໗. ອຈ຺ຈນ຺ຕນິຍາມກຖາວຓ຺ຓນາ

໘໔໗. ອິທານິ ອຈ຺ຈນ຺ຕນິຍາມກຖາ ນາມ ໂຫຕິ. ຕຕ຺ຖ ເຍສໍ ‘‘ສກິໍ ນິມຸຄ຺ໂຄ ນິມຸຄ຺ໂຄວ ໂຫຕີ’’ຕິ (ອ. ນິ. ໗.໑໕) ສຸຕ຺ຕໍ ນິສ຺ສາຍ ‘‘ອຕ຺ຖິ ປຸຖຸຊ຺ຊນສ຺ສ ອຈ຺ຈນ຺ຕນິຍາມຕາ’’ຕິ ລທ຺ຘິ, ເສຍ຺ຍຖາປິ ເອກຈ຺ຈານໍ ອຸຕ຺ຕຣາປຖການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ມາຕຸຆາຕໂກຕິອາທິ ‘‘ນິຍຕມິຈ຺ຉາທິຏ຺ຐິກສ຺ສ ຈ ມາຕຸຆາຕກາທີນຎ຺ຈ ສມາເນ ມິຈ຺ຉຕ຺ຕນິຍາເມ ມາຕຸຆາຕກາທີຫິປິ ເຕ ອຈ຺ຈນ຺ຕນິຍເຕຫິ ຠວິຕພ຺ພ’’ນ຺ຕິ ໂຈທນຕ຺ຖໍ ວຸຕ຺ຕໍ. ອິຕໂຣ ‘‘ນິຍຕມິຈ຺ຉາທິຏ຺ຐິໂກ ສໍສາຣຂາຓຸໂກ ຠວນ຺ຕເຣປິ ນິຍໂຕວ ອິເມ ປນ ເອກສ຺ມິຎ຺ເຎວ ອຕ຺ຕຠາເວ’’ຕິ ລທ຺ຘິຍາ ນ ເຫວນ຺ຕິ ປຏິກ຺ຂິປຕິ.

໘໔໘. ວິຈິກິຈ຺ຉາ ອຸປ຺ປຊ຺ເຊຍ຺ຍາຕິ ‘‘ອຍໍ ນິຍໂຕ ວາ ໂນ ວາ’’ຕິ ເອວໍ ອຸປ຺ປຊ຺ເຊຍ຺ຍາຕິ ປຸຈ຺ຉຕິ. ອິຕໂຣ ອນຸປ຺ປຕ຺ຕິກາຣຓໍ ອປສ຺ສນ຺ໂຕ ປຏິຊານາຕິ. ນຸປ຺ປຊ຺ເຊຍ຺ຍາຕິ ປຸຏ຺ໂຐ ປນ ຍໍ ທິຏ຺ຐິໍ ອາເສວນ຺ໂຕ ນິຍາມໍ ໂອກ຺ກນ຺ໂຕ, ຕຕ຺ຖ ອນຸປ຺ປຕ຺ຕິໍ ສນ຺ຘາຍ ປຏິຊານາຕິ. ຕໂຕ ປຫີນາຕິ ປຸຏ຺ໂຐ ມຄ຺ເຄນ ອປ຺ປຫີນຕ຺ຕາ ປຏິກ຺ຂິປຕິ, ຕໍ ທິຏ຺ຐິໍ ອາຣພ຺ຠ ອສມຸທາຈາຣໂຕ ປຏິຊານາຕິ. ອຖ ນໍ ຍສ຺ມາ ປຫານໍ ນາມ ວິນາ ອຣິຍມຄ຺ເຄນ ນຕ຺ຖິ, ຕສ຺ມາ ຕສ຺ສ ວເສນ ໂຈເທຕຸໍ ໂສຕາປຕ຺ຕິມຄ຺ເຄນາຕິອາທິມາຫ. ໂສ ເອກມຄ຺ເຄນາປິ ອປ຺ປຫີນຕ຺ຕາ ປຏິກ຺ຂິປຕິ. ປຸນ ກຕເມນາຕິ ປຸຏ຺ໂຐ ມິຈ຺ຉາມຄ຺ຄໍ ສນ຺ຘາຍ ອກຸສເລນາຕິອາທິມາຫ.

