໒. ປຣິຫານິກຖາ

໑. ວາທຍຸຕ຺ຕິປຣິຫານິວຓ຺ຓນາ

໒໓໙. ອິທານິ ປຣິຫານິກຖາ ໂຫຕິ. ປຣິຫານິຘມ຺ໂມ ອປຣິຫານິຘມ຺ໂມ, ‘‘ທ຺ເວເມ, ຠິກ຺ຂເວ, ຘມ຺ມາ ເສກ຺ຂສ຺ສ, ຠິກ຺ຂຸໂນ ປຣິຫານາຍ ສໍວຕ຺ຕນ຺ຕິ’’ (ອ. ນິ. ໒.໑໘໕), ‘‘ປຎ຺ຈິເມ, ຠິກ຺ຂເວ, ຘມ຺ມາ ສມຍວິມຸຕ຺ຕສ຺ສ ຠິກ຺ຂຸໂນ ປຣິຫານາຍ ສໍວຕ຺ຕນ຺ຕີ’’ຕິ (ອ. ນິ. ໕.໑໔໙) ເອວມາທີນິ ຫິ ສຸຕ຺ຕານິ ນິສ຺ສາຍ ສມ຺ມິຕິຍາ ວຊ຺ຊິປຸຕ຺ຕກາ ສພ຺ພຕ຺ຖິວາທິໂນ ເອກຈ຺ເຈ ຈ ມຫາສງ຺ຆິກາ ອຣຫໂຕປິ ປຣິຫານິໍ ອິຈ຺ຉນ຺ຕິ, ຕສ຺ມາ ເຕ ວາ ໂຫນ຺ຕຸ ອຎ຺ເຎເຍວ ວາ, ເຍສໍ ອຍໍ ລທ຺ຘິ, ເຕສໍ ລທ຺ຘິຠິນ຺ທນຕ຺ຖໍ ປຣິຫາຍຕິ ອຣຫາ ອຣຫຕ຺ຕາຕິ ປຸຈ຺ຉາ ສກວາທິສ຺ສ. ຕຕ຺ຣ ປຣິຫາຍຕີຕິ ທ຺ເວ ປຣິຫານິໂຍ ປຕ຺ຕປຣິຫານິ ຈ ອປ຺ປຕ຺ຕປຣິຫານິ ຈ. ຕຕ຺ຖ ‘‘ທຸຕິຍມ຺ປິ ໂຂ ອາຍສ຺ມາ ໂຄຘິໂກ ຕມ຺ຫາ ສາມຍິກາຍ ເຈໂຕວິມຸຕ຺ຕິຍາ ປຣິຫາຍີ’’ຕິ (ສໍ. ນິ. ໑.໑໕໙) ອຍໍ ປຕ຺ຕປຣິຫານິ ນາມ. ‘‘ມາ ໂວ ສາມຎ຺ຎຕ຺ຖິການໍ ສຕໍ ສາມຎ຺ຎຕ຺ໂຖ ປຣິຫາຍີ’’ຕິ (ມ. ນິ. ໑.໔໑໖-໔໑໘) ອຍໍ ອປ຺ປຕ຺ຕປຣິຫານິ. ຕາສຸ ອິຘ ປຕ຺ຕປຣິຫານິ ອຘິປ຺ເປຕາ. ຕຎ຺ຫິ ສນ຺ຘາຍ ອາມນ຺ຕາຕິ ປຏິຎ຺ຎາ ປຣວາທິສ຺ສ. ສກສມເຍ ປນ ອິມໍ ປຕ຺ຕປຣິຫານິໍ ນາມ ໂລກິຍສມາປຕ຺ຕິຍາວ ອິຈ຺ຉນ຺ຕິ, ນ ອຣຫຕ຺ຕາທີຫິ ສາມຎ຺ຎຜເລຫິ. ປຣສມເຍປິ ນໍ ສພ຺ພສາມຎ຺ຎຜເລສຸ ສພ຺ພຠເວສຸ ສພ຺ພກາເລສຸ ສພ຺ເພສຎ຺ຈ ປຸຄ຺ຄລານໍ ນ ອິຈ຺ຉນ຺ຕິ. ຕໍ ປນ ເຕສໍ ລທ຺ຘິມຕ຺ຕເມວາຕິ ສພ຺ພໍ ລທ຺ຘິຊາລໍ ຠິນ຺ທິຕຸໍ ປຸນ ສພ຺ພຕ຺ຖາຕິອາທິນາ ນເຍນ ເທສນາ ວຑ຺ຒິຕາ.

