໓. ວິປາກຕ຺ຕິກວຓ຺ຓນາ

໑-໒໓. ວິປາກຕ຺ຕິເກ ວິປາກໍ ຘມ຺ມໍ ປຏິຈ຺ຈ ວິປາໂກ ຘມ຺ໂມ ອຸປ຺ປຊ຺ຊຕິ ເຫຕຸປຈ຺ຈຍາຕິ ເຍ ເຫຕຸປຈ຺ຈເຍ ເຕຣສ ວາຣາ ວຸຕ຺ຕາ, ເຕ ສງ຺ຂິປິຕ຺ວາ ຄຓນາຍ ທສ຺ເສຕຸໍ ເຫຕຸຍາ ເຕຣສາຕິ ວຸຕ຺ຕໍ. ອາຣມ຺ມເຓ ປຎ຺ຈາຕິອາທີສຸປິ ເອເສວ ນໂຍ. ເອວເມຕ຺ຖ ເຕຣສ ປຎ຺ຈ ນວ ສຕ຺ຕ ຕີຓິ ທ຺ເວຕິ ຉ ຄຓນປຣິຈ຺ເຉທາ, ເຕສໍ ວເສນ ປຈ຺ຈຍສໍສນ຺ທເນ ເຫຏ຺ຐາ ວຸຕ຺ຕນເຍເນວ ຄຓນາ ເວທິຕພ຺ພາ.

໒໔-໕໒. ປຈ຺ຈນີເຍປິ ວິປາກໍ ຘມ຺ມໍ ປຏິຈ຺ຈ ວິປາໂກ ຘມ຺ໂມ ອຸປ຺ປຊ຺ຊຕິ ນເຫຕຸປຈ຺ຈຍາຕິ ເຍ ນເຫຕຸປຈ຺ຈເຍ ທສ ວາຣາ ວຸຕ຺ຕາ, ເຕ ສງ຺ຂິປິຕ຺ວາ ຄຓນາຍ ທສ຺ເສຕຸໍ ນເຫຕຸຍາ ທສາຕິ ວຸຕ຺ຕໍ. ນ ອາຣມ຺ມເຓ ປຎ຺ຈາຕິອາທີສຸປິ ເອເສວ ນໂຍ. ເອວເມຕ຺ຖ ທສ ປຎ຺ຈ ເຕຣສ ທ຺ວາທສ ທ຺ເວ ເອກໍ ນວ ຕີຓີຕິ ອຏ຺ຐ ຄຓນປຣິຈ຺ເຉທາ, ເຕສໍ ວເສນ ປຈ຺ຈຍສໍສນ຺ທເນ ເຫຏ຺ຐາ ວຸຕ຺ຕນເຍເນວ ວິຕ຺ຖາຣໂຕ ຄຓນາ ເວທິຕພ຺ພາ. ປາຬິ ປນ ສງ຺ຂິຕ຺ຕາ, ເອເຕສຎ຺ເຎວ ປນ ລທ຺ຘຄຓນຣປຣິຈ຺ເຉທານໍ ວາຣານໍ ວເສນ ສໍສນ຺ທິຕ຺ວາ ອນຸໂລມປຈ຺ຈນີຍໍ ປຈ຺ຈນີຍານຸໂລມຎ຺ຈ ເວທິຕພ຺ພໍ.

ສຫຊາຕວາໂຣ ອິມິນາວ ເອກຄຕິໂກ. ປຈ຺ຈຍນິສ຺ສຍສໍສຏ຺ຐສມ຺ປຍຸຕ຺ຕວາຣາ ຍຖາປາຬິເມວ ນິຍ຺ຍນ຺ຕິ.

໙໒. ປຎ຺ຫາວາເຣ ກຸສລາກຸສເລ ນິຣຸທ຺ເຘຕິ ເອຕສ຺ມິໍ ວິປສ຺ສນາວເສນ ປວຕ຺ເຕ ກຸສເລ ສາຣຊ຺ຊນາທິວເສນ ປວຕ຺ເຕ ອກຸສເລ ຈ ນິຣຸທ຺ເຘ. ວິປາໂກ ຕທາຣມ຺ມຓຕາ ອຸປ຺ປຊ຺ຊຕີຕິ ກາມາວຈຣວິປາໂກ ຕທາຣມ຺ມຓຕາຍ ອຸປ຺ປຊ຺ຊຕິ. ເຍ ປນ ‘‘ວິປສ຺ສນາຊວນານໍ ວິຈິກິຈ຺ຉຸທ຺ຘຈ຺ຈານຎ຺ຈ ປຣິໂຍສາເນ ຕທາຣມ຺ມຓໍ ນຕ຺ຖີ’’ຕິ ວທນ຺ຕິ, ເຕ ອິມາຍ ຕນ຺ຕິຍາ ປຏິເສເຘຕພ຺ພາ. ອາກາສານຎ຺ຈາຍຕນກຸສລໍ ວິຎ຺ຎາຓຎ຺ຈາຍຕນສ຺ສ ກິຣິຍສ຺ສ ອາຣມ຺ມຓປຈ຺ຈເຍນ ປຈ຺ຈໂຍຕິ ອຣຫຕ຺ຕໍ ປຕ຺ວາ ອສມາປນ຺ນປຸພ຺ພາ ສມາປຕ຺ຕິໂຍ ປຏິໂລມໂຕ ສມາປຊ຺ຊນ຺ຕສ຺ສ ວເສເນຕໍ ວຸຕ຺ຕໍ. ອິມິນາ ອຸປາເຍນ ສພ຺ພວິສ຺ສຊ຺ຊເນສຸ ສາຘຸກໍ ປາຬິໍ ອຸປປຣິກ຺ຂິຕ຺ວາ ອຕ຺ໂຖ ເວທິຕພ຺ໂພ.

