໔. ທານວຄ຺ໂຄ

໑. ປຐມທານສຸຕ຺ຕວຓ຺ຓນາ

໓໑. ຈຕຸຕ຺ຖສ຺ສ ປຐເມ ອາສຊ຺ຊ ທານໍ ເທຕີຕິ ປຕ຺ວາ ທານໍ ເທຕິ. ອາຄຕໍ ທິສ຺ວາ ຕໍ ມຸຫຸຕ຺ຕໍເຍວ ນິສີທາເປຕ຺ວາ ສກ຺ກາຣໍ ກຕ຺ວາ ທານໍ ເທຕິ, ທສ຺ສາມີຕິ ນ ກິລເມຕິ. ຠຍາຕິ ‘‘ອຍໍ ອທາຍໂກ ອກາຣໂກ’’ຕິ ຄຣຫຠຍາ, ອປາຍຠຍາ ວາ. ອທາສິ ເມຕິ ມຍ຺ຫໍ ປຸພ຺ເພ ເອສ ອິທໍ ນາມ ອທາສີຕິ ເທຕິ. ທສ຺ສຕິ ເມຕິ ອນາຄເຕ ອິທໍ ນາມ ທສ຺ສຕີຕິ ເທຕິ. ສາຫຸ ທານນ຺ຕິ ທານໍ ນາມ ສາຘຸ ສຸນ຺ທຣໍ ພຸທ຺ຘາທີຫິ ປຓ຺ຑິເຕຫິ ປສຕ຺ຖນ຺ຕິ ເທຕິ. ຈິຕ຺ຕາລງ຺ກາຣຈິຕ຺ຕປຣິກ຺ຂາຣຕ຺ຖໍ ທານໍ ເທຕີຕິ ສມຖວິປສ຺ສນາຈິຕ຺ຕສ຺ສ ອລງ຺ກາຣຕ຺ຖຎ຺ເຈວ ປຣິກ຺ຂາຣຕ຺ຖຎ຺ຈ ເທຕິ. ທານຎ຺ຫິ ຈິຕ຺ຕໍ ມຸທຸໍ ກໂຣຕິ. ເຍນ ລທ຺ໂຘ, ໂສ ‘‘ລທ຺ຘໍ ເມ’’ຕິ ມຸທຸຈິຕ຺ໂຕ ໂຫຕິ. ເຍນ ທິນ຺ນໍ, ໂສປິ ‘‘ທິນ຺ນໍ ມຍາ’’ຕິ ມຸທຸຈິຕ຺ໂຕ ໂຫຕິ. ອິຕິ ອຸຠິນ຺ນໍ ຈິຕ຺ຕໍ ມຸທຸໍ ກໂຣຕິ. ເຕເນວ ‘‘ອທນ຺ຕທມນ’’ນ຺ຕິ ວຸຈ຺ຈຕິ. ຍຖາຫ –

‘‘ອທນ຺ຕທມນໍ ທານໍ, ອທານໍ ທນ຺ຕທູສກໍ;

ທາເນນ ປິຍວາຈາຍ, ອຸນ຺ນມນ຺ຕິ ນມນ຺ຕິ ຈາ’’ຕິ.

ອິເມສຸ ປນ ອຏ຺ຐສຸ ທາເນສຸ ຈິຕ຺ຕາລງ຺ກາຣທານເມວ ອຸຕ຺ຕມນ຺ຕິ.

໒. ທຸຕິຍທານສຸຕ຺ຕວຓ຺ຓນາ

໓໒. ທຸຕິເຍ ສທ຺ຘາຕິ ຍາຍ ສທ຺ຘາຍ ທານໍ ເທຕິ, ສາ ສທ຺ຘາ. ຫິຣິຍນ຺ຕິ ຍາຍ ຫິຣິຍາ ທານໍ ເທຕິ, ສາວ ອຘິປ຺ເປຕາ. ກຸສລຎ຺ຈ ທານນ຺ຕິ ອນວຊ຺ຊຎ຺ຈ ທານໍ. ທິວິຍນ຺ຕິ ທິວງ຺ຄມໍ.