໘໔໙. ອຸຈ຺ເຉທທິຏ຺ຐິ ອຸປ຺ປຊ຺ເຊຍ຺ຍາຕິ ທຸຕິຍນິຍາມຸປ຺ປຕ຺ຕິໍ ປຸຈ຺ຉຕິ. ອິຕໂຣ ຍສ຺ມາ ‘‘ເຍປິ ເຕ ໂອກ຺ກລາ ວຍຠິຎ຺ຎາ ນຕ຺ຖິກວາທາ ອກິຣິຍວາທາ ອເຫຕຸກວາທາ’’ຕິ (ມ. ນິ. ໓.໑໔໓) ວຈນໂຕ ຕິສ຺ໂສປິ ນິຍຕມິຈ຺ຉາທິຏ຺ຐິໂຍ ເອກສ຺ສ ອຸປ຺ປຊ຺ຊນ຺ຕິ, ຕສ຺ມາ ປຏິຊານາຕິ.

໘໕໐. ອຖ ນໍ ‘‘ນ ຈ ນາມ ໂສ ອຈ຺ຈນ຺ຕນິຍາໂມ’’ຕິ ໂຈເທຕຸໍ ຫຎ຺ຈີຕິອາທິມາຫ. ອຈ຺ຈນ຺ຕນິຍຕສ຺ສ ຫິ ທຸຕິຍນິຍາໂມ ນິຣຕ຺ຖໂກ. ນຸປ຺ປຊ຺ເຊຍ຺ຍາຕິ ປຎ຺ເຫ ຍໍ ສສ຺ສຕທິຏ຺ຐິຍາ ສສ຺ສຕນ຺ຕິ ຄຫິຕໍ, ຕເທວ ອຸຈ຺ຉິຊ຺ຊິສ຺ສຕີຕິ ຄເຫຕ຺ວາ ອນຸປ຺ປຕ຺ຕິໍ ສນ຺ຘາຍ ປຏິຊານາຕິ. ປຫີນາຕິ ປຸຏ຺ໂຐ ມຄ຺ເຄນ ອປ຺ປຫີນຕ຺ຕາ ປຏິກ຺ຂິປຕິ, ວຸຕ຺ຕນເຍນ ອນຸປ຺ປຊ຺ຊນໂຕ ປຏິຊານາຕິ. ສສ຺ສຕທິຏ຺ຐິ ອຸປ຺ປຊ຺ເຊຍ຺ຍາຕິອາທີສຸປິ ເອເສວ ນໂຍ. ເສສໍ ວິຈິກິຈ຺ຉາວາເຣ ວຸຕ຺ຕນຍເມວ.

໘໕໑-໘໕໒. ນ ວຕ຺ຕພ຺ພນ຺ຕິ ປຸຈ຺ຉາ ປຣວາທິສ຺ສ, ສຸຕ຺ຕສ຺ສ ອຕ຺ຖິຕາຍ ປຏິຎ຺ຎາ ສກວາທິສ຺ສ. ນ ປນ ໂສ ຠວນ຺ຕເຣປິ ນິມຸຄ຺ໂຄວ. ອິມສ຺ມິຎ຺ເຎວ ຫິ ຠເວ ອຠພ຺ໂພ ໂສ ຕໍ ທິຏ຺ຐິໍ ປຊຫິຕຸນ຺ຕິ ອຍເມຕ຺ຖ ອຘິປ຺ປາໂຍ, ຕສ຺ມາ ອສາຘກເມຕນ຺ຕິ. ສພ຺ພກາລໍ ອຸມ຺ມຸຊ຺ຊິຕ຺ວາ ນິມຸຊ຺ຊຕີຕິອາທິ ວຈນມຕ຺ເຕ ອຠິນິເວສໍ ອກຕ຺ວາ ອຕ຺ໂຖ ປຣິເຍສິຕພ຺ໂພຕິ ທສ຺ສນຕ຺ຖໍ ວຸຕ຺ຕນ຺ຕິ.

ອຈ຺ຈນ຺ຕນິຍາມກຖາວຓ຺ຓນາ.