໓. ທຸກຕິກປຏ຺ຐານວຓ຺ຓນາ

ທຸກຕິກປຏ຺ຐາເນ ເຫຕຸໍ ກຸສລໍ ຘມ຺ມໍ ປຏິຈ຺ຈ ເຫຕຸ ກຸສໂລ ຘມ຺ໂມ ອຸປ຺ປຊ຺ຊຕິ ເຫຕຸປຈ຺ຈຍາຕິ ເອວໍ ປຎ຺ຫາມຕ຺ຕຸທ຺ຘາຣວເສເນວ ສງ຺ເຂປໂຕ ເທສນາ ກຕາ. ‘‘ກຸສລໍ ອໂລຠໍ ປຏິຈ຺ຈ ອໂທໂສ ອໂມໂຫ’’ຕິອາທິນາ ປນ ນເຍນ ວິຕ຺ຖາໂຣ ວຕ຺ຕພ຺ໂພ ສິຍາ, ໂສ ເຫຏ຺ຐາ ທສ຺ສິຕນເຍນ ສກ຺ກາ ອວຸຕ຺ໂຕປິ ຊານິຕຸນ຺ຕິ ເອກປເທປິ ເອກປຈ຺ຈໂຍ ວາ ນ ວຸຕ຺ໂຕ. ຍາ ປເນສາ ສງ຺ເຂປໂຕ ເທສນາ ກຕາ, ສາ ເອວໍ ກຕາຕິ ເວທິຕພ຺ພາ. ເຫຕຸທຸເກນ ຫິ ສທ຺ຘິໍ ກຸສລປທໍ ໂຍເຊຕ຺ວາ ປຏິຈ຺ຈວາເຣ ອນຸໂລມສ຺ສ ເຈວ ປຈ຺ຈນີຍສ຺ສ ຈ ວເສນ ສພ຺ເພ ລພ຺ຠມານກປຈ຺ຈຍາ ທສ຺ສິຕາ, ອນຸໂລມປຈ຺ຈນີຍປຈ຺ຈນີຍານຸໂລມນຍາ ເຈວ ສຫຊາຕວາຣາທໂຍ ຈ ນ ທສ຺ສິຕາ, ເກວລໍ ‘‘ປຏິຈ຺ຈວາຣສທິສໍເຍວ ວິຕ຺ຖາເຣຕພ຺ພ’’ນ຺ຕິ ວຸຕ຺ຕໍ. ປຎ຺ຫາວາເຣ ປຎ຺ຫມ຺ປິ ອວິສ຺ສຊ຺ເຊຕ຺ວາ ເກວລໍ ປຎ຺ຫຸທ຺ຘາຣມຕ຺ຕໍ ກຕ຺ວາ ອນຸໂລມປຈ຺ຈນີຍວເສເນວ ລພ຺ຠມານປຈ຺ຈຍາ ທສ຺ສິຕາ. ຍຖາ ຈ ກຸສລປທໍ, ເອວໍ ອກຸສລອພ຺ຍາກຕປທານິປິ ເຫຕຸທຸເກນ ສທ຺ຘິໍ ໂຍເຊຕ຺ວາ ເຫຕຸກຸສລທຸກຕິກໍ ນິທ຺ທິສິຕພ຺ພນ຺ຕິ ວຸຕ຺ຕໍ.

ຕໂຕ ປຣໍ ເຫຕຸໍ ສຸຂາຍ ເວທນາຍ ສມ຺ປຍຸຕ຺ຕໍ ຘມ຺ມນ຺ຕິອາທິນາ ນເຍນ ເຫຕຸເວທນາທຸກຕິກາທີນິ ເອກວີສຕິ ທຸກຕິການິ ທສ຺ສິຕານິ. ຍສ຺ມາ ປນ ເຫຕຸ ນາມ ສນິທສ຺ສນສປ຺ປຏິໂຆ ອນິທສ຺ສນສປ຺ປຏິໂຆ ວາ ນຕ຺ຖິ, ຕສ຺ມາ ເຫຕຸປເທນ ສທ຺ຘິໍ ສນິທສ຺ສນສປ຺ປຏິຆອນິທສ຺ສນສປ຺ປຏິຆປທານິ ນ ໂຍຊິຕານິ. ເອວໍ ເຫຕຸທຸເກນ ສທ຺ຘິໍ ລພ຺ຠມານກວເສນ ທ຺ວາວີສຕິ ຕິເກ ໂຍເຊຕ຺ວາ ປຸນ ເຕ ສເຫຕຸກທຸກາທີຫິ ສຣຓທຸກປຣິໂຍສາເນຫິ ສພ຺ພທຸເກຫິ ສທ຺ຘິໍ ໂຍຊິຕາ. ຕຕ຺ຖ ຍໍ ຍໍ ປທໍ ເຍນ ເຍນ ປເທນ ສທ຺ຘິໍ ໂຍຊນໍ ນ ຄຈ຺ຉຕິ, ຕໍ ຕໍ ປາຬິຍໍເຍວ ນ ລພ຺ຠຕີຕິ ວຸຕ຺ຕໍ. ເອວເມຕ຺ຖ ເອເກນ ທຸເກນ ສທ຺ຘິໍ ພາວີສຕິ ຕິເກ ໂຍເຊຕ຺ວາ ປຸນ ອປເຣນ ພາວີສຕິ, ອປເຣນ ພາວີສຕີຕິ ປຏິປາຏິຍາ ທຸກສເຕ ລພ຺ຠມານທຸກປເທຫິ ສທ຺ຘິໍ ທ຺ວາວີສຕິ ຕິກາ ໂຍຊິຕາຕິ ທ຺ວາວີສຕິ ຕິເກ ຄເຫຕ຺ວາ ທຸກສເຕ ປກ຺ຂິປິຕ຺ວາ ທຸກຕິກປຏ຺ຐານໍ ນາມ ເທສິຕໍ. ຕຕ຺ຖ ເຍສຸ ເຍສຸ ຐາເນສຸ ນຍໍ ທສ຺ເສຕ຺ວາ ປາຬິຍາ ສງ຺ເຂໂປ ກໂຕ, ເຕສຸ ເຕສຸ ຐາເນສຸ ທສ຺ສິຕນຍານຸຣູເປນ ຕສ຺ສາ ວິຕ຺ຖາໂຣ ເວທິຕພ຺ໂພຕິ.

ທຸກຕິກປຏ຺ຐານວຓ຺ຓນາ.