໑໒໐. ເຫຕຸຍາ ສຕ຺ຕ, ອາຣມ຺ມເຓ ນວ, ອຘິປຕິຍາ ທສາຕິອາທີສຸປິ ສຫຊາຕາຘິປຕິວເສນ ອາຣມ຺ມຓາຘິປຕິວເສນ ສຫຊາຕນິສ຺ສຍວເສນ ປຸເຣຊາຕນິສ຺ສຍວເສນ ອນນ຺ຕຣູປນິສ຺ສຍວເສນ ອາຣມ຺ມຓູປນິສ຺ສຍວເສນ ປກຕູປນິສ຺ສຍວເສນ ສຫຊາຕວິປ຺ປຍຸຕ຺ຕວເສນ ປຸເຣຊາຕປຈ຺ຉາຊາຕວິປ຺ປຍຸຕ຺ຕວເສນາຕິ ຍຕ຺ຖ ຍຕ຺ຖ ຍຖາ ຍຖາ ຍຕ຺ຕການິ ວິສ຺ສຊ຺ຊນານິ ລພ຺ຠນ຺ຕິ, ຕຕ຺ຖ ຕຕ຺ຖ ຕຖາ ຕຖາ ຕານິ ສພ຺ພານິ ສລ຺ລກ຺ເຂຕພ຺ພານິ. ຕຖາ ປຈ຺ຈນີຍາທີສຸ ອນຸໂລມວເສນ ວາຣຸທ຺ຘຣຓໍ, ອນຸໂລມໂຕ ລທ຺ຘວາຣານໍ ປຈ຺ຈນີຍໂຕ ຄຓນາ, ປຈ຺ຈຍສໍສນ຺ທນໍ, ອນຸໂລມປຈ຺ຈນີເຍ ປຈ຺ຈນີຍານຸໂລເມ ຈ ສຸທ຺ຘິເກສຸ ເຈວ ສໍສນ຺ທນວເສນ ຈ ປວຕ຺ເຕສຸ ເຫຕຸມູລກາທີສຸ ລພ຺ຠມານວາຣຄຓນາ, ອລພ຺ຠມານານໍ ອລພ຺ຠມານຕາຕິ ສພ຺ພໍ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ.

ຍຖາ ເຈຕ຺ຖ, ເອວໍ ອິໂຕ ປເຣສຸປິ ຕິກທຸເກສຸ. ປຏ຺ຐານປກຣຓຎ຺ຫິ ປາຬິໂຕວ ອນນ຺ຕໍ ອປຣິມາຓໍ. ຕສ຺ສ ປທປຏິປາຏິຍາ ອຕ຺ຖໍ ວຓ຺ຓຍິສ຺ສາມີຕິ ປຏິປນ຺ນສ຺ສ ອຕິທີຆາຍຸກສ຺ສາປິ ອາຍຸ ນປ຺ປໂຫຕິ. ນ ຈສ຺ສ ເອກເທສໍ ວຓ຺ເຓຕ຺ວາ ເສສມ຺ຫິ ນຍໂຕ ທສ຺ສິຍມາເນ ນ ສກ຺ກາ ອຕ຺ໂຖ ຊານິຕຸໍ, ຕສ຺ມາ ອິໂຕ ປຣໍ ເອຕ຺ຕກມ຺ປິ ອວຕ຺ວາ ເສເສສຸ ຕິກທຸເກສຸ ເຫຏ຺ຐາ ອວຸຕ຺ຕປ຺ປກາຣຕ຺ຕາ ຍໍ ຍໍ ອວສ຺ສໍ ວຕ຺ຕພ຺ພໍ, ຕໍ ຕເທວ ວກ຺ຂາມ. ຍໍ ປນ ອວຕ຺ວາ ຄມິສ຺ສາມ, ຕໍ ປາຬິນເຍເນວ ເວທິຕພ຺ພນ຺ຕິ.

ວິປາກຕ຺ຕິກວຓ຺ຓນາ.