໖. ອຸປ຺ປາທກກມ຺ມອາຍຸປ຺ປມາຓວາຣວຓ຺ຓນາ

(໑.) ອຸປ຺ປາທກກມ຺ມໍ

໑໐໒໑. ຉຏ຺ຐວາເຣ ປຎ຺ຈຫິ ກາມຄຸເຓຫິ ນານປ຺ປກາເຣຫິ ວາ ອິທ຺ຘິວິເສເສຫິ ທິພ຺ພນ຺ຕີຕິ ເທວາ. ສມ຺ມຸຕິເທວາຕິ ‘ເທໂວ, ເທວີ’ຕິ ເອວໍ ໂລກສມ຺ມຸຕິຍາ ເທວາ. ອຸປປຕ຺ຕິເທວາຕິ ເທວໂລເກ ອຸປ຺ປນ຺ນຕ຺ຕາ ອຸປປຕ຺ຕິຍາ ເທວາ. ວິສຸທ຺ຘິເທວາຕິ ສພ຺ເພສໍ ເທວານໍ ປູຊາຣຫາ ສພ຺ພກິເລສວິສຸທ຺ຘິຍາ ເທວາ. ຣາຊາໂນຕິ ມຸທ຺ຘາຠິສິຕ຺ຕຂຕ຺ຕິຍາ. ເທວິໂຍຕິ ເຕສໍ ມເຫສິໂຍ. ກຸມາຣາຕິ ອຠິສິຕ຺ຕຣາຊູນໍ ອຠິສິຕ຺ຕເທວິຍາ ກຸຈ຺ຉິສ຺ມິໍ ອຸປ຺ປນ຺ນກຸມາຣາ.

ອຸໂປສຖກມ຺ມໍ ກຕ຺ວາຕິ ຈາຕຸທ຺ທສາທີສຸ ອຏ຺ຐງ຺ຄສມນ຺ນາຄຕໍ ອຸໂປສຖໍ ອຸປວສິຕ຺ວາ. ອິທານິ ຍສ຺ມາ ປຣິຕ຺ຕທານາທິປຸຎ຺ຎກມ຺ມໍ ມນຸສ຺ສໂສຠຄ຺ຍຕາຍ ປຈ຺ຈໂຍ, ມຕ຺ຕໂສ ກຕໍ ມນຸສ຺ສໂສຠຄ຺ຍຕາຍ ອຘິມຕ຺ຕໍ, ອຘິມຕ຺ຕຠາເວປິ ນານປ຺ປກາຣເຠທໂຕ ນານປ຺ປກາຣສ຺ສ ຂຕ຺ຕິຍມຫາສາລາທິຠາວສ຺ສ ປຈ຺ຈໂຍ, ຕສ຺ມາ ຕສ຺ສ ວເສນ ອຸປປຕ຺ຕິເຠທໍ ທສ຺ເສນ຺ໂຕ ອປ຺ເປກຈ຺ເຈ ຄຫປຕິມຫາສາລານນ຺ຕິອາທິມາຫ. ຕຕ຺ຖ ມຫາສາໂຣ ເອເຕສນ຺ຕິ ມຫາສາຣາ; ຣ-ກາຣສ຺ສ ປນ ລ-ກາຣໍ ກຕ຺ວາ ມຫາສາລາຕິ ວຸຕ຺ຕໍ. ຄຫປຕິໂຍວ ມຫາສາລາ, ຄຫປຕີສຸ ວາ ມຫາສາລາຕິ ຄຫປຕິມຫາສາລາ. ເສເສສຸປິ ເອເສວ ນໂຍ. ຕຕ຺ຖ ຍສ຺ສ ເຄເຫ ປຈ຺ຉິມນ຺ເຕນ ຈຕ຺ຕາລີສໂກຏິຘນໍ ນິຘານຄຕໍ ໂຫຕິ, ກຫາປຓານຎ຺ຈ ປຎ຺ຈ ອມ຺ພຓານິ ທິວສວຬຎ຺ໂຊ ນິກ຺ຂມຕິ – ອຍໍ ຄຫປຕິມຫາສາໂລ ນາມ. ຍສ຺ສ ປນ ເຄເຫ ປຈ຺ຉິມນ຺ເຕນ ອສີຕິໂກຏິຘນໍ ນິຘານຄຕໍ ໂຫຕິ, ກຫາປຓານຎ຺ຈ ທສອມ຺ພຓານິ ທິວສວຬຎ຺ໂຊ ນິກ຺ຂມຕິ – ອຍໍ ພ຺ຣາຫ຺ມຓມຫາສາໂລ ນາມ. ຍສ຺ສ ປນ ເຄເຫ ປຈ຺ຉິມນ຺ເຕນ ໂກຏິສຕຘນໍ ນິຘານຄຕໍ ໂຫຕິ, ກຫາປຓານຎ຺ຈ ວີສຕິ ອມ຺ພຓານິ ທິວສວຬຎ຺ໂຊ ນິກ຺ຂມຕິ – ອຍໍ ຂຕ຺ຕິຍມຫາສາໂລ ນາມ.

