໙. ໂສຓໂກຏິວີສຕ຺ເຖຣອປທານວຓ຺ຓນາ

ນວມາປທາເນ ປນ ວິປສ຺ສິໂນ ປາວຈເນຕິອາທິກໍ ອາຍສ຺ມໂຕ ໂສຓສ຺ສ ໂກຏິວີສຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ມຫາວິຠເວ ເສຏ຺ຐິກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ເສຏ຺ຐິ ຫຸຕ຺ວາ ອຸປາສເກຫິ ສທ຺ຘິໍ ວິຫາຣໍ ຄນ຺ຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ຠຄວໂຕ ຈງ຺ກມນຏ຺ຐາເນ ສຸຘາຍ ປຣິກມ຺ມໍ ກາເຣຕ຺ວາ ເອກຎ຺ຈ ເລຓໍ ກາເຣຕ຺ວາ ນານາວິຣາຄວຕ຺ເຖຫິ ເລຓຠູມິຍາ ສນ຺ຖຣິຕ຺ວາ ອຸປຣິ ວິຕານຎ຺ຈ ກຕ຺ວາ ຈາຕຸທ຺ທິສສ຺ສ ສງ຺ຆສ຺ສ ນິຍ຺ຍາເທຕ຺ວາ ສຕ຺ຕາຫໍ ມຫາທານໍ ທຕ຺ວາ ປຓິຘານໍ ອກາສິ. ສຕ຺ຖາ ອນຸໂມທນໍ ອກາສິ. ໂສ ເຕນ ກຸສລກມ຺ເມນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ກປ຺ເປ ປຣິນິພ຺ພຸເຕ ກສ຺ສປທສພເລ ອນຸປ຺ປນ຺ເນ ອມ຺ຫາກໍ ຠຄວຕິ ພາຣາຓສິຍໍ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຄງ຺ຄາຕີເຣ ປຓ຺ຓສາລໍ ກຣິຕ຺ວາ ວສນ຺ຕໍ ເອກໍ ປຈ຺ເຈກພຸທ຺ຘໍ ເຕມາສໍ ຈຕູຫິ ປຈ຺ຈເຍຫິ ສກ຺ກຈ຺ຈໍ ອຸປຏ຺ຐຫິ. ປຈ຺ເຈກພຸທ຺ໂຘ ວຸຏ຺ຐວສ຺ໂສ ປຣິປຸຓ຺ຓປຣິກ຺ຂາໂຣ ຄນ຺ຘມາທນເມວ ອຄມາສິ. ໂສປິ ກຸລປຸຕ຺ໂຕ ຍາວຊີວໍ ຕຕ຺ຖ ປຸຎ຺ຎານິ ກຕ຺ວາ ຕໂຕ ຈວິຕ຺ວາ ເທວມນຸສ຺ເສສຸ ສໍສຣນ຺ໂຕ ອມ຺ຫາກໍ ຠຄວໂຕ ກາເລ ຈມ຺ປານຄເຣ ອຄ຺ຄເສຏ຺ຐິສ຺ສ ເຄເຫ ປຏິສນ຺ຘິໍ ຄຓ຺ຫິ. ຕສ຺ສ ປຏິສນ຺ຘິຄ຺ຄຫຓກາລໂຕ ປຏ຺ຐາຍ ເສຏ຺ຐິສ຺ສ ມຫາໂຠຄກ຺ຂນ຺ໂຘ ອຠິວຑ຺ຒິ. ຕສ຺ສ ມາຕຸກຸຈ຺ຉິໂຕ ນິກ຺ຂມນທິວເສ ສກລນຄເຣ ມຫາລາຠສກ຺ກາຣສມ຺ມາໂນ ອໂຫສິ, ຕສ຺ສ ປຸພ຺ເພ ປຈ຺ເຈກພຸທ຺ຘສ຺ສ ສຕສຫສ຺ສຄ຺ຆນິກຣຕ຺ຕກມ຺ພລປຣິຈ຺ຈາເຄນ ສຸວຓ຺ຓວຓ຺ໂຓ ສຸຂຸມາລຕໂຣ ຈ ອຕ຺ຕຠາໂວ ອໂຫສິ, ເຕນສ຺ສ ໂສໂຓຕິ ນາມໍ ອກໍສຸ. ໂສ ມຫຕາ ປຣິວາເຣນ ອຠິວຑ຺ຒິ. ຕສ຺ສ ຫຕ຺ຖປາທຕລານິ ພນ຺ຘຸຊີວກປຸປ຺ຜວຓ຺ຓານິ ອເຫສຸໍ, ເຕສໍ ສຕວາຣໍ ວິຫຕກປ຺ປາສໍ ວິຍ ມຸທຸສມ຺ຜສ຺ໂສ ອໂຫສິ. ປາທຕເລສຸ ມຓິກຸຓ຺ຑລາວຏ຺ຏວຓ຺ຓໂລມານິ ຊາຍິໍສຸ. ວຍປ຺ປຕ຺ຕສ຺ສ ຕສ຺ສ ຕິຓ຺ຓໍ ອຸຕູນໍ ອນຸຈ຺ຉວິເກ ຕໂຍ ປາສາເທ ກາຣາເປຕ຺ວາ ນາຏກິຕ຺ຖິໂຍ ອຸປຏ຺ຐາເປສຸໍ. ໂສ ຕຕ຺ຖ ມຫຕິໍ ສມ຺ປຕ຺ຕິໍ ອນຸຠວນ຺ໂຕ ເທວກຸມາໂຣ ວິຍ ປຏິວສຕິ.

