໑-໑໐. ຈິຕກປູຊກຕ຺ເຖຣອປທານາທິວຓ຺ຓນາ

໑-໒. ຕິໍສຕິເມ ວຄ຺ເຄ ປຐມາປທາເນ ອາຫຸຕິໍ ຍິຏ຺ຐຸກາໂມຫນ຺ຕິ ປູຊາສກ຺ກາຣໍ ກາເຣຕຸກາໂມ ອຫໍ. ນານາປຸປ຺ຜໍ ສມານຍິນ຺ຕິ ນານາ ອເນກວິຘໍ ຈມ຺ປກສລລາທິປຸປ຺ຜໍ ສໍ ສຸຏ຺ຐຸ ອານຍິໍ, ຣາສິໍ ອກາສິນ຺ຕິ ອຕ຺ໂຖ. ສິຂິໂນ ໂລກພນ຺ຘຸໂນຕິ ສກລໂລກຕ຺ຕຍພນ຺ຘຸສ຺ສ ຎາຕກສ຺ສ ສິຂິສ຺ສ ຠຄວໂຕ ປຣິນິພ຺ພຸຕສ຺ສ ຈິຕກໍ ອາຬາຫນຈິຕກໍ ທາຣຸຣາສິໍ ຊລນ຺ຕໍ ອາທິຕ຺ຕໍ ທິສ຺ວາ ຕຎ຺ຈ ມຍາ ຣາສີກຕໍ ປຸປ຺ຜໍ ໂອກິຣິໍ ປູເຊສິນ຺ຕິ ອຕ຺ໂຖ.

໖-໗. ທຸຕິຍາປທາເນ ອຊິນຸຕ຺ຕຣວາສໂນຕິ ອຊິນມິຄຈມ຺ມໍ ອຸຕ຺ຕຣາສງ຺ຄໍ ກຕ຺ວາ ນິວາສິໂນ ອຈ຺ຉາທໂນຕິ ອຕ຺ໂຖ. ອຠິຎ຺ຎາ ປຎ຺ຈ ນິພ຺ພຕ຺ຕາຕິ ອິທ຺ຘິວິຘາທໂຍ ປຎ຺ຈ ອຠິຎ຺ຎາໂຍ ປຎ຺ຈ ຎາຓານິ ນິພ຺ພຕ຺ຕາ ອຸປ຺ປາທິຕາ ນິປ຺ຜາທິຕາ. ຈນ຺ທສ຺ສ ປຣິມຊ຺ຊໂກຕິ ຈນ຺ທມຓ຺ຑລສ຺ສ ສມນ຺ຕໂຕ ມຊ຺ຊໂກ, ຜຸຏ຺ໂຐ ອໂຫສິນ຺ຕິ ອຕ຺ໂຖ. ວິປສ຺ສິໍ ໂລກປຊ຺ໂຊຕນ຺ຕິ ສກລໂລກຕ຺ຕເຍ ປທີປສທິສໍ ວິປສ຺ສິໍ ຠຄວນ຺ຕໍ ມມ ສນ຺ຕິກໍ ອຠິຄຕໍ ວິເສເສນ ສມ຺ປຕ຺ຕໍ ອາຄຕໍ. ທິສ຺ວາ ປາຣິຈ຺ຉຕ຺ຕກປຸປ຺ຜານີຕິ ເທວໂລກໂຕ ປາຣິຈ຺ຉຕ຺ຕກປຸປ຺ຜານິ ອາຫຣິຕ຺ວາ ວິປສ຺ສິສ຺ສ ສຕ຺ຖຸໂນ ມຕ຺ຖເກ ຉຕ຺ຕາກາເຣນ ອຫໍ ຘາເຣສິນ຺ຕິ ອຕ຺ໂຖ.

