໑. ອຕີຕາທິເອກຈ຺ຈກຖາວຓ຺ຓນາ

໒໙໙. ອິທານິ ເອກຈ຺ຈໍ ອຕ຺ຖີຕິ ກຖາ ໂຫຕິ. ຕຕ຺ຖ ເຍ ‘‘ເອກຈ຺ຈໍ ອຕີຕໍ ອຕ຺ຖີ’’ຕິ ມຎ຺ຎນ຺ຕິ, ເສຍ຺ຍຖາປິ ກສ຺ສປິກາ; ເຕສໍ ລທ຺ຘິຠິນ຺ທນຕ຺ຖໍ ອຕີຕໍ ອຕ຺ຖີຕິ ປຸຈ຺ຉາ ສກວາທິສ຺ສ, ເອກຈ຺ຈໍ ອຕ຺ຖີຕິ ວິສ຺ສຊ຺ຊນໍ ປຣວາທິສ຺ສ. ອຍຎ຺ຫິ ອຘິປ຺ປາໂຍ – ອວິປກ຺ກວິປາກໍ ອຕ຺ຖິ, ວິປກ຺ກວິປາກໍ ນຕ຺ຖີຕິ. ເອກຈ຺ຈໍ ນິຣຸທ຺ຘນ຺ຕິ ອນຸໂຍໂຄ ສກວາທິສ຺ສ. ຕສ຺ສຕ຺ໂຖ – ຍທິ ເຕ ອຕີຕໍ ເອກຈ຺ຈໍ ອຕ຺ຖິ ເອກຈ຺ຈໍ ນຕ຺ຖິ, ເອວໍ ສນ຺ເຕ ເອກຈ຺ຈໍ ອຕີຕໍ ນິຣຸທ຺ຘໍ, ເອກຈ຺ຈໍ ອຕີຕໍ ອນິຣຸທ຺ຘໍ, ຕເຖວ ຐິຕນ຺ຕິ ອາປຊ຺ຊຕິ. ວິຄຕນ຺ຕິອາທີສຸປິ ເອເສວ ນໂຍ.

ອວິປກ຺ກວິປາກຘມ຺ມາ ເອກຈ຺ເຈຕິ ອິທໍ ຍສ຺ມາ ເຍສໍ ໂສ ອວິປກ຺ກວິປາການໍ ອຕ຺ຖິຕໍ ອິຈ຺ຉຕິ, ເຕປິ ອຕີຕາເຍວ. ຕສ຺ມາ ຍຖາ ເຕ ອຕີຕໍ ເອກຈ຺ຈໍ ອຕ຺ຖິ, ກິໍ ຕຖາ ອວິປກ຺ກວິປາກາປິ ຘມ຺ມາ ເອກຈ຺ເຈ ອຕ຺ຖີ ເອກຈ຺ເຈ ນຕ຺ຖີຕິ ໂຈເທຕຸໍ ວຸຕ຺ຕໍ. ວິປກ຺ກວິປາກາຕິ ອິທໍ ເຍສໍ ໂສ ນຕ຺ຖິຕໍ ອິຈ຺ຉຕິ, ເຕສໍ ວເສນ ໂຈເທຕຸໍ ວຸຕ຺ຕໍ. ອວິປາກາຕິ ອິທໍ ອພ຺ຍາກຕານໍ ວເສນ ໂຈເທຕຸໍ ວຸຕ຺ຕໍ. ອິຕິ ອິເມສໍ ຕິຓ຺ຓໍ ຣາສີນໍ ວເສນ ສພ຺ເພສຸ ອນຸໂລມປຏິໂລເມສຸ ປຏິຎ຺ຎາ ຈ ປຏິກ຺ເຂໂປ ຈ ເວທິຕພ຺ພາ. ອຕີຕາ ເອກເທສໍ ວິປກ຺ກວິປາກາ, ເອກເທສໍ ອວິປກ຺ກວິປາກາຕິ ວິປ຺ປກຕວິປາກາ ວຸຈ຺ຈນ຺ຕິ. ເຍນ ຫິ ກມ຺ເມນ ປຏິສນ຺ຘິ ນິພ຺ພຕ຺ຕິຕາ, ຠວງ຺ຄມ຺ປິ ຈຸຕິປິ ຕສ຺ເສວ ວິປາໂກ. ຕສ຺ມາ ປຏິສນ຺ຘິໂຕ ຍາວ ຈຸຕິ, ຕາວ ຕໍ ວິປ຺ປກຕວິປາກໍ ນາມ ໂຫຕິ. ຕຖາຣູເປ ຘມ຺ເມ ສນ຺ຘາເຍຕໍ ວຸຕ຺ຕໍ.

ວິປຈ຺ຈິສ຺ສນ຺ຕີຕິ ກຕ຺ວາ ເຕ ອຕ຺ຖີຕິ ປຸຈ຺ຉາ ສກວາທິສ຺ສ. ຍຖາ ຘມ຺ມຘຣສ຺ສ ປຸຄ຺ຄລສ຺ສ ນິທ຺ທາຍນ຺ຕສ຺ສາປິ ພຫຸປວຕ຺ຕິໂນ ຘມ຺ມາ ອຕ຺ຖີຕິ ວຸຈ຺ຈນ຺ຕິ, ເອວໍ ໂລກໂວຫາຣວເສນ ອຕ຺ຖິຕໍ ສນ຺ຘາຍ ປຏິຎ຺ຎາ ປຣວາທິສ຺ສ. ວິປຈ຺ຈິສ຺ສນ຺ຕີຕິ ກຕ຺ວາ ປຈ຺ຈຸປນ຺ນາຕິ ທຸຕິຍປຎ຺ເຫ ‘‘ກມ຺ມານໍ ອວິນາສສງ຺ຂາໂຕ ກມ຺ມູປຈໂຍ ນາເມໂກ ອຕ຺ຖີ’’ຕິ ລທ຺ຘິຍໍ ຐຕ຺ວາ ປຏິຎ຺ຎາ ປຣວາທິສ຺ສ.