ຕຕ຺ຖ ຍສ຺ມາ ປຣວາທີ ກເມນ ປຣິຫາຍິຕ຺ວາ ໂສຕາປຕ຺ຕິຜເລ ຐິຕສ຺ສ ອຣຫໂຕ ປຣິຫານິໍ ນ ອິຈ຺ຉຕິ, ອຸປຣິຜເລສຸ ຐິຕສ຺ເສວ ອິຈ຺ຉຕິ. ຍສ຺ມາ ຈ ຣູປາຣູປຠເວສຸ ຐິຕສ຺ສ ນ ອິຈ຺ຉຕິ, ກມ຺ມາຣາມຕາທີນໍ ປນ ປຣິຫານິຍຘມ຺ມານໍ ຠາວໂຕ ກາມຠເວ ຐິຕສ຺ເສວ ອິຈ຺ຉຕິ, ຕສ຺ມາ ‘‘ສພ຺ພຕ຺ຖາ’’ຕິ ປຸຏ຺ໂຐ ປຏິກ຺ຂິປຕິ. ປຸນ ທຬ຺ຫໍ ກຕ຺ວາ ປຸຏ຺ໂຐ ກາມຠວໍ ສນ຺ຘາຍ ປຏິຊານາຕິ. ສພ຺ພສ຺ມິມ຺ປິ ຫິ ກາມຠເວ ປຣິຫານິກຣາ ກາມຄຸຓາ ອຕ຺ຖິ, ຕສ຺ມາ ຕຕ຺ຖ ປຣິຫາຍຕີຕິ ຕສ຺ສ ລທ຺ຘິ.

ຕຕິຍປຸຈ຺ຉາຍ ປຣິຫານີຕິ ປຣິຫານິກເຣ ຘມ຺ເມ ປຸຈ຺ຉຕິ. ຕຕ຺ຖ ຍສ຺ມາ ປຣິຫານິ ນາມ ກມ຺ມາຣາມຕາທິຘມ຺ມາ, ວິເສສໂຕ ວາ ກາມຣາຄພ຺ຍາປາທາ ເອວ, ເຕ ຈ ຣູປາຣູປຠເວ ນຕ຺ຖິ, ຕສ຺ມາ ‘‘ນ ເຫວ’’ນ຺ຕິ ປຏິກ຺ເຂໂປ ປຣວາທິສ຺ສ.

ສພ຺ພທາຕິ ກາລປຸຈ຺ຉາ. ຕຕ຺ຖ ປຐມປຎ຺ເຫ ໂຍນິໂສມນສິກາຣກາເລ ອປຣິຫາຍນໂຕ ປຏິກ຺ຂິປຕິ. ທຸຕິເຍ ອໂຍນິໂສມນສິກໂຣໂຕ ຣຕ຺ຕິຠາເຄ ວາ ທິວສຠາເຄ ວາ ສພ຺ພທາ ປຣິຫາຍນໂຕ ປຏິຊານາຕິ. ຕຕິເຍ ປຣິຫານິກຣຘມ຺ມສມາໂຍເຄ ສຕິ ມຸຫຸຕ຺ຕເມວ ປຣິຫານິ ນາມ ໂຫຕິ, ຕໂຕ ປຸພ຺ເພ ອປຣິຫີນສ຺ສ ປຈ຺ຉາ ປຣິຫີນສ຺ສ ຈ ປຣິຫານິ ນາມ ນຕ຺ຖີຕິ ປຏິກ຺ຂິປຕິ.

ສພ຺ເພວ ອຣຫນ຺ໂຕຕິ ປຎ຺ຫານໍ ປຐມສ຺ມິໍ ຕິກ຺ຂິນ຺ທ຺ຣິເຍ ສນ຺ຘາຍ ປຏິກ຺ຂິປຕິ. ທຸຕິຍສ຺ມິໍ ມຸທິນ຺ທ຺ຣິເຍ ສນ຺ຘາຍ ປຏິຊານາຕິ. ຕຕິຍສ຺ມິມ຺ປິ ຕິກ຺ຂິນ຺ທ຺ຣິຍາວ ອຘິປ຺ເປຕາ. ເຕສຎ຺ຫິ ສພ຺ເພສມ຺ປິ ປຣິຫານິ ນ ໂຫຕີຕິ ຕສ຺ສ ລທ຺ຘິ.