໓. ທານວຕ຺ຖຸສຸຕ຺ຕວຓ຺ຓນາ

໓໓. ຕຕິເຍ ທານວຕ຺ຖູນີຕິ ທານກາຣຓານິ. ຉນ຺ທາ ທານໍ ເທຕີຕິ ເປເມນ ທານໍ ເທຕິ. ໂທສາຕິ ໂທເສນ ກຸທ຺ໂຘ ຫຸຕ຺ວາ ຍໍ ອຕ຺ຖິ, ຕໍ ເວເຄນ ຄຓ຺ຫິຕ຺ວາ ເທຕິ. ໂມຫາຕິ ໂມເຫນ ມູຬ຺ໂຫ ເທຕິ. ຠຍາຕິ ຄຣຫຠເຍນ ວາ ອປາຍຠເຍນ ວາ, ຕສ຺ສ ຕສ຺ເສວ ວາ ປນ ຠເຍນ ເທຕິ. ກຸລວໍສນ຺ຕິ ກຸລປເວຓິໍ.

໔. ເຂຕ຺ຕສຸຕ຺ຕວຓ຺ຓນາ

໓໔. ຈຕຸຕ຺ເຖ ນ ມຫປ຺ຜລໍ ໂຫຕີຕິ ຘຎ຺ຎຜເລນ ມຫປ຺ຜລໍ ນ ໂຫຕິ. ນ ມຫສ຺ສາທນ຺ຕິ ຍມ຺ປິສ຺ສ ຜລໍ ໂຫຕິ, ຕສ຺ສ ອສ຺ສາໂທ ນ ມຫາ ໂຫຕິ ມນ຺ທສ຺ສາທໍ ນ ມຘຸຣໍ. ນ ຜາຕິເສຍ຺ຍນ຺ຕິ ເສຍ຺ຍາປິສ຺ສ ນ ໂຫຕິ ວຸຑ຺ຒິ, ຕສ຺ສ ມຫນ຺ຕໍ ວີຫິຖມ຺ຠສນ຺ນິເວສໍ ນ ໂຫຕີຕິ ອຕ຺ໂຖ. ອຸນ຺ນາມນິນ຺ນາມີຕິ ຖລນິນ຺ນວເສນ ວິສມຕລໍ. ຕຕ຺ຖ ຖເລ ອຸທກໍ ນ ສຓ຺ຐາຕິ, ນິນ຺ເນ ອຕິພຫຸ ຕິຏ຺ຐຕິ. ປາສາຓສກ຺ຂຣິກນ຺ຕິ ປຕ຺ຖຣິຕ຺ວາ ຐິຕປິຏ຺ຐິປາສາເຓຫິ ຈ ຂຸທ຺ທກປາສາເຓຫິ ຈ ສກ຺ຂຣາຫິ ຈ ສມນ຺ນາຄຕໍ. ອູສຣນ຺ຕິ ອຸພ຺ຠິນ຺ນໂລຓໍ. ນ ຈ ຄມ຺ຠີຣສິຕນ຺ຕິ ຖທ຺ຘຠູມິຕາຍ ຄມ຺ຠີຣານຸຄຕໍ, ນງ຺ຄລມຄ຺ຄໍ ກຕ຺ວາ ກສິຕຸໍ ນ ສກ຺ກາ ໂຫຕິ, ອຸຕ຺ຕານນງ຺ຄລມຄ຺ຄເມວ ໂຫຕິ. ນ ອາຍສມ຺ປນ຺ນນ຺ຕິ ນ ອຸທກາຄມນສມ຺ປນ຺ນໍ. ນ ອປາຍສມ຺ປນ຺ນນ຺ຕິ ປຈ຺ຉາຠາເຄ ອຸທກນິຄ຺ຄມນມຄ຺ຄສມ຺ປນ຺ນໍ ນ ໂຫຕິ. ນ ມາຕິກາສມ຺ປນ຺ນນ຺ຕິ ນ ຂຸທ຺ທກມຫນ຺ຕີຫິ ອຸທກມາຕິກາຫິ ສມ຺ປນ຺ນໍ ໂຫຕິ. ນ ມຣິຍາທສມ຺ປນ຺ນນ຺ຕິ ນ ເກທາຣມຣິຍາທາຫິ ສມ຺ປນ຺ນໍ. ນ ມຫປ຺ຜລນ຺ຕິອາທີນິ ສພ຺ພານິ ວິປາກຜລວເສເນວ ເວທິຕພ຺ພານິ.

