໑໘. ກຸມຸທວຄ຺ໂຄ

໑. ກຸມຸທມາລິຍຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ກຸມຸທມາລິຍຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ຫິມວນ຺ຕປພ຺ພຕສມີເປ ຊາຕສ຺ສຣສ຺ສ ອາສນ຺ເນ ຣກ຺ຂໂສ ຫຸຕ຺ວາ ນິພ຺ພຕ຺ໂຕ ອຕ຺ຖທສ຺ສິໍ ຠຄວນ຺ຕໍ ຕຕ຺ຖ ອຸປຄຕໍ ທິສ຺ວາ ປສນ຺ນມານໂສ ກຸມຸທປຸປ຺ຜານິ ໂອຈິນິຕ຺ວາ ຠຄວນ຺ຕໍ ປູເຊສິ. ຠຄວາ ອນຸໂມທນໍ ກຕ຺ວາ ປກ຺ກາມິ.

໑. ໂສ ເຕນ ປຸຎ຺ເຎນ ຕໂຕ ຈວິຕ຺ວາ ເທວໂລກໍ ອຸປປນ຺ໂນ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິອາທິສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຣຕນຕ຺ຕເຍ ປສນ຺ໂນ ປພ຺ພຊິຕ຺ວາ ວາຍມນ຺ໂຕ ພ຺ຣຫ຺ມຈຣິຍປຣິໂຍສານໍ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປພ຺ພເຕ ຫິມວນ຺ຕມ຺ຫີຕິອາທິມາຫ. ຕຕ຺ຖ ຕຕ຺ຖໂຊ ຣກ຺ຂໂສ ອາສິນ຺ຕິ ຕສ຺ມິໍ ຊາຕສ຺ສຣສມີເປ ຊາໂຕ ນິພ຺ພຕ຺ໂຕ ຣກ຺ຂໂສ ປຣຣຸຘິຣມໍສຂາທໂກ ນິທ຺ທໂຍ ໂຆຣຣູໂປ ຠຍານກສຠາໂວ ມຫາພໂລ ມຫາຖາໂມ ກກ຺ຂໂຬ ຍກ຺ໂຂ ອາສິໍ ອໂຫສິນ຺ຕິ ອຕ຺ໂຖ.

ກຸມຸທໍ ປຸປ຺ຜເຕ ຕຕ຺ຖາຕິ ຕສ຺ມິໍ ມຫາສເຣ ສູຣິຍຣໍສິຍາ ອຠາເວ ສຕິ ສາຍນ຺ເຫ ມກຸຬິຕໍ ກຸຎ຺ຈິຕາກາເຣນ ນິປ຺ປຠໍ ອວຓ຺ຓໍ ໂຫຕີຕິ ‘‘ກຸມຸທ’’ນ຺ຕິ ລທ຺ຘນາມໍ ປຸປ຺ຜໍ ປຸປ຺ຜເຕ ວິກສຕີຕິ ອຕ຺ໂຖ. ຈກ຺ກມຕ຺ຕານິ ຊາຍເຣຕິ ຕານິ ປຸປ຺ຜານິ ຣຖຈກ຺ກປມາຓານິ ຫຸຕ຺ວາ ຊາຍນ຺ຕີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ກຸມຸທມາລິຍຕ຺ເຖຣອປທານວຓ຺ຓນາ ສມຕ຺ຕາ.