ເສຏ຺ຐິອຸທາຫຣເຓ ປຐມປຸຈ຺ຉາ ປຣວາທິສ຺ສ, ທຸຕິຍາ ສກວາທິສ຺ສ. ຕຕ຺ຣາຍໍ ອຘິປ຺ປາໂຍ – ຍໍ ມໍ ຕຸມ຺ເຫ ປຸຈ຺ຉຖ – ‘‘ອຣຫາ ອຣຫຕ຺ຕາ ປຣິຫາຍນ຺ໂຕ ຈຕູຫິ ຜເລຫິ ປຣິຫາຍຕີ’’ຕິ, ຕຕ຺ຣ ໂວ ປຏິປຸຈ຺ຉາມິ – ‘‘ຈຕູຫິ ສຕສຫສ຺ເສຫິ ເສຏ຺ຐີ ເສຏ຺ຐິຕ຺ຕໍ ກໂຣນ຺ໂຕ ສຕສຫສ຺ເສຫິ ປຣິຫີເນ ເສຏ຺ຐີ ເສຏ຺ຐິຕ຺ຕາ ປຣິຫີໂນ ໂຫຕີ’’ຕິ. ຕໂຕ ສກວາທິນາ ເອກເທເສນ ປຣິຫານິໍ ສນ຺ຘາຍ ‘‘ອາມນ຺ຕາ’’ຕິ ວຸຕ຺ເຕ ສພ຺ພສາປເຕຍ຺ຍາ ປຣິຫີໂນ ໂຫຕີຕິ ປຸຈ຺ຉຕິ. ຕຖາ ອປຣິຫີນຕ຺ຕາ ສກວາທີ ນ ເຫວາຕິ ວຕ຺ວາ ອຖ ນໍ ‘‘ເອວເມວ ອຣຫາປິ ປຣິຫາຍຕິ ຈ. ນ ຈ ຈຕູຫິ ຜເລຫີ’’ຕິ ອຸປ຺ປນ຺ນລທ຺ຘິກໍ ທຸຕິຍໍ ຠພ຺ພປຎ຺ຫໍ ປຸຈ຺ຉຕິ. ປຣວາທີ ເສຏ຺ຐິໂນ ອຠພ຺ພຕາຍ ນິຍມໍ ອປສ຺ສນ຺ໂຕ ປຏິຊານິຕ຺ວາ ອຣຫໂຕ ຈຕູຫິ ຜເລຫິ ປຣິຫານິຠພ຺ພຕໍ ປຸຏ຺ໂຐ ‘‘ນິຍໂຕ ສມ຺ໂພຘິປຣາຍໂຓ’’ຕິ (ອ. ນິ. ໓.໘໗) ວຈນສ຺ສ ອໂຍນິໂສ ອຕ຺ຖໍ ຄເຫຕ຺ວາ ລທ຺ຘິຍໍ ຐິໂຕ ໂສຕາປຕ຺ຕິຜລໂຕ ປຣິຫາຍິຕຸໍ ອຠພ຺ພຕໍ ສນ຺ຘາຍ ປຏິກ຺ຂິປຕິ. ຕໍ ປນສ຺ສ ລທ຺ຘິມຕ຺ຕເມວາຕິ.

ເອຕ຺ຕາວຕາ ວາທຍຸຕ຺ຕິ ນາມ ນິຏ຺ຐິຕາ ໂຫຕິ.