ສມ຺ປນ຺ເນຕິ ປຣິປຸຓ຺ເຓ ສມ຺ປຕ຺ຕິຍຸຕ຺ເຕ. ປວຸຕ຺ຕາ ພີຊສມ຺ປທາຕິ ສມ຺ປນ຺ນໍ ພີຊໍ ໂຣປິຕໍ. ເທເວ ສມ຺ປາທຍນ຺ຕມ຺ຫີຕິ ເທເວ ສມ຺ມາ ວສ຺ສນ຺ເຕ. ອນີຕິສມ຺ປທາ ໂຫຕີຕິ ກີຏກິມິອາທິປາຓກອີຕິຍາ ອຠາໂວ ເອກາ ສມ຺ປທາ ໂຫຕິ. ວິຣູຬ຺ຫີຕິ ວຑ຺ຒິ ທຸຕິຍາ ສມ຺ປທາ ໂຫຕິ. ເວປຸລ຺ລນ຺ຕິ ວິປຸລຠາໂວ ຕຕິຍາ ສມ຺ປທາ ໂຫຕິ. ຜລນ຺ຕິ ປຣິປຸຓ຺ຓຜລໍ ຈຕຸຕ຺ຖີ ສມ຺ປທາ ໂຫຕິ. ສມ຺ປນ຺ນສີເລສູຕິ ປຣິປຸຓ຺ຓສີເລສຸ. ໂຠຊນສມ຺ປທາຕິ ສມ຺ປນ຺ນໍ ວິວິຘໂຠຊນໍ. ສມ຺ປທານນ຺ຕິ ຕິວິຘໍ ກຸສລສມ຺ປທໍ. ອຸປເນຕີຕິ ສາ ໂຠຊນສມ຺ປທາ ອຸປນຍຕິ. ກສ຺ມາ? ສມ຺ປນ຺ນຎ຺ຫິສ຺ສ ຕໍ ກຕໍ, ຍສ຺ມາສ຺ສ ຕໍ ກຕກມ຺ມໍ ສມ຺ປນ຺ນໍ ປຣິປຸຓ຺ຓນ຺ຕິ ອຕ຺ໂຖ. ສມ຺ປນ຺ນຕ຺ຖູຘາຕິ ສມ຺ປນ຺ໂນ ອຕ຺ຖຸ ອິຘ. ວິຊ຺ຊາຈຣຓສມ຺ປນ຺ໂນຕິ ຕີຫິ ວິຊ຺ຊາຫິ ຈ ປຎ຺ຈທສຫິ ຈຣຓຘມ຺ເມຫິ ຈ ສມນ຺ນາຄໂຕ. ລທ຺ຘາຕິ ເອວຣູໂປ ປຸຄ຺ຄໂລ ຈິຕ຺ຕສ຺ສ ສມ຺ປທໍ ອເວກລ຺ລປຣິປຸຓ຺ຓຠາວໍ ລຠິຕ຺ວາ. ກໂຣຕິ ກມ຺ມສມ຺ປທນ຺ຕິ ປຣິປຸຓ຺ຓກມ຺ມໍ ກໂຣຕິ. ລຠຕິ ຈຕ຺ຖສມ຺ປທນ຺ຕິ ອຕ຺ຖຎ຺ຈ ປຣິປຸຓ຺ຓໍ ລຠຕິ. ທິຏ຺ຐິສມ຺ປທນ຺ຕິ ວິປສ຺ສນາທິຏ຺ຐິໍ. ມຄ຺ຄສມ຺ປທນ຺ຕິ ໂສຕາປຕ຺ຕິມຄ຺ຄໍ. ຍາຕິ ສມ຺ປນ຺ນມານໂສຕິ ປຣິປຸຓ຺ຓຈິຕ຺ໂຕ ຫຸຕ຺ວາ ອຣຫຕ຺ຕໍ ຍາຕິ. ສາ ໂຫຕິ ສພ຺ພສມ຺ປທາຕິ ສາ ສພ຺ພທຸກ຺ເຂຫິ ວິມຸຕ຺ຕິ ສພ຺ພສມ຺ປທາ ນາມ ໂຫຕີຕິ.