໒. ນິສ຺ເສຓິທາຍກຕ຺ເຖຣອປທານວຓ຺ຓນາ

ໂກຓ຺ຑຎ຺ຎສ຺ສ ຠຄວໂຕຕິອາທິກໍ ອາຍສ຺ມໂຕ ນິສ຺ເສຓິທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ອເນກາສຸ ຊາຕີສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ໂກຓ຺ຑຎ຺ຎສ຺ສ ຠຄວໂຕ ກາເລ ວຑ຺ຒກິກຸເລ ນິພ຺ພຕ຺ໂຕ ສທ຺ໂຘ ປສນ຺ໂນ ຠຄວໂຕ ຘມ຺ມເທສນໍ ສຸຕ຺ວາ ປສນ຺ນມານໂສ ຠຄວໂຕ ວສນປາສາທສ຺ສາໂຣຫນຕ຺ຖາຍ ສາຣກຏ຺ຐມຍໍ ນິສ຺ເສຓິໍ ກຕ຺ວາ ອຸສ຺ສາເປຕ຺ວາ ຐເປສິ. ຠຄວາ ຕສ຺ສ ປສາທສໍວຑ຺ຒນຕ຺ຖາຍ ປສ຺ສນ຺ຕສ຺ເສວ ອຸປຣິປາສາທໍ ອາຣຸຫິ. ໂສ ອຕີວ ປສນ຺ໂນ ເຕເນວ ປີຕິໂສມນສ຺ເສນ ກາລໍ ກຕ຺ວາ ເທວໂລເກ ນິພ຺ພຕ຺ໂຕ ຕຕ຺ຖ ທິພ຺ພສມ຺ປຕ຺ຕິໍ ອນຸຠວິຕ຺ວາ ມນຸສ຺ເສສຸ ຊາຍມາໂນ ນິສ຺ເສຓິທານນິສ຺ສນ຺ເທນ ອຸຈ຺ຈກຸເລ ນິພ຺ພຕ຺ໂຕ ມນຸສ຺ສສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸເລ ນິພ຺ພຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ສທ຺ຘາຊາໂຕ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໙. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ໂກຓ຺ຑຎ຺ຎສ຺ສ ຠຄວໂຕຕິອາທິມາຫ. ຕຕ຺ຖ ໂກຓ຺ຑຎ຺ຎສ຺ສາຕິ ກຸຈ຺ຉິໂຕ ຫຸຕ຺ວາ ເຑຕິ ປວຕ຺ຕຕີຕິ ໂກຓ຺ໂຑ, ລາມກສຕ຺ໂຕ, ໂກຓ຺ຑໂຕ ອຎ຺ໂຎຕິ ໂກຓ຺ຑຎ຺ໂຎ, ອລາມໂກ ອຸຕ຺ຕມປຸຣິໂສຕິ ອຕ຺ໂຖ. ອຖ ວາ ພ຺ຣາຫ຺ມຓໂຄຕ຺ເຕສຸ ໂກຓ຺ຑຎ຺ຎໂຄຕ຺ເຕ ອຸປ຺ປນ຺ນຕ຺ຕາ ‘‘ໂກຓ຺ຑຎ຺ໂຎ’’ຕິ ໂຄຕ຺ຕວເສນ ຕສ຺ສ ນາມໍ, ຕສ຺ສ ໂກຓ຺ຑຎ຺ຎສ຺ສ. ເສສໍ ປາກຏເມວາຕິ.

ນິສ຺ເສຓິທາຍກຕ຺ເຖຣອປທານວຓ຺ຓນາ ສມຕ຺ຕາ.

໓. ຣຕ຺ຕິປຸປ຺ຜິຍຕ຺ເຖຣອປທານວຓ຺ຓນາ

ມິຄລຸທ຺ໂທ ປຸເຣ ອາສິນ຺ຕິອາທິກໍ ອາຍສ຺ມໂຕ ຣຕ຺ຕິປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເນສາທກຸເລ ອຸປ຺ປນ຺ໂນ ມິຄວຘາຍ ອຣຎ຺ເຎ ວິຈຣມາໂນ ຕສ຺ສ ກາຣຸຎ຺ເຎນ ອຣຎ຺ເຎ ຈຣມານໍ ວິປສ຺ສິໍ ຠຄວນ຺ຕໍ ທິສ຺ວາ ປສນ຺ນມານໂສ ປຸປ຺ຜິຕໍ ຣຕ຺ຕິກໍ ນາມ ປຸປ຺ຜໍ ກຸຏຊປຸປ຺ຜຎ຺ຈ ສຫ ວຓ຺ເຏນ ໂອຈິນິຕ຺ວາ ໂສມນສ຺ສຈິຕ຺ເຕນ ປູເຊສິ. ຠຄວາ ອນຸໂມທນໍ ກຕ຺ວາ ປກ຺ກາມິ.