໑໑-໑໓. ຕຕິຍາປທາເນ ປຸຕ຺ໂຕ ມມ ປພ຺ພຊິໂຕຕິ ມຍ຺ຫໍ ປຸຕ຺ໂຕ ສທ຺ຘາຍ ປພ຺ພຊິໂຕ. ກາສາຍວສໂນ ຕທາຕິ ຕສ຺ມິໍ ປພ຺ພຊິຕກາເລ ກາສາຍນິວຕ຺ໂຖ, ນ ພາຫິຣກປພ຺ພຊ຺ຊາຍ ປພ຺ພຊິໂຕຕິ ອຕ຺ໂຖ. ໂສ ຈ ພຸທ຺ຘຕ຺ຕໍ ສມ຺ປຕ຺ໂຕຕິ ໂສ ມຍ຺ຫໍ ປຸຕ຺ໂຕ ຈຕູສຸ ພຸທ຺ເຘສຸ ສາວກພຸທ຺ຘຠາວໍ ສໍ ສຸຏ຺ຐຸ ປຕ຺ໂຕ, ອຣຫຕ຺ຕໍ ປຕ຺ໂຕຕິ ອຕ຺ໂຖ. ນິພ຺ພຸໂຕ ໂລກປູຊິໂຕຕິ ສກລໂລເກຫິ ກຕສກ຺ກາໂຣ ຂນ຺ຘປຣິນິພ຺ພາເນນ ປຣິນິພ຺ພຸໂຕຕິ ອຕ຺ໂຖ. ວິຈິນນ຺ໂຕ ສກໍ ປຸຕ຺ຕນ຺ຕິ ອຫໍ ຕສ຺ສ ຄຕເທສໍ ປຸຈ຺ຉິຕ຺ວາ ສກໍ ປຸຕ຺ຕໍ ວິຈິນນ຺ໂຕ ປຈ຺ຉໂຕ ອຄມໍ, ອນຸຄໂຕ ອສ຺ມີຕິ ອຕ຺ໂຖ. ນິພ຺ພຸຕສ຺ສ ມຫນ຺ຕສ຺ສາຕິ ມຫນ຺ເຕຫິ ສີລກ຺ຂນ຺ຘາທີຫິ ຍຸຕ຺ຕຕ຺ຕາ ມຫນ຺ຕສ຺ສ ຕສ຺ສ ມມ ປຸຕ຺ຕສ຺ສ ອຣຫໂຕ ອາທຫນຏ຺ຐາເນ ຈິຕກໍ ຈິຕກຏ຺ຐານໍ ອຫໍ ອຄມາສິນ຺ຕິ ອຕ຺ໂຖ. ປຄ຺ຄຍ຺ຫ ອຎ຺ຊລິໍ ຕຕ຺ຖາຕິ ຕສ຺ມິໍ ອາທຫນຏ຺ຐາເນ ອຎ຺ຊລິໍ ທສງ຺ຄຸລິສໂມຘານໍ ປຄ຺ຄເຫຕ຺ວາ ສິຣສິ ກຕ຺ວາ ອຫໍ ຈິຕກໍ ທຫນທາຣຸຣາສິໍ ວນ຺ທິຕ຺ວາ ປຓາມໍ ກຕ຺ວາ ເສຕຈ຺ຉຕ຺ຕຎ຺ຈ ປຄ຺ຄຍ຺ຫາຕິ ນ ເກວລເມວ ວນ຺ທິຕ຺ວາ ຘວລຈ຺ຉຕ຺ຕຎ຺ຈ ປຄ຺ຄຍ຺ຫ ອຸກ຺ຂິປິຕ຺ວາ ອຫໍ ອາໂຣເປສິໍ ປຕິຏ຺ຐເປສິນ຺ຕິ ອຕ຺ໂຖ.

໑໗-໑໘. ຈຕຸຕ຺ຖາປທາເນ ອນຸຄ຺ຄຕມ຺ຫິ ອາທິຈ຺ເຈຕິ ສູຣິເຍ ອນຸຄ຺ຄເຕ ອນຸຏ຺ຐິເຕ ປຈ຺ຈູສກາເລຕິ ອຕ຺ໂຖ. ປສາໂທ ວິປຸໂລ ອຫູຕິ ໂຣຄປີຬິຕສ຺ສ ມຍ຺ຫໍ ຈິຕ຺ຕປ຺ປສາໂທ ວິປຸໂລ ອຕິເຣໂກ ພຸທ຺ຘານຸສ຺ສຣເຓນ ອຫຸ ອໂຫສິ. ມເຫສິໂນ ພຸທ຺ຘເສຏ຺ຐສ຺ສ ໂລກມ຺ຫິ ປາຕຸຠາໂວ ປາກຏຠາໂວ ອໂຫສີຕິ ສມ຺ພນ຺ໂຘ. ໂຆສມສ຺ໂສສຫໍ ຕຕ຺ຖາຕິ ຕສ຺ມິໍ ປາຕຸຠາເວ ສຕິ ‘‘ອຫໍ ຄິລາໂນ ພຸທ຺ໂຘ ອຸປ຺ປນ຺ໂນ’’ຕິ ໂຆສໍ ອສ຺ໂສສິໍ. ນ ຈ ປສ຺ສາມິ ຕໍ ຊິນນ຺ຕິ ຕໍ ຊິຕປຎ຺ຈມາຣໍ ສມ຺ມາສມ຺ພຸທ຺ຘໍ ນ ປສ຺ສາມິ, ພາຬ຺ຫຄິລານຕ຺ຕາ ຄນ຺ຕ຺ວາ ປສ຺ສິຕຸໍ ນ ສກ຺ໂກມີຕິ ອຕ຺ໂຖ. ມຣຓຎ຺ຈ ອນຸປ຺ປຕ຺ໂຕຕິ ມຣຓາສນ຺ນກາລໍ ອນຸປ຺ປຕ຺ໂຕ, ອາສນ຺ນມຣໂຓ ຫຸຕ຺ວາຕິ ອຕ຺ໂຖ. ພຸທ຺ຘສຎ຺ຎມນຸສ຺ສຣິນ຺ຕິ ພຸທ຺ໂຘຕິນາມໍ ອນຸສ຺ສຣິໍ, ພຸທ຺ຘາຣມ຺ມຓໍ ມນສິ ອກາສິນ຺ຕິ ອຕ຺ໂຖ.

