໖. ອຕີຕກ຺ຂນ຺ຘາທິກຖາ

໑. ນສຸຕ຺ຕສາຘນກຖາວຓ຺ຓນາ

໒໙໗. ອິທານິ ‘‘ອຕີຕໍ ຂນ຺ຘາ’’ຕິອາທິກຖາ ໂຫຕິ. ຕຕ຺ຖ ຂນ຺ຘາທິຠາວາວິຊຫນໂຕ ອຕີຕານາຄຕານໍ ອຕ຺ຖິຕໍ ອິຈ຺ຉນ຺ຕສ຺ສ ອຕີຕໍ ຂນ຺ຘາຕິ ປຸຈ຺ຉາ ປຣວາທິສ຺ສ, ອຕີຕສ຺ສ ຂນ຺ຘສງ຺ຄຫິຕຕ຺ຕາ ອາມນ຺ຕາຕິ ປຏິຎ຺ຎາ ສກວາທິສ຺ສ. ປຸນ ອຕີຕໍ ນຕ຺ຖີຕິ ປຸຈ຺ຉາ ປຣວາທິສ຺ສ, ຕສ຺ສ ນິຣຸຕ຺ຕິປຖສຸຕ຺ເຕນ ອຕ຺ຖິຕາຍ ວາຣິຕຕ຺ຕາ ປຏິກ຺ເຂໂປ ສກວາທິສ຺ສ. ອາຍຕນຘາຕຸປຸຈ຺ຉາສຸປິ ອນາຄຕປຎ຺ເຫສຸປິ ປຈ຺ຈຸປ຺ປນ຺ເນນ ສທ຺ຘິໍ ສໍສນ຺ທິຕ຺ວາ ອນຸໂລມປຏິໂລມໂຕ ອາຄຕປຎ຺ເຫສຸປິ ‘‘ອຕີຕໍ ຣູປ’’ນ຺ຕິອາທິປຎ຺ເຫສຸປິ ອິມິນາວຸປາເຍນ ອຕ຺ໂຖ ເວທິຕພ຺ໂພ.

໒. ສຸຕ຺ຕສາຘນວຓ຺ຓນາ

໒໙໘. ສຸຕ຺ຕສາຘເນ ປນ ນ ວຕ຺ຕພ຺ພນ຺ຕິ ປຸຈ຺ຉາ ສກວາທິສ຺ສ. ຕຕ຺ຖ ນຕ຺ຖິ ເຈເຕຕິ ນຕ຺ຖິ ຈ ເອເຕ ຘມ຺ມາຕິ ອຕ຺ໂຖ. ຂນ຺ຘາທິຠາເວ ສຕິ ນຕ຺ຖິຕໍ ອນິຈ຺ຉນ຺ຕສ຺ສ ອາມນ຺ຕາຕິ ປຏິຎ຺ຎາ ປຣວາທິສ຺ສ, ອຖ ເນສໍ ນຕ຺ຖິຠາວສາຘນຕ຺ຖໍ ສຸຕ຺ຕາຫຣຓໍ ສກວາທິສ຺ສ. ທຸຕິຍປຸຈ຺ຉາປິ ປຣວາທິສ຺ສ, ປຏິຎ຺ຎາ ສກວາທິສ຺ສ, ສຸຕ຺ຕາຫຣຓໍ ປຣວາທິສ຺ສ. ຕໍ ປນ ເນສໍ ຂນ຺ຘາທິຠາວເມວ ສາເຘຕິ, ນ ອຕ຺ຖິຠາວນ຺ຕິ ອາຫຏມ຺ປິ ອນາຫຏສທິສເມວາຕິ.

ອຕີຕໍ ຂນ຺ຘາຕິອາທິກຖາວຓ຺ຓນາ.