໑໓. ໂສ ເຕເນວ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ໂນ ສຕ຺ຖຸ ຘມ຺ມເທສນໍ ສຸຕ຺ວາ ກາເມສຸ ອາທີນວໍ ທິສ຺ວາ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ໂຕ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ‘‘ເນສາທຠູເຕນ ມຍາ ກຕກຸສລໍ ສຸນ຺ທຣ’’ນ຺ຕິ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ມິຄລຸທ຺ໂທ ປຸເຣ ອາສິນ຺ຕິອາທິມາຫ. ຕຕ຺ຖ ມິຄານໍ ລຸທ຺ໂທ ສາຫສິໂກ ມາຣໂກຕິ ມິຄລຸທ຺ໂທ, ມິເຄສຸ ວາ ລຸທ຺ໂທ ໂລຠີຕິ ມິຄລຸທ຺ໂທ, ເນສາໂທ ອາສິໍ ປຸເຣຕິ ອຕ຺ໂຖ.

໑໔. ຣຕ຺ຕິກໍ ປຸປ຺ຜິຕໍ ທິສ຺ວາຕິ ປທຸມປຸປ຺ຜາທີນິ ອເນການິ ປຸປ຺ຜານິ ສູຣິຍຣໍສິສມ຺ຜສ຺ເສນ ທິວາ ປຸປ຺ຜນ຺ຕິ ຣຕ຺ຕິຍໍ ມກຸຬິຕານິ ໂຫນ຺ຕິ. ຊາຕິສຸມນມລ຺ລິກາທີນິ ອເນການິ ປຸປ຺ຜານິ ປນ ຣຕ຺ຕິຍໍ ປຸປ຺ຜນ຺ຕິ ໂນ ທິວາ. ຕສ຺ມາ ຣຕ຺ຕິຍໍ ປຸປ຺ຜນໂຕ ຣຕ຺ຕິປຸປ຺ຜນາມການິ ອເນການິ ສຸຄນ຺ຘປຸປ຺ຜານິ ຈ ກຸຏຊປຸປ຺ຜານິ ຈ ຄເຫຕ຺ວາ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຣຕ຺ຕິປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໔. ອຸທປານທາຍກຕ຺ເຖຣອປທານວຓ຺ຓນາ

ວິປສ຺ສິໂນ ຠຄວໂຕຕິອາທິກໍ ອາຍສ຺ມໂຕ ອຸທປານທາຍກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມມຸນິວເຣສຸ ກຕາຘິກາໂຣ ອເນເກສຸ ຠເວສຸ ກຕປຸຎ຺ຎສຎ຺ຈໂຍ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ‘‘ປານີຍທານໍ ມຍາ ທາຕພ຺ພໍ, ຕຎ຺ຈ ນິຣນ຺ຕຣໍ ກຕ຺ວາ ປວຕ຺ເຕຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ເອກໍ ກູປໍ ຂນາເປຕ຺ວາ ອຸທກສມ຺ປຕ຺ຕກາເລ ອິຏ຺ຐກາຫິ ຈິນາເປຕ຺ວາ ຖິຣໍ ກຕ຺ວາ ຕຕ຺ຖ ອຸຏ຺ຐິເຕນ ອຸທເກນ ປຸຓ຺ຓໍ ຕໍ ອຸທປານໍ ວິປສ຺ສິສ຺ສ ຠຄວໂຕ ນິຍ຺ຍາເທສິ. ຠຄວາ ປານີຍທານານິສໍສທີປກໍ ອນຸໂມທນໍ ອກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ນິພ຺ພຕ຺ຕນິພ຺ພຕ຺ຕຏ຺ຐາເນ ໂປກ຺ຂຣຓີອຸທປານປານີຍາທິສມ຺ປນ຺ໂນ ສຸຂມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ໂຘ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑໘. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິປສ຺ສິໂນ ຠຄວໂຕຕິອາທິມາຫ. ຕຕ຺ຖ ອຸທປາໂນ ກໂຕ ມຍາຕິ ອຸທກໍ ປິວນ຺ຕິ ເອຕ຺ຖາຕິ ອຸທປາໂນ, ກູປໂປກ຺ຂຣຓີຕຬາການເມຕໍ ອຘິວຈນໍ. ໂສ ອຸທປາໂນ ກູໂປ ວິປສ຺ສິສ຺ສ ຠຄວໂຕ ອຕ຺ຖາຍ ກໂຕ ຂນິໂຕຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ອຸທປານທາຍກຕ຺ເຖຣອປທານວຓ຺ຓນາ ສມຕ຺ຕາ.

