໒. ປວຕ຺ຕິວາຣວຓ຺ຓນາ

໒໗-໑໖໔. ປວຕ຺ຕິວາເຣ ປເນຕ຺ຖ ປຈ຺ຈຸປ຺ປນ຺ນກາເລ ປຸຄ຺ຄລວາຣສ຺ສ ອນຸໂລມນເຍ ‘‘ຍສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕິ, ຕສ຺ສ ສມຸທຍສຈ຺ຈໍ ອຸປ຺ປຊ຺ຊຕິ; ຍສ຺ສ ວາ ປນ ສມຸທຍສຈ຺ຈໍ ອຸປ຺ປຊ຺ຊຕິ, ຕສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕີ’’ຕິ ທຸກ຺ຂສຈ຺ຈມູລເກຫິ ຕີຫິ, ສມຸທຍສຈ຺ຈມູລເກຫິ ທ຺ວີຫິ, ນິໂຣຘສຈ຺ຈມູລເກນ ເອເກນາຕິ ລພ຺ຠມານຎ຺ຈ ອລພ຺ຠມານຎ຺ຈ ຄເຫຕ຺ວາ ປາຬິວເສນ ຉຫິ ຍມເກຫິ ຠວິຕພ຺ພໍ. ເຕສຸ ຍສ຺ມາ ນິໂຣຘສ຺ສ ເນວ ອຸປ຺ປາໂທ, ນ ນິໂຣໂຘ ຍຸຊ຺ຊຕິ, ຕສ຺ມາ ທຸກ຺ຂສຈ຺ຈມູລການິ ສມຸທຍສຈ຺ຈມຄ຺ຄສຈ຺ເຈຫິ ສທ຺ຘິໍ ທ຺ເວ, ສມຸທຍສຈ຺ຈມູລກໍ ມຄ຺ຄສຈ຺ເຈນ ສທ຺ຘິໍ ເອກນ຺ຕິ ຕີຓິ ຍມການິ ອາຄຕານິ. ຕສ຺ສ ປຏິໂລມນເຍປິ ໂອກາສວາຣາທີສຸປິ ເອເສວ ນໂຍ. ເອວເມຕ຺ຖ ສພ຺ພວາເຣສຸ ຕິຓ຺ຓໍ ຕິຓ຺ຓໍ ຍມການໍ ວເສນ ຍມກຄຓນາ ເວທິຕພ຺ພາ. ອຕ຺ຖວິນິຈ຺ຉເຍ ປເນຕ຺ຖ ອິທໍ ລກ຺ຂຓໍ – ອິມສ຺ສ ຫິ ສຈ຺ຈຍມກສ຺ສ ປວຕ຺ຕິວາເຣ ນິໂຣຘສຈ຺ຈໍ ຕາວ ນ ລພ຺ຠເຕວ. ເສເສສຸ ປນ ຕີສຸ ສມຸທຍສຈ຺ຈມຄ຺ຄສຈ຺ຈານິ ເອກນ຺ເຕນ ປວຕ຺ຕິຍໍເຍວ ລພ຺ຠນ຺ຕິ. ທຸກ຺ຂສຈ຺ຈໍ ຈຸຕິປຏິສນ຺ຘີສຸປິ ປວຕ຺ເຕປິ ລພ຺ຠຕິ. ປຈ຺ຈຸປ຺ປນ຺ນາທໂຍ ປນ ຕໂຍ ກາລາ ຈຸຕິປຏິສນ຺ຘີນມ຺ປິ ປວຕ຺ຕິຍາປິ ວເສນ ລພ຺ຠນ຺ຕິ. ເອວເມຕ຺ຖ ຍໍ ຍໍ ລພ຺ຠຕິ, ຕສ຺ສ ຕສ຺ສ ວເສນ ອຕ຺ຖວິນິຈ຺ຉໂຍ ເວທິຕພ຺ໂພ.

