໑໐. ຂຓິກກຖາວຓ຺ຓນາ

໙໐໖-໙໐໗. ອິທານິ ຂຓິກກຖາ ນາມ ໂຫຕິ. ຕຕ຺ຖ ຍສ຺ມາ ສພ຺ພສງ຺ຂຕຘມ຺ມາ ອນິຈ຺ຈາ, ຕສ຺ມາ ເອກຈິຕ຺ຕກ຺ຂຓິກາເຍວ. ສມານາຍ ຫິ ອນິຈ຺ຈຕາຍ ເອໂກ ລຫຸໍ ຠິຊ຺ຊຕິ, ເອໂກ ຈິເຣນາຕິ ໂກ ເອຕ຺ຖ ນິຍາໂມຕິ ເຍສໍ ລທ຺ຘິ, ເສຍ຺ຍຖາປິ ປຸພ຺ພເສລິຍາປຣເສລິຍານໍ; ເຕ ສນ຺ຘາຍ ເອກຈິຕ຺ຕກ຺ຂຓິກາຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ຈິຕ຺ເຕ ມຫາປຖວີຕິອາທີສຸ ເຕສໍ ຕຖາ ສຓ຺ຐານໍ ອປສ຺ສນ຺ໂຕ ປຏິກ຺ຂິປຕິ. ຈກ຺ຂາຍຕນນ຺ຕິອາທິ ‘‘ຍທິ ສພ຺ເພ ເອກຈິຕ຺ຕກ຺ຂຓິກາ ຠເວຍ຺ຍຸໍ, ຈກ຺ຂາຍຕນາທີນິ ຈກ຺ຂຸວິຎ຺ຎາຓາທີຫິ ສທ຺ຘິໍເຍວ ອຸປ຺ປຊ຺ຊິຕ຺ວາ ນິຣຸຊ຺ເຌຍ຺ຍຸ’’ນ຺ຕິ ໂຈທນຕ຺ຖໍ ວຸຕ຺ຕໍ. ອິຕໂຣ ປນ ອນ຺ໂຕມາຕຸກຸຈ຺ຉິຄຕສ຺ສ ວິຎ຺ຎາຓຸປ຺ປຕ຺ຕິໍ ສນ຺ຘາຍ ປຏິກ຺ຂິປຕິ, ປວຕ຺ຕໍ ສນ຺ຘາຍ ລທ຺ຘິວເສນ ປຏິຊານາຕິ. ເສສເມຕ຺ຖ ອຸຕ຺ຕານຕ຺ຖເມວາຕິ. ເຕນ ຫິ ເອກຈິຕ຺ຕກ຺ຂຓິກາຕິ ຍສ຺ມາ ນິຈ຺ຈາ ນ ໂຫນ຺ຕິ, ຕສ຺ມາ ເອກຈິຕ຺ຕກ຺ຂຓິກາຕິ ອຕ຺ຕໂນ ຣຸຈິຍາ ກາຣຓໍ ວທຕິ. ຕໍ ອວຸຕ຺ຕສທິສເມວາຕິ.

ຂຓິກກຖາວຓ຺ຓນາ.

ພາວີສຕິໂມ ວຄ຺ໂຄ.