໕. ສີຫາສນທາຍກຕ຺ເຖຣອປທານວຓ຺ຓນາ

ນິພ຺ພຸເຕ ໂລກນາຖມ຺ຫີຕິອາທິກໍ ອາຍສ຺ມໂຕ ສີຫາສນທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ນິພ຺ພານາຘິຄມຕ຺ຖາຍ ກຕປຸຎ຺ຎູປຈໂຍ ປທຸມຸຕ຺ຕຣສ຺ສ ຠຄວໂຕ ກາເລ ຄຫປຕິກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ຣຕນຕ຺ຕເຍ ປສນ຺ໂນ ຕສ຺ມິໍ ຠຄວຕິ ປຣິນິພ຺ພຸເຕ ສຕ຺ຕຫິ ຣຕເນຫິ ຂຈິຕໍ ສີຫາສນໍ ກາຣາເປຕ຺ວາ ໂພຘິຣຸກ຺ຂໍ ປູເຊສິ, ພຫູຫິ ມາລາຄນ຺ຘຘູເປຫິ ຈ ປູເຊສິ.

໒໑. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ສພ຺ພຕ຺ຖ ປູຊິໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ວສນ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ຎາຕິວຄ຺ຄໍ ປຫາຍ ປພ຺ພຊິໂຕ ນຈິຣສ຺ເສວ ອຣຫາ ຫຸຕ຺ວາ ປຸພ຺ພູປຈິຕກຸສລສມ຺ຠາຣໍ ສຣິຕ຺ວາ ສຎ຺ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ໂລກນາຖມ຺ຫີຕິອາທິມາຫ. ຕຕ຺ຖ ສີຫາສນມທາສຫນ຺ຕິ ສີຫຣູປຫິຣຎ຺ຎສຸວຓ຺ຓຣຕເນຫິ ຂຈິຕໍ ອາສນໍ ສີຫາສນໍ, ສີຫສ຺ສ ວາ ອຠີຕສ຺ສ ຠຄວໂຕ ນິສິນ຺ນາຣຫໍ, ສີຫໍ ວາ ເສຏ຺ຐໍ ອຸຕ຺ຕມໍ ອາສນນ຺ຕິ ສີຫາສນໍ, ຕໍ ອຫໍ ອທາສິໍ, ໂພຘິຣຸກ຺ຂໍ ປູເຊສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສີຫາສນທາຍກຕ຺ເຖຣອປທານວຓ຺ຓນາ ສມຕ຺ຕາ.