ສຫພ຺ຍຕນ຺ຕິ ສຫຠາວໍ; ສຠາຄາ ຫຸຕ຺ວາ ນິພ຺ພຕ຺ຕນ຺ຕີຕິ ອຕ຺ໂຖ. ຈາຕຸມຫາຣາຊິການນ຺ຕິອາທີສຸ ຈາຕຸມຫາຣາຊິກາ ນາມ ສິເນຣຸປພ຺ພຕສ຺ສ ເວມຊ຺ເຌ ໂຫນ຺ຕິ. ເຕສຸ ປພ຺ພຕຏ຺ຐກາປິ ອຕ຺ຖິ, ອາກາສຏ຺ຐາປິ; ເຕສໍ ປຣມ຺ປຣາ ຈກ຺ກວາຬປພ຺ພຕໍ ປຕ຺ຕາ. ຂິຑ຺ຑາປໂທສິກາ, ມໂນປໂທສິກາ, ສີຕວລາຫກາ, ອຸຓ຺ຫວລາຫກາ, ຈນ຺ທິມາ ເທວປຸຕ຺ໂຕ, ສູຣິໂຍ ເທວປຸຕ຺ໂຕຕິ ເອເຕ ສພ຺ເພປິ ຈາຕຸມຫາຣາຊິກເທວໂລກຏ຺ຐກາ ເອວ.

ເຕຕ຺ຕິໍສ ຊນາ ຕຕ຺ຖ ອຸປປນ຺ນາຕິ ຕາວຕິໍສາ. ອປິຈ ຕາວຕິໍສາຕິ ເຕສໍ ເທວານໍ ນາມເມວາຕິ ວຸຕ຺ຕໍ. ເຕປິ ອຕ຺ຖິ ປພ຺ພຕຏ຺ຐກາ, ອຕ຺ຖິ ອາກາສຏ຺ຐກາ. ເຕສໍ ປຣມ຺ປຣາ ຈກ຺ກວາຬປພ຺ພຕໍ ປຕ຺ຕາ. ຕຖາ ຍາມາທີນໍ. ເອກເທວໂລເກປິ ຫິ ເທວານໍ ປຣມ຺ປຣາ ຈກ຺ກວາຬປພ຺ພຕໍ ອປ຺ປຕ຺ຕາ ນາມ ນຕ຺ຖິ. ຕຕ຺ຖ ທິພ຺ພໍ ສຸຂໍ ຍາຕາ ປຍາຕາ ສມ຺ປຕ຺ຕາຕິ ຍາມາ. ຕຸຏ຺ຐາ ປຫຏ຺ຐາຕິ ຕຸສິຕາ. ປກຕິປຏິຍຕ຺ຕາຣມ຺ມຓໂຕ ອຕິເຣເກນ ຣມິຕຸກາມກາເລ ຍຖາຣຸຈິເຕ ໂຠເຄ ນິມ຺ມິນິຕ຺ວາ ຣມນ຺ຕີຕິ ນິມ຺ມານຣຕີ. ຈິຕ຺ຕາຈາຣໍ ຎຕ຺ວາ ປເຣຫິ ນິມ຺ມິເຕສຸ ໂຠເຄສຸ ວສໍ ວຕ຺ເຕນ຺ຕີຕິ ປຣນິມ຺ມິຕວສວຕ຺ຕີ.

