໙. ນຍຖາຈິຕ຺ຕສ຺ສ ວາຈາຕິກຖາວຓ຺ຓນາ

໕໖໔. ອິທານິ ນຍຖາຈິຕ຺ຕສ຺ສ ວາຈາຕິກຖາ ນາມ ໂຫຕິ. ຕຕ຺ຖ ຍສ຺ມາ ໂກຈິ ອຎ຺ຎໍ ຠຓິສ຺ສາມີຕິ ອຎ຺ຎໍ ຠຓຕິ, ຕສ຺ມາ ນຍຖາຈິຕ຺ຕສ຺ສ ວາຈາ ຈິຕ຺ຕານຸຣູປາ ຈິຕ຺ຕານຸຄຕິກາ ນ ໂຫຕິ, ວິນາປິ ຈິຕ຺ເຕນ ປວຕ຺ຕຕີຕິ ເຍສໍ ລທ຺ຘິ; ເສຍ຺ຍຖາປິ ປຸພ຺ພເສລິຍານໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ຕໍສມຸຏ຺ຐາປກໍ ຈິຕ຺ຕໍ ນ ສິຍາ, ຜສ຺ສາທໂຍປິ ຕສ຺ມິໍ ຂເຓ ນ ສິຍຸ’’ນ຺ຕິ ໂຈເທຕຸໍ ອຜສ຺ສກສ຺ສາຕິອາທິມາຫ. ນ ຠຓິຕຸກາໂມຕິອາທີສຸ ຍສ຺ມາ ອຎ຺ຎໍ ຠຓິສ຺ສາມີຕິ ອຎ຺ຎໍ ຠຓນ຺ໂຕປິ ຠຓິຕຸກາໂມເຍວ ນາມ ໂຫຕິ, ຕສ຺ມາ ນ ເຫວາຕິ ປຏິກ຺ຂິປຕິ.

໕໖໕. ນນຸ ອຕ຺ຖິ ໂກຈິ ອຎ຺ຎໍ ຠຓິສ຺ສາມີຕິອາທີສຸ ຈີວຣນ຺ຕິ ຠຓິຕຸກາໂມ ຈີຣນ຺ຕິ ຠເຓຍ຺ຍ. ຕຕ຺ຖ ອຎ຺ຎໍ ຠຓິຕຸກາມຕາຈິຕ຺ຕໍ, ອຎ຺ຎໍ ຠຓນຈິຕ຺ຕໍ, ອິຕິ ປຸພ຺ພຠາເຄນ ຈິຕ຺ເຕນ ອສທິສຕ຺ຕາ ອຍຖາຈິຕ຺ໂຕ ນາມ ໂຫຕິ, ເຕນສ຺ສ ເກວລໍ ອນາປຕ຺ຕິ ນາມ ໂຫຕິ, ນ ປນ ຈີຣນ຺ຕິ ວຈນສມຸຏ຺ຐາປກຈິຕ຺ຕໍ ນຕ຺ຖິ, ອິຕິ ອຈິຕ຺ຕກາ ສາ ວາຈາຕິ ອຕ຺ຖໍ ສນ຺ຘາຍ ອິມິນາ ອຸທາຫຣເຓນ ‘‘ນຍຖາຈິຕ຺ຕສ຺ສ ວາຈາ’’ຕິ ປຕິຏ຺ຐາປິຕາປິ ອປ຺ປຕິຏ຺ຐາປິຕາວ ໂຫຕີຕິ.

ນຍຖາຈິຕ຺ຕສ຺ສ ວາຈາຕິກຖາວຓ຺ຓນາ.