໖. ມຄ຺ຄທຕ຺ຕິກຕ຺ເຖຣອປທານວຓ຺ຓນາ

ອໂນມທສ຺ສີ ຠຄວາຕິອາທິກໍ ອາຍສ຺ມໂຕ ມຄ຺ຄທຕ຺ຕິກຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອໂນມທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ສຓ຺ຐເປຕ຺ວາ ວສນ຺ໂຕ ອໂນມທສ຺ສິໍ ຠຄວນ຺ຕໍ ອາກາເສ ຈງ຺ກມນ຺ຕໍ ປາທຸທ຺ຘາເຣ ປາທຸທ຺ຘາຣຈງ຺ກມນຏ຺ຐາເນ ປຸປ຺ຜານໍ ວິກິຣຓໍ ອຈ຺ຉຣິຍຎ຺ຈ ທິສ຺ວາ ປສນ຺ນມານໂສ ປຸປ຺ຜານິ ອາກາເສ ອຸກ຺ຂິປິ, ຕານິ ວິຕານໍ ຫຸຕ຺ວາ ອຏ຺ຐໍສຸ.

໒໖. ໂສ ເຕນ ປຸຎ຺ເຎນ ສຸຄຕີສຸເຍວ ສໍສຣນ຺ໂຕ ສພ຺ພຕ຺ຖ ປູຊິໂຕ ສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸເລ ນິພ຺ພຕ຺ໂຕ ກເມນ ໂຍພ຺ພຎ຺ຎໍ ປາປຸຓິຕ຺ວາ ສທ຺ຘາຊາໂຕ ປພ຺ພຊິຕ຺ວາ ວຕ຺ຕສມ຺ປນ຺ໂນ ນຈິຣສ຺ເສວ ອຣຫຕ຺ຕໍ ປຕ຺ໂຕ ຈງ຺ກມນສ຺ສ ປູຊິຕຕ຺ຕາ ມຄ຺ຄທຕ຺ຕິກຕ຺ເຖໂຣຕິ ປາກໂຏ. ໂສ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອໂນມທສ຺ສີ ຠຄວາຕິອາທິມາຫ. ທິຏ຺ຐຘມ຺ມສຸຂຕ຺ຖາຍາຕິ ອິມສ຺ມິໍ ອຕ຺ຕຠາເວ ຈງ຺ກມເນນ ສຣີຣສລ຺ລຫຸກາທິສຸຂໍ ປຏິຈ຺ຈາຕິ ອຕ຺ໂຖ. ອພ຺ໂຠກາສມ຺ຫິ ຈງ຺ກມີຕິ ອພ຺ໂຠກາເສ ອງ຺ຄຓຏ຺ຐາເນ ຈງ຺ກມິ, ປທວິກ຺ເຂປໍ ປທສຎ຺ຈາຣໍ ອກາສີຕິ ອຕ຺ໂຖ.

ອຸທ຺ຘເຕ ປາເທ ປຸປ຺ຜານີຕິ ຈງ຺ກມນ຺ເຕນ ປາເທ ອຸທ຺ຘເຕ ປທຸມຸປ຺ປລາທີນິ ປຸປ຺ຜານິ ປຖວິໂຕ ອຸຄ຺ຄນ຺ຕ຺ວາ ຈງ຺ກເມ ວິກິຣິໍສູຕິ ອຕ຺ໂຖ. ໂສຠໍ ມຸທ຺ຘນິ ຕິຏ຺ຐເຣຕິ ພຸທ຺ຘສ຺ສ ມຸທ຺ຘນິ ສີເສ ໂສຠຍມານາ ຕານິ ຕິຏ຺ຐນ຺ຕີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ມຄ຺ຄທຕ຺ຕິກຕ຺ເຖຣອປທານວຓ຺ຓນາ ສມຕ຺ຕາ.

