໙. ສມາທປກຕ຺ເຖຣອປທານວຓ຺ຓນາ

ນຄເຣ ພນ຺ຘຸມຕິຍາຕິອາທິກໍ ອາຍສ຺ມໂຕ ສມາທປກຕ຺ເຖຣສ຺ສ ອປທານໍ. ອຍມ຺ປິ ເຖໂຣ ປຸຣິມພຸທ຺ຘານໍ ສນ຺ຕິເກ ກຕກຸສລສມ຺ຠາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ສຓ຺ຐເປຕ຺ວາ ປຸຎ຺ຎານິ ກໂຣນ຺ໂຕ ວສມາໂນ ສທ຺ໂຘ ປສນ຺ໂນ ພຫູ ອຸປາສເກ ສນ຺ນິປາເຕຕ຺ວາ ຄຓເຊຏ຺ຐໂກ ຫຸຕ຺ວາ ‘‘ມາຬກໍ ກຣິສ຺ສາມາ’’ຕິ ເຕ ສພ຺ເພ ສມາທເປຕ຺ວາ ເອກໍ ມາຬກໍ ສມໍ ກາເຣຕ຺ວາ ປຓ຺ຑຣປຸລິນໍ ໂອກິຣິຕ຺ວາ ຠຄວໂຕ ນິຍ຺ຍາເທສິ. ໂສ ເຕນ ປຸຎ຺ເຎນ ເທວໂລເກ ອຸປ຺ປນ຺ໂນ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິອາທິສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຠຄວຕິ ປສນ຺ໂນ ຘມ຺ມໍ ສຸຕ຺ວາ ປສນ຺ນມານໂສ ສທ຺ຘາຊາໂຕ ປພ຺ພຊິຕ຺ວາ ສີລສມ຺ປນ຺ໂນ ວຕ຺ຕສມ຺ປນ຺ໂນ ນຈິຣສ຺ເສວ ອຣຫຕ຺ຕໍ ປາປຸຓິ.

໔໔. ໂສ ອປຣຠາເຄ ອຕ຺ຕໂນ ກຕກຸສລໍ ສຣິຕ຺ວາ ສຎ຺ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ນຄເຣ ພນ຺ຘຸມຕິຍາຕິອາທິມາຫ. ຕຕ຺ຖ ພນ຺ຘນ຺ຕິ ຎາຕິໂຄຕ຺ຕາທິວເສນ ເອກສມ຺ພນ຺ຘາ ໂຫນ຺ຕິ ສກລນຄຣວາສິໂນຕິ ພນ຺ຘູ, ພນ຺ຘູ ເອຕສ຺ມິໍ ວິຊ຺ຊນ຺ຕີຕິ ພນ຺ຘຸມຕີ, ຕສ຺ສາ ພນ຺ຘຸມຕິຍາ ນາມ ນຄເຣ ມຫາປູຄຄໂຓ ອຸປາສກສມູໂຫ ອໂຫສີຕິ ອຕ຺ໂຖ. ມາຬໍ ກສ຺ສາມ ສງ຺ຆສ຺ສາຕິ ເອຕ຺ຖ ມາຕິ ຄຓ຺ຫາຕິ ສມ຺ປຕ຺ຕສມ຺ປຕ຺ຕຊນານໍ ຈິຕ຺ຕນ຺ຕິ ມາຬໍ, ອຖ ວາ ສມ຺ປຕ຺ຕຍຕິຄຓານໍ ຈິຕ຺ຕສ຺ສ ວິເວກກຣເຓ ອລນ຺ຕິ ມາຬໍ, ມາຬເມວ ມາຬກໍ, ຠິກ຺ຂຸສງ຺ຆສ຺ສ ຜາສຸວິຫາຣຕ຺ຖາຍ ມາຬກໍ ກຣິສ຺ສາມາຕິ ອຕ຺ໂຖ. ເສສໍ ປາກຏເມວາຕິ.

ສມາທປກຕ຺ເຖຣອປທານວຓ຺ຓນາ ສມຕ຺ຕາ.