(໒.) ອາຍຸປ຺ປມາຓໍ

໑໐໒໒. ອປ຺ປໍ ວາ ຠິຍ຺ໂຍຕິ ທຸຕິຍໍ ວສ຺ສສຕໍ ອປ຺ປຕ຺ວາ ວີສາຍ ວາ ຕິໍສາຍ ວາ ຈຕ຺ຕາລີສາຍ ວາ ປຎ຺ຎາສາຍ ວາ ສຏ຺ຐິຍາ ວາ ວສ຺ເສຫິ ອຘິກມ຺ປິ ວສ຺ສສຕນ຺ຕິ ອຕ຺ໂຖ. ສພ຺ພມ຺ປິ ເຫຕໍ ທຸຕິຍໍ ວສ຺ສສຕໍ ອປ຺ປຕ຺ຕຕ຺ຕາ ອປ຺ປນ຺ຕິ ວຸຕ຺ຕໍ.

໑໐໒໔. ພ຺ຣຫ຺ມປາຣິສຊ຺ຊາທີສຸ ມຫາພ຺ຣຫ຺ມານໍ ປາຣິສຊ຺ຊາ ປຣິຈາຣິກາຕິ ພ຺ຣຫ຺ມປາຣິສຊ຺ຊາ. ເຕສໍ ປຸໂຣຫິຕຠາເວ ຐິຕາຕິ ພ຺ຣຫ຺ມປຸໂຣຫິຕາ. ວຓ຺ຓວນ຺ຕຕາຍ ເຈວ ທີຆາຍຸກຕາຍ ຈ ມຫນ຺ໂຕ ພ຺ຣຫ຺ມາຕິ ມຫາພ຺ຣຫ຺ມາ, ເຕສໍ ມຫາພ຺ຣຫ຺ມານໍ. ອິເມ ຕໂຍປິ ຊນາ ປຐມຊ຺ຌານຠູມິຍໍ ເອກຕເລ ວສນ຺ຕິ; ອາຍຸອນ຺ຕຣໍ ປນ ເນສໍ ນານາ.

໑໐໒໕. ປຣິຕ຺ຕາ ອາຠາ ເອເຕສນ຺ຕິ ປຣິຕ຺ຕາຠາ. ອປ຺ປມາຓາ ອາຠາ ເອເຕສນ຺ຕິ ອປ຺ປມາຓາຠາ. ທຓ຺ຑທີປິກາຍ ອຈ຺ຈິ ວິຍ ເອເຕສໍ ສຣີຣໂຕ ອາຠາ ຉິຊ຺ຊິຕ຺ວາ ຉິຊ຺ຊິຕ຺ວາ ປຕນ຺ຕີ ວິຍ ສຣຕິ ວິສຣຕີຕິ ອາຠສ຺ສຣາ. ອິເມປິ ຕໂຍ ຊນາ ທຸຕິຍຊ຺ຌານຠູມິຍໍ ເອກຕເລ ວສນ຺ຕິ; ອາຍຸອນ຺ຕຣໍ ປນ ເນສໍ ນານາ.

