໖. ປຸຎ຺ຎກິຣິຍວຕ຺ຖຸສຸຕ຺ຕວຓ຺ຓນາ

໓໖. ຉຏ຺ເຐ ປຸຎ຺ຎກິຣິຍານິ ຈ ຕານິ ເຕສໍ ເຕສໍ ອານິສໍສານໍ ວຕ຺ຖູນິ ຈາຕິ ປຸຎ຺ຎກິຣິຍວຕ຺ຖູນິ. ທານາທີນຎ຺ຫິ ລກ຺ຂເຓ ຈິຕ຺ຕໍ ຐເປຕ຺ວາ ‘‘ເອວຣູປໍ ນາມ ອມ຺ເຫຫິ ທານໍ ທາຕພ຺ພໍ, ສີລໍ ຣກ຺ຂິຕພ຺ພໍ, ຠາວນາ ຠາເວຕພ຺ພາ’’ຕິ ສຕ຺ຕາ ປຸຎ຺ຎານິ ກໂຣນ຺ຕິ. ທານເມວ ທານມຍໍ, ທານເຈຕນາສຸ ວາ ປຸຣິມເຈຕນາໂຕ ນິປ຺ຜນ຺ນາ ສນ຺ນິຏ຺ຐາປກເຈຕນາ ທານມຍໍ ສີລາທີຫິ ສີລມຍາທີນິ ວິຍ. ເສສທ຺ວເຍສຸປິ ເອເສວ ນໂຍ. ປຣິຕ຺ຕໍ ກຕໍ ໂຫຕີຕິ ໂຖກໍ ມນ຺ທໍ ກຕໍ ໂຫຕິ. ນາຠິສມ຺ໂຠຕີຕິ ນ ນິປ຺ຜຊ຺ຊຕິ. ອກຕໍ ໂຫຕີຕິ ຠາວນາຍໂຍໂຄເຍວ ອນາຣທ຺ໂຘ ໂຫຕີຕິ ອຕ຺ໂຖ. ມນຸສ຺ສໂທຠຄ຺ຍນ຺ຕິ ມນຸສ຺ເສສຸ ສມ຺ປຕ຺ຕິຣຫິຕໍ ປຎ຺ຈວິຘໍ ນີຈກຸລໍ. ອຸປປຊ຺ຊຕີຕິ ປຏິສນ຺ຘິວເສນ ອຸປຄຈ຺ຉຕິ, ຕຕ຺ຖ ນິພ຺ພຕ຺ຕຕີຕິ ອຕ຺ໂຖ. ມຕ຺ຕໂສ ກຕນ຺ຕິ ປມາເຓນ ກຕໍ, ໂຖກໍ ນ ພຫຸ. ມນຸສ຺ສໂສຠຄ຺ຍນ຺ຕິ ມນຸສ຺ເສສຸ ສຸຠຄຠາວໍ ຕິວິຘກຸລສມ຺ປຕ຺ຕິໍ. ອຘິມຕ຺ຕນ຺ຕິ ອຘິກປ຺ປມາຓໍ ພລວໍ ວາ. ອຘິຄຓ຺ຫນ຺ຕີຕິ ອຠິຠວິຕ຺ວາ ຄຓ຺ຫນ຺ຕິ, ວິສິຏ຺ຐຕຣາ ເຊຏ຺ຐກາ ໂຫນ຺ຕີຕິ ອຕ຺ໂຖ.