໒. ອຣິຍປຸຄ຺ຄລສໍສນ຺ທນປຣິຫານິວຓ຺ຓນາ

໒໔໐. ອິທານິ ອຣິຍປຸຄ຺ຄລສໍສນ຺ທນາ ອາຣທ຺ຘາ. ຕຕ຺ຖ ຍສ຺ມາ ເກຈິ ອຣຫໂຕວ ປຣິຫານິໍ ອິຈ຺ຉນ຺ຕິ, ເກຈິ ອນາຄາມິໂນປິ, ເກຈິ ສກທາຄາມິສ຺ສປິ. ໂສຕາປນ຺ນສ຺ສ ປນ ສພ຺ເພປິ ນ ອິຈ຺ຉນ຺ຕິເຍວ. ເຍ ອຣຫຕ຺ຕາ ປຣິຫາຍິຕ຺ວາ ອນາຄາມິສກທາຄາມິຠາເວ ຐິຕາ, ເຕສໍ ປຣິຫານິໍ ອິຈ຺ຉນ຺ຕິ, ນ ອິຕເຣສໍ ອນາຄາມິສກທາຄາມີນໍ. ໂສຕາປນ຺ນສ຺ສ ປນ ເຕປິ ສພ຺ພຖາປິ ນ ອິຈ຺ຉນ຺ຕິເຍວ, ຕສ຺ມາ ເປຍ຺ຍາລມຸເຂນ ປຸຈ຺ຉາ ກຕາ. ຕຕ຺ຖ ເຕສໍ ລທ຺ຘິວເສນ ປຏິຎ຺ຎາ ຈ ປຏິກ຺ເຂໂປ ຈ ເວທິຕພ຺ພາ. ‘‘ປຣິຫາຍຕິ ອນາຄາມີ ອນາຄາມິຜລາ’’ຕິ ຫິ ປຎ຺ຫສ຺ມິໍ ເຍ ອນາຄາມິໂນ ປຣິຫານິໍ ນ ອິຈ຺ຉນ຺ຕິ, ເຕສໍ ວເສນ ປຏິກ຺ເຂໂປ. ເຍ ປກຕິອນາຄາມິໂນ ວາ ອຣຫຕ຺ຕາ ປຣິຫາຍິຕ຺ວາ ຐິຕອນາຄາມິໂນ ວາ ປຣິຫານິໍ ອິຈ຺ຉນ຺ຕິ, ເຕສໍ ວເສນ ປຏິຎ຺ຎາຕິ ອິທເມຕ຺ຖ ນຍມຸຂໍ. ຕສ຺ສານຸສາເຣນ ສພ຺ພເປຍ຺ຍາລາ ອຕ຺ຖໂຕ ເວທິຕພ຺ພາ.

໒໔໑. ຍໍ ປເນຕ຺ຖ ‘‘ໂສຕາປຕ຺ຕິຜລສ຺ສ ອນນ຺ຕຣາ ອຣຫຕ຺ຕໍເຍວ ສຈ຺ຉິກໂຣຕີ’’ຕິ ວຸຕ຺ຕໍ, ຕໍ ປຣິຫີນສ຺ສ ປຸນ ວາຍມໂຕ ອຣຫຕ຺ຕປ຺ປຕ຺ຕິໍ ສນ຺ຘາຍ ວຸຕ຺ຕໍ. ອິຕໂຣ ໂສຕາປຕ຺ຕິຜລານນ຺ຕຣໍ ອຣຫຕ຺ຕສ຺ສ ອຠາວາ ປຏິກ຺ຂິປຕິ.

໒໔໒. ຕໂຕ ປຣໍ ‘‘ປຣິຫານິ ນາເມສາ ກິເລສປ຺ປຫານສ຺ສ ວາ ມນ຺ທຕາຍ ຠເວຍ຺ຍ, ມຄ຺ຄຠາວນາທີນໍ ວາ ອນຘິມຕ຺ຕຕາຍ, ສຈ຺ຈານໍ ວາ ອທສ຺ສເນນາ’’ຕິ ເອວມາທີນໍ ວເສນ ອນຸຍຸຎ຺ຊິຕຸໍ ກສ຺ສ ພຫຸຕຣາ ກິເລສາ ປຫີນາຕິອາທິ ວຸຕ຺ຕໍ. ຕໍ ສພ຺ພໍ ອຸຕ຺ຕານາຘິປ຺ປາຍເມວ ສຸຕ຺ຕານໍ ປນຕ຺ໂຖ ອາຄມຏ຺ຐກຖາສຸ ວຸຕ຺ຕນເຍເນວ ເວທິຕພ຺ໂພ.

