໑. ອານິສໍສທສ຺ສາວີກຖາວຓ຺ຓນາ

໕໔໗. ອິທານິ ອານິສໍສທສ຺ສາວີກຖາ ນາມ ໂຫຕິ. ຕຕ຺ຖ ສກສມເຍ ສງ຺ຂາເຣ ອາທີນວໂຕ ນິພ຺ພານຎ຺ຈ ອານິສໍສໂຕ ປສ຺ສນ຺ຕສ຺ສ ສໍໂຍຊນປ຺ປຫານໍ ໂຫຕີຕິ ນິຈ຺ຉໂຍ. ເຍສໍ ປນ ເຕສຸ ທ຺ວີສຸປິ ເອກໍສິກວາທໍ ຄເຫຕ຺ວາ ‘‘ອານິສໍສທສ຺ສາວິໂນວ ສໍໂຍຊນປ຺ປຫານໍ ໂຫຕີ’’ຕິ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖສ຺ສ ‘‘ເອກໍສິກວາໂທ ຕຍາ ຄຫິໂຕ, ອາທີນໂວປິ ທຏ຺ຐພ຺ໂພເຍວາ’’ຕິ ວິຠາຄທສ຺ສນຕ຺ຖໍ ສກວາທີ ສງ຺ຂາເຣຕິອາທິມາຫ.

ສງ຺ຂາເຣ ຈ ອນິຈ຺ຈໂຕ ມນສິກໂຣຕິ, ນິພ຺ພາເນ ຈ ອານິສໍສທສ຺ສາວີ ໂຫຕີຕິ ປຎ຺ຫສ຺ມິໍ ອຍມຘິປ຺ປາໂຍ – ອານິສໍສທສ຺ສາວິສ຺ສ ສໍໂຍຊນານໍ ປຫານໍ ໂຫຕີຕິ ເຕສໍ ລທ຺ຘິ. ນນຸ ສງ຺ຂາເຣ ອນິຈ຺ຈໂຕ ມນສິກໂຣໂຕ ສໍໂຍຊນາ ປຫີຍນ຺ຕີຕິ ຈ ປຸຏ຺ໂຐ ອາມນ຺ຕາຕິ ປຏິຊານາຕິ. ເຕນ ເຕ ສງ຺ຂາເຣ ຈ ອນິຈ຺ຈໂຕ ມນສິກໂຣຕິ, ນິພ຺ພາເນ ຈ ອານິສໍສທສ຺ສາວີ ໂຫຕີຕິ ອິທໍ ອາປຊ຺ຊຕິ, ກິໍ ສມ຺ປຏິຈ຺ຉສິ ເອຕນ຺ຕິ. ຕໂຕ ປຣວາທີ ເອກຈິຕ຺ຕກ຺ຂຓໍ ສນ຺ຘາຍ ປຏິກ຺ຂິປຕິ, ທຸຕິຍໍ ປຸຏ຺ໂຐ ນານາຈິຕ຺ຕວເສນ ປຏິຊານາຕິ. ສກວາທີ ປນສ຺ສ ອຘິປ຺ປາຍໍ ມທ຺ທິຕ຺ວາ ອນິຈ຺ຈມນສິກາຣສ຺ສ ອານິສໍສທສ຺ສາວິຕາຍ ຈ ເອກໂຕ ປຏິຎ຺ຎາຕຕ຺ຕາ ທ຺ວິນ຺ນໍ ຜສ຺ສານໍ ທ຺ວິນ຺ນໍ ຈິຕ຺ຕານໍ ສໂມຘານໍ ໂຫຕີຕິ ປຸຈ຺ຉຕິ. ອິຕໂຣ ທ຺ວິນ຺ນໍ ສໂມຘານໍ ອປສ຺ສນ຺ໂຕ ປຏິກ຺ຂິປຕິ. ທຸກ຺ຂໂຕຕິອາທິປຎ຺ເຫສຸປິ ເອເສວ ນໂຍ. ກິໍ ປເນຕ຺ຖ ສນ຺ນິຏ຺ຐານໍ, ກິໍ ອນິຈ຺ຈາທິໂຕ ມນສິກໂຣໂຕ ສໍໂຍຊນາ ປຫີຍນ຺ຕິ, ອຸທາຫຸ ນິພ຺ພາເນ ອານິສໍສທສ຺ສາວິສ຺ສ, ອຸທາຫຸ ທ຺ເວປິ ເອກໂຕ ກໂຣນ຺ຕສ຺ສາຕິ. ຍທິ ຕາວ ອນິຈ຺ຈາທິໂຕ ມນສິກໂຣໂຕ ປຫານໍ ຠເວຍ຺ຍ, ວິປສ຺ສນາຈິຕ຺ເຕເນວ ຠເວຍ຺ຍ. ອຖ ອານິສໍສທສ຺ສາວິໂນ, ອນຸສ຺ສວວເສນ ນິພ຺ພາເນ ອານິສໍສໍ ປສ຺ສນ຺ຕສ຺ສ ວິປສ຺ສນາຈິຕ຺ເຕເນວ ຠເວຍ຺ຍ, ອຖ ທ຺ເວປິ ເອກໂຕ ກໂຣນ຺ຕສ຺ສ ຠເວຍ຺ຍ, ທ຺ວິນ຺ນໍ ຜສ຺ສາທີນໍ ສໂມຘານໍ ຠເວຍ຺ຍ. ຍສ຺ມາ ປນ ອຣິຍມຄ຺ຄກ຺ຂເຓ ອນິຈ຺ຈາທິມນສິກາຣສ຺ສ ກິຈ຺ຈໍ ນິປ຺ຜຕ຺ຕິໍ ຄຈ຺ຉຕິ ປຸນ ນິຈ຺ຈໂຕຕິອາທິຄຫຓສ຺ສ ອນຸປ຺ປຕ຺ຕິຘມ຺ມຠາວໂຕ, ນິພ຺ພາເນ ຈ ປຈ຺ຈກ຺ຂໂຕວ ອານິສໍສທສ຺ສນໍ ອິຊ຺ຌຕິ, ຕສ຺ມາ ກິຈ຺ຈນິປ຺ຜຕ຺ຕິວເສນ ອນິຈ຺ຈາທິໂຕ ມນສິກໂຣໂຕ ອາຣມ຺ມຓໍ ກຕ຺ວາ ປວຕ຺ຕິວເສນ ຈ ນິພ຺ພາເນ ອານິສໍສທສ຺ສາວິສ຺ສ ສໍໂຍຊນານໍ ປຫານໍ ໂຫຕີຕິ ເວທິຕພ຺ພໍ.

໕໔໘. ນິພ຺ພາເນ ສຸຂານຸປສ຺ສີຕິ ສຸຕ຺ຕໍ ນິພ຺ພາເນ ສຸຂານຸປສ຺ສນາທິຠາວເມວ ສາເຘຕິ, ນ ອານິສໍສທສ຺ສາວິຕາມຕ຺ເຕນ ສໍໂຍຊນານໍ ປຫານໍ. ຕສ຺ມາ ອາຠຕມ຺ປິ ອນາຠຕສທິສເມວາຕິ.

ອານິສໍສທສ຺ສາວີກຖາວຓ຺ຓນາ.