໑໐໒໖. ປຣິຕ຺ຕາ ສຸຠາ ເອເຕສນ຺ຕິ ປຣິຕ຺ຕສຸຠາ. ອປ຺ປມາຓາ ສຸຠາ ເອເຕສນ຺ຕິ ອປ຺ປມາຓສຸຠາ. ສຸເຠນ ໂອກິຓ຺ຓາ ວິກິຓ຺ຓາ, ສຸເຠນ ສຣີຣປ຺ປຠາວຓ຺ເຓນ ເອກຄ຺ຆນາ, ສຸວຓ຺ຓມຎ຺ຊຸສາຍ ຐປິຕສມ຺ປຊ຺ຊລິຕກຎ຺ຈນປິຓ຺ຑສສ຺ສິຣີກາຕິ ສຸຠກິຓ຺ຫາ. ອິເມປິ ຕໂຍ ຊນາ ຕຕິຍຊ຺ຌານຠູມິຍໍ ເອກຕເລ ວສນ຺ຕິ; ອາຍຸອນ຺ຕຣໍ ປນ ເນສໍ ນານາ.

໑໐໒໗. ອາຣມ຺ມຓນານຕ຺ຕຕາຕິ ອາຣມ຺ມຓສ຺ສ ນານຕ຺ຕຠາໂວ. ມນສິກາຣນານຕ຺ຕຕາທີສຸປິ ເອເສວ ນໂຍ. ເອຕ຺ຖ ເອກສ຺ສ ປຖວີກສິຓໍ ອາຣມ຺ມຓໍ ໂຫຕິ…ເປ… ເອກສ຺ສ ໂອທາຕກສິຓນ຺ຕິ ອິທໍ ອາຣມ຺ມຓນານຕ຺ຕໍ. ເອໂກ ປຖວີກສິຓໍ ມນສິ ກໂຣຕິ…ເປ… ເອໂກ ໂອທາຕກສິຓນ຺ຕິ ອິທໍ ມນສິກາຣນານຕ຺ຕໍ. ເອກສ຺ສ ປຖວີກສິເຓ ຉນ຺ໂທ ໂຫຕິ…ເປ… ເອກສ຺ສ ໂອທາຕກສິເຓຕິ ອິທໍ ຉນ຺ທນານຕ຺ຕໍ. ເອໂກ ປຖວີກສິເຓ ປຕ຺ຖນໍ ກໂຣຕິ…ເປ… ເອໂກ ໂອທາຕກສິເຓຕິ ອິທໍ ປຓິຘິນານຕ຺ຕໍ. ເອໂກ ປຖວີກສິຓວເສນ ອຘິມຸຈ຺ຈຕິ…ເປ… ເອໂກ ໂອທາຕກສິຓວເສນາຕິ ອິທໍ ອຘິໂມກ຺ຂນານຕ຺ຕໍ. ເອໂກ ປຖວີກສິຓວເສນ ຈິຕ຺ຕໍ ອຠິນີຫຣຕິ…ເປ… ເອໂກ ໂອທາຕກສິຓວເສນາຕິ ອິທໍ ອຠິນີຫາຣນານຕ຺ຕໍ. ເອກສ຺ສ ປຖວີກສິຓປຣິຈ຺ຉິນ຺ທນກປຎ຺ຎາ ໂຫຕິ…ເປ… ເອກສ຺ສ ໂອທາຕກສິຓປຣິຈ຺ຉິນ຺ທນກປຎ຺ຎາຕິ ອິທໍ ປຎ຺ຎານານຕ຺ຕໍ. ຕຕ຺ຖ ອາຣມ຺ມຓມນສິກາຣາ ປຸພ຺ພຠາເຄນ ກຖິຕາ. ຉນ຺ທປຓິຘິອຘິໂມກ຺ຂາຠິນີຫາຣາ ອປ຺ປນາຍປິ ວຕ຺ຕນ຺ຕິ ອຸປຈາເຣປິ. ປຎ຺ຎາ ປນ ໂລກິຍໂລກຸຕ຺ຕຣມິສ຺ສກາ ກຖິຕາ.