໕. ທານູປປຕ຺ຕິສຸຕ຺ຕວຓ຺ຓນາ

໓໕. ປຎ຺ຈເມ ທານູປປຕ຺ຕິໂຍຕິ ທານປຈ຺ຈຍາ ອຸປປຕ຺ຕິໂຍ. ທຫຕີຕິ ຐເປຕິ. ອຘິຏ຺ຐາຕີຕິ ຕສ຺ເສວ ເວວຈນໍ. ຠາເວຕີຕິ ວຑ຺ເຒຕິ. ຫີເນ ວິມຸຕ຺ຕນ຺ຕິ ຫີເນສຸ ປຎ຺ຈສຸ ກາມຄຸເຓສຸ ວິມຸຕ຺ຕໍ. ອຸຕ຺ຕຣິ ອຠາວິຕນ຺ຕິ ຕໂຕ ອຸຕ຺ຕຣິມຄ຺ຄຜລຕ຺ຖາຍ ອຠາວິຕໍ. ຕຕ຺ຣູປປຕ຺ຕິຍາ ສໍວຕ຺ຕຕີຕິ ຍໍ ຐານໍ ປຕ຺ເຖຕ຺ວາ ກຸສລໍ ກຕໍ, ຕຕ຺ຖ ນິພ຺ພຕ຺ຕນຕ຺ຖາຍ ສໍວຕ຺ຕຕິ. ວີຕຣາຄສ຺ສາຕິ ມຄ຺ເຄນ ວາ ສມຸຈ຺ຉິນ຺ນຣາຄສ຺ສ ສມາປຕ຺ຕິຍາ ວາ ວິກ຺ຂມ຺ຠິຕຣາຄສ຺ສ. ທານມຕ຺ເຕເນວ ຫິ ພ຺ຣຫ຺ມໂລເກ ນິພ຺ພຕ຺ຕິຕຸໍ ນ ສກ຺ກາ, ທານໍ ປນ ສມາຘິວິປສ຺ສນາຈິຕ຺ຕສ຺ສ ອລງ຺ກາຣປຣິວາຣໍ ໂຫຕິ. ຕໂຕ ທາເນນ ມຸທຸຈິຕ຺ໂຕ ພ຺ຣຫ຺ມວິຫາເຣ ຠາເວຕ຺ວາ ພ຺ຣຫ຺ມໂລເກ ນິພ຺ພຕ຺ຕຕິ. ເຕນ ວຸຕ຺ຕໍ – ‘‘ວີຕຣາຄສ຺ສ ໂນ ສຣາຄສ຺ສາ’’ຕິ.