໗. ເອກທີປິຍຕ຺ເຖຣອປທານວຓ຺ຓນາ

ປທຸມຸຕ຺ຕຣສ຺ສ ມຸນິໂນຕິອາທິກໍ ອາຍສ຺ມໂຕ ເອກທີປິຍຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມຊິນເສຏ຺ເຐສຸ ກຕກຸສລສມ຺ຠາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຄຫປຕິກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ໂຘ ປສນ຺ໂນ ຠຄວໂຕ ສລລມຫາໂພຘິມ຺ຫິ ເອກປທີປໍ ປູເຊສິ, ຖາວຣໍ ກຕ຺ວາ ນິຈ຺ຈເມກປທີປປູຊນຕ຺ຖາຍ ເຕລວຏ຺ຏໍ ປຏ຺ຐເປສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ຊລມາໂນ ປສນ຺ນຈກ຺ຂຸໂກ ອຸຠຍສຸຂມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ໂຕ ທີປປູຊາຍ ລທ຺ຘວິເສສາຘິຄມຕ຺ຕາ ເອກທີປິຍຕ຺ເຖໂຣຕິ ປາກໂຏ.

໓໐. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣສ຺ສ ມຸນິໂນຕິອາທິມາຫ. ຕໍ ສພ຺ພໍ ອຸຕ຺ຕານຕ຺ຖເມວາຕິ.

ເອກທີປິຍຕ຺ເຖຣອປທານວຓ຺ຓນາ ສມຕ຺ຕາ.

໘. ມຓິປູຊກຕ຺ເຖຣອປທານວຓ຺ຓນາ

ໂອເຣນ ຫິມວນ຺ຕສ຺ສາຕິອາທິກໍ ອາຍສ຺ມໂຕ ມຓິປູຊກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸເລ ນິພ຺ພຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖາທີນວໍ ທິສ຺ວາ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕໂອຣຠາເຄ ເອກິສ຺ສາ ນທິຍາ ສມີເປ ປຓ຺ຓສາລໍ ກາເຣຕ຺ວາ ວສນ຺ໂຕ ວິເວກກາມຕາຍ ຕສ຺ສານຸກມ຺ປາຍ ຈ ຕຕ຺ຖ ອຸປຄຕໍ ປທຸມຸຕ຺ຕຣໍ ຠຄວນ຺ຕໍ ທິສ຺ວາ ປສນ຺ນມານໂສ ມຓິປລ຺ລງ຺ກໍ ຠຄວໂຕ ປູເຊສິ. ຠຄວາ ຕສ຺ສ ປສາທວຑ຺ຒນຕ຺ຖາຍ ຕຕ຺ຖ ນິສີທິ. ໂສ ຠິຍ຺ໂຍໂສມຕ຺ຕາຍ ປສນ຺ໂນ ນິພ຺ພານາຘິຄມຕ຺ຖາຍ ປຕ຺ຖນໍ ອກາສິ. ຠຄວາ ອນຸໂມທນໍ ວຕ຺ວາ ປກ຺ກາມິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສພ຺ພຕ຺ຖ ປູຊິໂຕ ສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ກຸເລ ນິພ຺ພຕ຺ໂຕ ຆຣາວາສໍ ວສນ຺ໂຕ ເອກທິວສໍ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໔. ໂສ ເອກທິວສໍ ອຕ຺ຕນາ ກຕກຸສລໍ ສຣິຕ຺ວາ ສຎ຺ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ໂອເຣນ ຫິມວນ຺ຕສ຺ສາຕິອາທິມາຫ. ຕຕ຺ຖ ໂອເຣນາຕິ ຫິມວນ຺ຕສ຺ສ ອປຣໍ ຠາຄໍ ວິຫາຍ ໂອເຣນ, ຠຸມ຺ມຕ຺ເຖ ກຣຓວຈນໍ, ໂອຣສ຺ມິໍ ທິສາຠາເຄຕິ ອຕ຺ໂຖ. ນທິກາ ສມ຺ປວຕ຺ຕຖາຕິ ອປາກຏນາມເຘຍ຺ຍາ ເອກາ ນທີ ສໍສຸຏ຺ຐຸ ປວຕ຺ຕານີ ວຫານີ ສນ຺ທມານາ ອໂຫສີຕິ ອຕ຺ໂຖ. ຕສ຺ສາ ຈານຸປເຂຕ຺ຕມ຺ຫີຕິ ຕສ຺ສາ ນທິຍາ ອນຸປເຂຕ຺ຕມ຺ຫິ ຕີຣສມີເປຕິ ອຕ຺ໂຖ. ສຍມ຺ຠູ ວສເຕ ຕທາຕິ ຍທາ ອຫໍ ມຓິປລ຺ລງ຺ກໍ ປູເຊສິໍ, ຕທາ ອນາຈຣິຍໂກ ຫຸຕ຺ວາ ສຍເມວ ພຸທ຺ຘຠູໂຕ ຠຄວາ ວສເຕ ວິຫຣຕີຕິ ອຕ຺ໂຖ.