ອສຎ຺ຎສຕ຺ຕານນ຺ຕິ ສຎ຺ຎາວິຣຫິຕານໍ ສຕ຺ຕານໍ. ເອກຈ຺ເຈ ຫິ ຕິຕ຺ຖາຍຕເນ ປພ຺ພຊິຕ຺ວາ ‘ຈິຕ຺ຕໍ ນິສ຺ສາຍ ຣຊ຺ຊນທຸສ຺ສນມຸຍ຺ຫນານິ ນາມ ໂຫນ຺ຕີ’ຕິ ຈິຕ຺ເຕ ໂທສໍ ທິສ຺ວາ ‘ອຈິຕ຺ຕກຠາໂວ ນາມ ໂສຠໂນ, ທິຏ຺ຐຘມ຺ມນິພ຺ພານເມຕ’ນ຺ຕິ ສຎ຺ຎາວິຣາຄໍ ຊເນຕ຺ວາ ຕຕ຺ຣູປຄໍ ປຎ຺ຈມໍ ສມາປຕ຺ຕິໍ ຠາເວຕ຺ວາ ຕຕ຺ຖ ນິພ຺ພຕ຺ຕນ຺ຕິ. ເຕສໍ ອຸປປຕ຺ຕິກ຺ຂເຓ ເອໂກ ຣູປກ຺ຂນ຺ໂຘເຍວ ນິພ຺ພຕ຺ຕຕິ. ຐຕ຺ວາ ນິພ຺ພຕ຺ໂຕ ຐິຕໂກ ເອວ ໂຫຕິ, ນິສີທິຕ຺ວາ ນິພ຺ພຕ຺ໂຕ ນິສິນ຺ນໂກວ ນິປຊ຺ຊິຕ຺ວາ ນິພ຺ພຕ຺ໂຕ ນິປນ຺ໂນວ. ຈິຕ຺ຕກມ຺ມຣູປກສທິສາ ຫຸຕ຺ວາ ປຎ຺ຈ ກປ຺ປສຕານິ ຕິຏ຺ຐນ຺ຕິ. ເຕສໍ ປຣິໂຍສາເນ ໂສ ຣູປກາໂຍ ອນ຺ຕຣຘາຍຕິ, ກາມາວຈຣສຎ຺ຎາ ອຸປ຺ປຊ຺ຊຕິ; ເຕນ ອິຘ ສຎ຺ຎຸປ຺ປາເທນ ເຕ ເທວາ ຕມ຺ຫາ ກາຍາ ຈຸຕາຕິ ປຎ຺ຎາຍນ຺ຕິ.

ວິປຸລາ ຜລາ ເອເຕສນ຺ຕິ ເວຫປ຺ຜລາ. ອຕ຺ຕໂນ ສມ຺ປຕ຺ຕິຍາ ນ ຫາຍນ຺ຕິ ນ ວິຫາຍນ຺ຕີຕິ ອວິຫາ. ນ ກຎ຺ຈິ ສຕ຺ຕໍ ຕປ຺ປນ຺ຕີຕິ ອຕປ຺ປາ. ສຸນ຺ທຣາ ທສ຺ສນາ ອຠິຣູປາ ປາສາທິກາຕິ ສຸທສ຺ສາ. ສຸຏ຺ຐ ປສ຺ສນ຺ຕິ, ສຸນ຺ທຣເມເຕສໍ ວາ ທສ຺ສນນ຺ຕິ ສຸທສ຺ສີ. ສພ຺ເພຫິ ເອວ ຄຸເຓຫິ ຈ ຠວສມ຺ປຕ຺ຕິຍາ ຈ ເຊຏ຺ຐາ, ນຕ຺ເຖຕ຺ຖ ກນິຏ຺ຐາຕິ ອກນິຏ຺ຐາ.

໑໐໒໘. ອາກາສານຎ຺ຈາຍຕນໍ ອຸປຄຕາຕິ ອາກາສານຎ຺ຈາຍຕນູປຄາ. ອິຕເຣສຸປິ ເອເສວ ນໂຍ. ອິຕິ ຉ ກາມາວຈຣາ, ນວ ພ຺ຣຫ຺ມໂລກາ, ປຎ຺ຈ ສຸທ຺ຘາວາສາ, ຈຕ຺ຕາໂຣ ອຣູປາ ອສຎ຺ຎສຕ຺ຕເວຫປ຺ຜເລຫິ ສທ຺ຘິໍ ຉພ຺ພີສຕິ ເທວໂລກາ; ມນຸສ຺ສໂລເກນ ສທ຺ຘິໍ ສຕ຺ຕວີສຕິ.