ຕຕ຺ຣິທໍ ນຍມຸຂໍ – ສພ຺ເພສໍ ອຸປປຊ຺ຊນ຺ຕານນ຺ຕິ ອນ຺ຕມໂສ ສຸທ຺ຘາວາສານມ຺ປິ. ເຕປິ ຫິ ທຸກ຺ຂສຈ຺ເຈເນວ ອຸປປຊ຺ຊນ຺ຕິ. ຕຓ຺ຫາວິປ຺ປຍຸຕ຺ຕຈິຕ຺ຕສ຺ສາຕິ ອິທໍ ທຸກ຺ຂສຈ຺ຈສມຸທຍສຈ຺ເຈສຸ ເອກໂກຏ຺ຐາສສ຺ສ ອຸປ຺ປຕ຺ຕິທສ຺ສນຕ຺ຖໍ ວຸຕ຺ຕໍ. ຕສ຺ມາ ປຎ຺ຈໂວກາຣວເສເນວ ຄເຫຕພ຺ພໍ. ຈຕຸໂວກາເຣ ປນ ຕຓ຺ຫາວິປ຺ປຍຸຕ຺ຕສ຺ສ ຜລສມາປຕ຺ຕິຈິຕ຺ຕສ຺ສ ອຸປ຺ປາທກ຺ຂເຓ ເອກມ຺ປິ ສຈ຺ຈໍ ນຸປ຺ປຊ຺ຊຕິ. ອິທໍ ອິຘ ນ ຄເຫຕພ຺ພໍ. ເຕສໍ ທຸກ຺ຂສຈ຺ຈຎ຺ຈາຕິ ຕສ຺ມິຎ຺ຫິ ຂເຓ ຕຓ຺ຫໍ ຐເປຕ຺ວາ ເສສໍ ທຸກ຺ຂສຈ຺ຈໍ ນາມ ໂຫຕີຕິ ສນ຺ຘາເຍຕໍ ວຸຕ຺ຕໍ. ມຄ຺ຄສ຺ສ ອຸປ຺ປາທກ຺ຂເຓປິ ເອເສວ ນໂຍ. ຕຕ຺ຖ ປນ ຣູປເມວ ທຸກ຺ຂສຈ຺ຈໍ ນາມ. ເສສາ ມຄ຺ຄສມ຺ປຍຸຕ຺ຕກາ ຘມ຺ມາ ສຈ຺ຈວິນິມຸຕ຺ຕາ. ເຕເນວ ກາຣເຓນ ‘‘ອຣູເປ ມຄ຺ຄສ຺ສ ອຸປ຺ປາທກ຺ຂເຓ ເຕສໍ ມຄ຺ຄສຈ຺ຈໍ ອຸປ຺ປຊ຺ຊຕິ, ໂນ ຈ ເຕສໍ ທຸກ຺ຂສຈ຺ຈໍ ອຸປ຺ປຊ຺ຊຕີ’’ຕິ ວຸຕ຺ຕໍ. ສພ຺ເພສໍ ອຸປປຊ຺ຊນ຺ຕານໍ ປວຕ຺ເຕ ຕຓ຺ຫາວິປ຺ປຍຸຕ຺ຕຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຕຕ຺ຖາຕິ ເຕສໍ ຕສ຺ມິໍ ອຸປປຕ຺ຕິກ຺ຂເຓ ຕຓ຺ຫາວິປ຺ປຍຸຕ຺ຕຈິຕ຺ຕຸປ຺ປຕ຺ຕິກ຺ຂເຓ ຈາຕິ ເອວເມຕ຺ຖ ຂຓວເສນ ໂອກາໂສ ເວທິຕພ຺ໂພ. ອຎ຺ເຎສຸປິ ເອວຣູເປສຸ ເອເສວ ນໂຍ. ອນຠິສເມຕາວີນນ຺ຕິ ຈຕຸສຈ຺ຈປຏິເວຘສງ຺ຂາຕໍ ອຠິສມຍໍ ອປ຺ປຕ຺ຕສຕ຺ຕານໍ. ອຠິສເມຕາວີນນ຺ຕິ ອຠິສມິຕສຈ຺ຈານນ຺ຕິ. ອິມິນາ ນຍມຸເຂນ ສພ຺ພຕ຺ຖ ອຕ຺ຖວິນິຈ຺ຉໂຍ ເວທິຕພ຺ໂພ.

ປວຕ຺ຕິວາຣວຓ຺ຓນາ.