໒໖໒. ສມຍວິມຸຕ຺ໂຕ ອຣຫາ ອຣຫຕ຺ຕາ ປຣິຫາຍຕີຕິ ເອຕ຺ຖ ມຸທິນ຺ທ຺ຣິໂຍ ສມຍວິມຸຕ຺ໂຕ, ຕິກ຺ຂິນ຺ທ຺ຣິໂຍ ອສມຍວິມຸຕ຺ໂຕຕິ ເຕສໍ ລທ຺ຘິ. ສກສມເຍ ປນ ອວສິປ຺ປຕ຺ໂຕ ຌານລາຠີ ສມຍວິມຸຕ຺ໂຕ, ວສິປ຺ປຕ຺ໂຕ ຌານລາຠີ ເຈວ ສພ຺ເພ ຈ ອຣິຍປຸຄ຺ຄລາ ອຣິເຍ ວິໂມກ຺ເຂ ອສມຍວິມຸຕ຺ຕາຕິ ສນ຺ນິຏ຺ຐານໍ. ໂສ ປນ ຕໍ ອຕ຺ຕໂນ ລທ຺ຘິໍ ຄເຫຕ຺ວາ ສມຍວິມຸຕ຺ໂຕ ປຣິຫາຍຕິ, ອິຕໂຣ ນ ປຣິຫາຍຕີ’’ຕິ ອາຫ. ເສສເມຕ຺ຖ ອຸຕ຺ຕານຕ຺ຖເມວ.

ອຣິຍປຸຄ຺ຄລສໍສນ຺ທນປຣິຫານິວຓ຺ຓນາ.

໓. ສຸຕ຺ຕສາຘນປຣິຫານິວຓ຺ຓນາ

໒໖໕. ອິທານິ ສຸຕ຺ຕສາຘນາ ໂຫຕິ. ຕຕ຺ຖ ອຸຈ຺ຈາວຈາຕິ ອຸຕ຺ຕມຫີນເຠທໂຕ ອຸຈ຺ຈາ ຈ ອວຈາ ຈ. ປຏິປາທາຕິ ປຏິປທາ. ສມເຓນ ປກາສິຕາຕິ ພຸທ຺ຘສມເຓນ ໂຊຕິຕາ. ສຸຂາປຏິປທາ ຫິ ຂິປ຺ປາຠິຎ຺ຎາ ອຸຈ຺ຈາ. ທຸກ຺ຂາປຏິປທາ ທນ຺ຘາຠິຎ຺ຎາ ອວຈາ. ອິຕຣາ ທ຺ເວ ເອເກນງ຺ເຄນ ອຸຈ຺ຈາ, ເອເກນ ອວຈາ. ປຐມໍ ວຸຕ຺ຕາ ເອວ ວາ ອຸຈ຺ຈາ, ອິຕໂຣ ຕິສ຺ໂສປິ ອວຈາ. ຕາຍ ເຈຕາຍ ອຸຈ຺ຈາວຈາຍ ປຏິປທາຍ ນ ປາຣໍ ທິຄຸຓໍ ຍນ຺ຕິ, ເອກມຄ຺ເຄນ ທ຺ວິກ຺ຂຕ຺ຕຸໍ ນິພ຺ພານໍ ນ ຄຈ຺ຉນ຺ຕີຕິ ອຕ຺ໂຖ. ກສ຺ມາ? ເຍນ ມຄ຺ເຄນ ເຍ ກິເລສາ ປຫີນາ, ເຕນ ເຕສໍ ປຸນ ອປ຺ປຫາຕພ຺ພໂຕ. ເອເຕນ ປຣິຫານິຘມ຺ມາຠາວໍ ທີເປຕິ. ນຍິທໍ ເອກຄຸຓໍ ມຸຕນ຺ຕິ ຕຎ຺ຈ ອິທໍ ປາຣໍ ເອກວາຣໍເຍວ ຜຸສນາຣຫໍ ນ ໂຫຕິ. ກສ຺ມາ? ເອເກນ ມຄ຺ເຄນ ສພ຺ພກິເລສານໍ ອປ຺ປຫານໂຕ. ເອເຕນ ເອກມຄ຺ເຄເນວ ອຣຫຕ຺ຕາຠາວໍ ທີເປຕິ.

