໖. ຕິປຸປ຺ຜິຍຕ຺ເຖຣອປທານວຓ຺ຓນາ

ມິຄລຸທ຺ໂທ ປຸເຣ ອາສິນ຺ຕິອາທິກໍ ອາຍສ຺ມໂຕ ຕິປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອນ຺ຕຣາ ເກນຈິ ອກຸສລຈ຺ຉິທ຺ເທນ ວິປສ຺ສິສ຺ສ ຠຄວໂຕ ກາເລ ເນສາທກຸເລ ນິພ຺ພຕ຺ໂຕ ມິຄລຸທ຺ໂທ ຫຸຕ຺ວາ ອຣຎ຺ເຎ ວິຫຣຕິ. ຕທາ ວິປສ຺ສິສ຺ສ ຠຄວໂຕ ປາຏລິໂພຘິໍ ສມ຺ປຸຓ຺ຓປຕ຺ຕປລ຺ລວໍ ຫຣິຕວຓ຺ຓໍ ນີໂລຠາສໍ ມໂນຣມໍ ທິສ຺ວາ ຕີຫິ ປຸປ຺ເຜຫິ ປູເຊຕ຺ວາ ປຸຣາຓປຕ຺ຕໍ ຉຑ຺ເຑຕ຺ວາ ຠຄວໂຕ ສມ຺ມຸຂາ ວິຍ ປາຏລິມຫາໂພຘິໍ ວນ຺ທິ. ໂສ ເຕນ ປຸຎ຺ເຎນ ຕໂຕ ຈຸໂຕ ເທວໂລເກ ອຸປ຺ປນ຺ໂນ ຕຕ຺ຖ ທິພ຺ພສມ຺ປຕ຺ຕິໍ ອປຣາປຣໍ ອນຸຠວິຕ຺ວາ ຕໂຕ ຈຸໂຕ ມນຸສ຺ເສສຸ ຊາໂຕ ຕຕ຺ຖ ຈກ຺ກວຕ຺ຕິສມ຺ປຕ຺ຕິອາທໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘໂສມນສ຺ສຫທໂຍ ເຄຫໍ ປຫາຍ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໑. ໂສ ເອວໍ ສິທ຺ຘິປ຺ປຕ຺ໂຕ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ມິຄລຸທ຺ໂທ ປຸເຣ ອາສິນ຺ຕິອາທິມາຫ. ຕຕ຺ຖ ມຣຓາຍ ຄຈ຺ຉຕິ ປາປຸຓາຕີຕິ ມິໂຄ, ອຖ ວາ ມຄຍມາໂນ ອິຫຕິ ປວຕ຺ຕຕີຕິ ມິໂຄ, ມິຄານໍ ມາຣເຓ ລຸທ຺ໂທ ໂລຠີ ເຄໂຘຕິ ມິຄລຸທ຺ໂທ, ປຸເຣ ມຍ຺ຫໍ ປຸຎ຺ຎກຣຓສມເຍ ການນສງ຺ຂາເຕ ມຫາອຣຎ຺ເຎ ມິຄລຸທ຺ໂທ ອາສິນ຺ຕິ ສມ຺ພນ຺ໂຘ. ປາຏລິໍ ຫຣິຕໍ ທິສ຺ວາຕິ ຕຕ຺ຖ ປກາເຣນ ຕເລນ ຣຕ຺ຕວຓ຺ເຓນ ຠວຕີຕິ ປາຏລິ, ປຸປ຺ຜານໍ ຣຕ຺ຕວຓ຺ຓຕາຍ ປາຏລີຕິ ໂວຫາໂຣ, ປຕ຺ຕານໍ ຫຣິຕຕາຍ ຫຣິຕໍ ນີລວຓ຺ຓໍ ປາຏລິໂພຘິໍ ທິສ຺ວາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຕິປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.