ຊິຓ຺ຓປຸຣິສວຓ຺ຓນາ

໔໓. ທຸຕິຍຠາຓວາເຣ ໂຄປານສິວງ຺ກນ຺ຕິ ໂຄປານສີ ວິຍ ວງ຺ກໍ. ໂຠຄ຺ຄນ຺ຕິ ຂນ຺ເຘ, ກຏິຍໍ, ຊາຓູສູຕິ ຕີສຸ ຐາເນສຸ ໂຠຄ຺ຄວງ຺ກໍ. ທຓ຺ຑປຣາຍນນ຺ຕິ ທຓ຺ຑຄຕິກໍ ທຓ຺ຑປຏິສຣຓໍ. ອາຕຸຣນ຺ຕິ ຊຣາຕຸຣໍ. ຄຕໂຍພ຺ພນນ຺ຕິ ອຕິກ຺ກນ຺ຕໂຍພ຺ພນໍ ປຈ຺ຉິມວເຍ ຐິຕໍ. ທິສ຺ວາຕິ ອຑ຺ຒໂຍຊນປ຺ປມາເຓນ ພລກາເຍນ ປຣິວຸໂຕ ສຸສໍວິຫິຕາຣກ຺ໂຂປິ ຄຈ຺ຉນ຺ໂຕ ຍທາ ຣໂຖ ປຸຣໂຕ ໂຫຕິ, ປຈ຺ຉາ ພລກາໂຍ, ຕາທິເສ ໂອກາເສ ສຸທ຺ຘາວາສຂີຓາສວພ຺ຣຫ຺ເມຫິ ອຕ຺ຕໂນ ອານຸຠາເວນ ຣຖສ຺ສ ປຸຣໂຕວ ທສ຺ສິຕໍ, ຕໍ ປຸຣິສໍ ປສ຺ສິຕ຺ວາ. ສຸທ຺ຘາວາສາ ກິຣ – ‘‘ມຫາປຸຣິໂສ ປງ຺ເກ ຄໂຊ ວິຍ ປຎ຺ຈສຸ ກາມຄຸເຓສຸ ລຄ຺ໂຄ, ສຕິມສ຺ສ ອຸປ຺ປາເທສ຺ສາມາ’’ຕິ ຕໍ ທສ຺ເສສຸໍ. ເອວໍ ທສ຺ສິຕຎ຺ຈ ຕໍ ໂພຘິສຕ຺ໂຕ ເຈວ ປສ຺ສຕິ ສາຣຖິ ຈ. ພ຺ຣຫ຺ມາໂນ ຫິ ໂພຘິສຕ຺ຕສ຺ສ ອປ຺ປມາທຕ຺ຖໍ ສາຣຖິສ຺ສ ຈ ກຖາສລ຺ລາປຕ຺ຖໍ ຕໍ ທສ຺ເສສຸໍ. ກິໍ ປເນໂສຕິ ‘‘ເອໂສ ຊິຓ຺ໂຓຕິ ກິໍ ວຸຕ຺ຕໍ ໂຫຕິ, ນາຫໍ, ໂຠ ອິໂຕ ປຸພ຺ເພ ເອວຣູປໍ ອທ຺ທສ’’ນ຺ຕິ ປຸຈ຺ຉິ.

ເຕນ ຫີຕິ ຍທິ ມຍ຺ຫມ຺ປິ ເອວຣູເປຫິ ເກເສຫິ ເອວຣູເປນ ຈ ກາເຍນ ຠວິຕພ຺ພໍ, ເຕນ ຫິ ສມ຺ມ ສາຣຖິ. ອລໍ ທານຊ຺ຊ ອຸຍ຺ຍານຠູມິຍາຕິ – ‘‘ອຊ຺ຊ ອຸຍ຺ຍານຠູມິໍ ປສ຺ສິສ຺ສາມາ’’ຕິ ຄຈ຺ຉາມ, ອລໍ ຕາຍ ອຸຍ຺ຍານຠູມິຍາຕິ ສໍວິຄ຺ຄຫທໂຍ ສໍເວຄານຸຣູປມາຫ. ອນ຺ເຕປຸຣໍ ຄໂຕຕິ ອິຕ຺ຖິຊນໍ ວິສ຺ສຊ຺ເຊຕ຺ວາ ສິຣິຄພ຺ເຠ ເອກໂກວ ນິສິນ຺ໂນ. ຍຕ຺ຣ ຫິ ນາມາຕິ ຍາຍ ຊາຕິຍາ ສຕິ ຊຣາ ປຎ຺ຎາຍຕິ, ສາ ຊາຕິ ຘິຣຕ຺ຖຸ ຘິກ຺ກຕາ ອຕ຺ຖຸ, ຊິຄຸຈ຺ຉາເມຕໍ ຊາຕິນ຺ຕິ, ຊາຕິຍາ ມູລໍ ຂຓນ຺ໂຕ ນິສີທິ, ປຐເມນ ສລ຺ເລນ ຫທເຍ ວິທ຺ໂຘ ວິຍ.

໔໕. ສາຣຖິໍ ອາມນ຺ຕາເປຕ຺ວາຕິ ຣາຊາ ກິຣ ເນມິຕ຺ຕເກຫິ ກຖິຕກາລໂຕ ປຏ຺ຐາຍ ໂອຫິຕໂສໂຕ ວິຈຣຕິ, ໂສ ‘‘ກຸມາໂຣ ອຸຍ຺ຍານໍ ຄຈ຺ຉນ຺ໂຕ ອນ຺ຕຣາມຄ຺ເຄ ນິວຕ຺ໂຕ’’ຕິ ສຸຕ຺ວາ ສາຣຖິໍ ອາມນ຺ຕາເປສິ. ມາ ເຫວ ໂຂຕິອາທີສຸ ຣຊ຺ຊໍ ກາເຣຕຸ, ມາ ປພ຺ພຊຕຸ, ພ຺ຣາຫ຺ມຓານໍ ວຈນໍ ມາ ສຈ຺ຈໍ ໂຫຕູຕິ ເອວໍ ຈິນ຺ເຕສີຕິ ອຕ຺ໂຖ.