໑໐. ທສກນິທ຺ເທສວຓ຺ຓນາ

໒໐໙. ທສກນິທ຺ເທເສ – ອິຘາຕິ ກາມາວຈຣຠູມິຍໍ. ກາມາວຈຣຠູມິຍຎ຺ຫິ ສຕ຺ຕກ຺ຂຕ຺ຕຸປຣມາທີນໍ ກາມາວຈຣຠູມິຍຎ຺ເຎວ ນິຏ຺ຐາ ໂຫຕິ. ກາມາວຈຣຕ຺ຕຠາເວເນວ ອຣຫຕ຺ຕປ຺ປຕ຺ຕິ ຈ ອນຸປາທິເສສນິພ຺ພານປ຺ປຕ຺ຕິ ຈ ໂຫຕີຕິ ອຕ຺ໂຖ.

ອິຘ ວິຫາຍາຕິ ອິຘ ກາມາວຈເຣ ອຕ຺ຕຠາເວ ວິຫາຍ ສຸທ຺ຘາວາສຕ຺ຕຠາເວ ຐິຕານໍ ນິຏ຺ຐາ ໂຫຕີຕິ ອຕ຺ໂຖ. ອນ຺ຕຣາປຣິນິພ຺ພາຍິອາທໂຍ ຫິ ອິຘ ອນາຄາມິຜລໍ ປຕ຺ວາ ອິໂຕ ຈຸຕາ ສຸທ຺ຘາວາເສສຸ ອຸປ຺ປຊ຺ຊິຕ຺ວາ ເຕນ ອຕ຺ຕຠາເວນ ອຣຫຕ຺ຕຎ຺ເຈວ ອນຸປາທິເສສນິພ຺ພານຘາຕຸຎ຺ຈ ປາປຸຓນ຺ຕິ. ເຕນ ວຸຕ຺ຕໍ – ‘‘ອິເມສໍ ປຎ຺ຈນ຺ນໍ ອິຘ ວິຫາຍ ນິຏ຺ຐາ’’ຕິ.

ທສກນິທ຺ເທສວຓ຺ຓນາ.

ນິຄມນກຖາ

ເອຕ຺ຕາວຕາ ຈ –

ຍໍ ເວ ປຸຄ຺ຄລປຎ຺ຎຕ຺ຕິໍ, ໂລເກ ອປ຺ປຏິປຸຄ຺ຄໂລ;

ນາຕິສງ຺ເຂປໂຕ ສຕ຺ຖາ, ເທເສສິ ຕິທສາລເຍ.

ຕສ຺ສາ ອຏ຺ຐກຖຎ຺ເຈວ, ທີປຠາສາຍ ສງ຺ຂຕໍ;

ອາຄມຏ຺ຐກຖາໂຍ ຈ, ໂອຄາເຫຕ຺ວາ ອເສສໂຕ.

ສຸວິຠຕ຺ໂຕ ອສໍກິຓ຺ໂຓ, ໂຍ ໂຍ ອຕ຺ໂຖ ຍຫິໍ ຍຫິໍ;

ຕໂຕ ຕໂຕ ຕໍ ຄເຫຕ຺ວາ, ປຫາຍ ອຕິວິຕ຺ຖາຣໍ.

ວິສຸທ຺ຘິມຄ຺ເຄ ຍໍ ວຸຕ຺ຕໍ, ຕໍ ອນາທາຍ ສງ຺ຂຕາ;

ນາຕິສງ຺ເຂປວິຕ຺ຖາຣ-ນເຍນຏ຺ຐກຖາ ອຍໍ.

ຕໍ ເອຕໍ ສຕ຺ຕມຕ຺ເຕຫິ, ຠາຓວາເຣຫິ ຕນ຺ຕິຍາ;

ຈິຣຏ຺ຐິຕຕ຺ຖໍ ຘມ຺ມສ຺ສ, ສງ຺ຂໂຣນ຺ເຕນ ຍໍ ມຍາ.

ສມ຺ປຕ຺ຕໍ ກຸສລໍ ເຕນ, ສທ຺ຘມ຺ມໍ ສຸຂຸມໍ ສິວໍ;

ໂອໂລເກນ຺ຕຸ ວິສຸທ຺ເຘນ, ປາຓໂຍ ຘມ຺ມຈກ຺ຂຸນາຕິ.

ປຸຄ຺ຄລປຎ຺ຎຕ຺ຕິ-ອຏ຺ຐກຖາ ນິຏ຺ຐິຕາ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