໓໕. ມຓິໍ ປຄ຺ຄຍ຺ຫ ປລ຺ລງ຺ກນ຺ຕິ ມຓິນ຺ຕິ ຈິຕ຺ຕໍ ອາຣາເຘຕິ ໂສມນສ຺ສໍ ກໂຣຕີຕິ ມຓິ, ອຖ ວາ ມາຕິ ປມາຓໍ ກໂຣຕິ ອາຠຣຓນ຺ຕິ ມຓິ, ອຖ ວາ ມຣນ຺ຕາປິ ຣາຊຍຸວຣາຊາທໂຍ ຕໍ ນ ປຣິຈ຺ຈຊນ຺ຕິ ຕທຕ຺ຖາຍ ສງ຺ຄາມໍ ກໂຣນ຺ຕີຕິ ມຓິ, ຕໍ ມຓິໍ ມຓິມຍໍ ປລ຺ລງ຺ກໍ ມໂນຣມໍ ສາຘຸ ຈິຕ຺ຕໍ ສຸຏ຺ຐຸ ວິຈິຕ຺ຕໍ ປຄ຺ຄຍ຺ຫ ຄເຫຕ຺ວາ ພຸທ຺ຘເສຏ຺ຐສ຺ສ ອຠິໂຣປຍິໍ ປູເຊສິນ຺ຕິ ອຕ຺ໂຖ. ເສສໍ ສພ຺ພໍ ອຸຕ຺ຕານຕ຺ຖເມວາຕິ.

ມຓິປູຊກຕ຺ເຖຣອປທານວຓ຺ຓນາ ສມຕ຺ຕາ.

໙. ຕິກິຈ຺ຉກຕ຺ເຖຣອປທານວຓ຺ຓນາ

ນຄເຣ ພນ຺ຘຸມຕິຍາຕິອາທິກໍ ອາຍສ຺ມໂຕ ຕິກິຈ຺ຉກຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ພນ຺ຘຸມຕີນຄເຣ ເວຊ຺ຊກຸເລ ນິພ຺ພຕ຺ໂຕ ພຫຸສ຺ສຸໂຕ ສຸສິກ຺ຂິໂຕ ເວຊ຺ຊກມ຺ເມ ເຉໂກ ພຫູ ໂຣຄິໂນ ຕິກິຈ຺ຉນ຺ໂຕ ວິປສ຺ສິສ຺ສ ຠຄວໂຕ ອຸປຏ຺ຐາກສ຺ສ ອໂສກນາມຕ຺ເຖຣສ຺ສ ໂຣຄໍ ຕິກິຈ຺ຉິ. ໂສ ເຕນ ປຸຎ຺ເຎນ ເທວມນຸສ຺ເສສຸ ອປຣາປຣໍ ສຸຂໍ ອນຸຠວນ຺ໂຕ ນິພ຺ພຕ຺ຕນິພ຺ພຕ຺ຕຠເວ ອໂຣໂຄ ທີຆາຍຸໂກ ສຸວຓ຺ຓວຓ຺ຓສຣີໂຣ ອໂຫສິ.

