໒. ສໍສນ຺ທນພ຺ຣຫ຺ມຈຣິຍວຓ຺ຓນາ

໒໗໓. ອິທານິ ຍທິ ອຎ຺ຎຕ຺ຖ ຠາວິເຕນ ມຄ຺ເຄນ ອຎ຺ຎຕ຺ຖ ຜລສຈ຺ຉິກິຣິຍາ ໂຫຕິ, ໂສຕາປນ຺ນາທີນມ຺ປິ ສິຍາຕິ ເອຕມຕ຺ຖໍ ທສ຺ເສຕຸໍ ປຸນ ອນາຄາມີຕິອາທີນໍ ສໍສນ຺ທນປຸຈ຺ຉາ ສກວາທິສ຺ສ. ຕຕ຺ຖ ອນາຄາມິສ຺ສ ຜລສຈ຺ຉິກິຣິຍາຍ ປຏິຎ຺ຎາ, ເສສານໍ ຜລສຈ຺ຉິກິຣິຍາຍ ປຏິກ຺ເຂໂປ ປຣວາທິສ຺ສ. ອິຘ ຠາວິຕມຄ຺ໂຄ ຫິ ອນາຄາມີ ອິຘວິຫາຍນິຏ຺ໂຐ ນາມ ໂຫຕິ. ໂສ ອິຘ ອນາຄາມິມຄ຺ຄໍ ຠາເວຕ຺ວາ ‘‘ໂອປປາຕິໂກ ຕຕ຺ຖປຣິນິພ຺ພາຍີ’’ຕິ ວຈນໂຕ ‘‘ປຸນ ມຄ຺ຄຠາວນໍ ວິນາ ອຸປປຕ຺ຕິວເສເນວ ອຣຫຕ຺ຕຜລໍ ສຈ຺ຉິກໂຣຕີ’’ຕິ ຕສ຺ສ ລທ຺ຘິ. ໂສຕາປນ຺ນສກທາຄາມິໂນ ປນ ຕຕ຺ຖ ມຄ຺ຄໍ ຠາເວຕ຺ວາ ຕຕ຺ຣຸປປຕ຺ຕິກາ ນາມ ໂຫນ຺ຕີຕິ ເຕສໍ ອິຘາຄມນຎ຺ເຎວ ນຕ຺ຖິ. ອິຕິ ໂສ ອນາຄາມິສ຺ສ ຜລສຈ຺ຉິກິຣິຍໍ ປຸຏ຺ໂຐ ປຏິຊານາຕິ. ອິຕເຣສໍ ປຏິກ຺ຂິປຕິ.

ອນາຄາມີ ປຸຄ຺ຄໂລ ຕຕ຺ຖ ຠາວິເຕນ ມຄ຺ເຄນາຕິ ປຎ຺ເຫ ‘‘ອນາຄາມິໂນ ຕຕ຺ຖ ມຄ຺ຄຠາວນາວ ນຕ຺ຖີ’’ຕິ ລທ຺ຘິຍາ ປຏິກ຺ຂິປຕິ. ມຄ຺ໂຄ ຈ ຠາວີຍຕິ, ນ ຈ ກິເລສາ ປຫີຍນ຺ຕີຕິ ປຸຈ຺ຉາ ສກວາທິສ຺ສ, ຣູປາວຈຣມຄ຺ຄໍ ສນ຺ຘາຍ ປຏິຎ຺ຎາ ອິຕຣສ຺ສ. ຣູປາວຈຣມຄ຺ເຄນ ຫິ ໂສ ອິຘວິຫາຍນິຏ຺ໂຐ ນາມ ຊາໂຕ.

ອນາຄາມີ ປຸຄ຺ຄໂລ ກຕກຣຓີໂຍຕິ ປຎ຺ເຫ ‘‘ໂອປປາຕິໂກ ຕຕ຺ຖປຣິນິພ຺ພາຍີ’’ຕິ ວຈນໂຕ ອຸປປຕ຺ຕິຍາວສ຺ສ ກຕກຣຓີຍາທິຠາວໍ ສນ຺ຘາຍ ປຏິຊານາຕິ. ອຣຫາຕິ ປຎ຺ເຫ ອິຘປຣິນິພ຺ພາຍິໂນ ອຣຫໂຕ ວເສເນວ ປຏິກ຺ຂິປຕິ. ປຸນ ປຸຏ຺ໂຐ ຕຕ຺ຖປຣິນິພ຺ພາຍິໂນ ວເສນ ປຏິຊານາຕິ.

ອຕ຺ຖິ ອຣຫໂຕ ປຸນພ຺ຠໂວຕິອາທີສຸປິ ຕຕ຺ຖປຣິນິພ຺ພາຍີ ອິຘປຣິນິພ຺ພາຍີນໍ ວເສເນວ ອຕ຺ໂຖ ເວທິຕພ຺ໂພ. ອປ຺ປຏິວິທ຺ຘາກຸປ຺ໂປວ ຕຕ຺ຖປຣິນິພ຺ພາຍຕີຕິ ປຸຏ຺ໂຐ ອິເຘວ ຠາວິເຕນ ມຄ຺ເຄນ ຕສ຺ສ ອກຸປ຺ປປຏິເວຘໍ ອິຈ຺ຉນ຺ໂຕ ປຏິກ຺ຂິປຕິ.

ຍຖາ ມິໂຄຕິ ປຐມໍ ອຸທາຫຣຓໍ ປຣວາທິສ຺ສ, ທຸຕິຍໍ ສກວາທິສ຺ສ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ພ຺ຣຫ຺ມຈຣິຍກຖາ ນິຏ຺ຐິຕາ.