ຕຕ຺ຖ ສມ຺ມາສມ຺ພຸທ຺ເຘນ ມນຸສ຺ສານໍ ເທວານຎ຺ຈ ອາຍຸໍ ປຣິຈ຺ຉິນ຺ທມາເນນ ຈຕູສຸ ອປາເຍສຸ ຠຸມ຺ມເທເວສຸ ຈ ອາຍຸ ປຣິຈ຺ຉິນ຺ນໍ ຕໍ ກສ຺ມາຕິ? ນິຣເຍ ຕາວ ກມ຺ມເມວ ປມາຓໍ. ຍາວ ກມ຺ມໍ ນ ຂີຍຕິ, ນ ຕາວ ຈວນ຺ຕິ. ຕຖາ ເສສອປາເຍສຸ. ຠຸມ຺ມເທວານມ຺ປິ ກມ຺ມເມວ ປມາຓໍ. ຕຕ຺ຖ ນິພ຺ພຕ຺ຕາ ຫິ ເກຈິ ສຕ຺ຕາຫມຕ຺ຕໍ ຕິຏ຺ຐນ຺ຕິ, ເກຈິ ອທ຺ຘມາສໍ, ເກຈິ ມາສໍ, ກປ຺ປໍ ຕິຏ຺ຐມານາປິ ອຕ຺ຖິເຍວ.

ຕຕ຺ຖ ມນຸສ຺ເສສຸ ຄິຫິຠາເວ ຐິຕາເຍວ ໂສຕາປນ຺ນາປິ ໂຫນ຺ຕິ, ສກທາຄາມິຜລມ຺ປິ ອນາຄາມິຜລມ຺ປິ ອຣຫຕ຺ຕຜລມ຺ປິ ປາປຸຓນ຺ຕິ. ເຕສຸ ໂສຕາປນ຺ນາທໂຍ ຍາວຊີວໍ ຕິຏ຺ຐນ຺ຕິ. ຂີຓາສວາ ປນ ປຣິນິພ຺ພາຍນ຺ຕິ ວາ ປພ຺ພຊນ຺ຕິ ວາ. ກສ຺ມາ? ອຣຫຕ຺ຕໍ ນາມ ເສຏ຺ຐຄຸໂຓ, ຄິຫິລິງ຺ຄໍ ຫີນໍ, ຕໍ ຫີນຕາຍ ອຸຕ຺ຕມໍ ຄຸຓໍ ຘາເຣຕຸໍ ນ ສກ຺ໂກຕິ. ຕສ຺ມາ ເຕ ປຣິນິພ຺ພາຕຸກາມາ ວາ ປພ຺ພຊິຕຸກາມາ ວາ ໂຫນ຺ຕິ.

ຠຸມ຺ມເທວາ ປນ ອຣຫຕ຺ຕໍ ປຕ຺ວາປິ ຍາວຊີວໍ ຕິຏ຺ຐນ຺ຕິ. ຉສຸ ກາມາວຈຣເທເວສຸ ໂສຕາປນ຺ນສກທາຄາມິໂນ ຍາວຊີວໍ ຕິຏ຺ຐນ຺ຕິ; ອນາຄາມິນາ ຣູປຠວໍ ຄນ຺ຕຸໍ ວຏ຺ຏຕິ, ຂີຓາສເວນ ປຣິນິພ຺ພາຕຸໍ. ກສ຺ມາ? ນິລີຍໂນກາສສ຺ສ ອຠາວາ. ຣູປາວຈຣາຣູປາວຈເຣສຸ ສພ຺ເພປິ ຍາວຊີວໍ ຕິຏ຺ຐນ຺ຕິ. ຕຕ຺ຖ ຣູປາວຈເຣ ນິພ຺ພຕ຺ຕາ ໂສຕາປນ຺ນສກທາຄາມິໂນ ນ ປຸນ ອິຘາຄຈ຺ຉນ຺ຕິ, ຕຕ຺ເຖວ ປຣິນິພ຺ພາຍນ຺ຕິ. ເອເຕ ຫິ ຌານອນາຄາມິໂນ ນາມ.