໓໙. ໂສ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ຄຫປຕິກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສພ຺ພສິປ຺ເປສຸ ນິປ຺ຜຕ຺ຕິໍ ປຕ຺ໂຕ ອໂຣໂຄ ສຸຂິໂຕ ວິຠວສມ຺ປນ຺ໂນ ຣຕນຕ຺ຕເຍ ປສນ຺ໂນ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ຆຣາວາສໍ ປຫາຍ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນຄເຣ ພນ຺ຘຸມຕິຍາຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ຕິກິຈ຺ຉກຕ຺ເຖຣອປທານວຓ຺ຓນາ ສມຕ຺ຕາ.

໑໐. ສງ຺ຆຸປຏ຺ຐາກຕ຺ເຖຣອປທານວຓ຺ຓນາ

ເວສ຺ສຠຸມ຺ຫິ ຠຄວຕີຕິອາທິກໍ ອາຍສ຺ມໂຕ ສງ຺ຆຸປຏ຺ຐາກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ເຘສຸ ກຕກຸສລສມ຺ຠາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ເວສ຺ສຠຸສ຺ສ ຠຄວໂຕ ກາເລ ຕສ຺ສາຣາມິກສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສທ຺ໂຘ ປສນ຺ໂນ ວິຫາເຣສຸ ອາຣາມິກກມ຺ມໍ ກໂຣນ຺ໂຕ ສກ຺ກຈ຺ຈໍ ສງ຺ຆໍ ອຸປຏ຺ຐາສິ. ໂສ ເຕເນວ ກຸສລກມ຺ເມນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ຄຫປຕິກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ວິຠວສມ຺ປນ຺ໂນ ສຸຂປ຺ປຕ຺ໂຕ ປາກໂຏ ສຕ຺ຖຸ ຘມ຺ມເທສນໍ ສຸຕ຺ວາ ສາສເນ ປສນ຺ໂນ ປພ຺ພຊິຕ຺ວາ ວຕ຺ຕສມ຺ປນ຺ໂນ ສາສນໍ ໂສຠຍມາໂນ ວິປສ຺ສນໍ ວຑ຺ເຒນ຺ໂຕ ນຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ໂຕ ຉຬຠິຎ຺ໂຎ ປຸພ຺ເພ ກຕກຸສລກມ຺ມວເສນ ສງ຺ຆຸປຏ຺ຐາກຕ຺ເຖໂຣຕິ ປາກໂຏ ອໂຫສິ.

໔໕. ໂສ ເອກທິວສໍ ‘‘ປຸພ຺ເພ ມຍາ ກິໍ ນາມ ກມ຺ມໍ ກຕ຺ວາ ອຍໍ ໂລກຸຕ຺ຕຣສມ຺ປຕ຺ຕິ ລທ຺ຘາ’’ຕິ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ປຈ຺ຈກ຺ຂໂຕ ຊານິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປາກຏໍ ກໂຣນ຺ໂຕ ເວສ຺ສຠຸມ຺ຫິ ຠຄວຕີຕິອາທິມາຫ. ຕຕ຺ຖ ອໂຫສາຣາມິໂກ ອຫນ຺ຕິ ອຫໍ ເວສ຺ສຠຸສ຺ສ ຠຄວໂຕ ສາສເນ ອາຣາມິໂກ ອໂຫສິນ຺ຕິ ອຕ຺ໂຖ. ເສສໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖຕ຺ຕາ ຈ ສຸວິຎ຺ເຎຍ຺ຍເມວາຕິ.

ສງ຺ຆຸປຏ຺ຐາກຕ຺ເຖຣອປທານວຓ຺ຓນາ ສມຕ຺ຕາ.

ອຏ຺ຐາຣສມວຄ຺ຄວຓ຺ຓນາ ສມຕ຺ຕາ.