໔. ປຕ຺ຕິກຖາວຓ຺ຓນາ

໘໓໗-໘໔໐. ອິທານິ ປຕ຺ຕິກຖາ ນາມ ໂຫຕິ. ຕຕ຺ຖ ‘‘ຍໍ ຍໍ ປຏິລພ຺ຠຕິ, ຕສ຺ສ ຕສ຺ສ ປຏິລາໂຠ ປຕ຺ຕິ ນາມ. ສາ ຈ ອສງ຺ຂຕາ’’ຕິ ເຍສໍ ລທ຺ຘິ, ເສຍ຺ຍຖາປິ ປຸພ຺ພເສລິຍານຎ຺ເຎວ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສມິຘາປິ ເຫຏ຺ຐາ ວຸຕ຺ຕນຍຕ຺ຕາ ຍຖາປາຬິເມວ ນິຍ຺ຍາຕີຕິ. ນ ວຕ຺ຕພ຺ພນ຺ຕິອາທິ ຍາຍ ລທ຺ຘິຍາ ປຕ຺ຕິ ອສງ຺ຂຕາຕິ ມຎ຺ຎຕິ, ຕໍ ປກາເສຕຸໍ ວຸຕ຺ຕໍ. ຕຕ຺ຖ ສກວາທີ ‘‘ນ ເຫວໍ ວຕ຺ຕພ຺ເພ’’ຕິ ປຏິກ຺ຂິປນ຺ໂຕ ເກວລໍ ປຕ຺ຕິຍາ ຣູປາທິຠາວໍ ນ ສມ຺ປຏິຈ຺ຉຕິ. ນ ຫິ ປຕ຺ຕິ ນາມ ໂກຈິ ຘມ຺ໂມ ອຕ຺ຖິ, ນ ປນ ອສງ຺ຂຕຠາວໍ ອນຸຊານາຕິ. ອິຕໂຣ ປນ ປຏິກ຺ເຂປມຕ຺ເຕເນວ ອສງ຺ຂຕາຕິ ລທ຺ຘິໍ ປຕິຏ຺ຐເປຕິ, ສາ ອໂຍນິໂສ ປຕິຏ຺ຐາປິຕຕ຺ຕາ ອປ຺ປຕິຏ຺ຐິຕາເຍວາຕິ.

ປຕ຺ຕິກຖາວຓ຺ຓນາ.