ອຖ ອມ຺ຫາກໍ ຠຄວຕິ ສພ຺ພຎ຺ຎຸຕໍ ປຕ຺ວາ ປວຕ຺ຕິຕວຣຘມ຺ມຈກ຺ເກ ຣາຊຄຫໍ ອຸປນິສ຺ສາຍ ວິຫຣນ຺ເຕ ພິມ຺ພິສາຣຣຎ຺ຎາ ປກ຺ໂກສາປິໂຕ ເຕຫິ ອສີຕິຍາ ຄາມິກສຫສ຺ເສຫິ ສທ຺ຘິໍ ຣາຊຄຫໍ ອາຄໂຕ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ມາຕາປິຕໂຣ ອນຸຊານາເປຕ຺ວາ ຠຄວໂຕ ສນ຺ຕິເກ ປພ຺ພຊິຕ຺ວາ ລທ຺ຘູປສມ຺ປໂທ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ຊນສໍສຄ຺ຄປຣິຫຣຓຕ຺ຖໍ ສີຕວເນ ວິຫາສິ. ໂສ ຕຕ຺ຖ ວສນ຺ໂຕ ‘‘ມມ ສຣີຣໍ ສຸຂຸມາລໍ, ນ ຈ ສກ຺ກາ ສຸເຂເນວ ສຸຂໍ ອຘິຄນ຺ຕຸໍ, ກາຍໍ ກິລເມຕ຺ວາປິ ສມຓຘມ຺ມໍ ກາຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ຐານຈງ຺ກມເມວ ອຘິຏ຺ຐາຍ ປຘານມນຸຍຸຎ຺ຊນ຺ໂຕ ປາທຕເລສຸ ໂຜເຏສຸ ອຸຏ຺ຐິເຕສຸປິ ເວທນໍ ອຊ຺ຌຸເປກ຺ຂິຕ຺ວາ ທຬ຺ຫໍ ວີຣິຍໍ ກໂຣນ຺ໂຕ ອຈ຺ຈາຣທ຺ຘວີຣິຍຕາຍ ວິເສສໍ ນິພ຺ພຕ຺ເຕຕຸໍ ອສກ຺ໂກນ຺ໂຕ ‘‘ເອວໍ ອຫໍ ວາຍມນ຺ໂຕປິ ມຄ຺ຄຜລານິ ນິພ຺ພຕ຺ເຕຕຸໍ ນ ສກ຺ໂກມິ, ກິໍ ເມ ປພ຺ພຊ຺ຊາຍ, ຫີນາຍາວຕ຺ຕິຕ຺ວາ ໂຠເຄ ຈ ຠຸຎ຺ຊາມິ, ປຸຎ຺ຎານິ ຈ ກຣິສ຺ສາມີ’’ຕິ ຈິນ຺ເຕສິ. ອຖ ສຕ຺ຖາ ຕສ຺ສ ຈິຕ຺ຕາຈາຣໍ ຎຕ຺ວາ ຕຕ຺ຖ ຄນ຺ຕ຺ວາ ວີໂຓປໂມວາເທນ (ມຫາວ. ໒໔໓) ໂອວທິຕ຺ວາ ວີຣິຍສມຕາໂຍຊນວິຘິໍ ທສ຺ເສນ຺ໂຕ ກມ຺ມຏ຺ຐານໍ ໂສເຘຕ຺ວາ ຄິຊ຺ຌກູຏໍ ຄໂຕ. ໂສໂຓປິ ໂຂ ສຕ຺ຖຸ ສນ຺ຕິກາ ໂອວາທໍ ລຠິຕ຺ວາ ວີຣິຍສມຕໍ ໂຍເຊຕ຺ວາ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ເຕ ປຕິຏ຺ຐາສິ.

໔໙. ໂສ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິປສ຺ສິໂນ ປາວຈເນຕິອາທິມາຫ. ຕຕ຺ຖ ວິປສ຺ສີຕິ ວິເສເສນ, ວິວິຘໍ ວາ ປສ຺ສຕີຕິ ວິປສ຺ສີ. ປາວຈເນຕິ ປກາເຣນ ວຸຈ຺ຈຕີຕິ ປາວຈນໍ, ປິຏກຕ຺ຕຍໍ. ຕສ຺ສ ວິປສ຺ສິໂນ ຕສ຺ມິໍ ປາວຈເນຕິ ອຕ຺ໂຖ. ເລຓນ຺ຕິ ລິນນ຺ເຕ ນິລີຍນ຺ເຕ ເອຕ຺ຖາຕິ ເລຓໍ ວິຫາຣໍ. ພນ຺ຘຸມາຣາຊຘານິຍາຕິ ພນ຺ຘນ຺ຕິ ກຸລປຣມ຺ປຣາຍ ວເສນ ອຎ຺ຎມຎ຺ຎໍ ສມ຺ພຊ຺ຌນ຺ຕີຕິ ພນ຺ຘູ, ຎາຕກາ. ເຕ ເອຕ຺ຖ ປຏິວສນ຺ຕີຕິ ພນ຺ຘຸມາ, ພນ຺ຘຸ ອສ຺ສ ອຕ຺ຖີຕິ ວາ ພນ຺ຘຸມາ. ຣາຊູນໍ ວສນຏ຺ຐານນ຺ຕິ ຣາຊຘານີ, ພນ຺ຘຸມາ ຈ ສາ ຣາຊຘານີ ເຈຕິ ພນ຺ຘຸມາຣາຊຘານີ, ຕສ຺ສາ ພນ຺ຘຸມາຣາຊຘານິຍາ, ເລຓໍ ມຍາ ກຕນ຺ຕິ ສມ຺ພນ຺ໂຘ. ເສສເມຕ຺ຖ ອຸຕ຺ຕານຕ຺ຖເມວາຕິ.

ໂສຓໂກຏິວີສຕ຺ເຖຣອປທານວຓ຺ຓນາ ສມຕ຺ຕາ.