໂນ ຕາສໍ ຫຕ຺ຖໂຕ ມຸຈ຺ຈິຕ຺ວາ ມຈ຺ເຉນ ຄິລິໂຕ ອໂຫສິ. ເກວຏ຺ຏາ ຕໍ ມຈ຺ຉໍ ຊາລາຍ ຄເຫຕ຺ວາ ພາຣາຓສິຍໍ ເສຏ຺ຐິຠຣິຍາຍ ວິກ຺ກິຓິໍສຸ. ສາ ຕໍ ຄເຫຕ຺ວາ ຜາລຍມານາ ປຸພ຺ເພ ກຕປຸຎ຺ຎຜເລນ ອໂຣຄໍ ທາຣກໍ ທິສ຺ວາ ‘‘ປຸຕ຺ໂຕ ເມ ລທ຺ໂຘ’’ຕິ ຄເຫຕ຺ວາ ໂປເສສິ. ໂສ ຊນເກຫິ ມາຕາປິຕູຫິ ຕໍ ປວຕ຺ຕິໍ ສຸຕ຺ວາ ອາຄນ຺ຕ຺ວາ ‘‘ອຍໍ ອມ຺ຫາກໍ ປຸຕ຺ໂຕ, ເທຖ ໂນ ປຸຕ຺ຕ’’ນ຺ຕິ ອນຸໂຍເຄ ກເຕ ຣຎ຺ຎາ ‘‘ອຸຠເຍສມ຺ປິ ສາຘາຣໂຓ ໂຫຕູ’’ຕິ ທ຺ວິນ຺ນໍ ກຸລານໍ ທາຍາທຠາເວນ ວິນິຈ຺ຉຍໍ ກຕ຺ວາ ຐປິຕຕ຺ຕາ ພາກຸໂລຕິ ລທ຺ຘນາໂມ ວຍປ຺ປຕ຺ໂຕ ມຫາສມ຺ປຕ຺ຕິໍ ອນຸຠວນ຺ໂຕ ທ຺ວີສຸ ເສຏ຺ຐິກຸເລສຸ ເອເກກສ຺ມິໍ ຉມາສໍ ຉມາສໍ ວສຕິ. ເຕ ອຕ຺ຕໂນ ວາເຣ ສມ຺ປຕ຺ເຕ ນາວາສງ຺ຆາຏໍ ພນ຺ຘິຕ຺ວາ ຕຕ຺ຣູປຣິ ຣຕນມຓ຺ຑປໍ ກາເຣຕ຺ວາ ປຎ຺ຈງ຺ຄິກຕູຣິເຍ ນິປ຺ຜາເທຕ຺ວາ ກຸມາຣໍ ຕຕ຺ຖ ນິສີທາເປຕ຺ວາ ອຸຠຍນຄຣມຊ຺ຌຏ຺ຐານໍ ຄງ຺ຄາຍ ອາຄຈ຺ຉນ຺ຕິ, ອປຣເສຏ຺ຐິມນຸສ຺ສາປິ ເອວເມວ ສຊ຺ເຊຕ຺ວາ ຕໍ ຐານໍ ຄນ຺ຕ຺ວາ ກຸມາຣໍ ຕຕ຺ຖ ອາໂຣເປຕ຺ວາ ຄຈ຺ຉນ຺ຕິ. ໂສ ເອວໍ ວຑ຺ຒມາໂນ ອາສີຕິໂກ ຫຸຕ຺ວາ ອຸຠຍເສຏ຺ຐິປຸຕ຺ໂຕຕິ ປາກໂຏ. ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສຕ຺ຕາຫໍ ວາຍມນ຺ໂຕ ອຏ຺ຐເມ ທິວເສ ສຫ ປຏິສມ຺ຠິທາຍ ອຣຫຕ຺ຕໍ ປາປຸຓິ.

໓໘໖. ໂສ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕວ. ອປທານປາຬິອຕ຺ໂຖປິ ສຸວິຎ຺ເຎຍ຺ໂຍວ. ໂສ ອຣຫຕ຺ຕໍ ປຕ຺ວາ ວິມຸຕ຺ຕິສຸເຂນ ວິຫຣນ຺ໂຕ ສຏ຺ຐິວສ຺ສສຕາຍຸໂກ ຫຸຕ຺ວາ ປຣິນິພ຺ພາຍີຕິ.

ພາກຸລຕ຺ເຖຣອປທານວຓ຺ຓນາ ສມຕ຺ຕາ.