໔. ຘມ຺ມາຠິສມຍກຖາວຓ຺ຓນາ

໘໙໗. ອິທານິ ຘມ຺ມາຠິສມຍກຖາ ນາມ ໂຫຕິ. ຕຕ຺ຖ ອຕີຕຠເວ ໂສຕາປນ຺ນໍ ມາຕຸກຸຈ຺ຉິຍໍ ວສິຕ຺ວາ ນິກ຺ຂນ຺ຕໍ ທິສ຺ວາ ‘‘ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍ’’ຕິ ເຍສໍ ລທ຺ຘິ, ເສຍ຺ຍຖາປິ ເອກຈ຺ຈານໍ ອຸຕ຺ຕຣາປຖການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ຕຕ຺ຖ ຘມ຺ມາຠິສມໂຍ ອຕ຺ຖິ, ຘມ຺ມາຠິສມຍສ຺ສ ກາຣເຓຫິ ຘມ຺ມເທສນາທີຫິ ຠວິຕພ຺ພ’’ນ຺ຕິ ໂຈເທຕຸໍ ອຕ຺ຖິ ຄພ຺ຠເສຍ຺ຍາຍ ຘມ຺ມເທສນາຕິອາທິມາຫ. ສຸຕ຺ຕສ຺ສາຕິອາທິ ຠວງ຺ຄວາຣໍ ສນ຺ຘາຍ ວຸຕ຺ຕໍ. ຄພ຺ຠເສຍ຺ຍາຍ ຫິ ເຍຠຸຍ຺ເຍນ ຠວງ຺ຄເມວ ປວຕ຺ຕຕິ. ເຕເນວ ສຕ຺ໂຕ ກິຣິຍມຍປ຺ປວຕ຺ຕາຠາວາ ສຸຕ຺ໂຕ, ຠາວນານຸໂຍຄສ຺ສ ອຠາວາ ປມຕ຺ໂຕ, ກມ຺ມຏ຺ຐານປຣິຄ຺ຄາຫການໍ ສຕິສມ຺ປຊຎ຺ຎານໍ ອຠາວາ ມຸຏ຺ຐສ຺ສຕິ ອສມ຺ປຊາໂນ ນາມ ໂຫຕິ, ຕຖາຣູປສ຺ສ ກຸໂຕ ຘມ຺ມາຠິສມໂຍຕິ?

ຘມ຺ມາຠິສມຍກຖາວຓ຺ຓນາ.