ອຕ຺ຖິ ຉິນ຺ນສ຺ສ ເຉທິຍນ຺ຕິ ຉິນ຺ນສ຺ສ ກິເລສວຏ຺ຏສ຺ສ ປຸນ ຉິນ຺ທິຕພ຺ພໍ ກິຎ຺ຈິ ອຕ຺ຖີຕິ ປຸຈ຺ຉຕິ. ອິຕໂຣ ຕິກ຺ຂິນ຺ທ຺ຣິຍໍ ສນ຺ຘາຍ ປຏິກ຺ຂິປິຕ຺ວາ ປຸນ ປຸຏ຺ໂຐ ມຸທິນ຺ທ຺ຣິຍໍ ສນ຺ຘາຍ ປຏິຊານາຕິ. ສກວາທີ ສຸຕ຺ຕໍ ອາຫຣິຕ຺ວາ ນຕ຺ຖິຠາວໍ ທສ຺ເສຕິ. ຕຕ຺ຖ ໂອຆປາໂສຕິ ກິເລໂສໂຆ ເຈວ ກິເລສປາໂສ ຈ.

໒໖໖. ກຕສ຺ສ ປຏິຈໂຍຕິ ຠາວິຕສ຺ສ ມຄ຺ຄສ຺ສ ປຸນ ຠາວນາ. ອິຘາປິ ປຏິກ຺ເຂປປຏິຊານນານິ ປຸຣິມນເຍເນວ ເວທິຕພ຺ພານິ.

໒໖໗. ປຣິຫານາຍ ສໍວຕ຺ຕນ຺ຕີຕິ ປຣວາທິນາ ອາຠເຕ ສຸຕ຺ເຕ ປຎ຺ຈ ຘມ຺ມາ ອປ຺ປຕ຺ຕປຣິຫານາຍ ເຈວ ໂລກິຍສມາປຕ຺ຕິປຣິຫານາຍ ຈ ສໍວຕ຺ຕນ຺ຕິ. ໂສ ປນ ປຕ຺ຕສ຺ສ ອຣຫຕ຺ຕຜລສ຺ສ ປຣິຫານາຍ ສລ຺ລກ຺ເຂຕິ. ເຕເນວ ອຕ຺ຖິ ອຣຫໂຕ ກມ຺ມາຣາມຕາຕິ ອາຫ. ອິຕໂຣປິ ອສມຍວິມຸຕ຺ຕໍ ສນ຺ຘາຍ ປຏິກ຺ຂິປິຕ຺ວາ ອິຕຣໍ ສນ຺ຘາຍ ປຏິຊານາຕິ. ກາມຣາຄວເສນ ວາ ປວຕ຺ຕມານໍ ຕໍ ປຏິກ຺ຂິປິຕ຺ວາ ອິຕຣຖາ ປວຕ຺ຕມານໍ ປຏິຊານາຕິ. ຣາຄາທີນໍ ປນ ອຕ຺ຖິຕໍ ປຸຏ຺ໂຐ ປຏິຊານິຕຸໍ ນ ສກ຺ໂກຕິ.

໒໖໘. ກິໍ ປຣິຍຸຏ຺ຐິໂຕຕິ ເກນ ປຣິຍຸຏ຺ຐິໂຕ ອນຸພທ຺ໂຘ ອຊ຺ໂຌຕ຺ຖໂຕ ວາ ຫຸຕ຺ວາຕິ ອຕ຺ໂຖ. ອນຸສຍປຸຈ຺ຉາຍປິ ຕິກ຺ຂິນ຺ທ຺ຣິຍມຸທິນ຺ທ຺ຣິຍວເສເນວ ປຏິກ຺ເຂປປຏິຊານນານິ ເວທິຕພ຺ພານິ. ກລ຺ຍາຓານຸສໂຍຕິ ວຈນມຕ຺ຕສາມຎ຺ເຎນ ວາ ປຏິຊານາຕິ. ຣາໂຄ ອຸປຈຍໍ ຄຈ຺ຉຕີຕິ ຠາວນາຍ ປຫີນໍ ສນ຺ຘາຍາຫ. ປຣໂຕ ໂທສໂມເຫສຸປິ ເອເສວ ນໂຍ. ສກ຺ກາຍທິຏ຺ຐິອາທີນໍ ປນ ທສ຺ສເນນ ປຫີນຕ຺ຕາ ອຸປຈຍໍ ນ ອິຈ຺ຉຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສຸຕ຺ຕສາຘນາ.

ປຣິຫານິກຖາ ນິຏ຺ຐິຕາ.