໒໑-໒໓. ປຎ຺ຈມາປທາເນ ອາຣາມທ຺ວາຣາ ນິກ຺ຂມ຺ມາຕິ ອາຣາມທ຺ວາຣໂຕ ສງ຺ຆສ຺ສ ນິກ຺ຂມນທ຺ວາຣມຄ຺ເຄຫິ ອຕ຺ໂຖ. ໂຄສີສໍ ສນ຺ຖຕໍ ມຍາຕິ ຕສ຺ມິໍ ນິກ຺ຂມນທ຺ວາຣມຄ຺ເຄ ‘‘ຠຄວໂຕ ຠິກ຺ຂຸສງ຺ຆສ຺ສ ຈ ປາທາ ມາ ກທ຺ທມໍ ອກ຺ກມນ຺ຕູ’’ຕິ ອກ຺ກມນຕ຺ຖາຍ ໂຄສີສຏ຺ຐິໍ ມຍາ ສນ຺ຖຣິຕນ຺ຕິ ອຕ຺ໂຖ. ອນຸໂຠມິ ສກໍ ກມ຺ມນ຺ຕິ ອຕ຺ຕໂນ ໂຄສີສອຕ຺ຖຣຓກມ຺ມສ຺ສ ພເລນ ອາຊານີຍາ ວາຕຊວາ ສິນ຺ຘວາ ສີຆວາຫນາທີນິ ວິປາກຜລານິ ອນຸໂຠມີຕິ ອຕ຺ໂຖ. ອໂຫ ກາຣໍ ປຣມກາຣນ຺ຕິ ສຸເຂຕ຺ເຕ ສງ຺ເຆ ມຍາ ສຸຏ຺ຐຸ ກຕໍ ກາຣໍ ອປ຺ປກມ຺ປິ ກິຈ຺ຈໍ ມຫປ຺ຜລທານໂຕ ປຣມກາຣໍ ອຸຕ຺ຕມກິຈ຺ຈໍ ອໂຫ ວິມ຺ຫຍນ຺ຕິ ອຕ຺ໂຖ. ຍຖາ ຕິຓໂທສາທິວິຣຫິເຕສຸ ເຂຕ຺ເຕສຸ ວປ຺ປິຕໍ ສາລິພີຊໍ ມຫປ຺ຜລໍ ເທຕິ, ເອວເມວ ຣາຄໂທສາທິໂທສຣຫິເຕ ປຣິສຸທ຺ຘກາຍວຈີສມາຈາເຣ ສງ຺ຆເຂຕ຺ເຕ ໂຄສີສອຕ຺ຖຣຓກມ຺ມໍ ມຍາ ກຕໍ, ອິທໍ ມຫປ຺ຜລໍ ເທຕີຕິ ວຸຕ຺ຕໍ ໂຫຕິ. ນ ອຎ຺ຎໍ ກລມຄ຺ຆຕີຕິ ອຎ຺ຎໍ ພາຫິຣສາສເນ ກຕໍ ກມ຺ມໍ ສງ຺ເຆ ກຕສ຺ສ ກາຣສ຺ສ ປູຊາສກ຺ກາຣສ຺ສ ກລໍ ໂສຬສິໍ ກລໍ ໂກຏ຺ຐາສໍ ນ ອຄ຺ຆຕີຕິ ສມ຺ພນ຺ໂຘ.

ຉຏ຺ຐສຕ຺ຕມຏ຺ຐມນວມທສມາປທານານິ ອຸຕ຺ຕານາເນວາຕິ.

ຕິໍສຕິມວຄ຺ຄວຓ຺ຓນາ ສມຕ຺ຕາ.