ອຏ຺ຐສມາປຕ຺ຕິລາຠີນໍ ປນ ກິໍ ນິຍເມຕິ? ປຄຸຓຊ຺ຌານໍ. ຍເທວສ຺ສ ປຄຸຓໍ ໂຫຕິ, ເຕນ ອຸປ຺ປຊ຺ຊຕິ. ສພ຺ເພສຸ ປນ ປຄຸເຓສຸ ກິໍ ນິຍເມຕິ? ປຕ຺ຖນາ. ຍຕ຺ຖ ອຸປປຕ຺ຕິໍ ປຕ຺ເຖຕິ ຕຕ຺ເຖວ ອຸປປຊ຺ຊຕິ. ປຕ຺ຖນາຍ ອສຕິ ກິໍ ນິຍເມຕິ? ມຣຓສມເຍ ສມາປນ຺ນາ ສມາປຕ຺ຕິ. ມຣຓສມເຍ ສມາປນ຺ນາ ນຕ຺ຖິ, ກິໍ ນິຍເມຕິ? ເນວສຎ຺ຎານາສຎ຺ຎາຍຕນສມາປຕ຺ຕິ. ເອກໍເສນ ຫິ ໂສ ເນວສຎ຺ຎານາສຎ຺ຎາຍຕເນ ອຸປປຊ຺ຊຕິ. ນວສຸ ພ຺ຣຫ຺ມໂລເກສຸ ນິພ຺ພຕ຺ຕອຣິຍສາວການໍ ຕຕ຺ຣູປປຕ຺ຕິປິ ໂຫຕິ ອຸປຣູປປຕ຺ຕິປິ ນ ເຫຏ຺ຐູປປຕ຺ຕິ. ປຸຖຸຊ຺ຊນານໍ ປນ ຕຕ຺ຣູປປຕ຺ຕິປິ ໂຫຕິ ອຸປຣູປປຕ຺ຕິປິ ເຫຏ຺ຐູປປຕ຺ຕິປິ. ປຎ຺ຈສຸ ສຸທ຺ຘາວາເສສຸ ຈຕູສຸ ຈ ອຣູເປສຸ ອຣິຍສາວການໍ ຕຕ຺ຣູປປຕ຺ຕິປິ ໂຫຕິ ອຸປຣູປປຕ຺ຕິປິ. ປຐມຊ຺ຌານຠູມິຍໍ ນິພ຺ພຕ຺ໂຕ ອນາຄາມີ ນວ ພ຺ຣຫ຺ມໂລເກ ໂສເຘຕ຺ວາ ມຕ຺ຖເກ ຐິໂຕ ປຣິນິພ຺ພາຕິ. ເວຫປ຺ຜລາ, ອກນິຏ຺ຐາ, ເນວສຎ຺ຎານາສຎ຺ຎາຍຕນນ຺ຕິ ອິເມ ຕໂຍ ເທວໂລກາ ເສຏ຺ຐຠວາ ນາມ. ອິເມສຸ ຕີສຸ ຐາເນສຸ ນິພ຺ພຕ຺ຕອນາຄາມິໂນ ເນວ ອຸທ຺ຘໍ ຄຈ຺ຉນ຺ຕິ, ນ ອໂຘ, ຕຕ຺ຖ ຕຕ຺ເຖວ ປຣິນິພ຺ພາຍນ຺ຕີຕິ. ອິທເມຕ຺ຖ ປກິຓ຺ຓກໍ.