໖. ປຸຎ຺ຎກິຣິຍວຕ຺ຖຸສຸຕ຺ຕວຓ຺ຓນາ

໓໖. ຉຏ຺ເຐ ປຸຎ຺ຎກິຣິຍານິ ຈ ຕານິ ເຕສໍ ເຕສໍ ອານິສໍສານໍ ວຕ຺ຖູນິ ຈາຕິ ປຸຎ຺ຎກິຣິຍວຕ຺ຖູນິ. ທານາທີນຎ຺ຫິ ລກ຺ຂເຓ ຈິຕ຺ຕໍ ຐເປຕ຺ວາ ‘‘ເອວຣູປໍ ນາມ ອມ຺ເຫຫິ ທານໍ ທາຕພ຺ພໍ, ສີລໍ ຣກ຺ຂິຕພ຺ພໍ, ຠາວນາ ຠາເວຕພ຺ພາ’’ຕິ ສຕ຺ຕາ ປຸຎ຺ຎານິ ກໂຣນ຺ຕິ. ທານເມວ ທານມຍໍ, ທານເຈຕນາສຸ ວາ ປຸຣິມເຈຕນາໂຕ ນິປ຺ຜນ຺ນາ ສນ຺ນິຏ຺ຐາປກເຈຕນາ ທານມຍໍ ສີລາທີຫິ ສີລມຍາທີນິ ວິຍ. ເສສທ຺ວເຍສຸປິ ເອເສວ ນໂຍ. ປຣິຕ຺ຕໍ ກຕໍ ໂຫຕີຕິ ໂຖກໍ ມນ຺ທໍ ກຕໍ ໂຫຕິ. ນາຠິສມ຺ໂຠຕີຕິ ນ ນິປ຺ຜຊ຺ຊຕິ. ອກຕໍ ໂຫຕີຕິ ຠາວນາຍໂຍໂຄເຍວ ອນາຣທ຺ໂຘ ໂຫຕີຕິ ອຕ຺ໂຖ. ມນຸສ຺ສໂທຠຄ຺ຍນ຺ຕິ ມນຸສ຺ເສສຸ ສມ຺ປຕ຺ຕິຣຫິຕໍ ປຎ຺ຈວິຘໍ ນີຈກຸລໍ. ອຸປປຊ຺ຊຕີຕິ ປຏິສນ຺ຘິວເສນ ອຸປຄຈ຺ຉຕິ, ຕຕ຺ຖ ນິພ຺ພຕ຺ຕຕີຕິ ອຕ຺ໂຖ. ມຕ຺ຕໂສ ກຕນ຺ຕິ ປມາເຓນ ກຕໍ, ໂຖກໍ ນ ພຫຸ. ມນຸສ຺ສໂສຠຄ຺ຍນ຺ຕິ ມນຸສ຺ເສສຸ ສຸຠຄຠາວໍ ຕິວິຘກຸລສມ຺ປຕ຺ຕິໍ. ອຘິມຕ຺ຕນ຺ຕິ ອຘິກປ຺ປມາຓໍ ພລວໍ ວາ. ອຘິຄຓ຺ຫນ຺ຕີຕິ ອຠິຠວິຕ຺ວາ ຄຓ຺ຫນ຺ຕິ, ວິສິຏ຺ຐຕຣາ ເຊຏ຺ຐກາ ໂຫນ຺ຕີຕິ ອຕ຺ໂຖ.

໗. ສປ຺ປຸຣິສທານສຸຕ຺ຕວຓ຺ຓນາ

໓໗. ສຕ຺ຕເມ ສຸຈິນ຺ຕິ ປຣິສຸທ຺ຘໍ ວຓ຺ຓສມ຺ປນ຺ນໍ ເທຕິ. ປຓີຕນ຺ຕິ ຣສູປປນ຺ນໍ. ກາເລນາຕິ ຍຸຕ຺ຕປຕ຺ຕກາເລນ. ກປ຺ປິຍນ຺ຕິ ຍໍ ກປ຺ປິຍໍ, ຕໍ ເທຕິ. ວິເຈຍ຺ຍ ເທຕີຕິ ‘‘ອິມສ຺ສ ທິນ຺ນໍ ມຫປ຺ຜລໍ ຠວິສ຺ສຕິ, ອິມສ຺ສ ນ ມຫປ຺ຜລ’’ນ຺ຕິ ເອວໍ ປຏິຄ຺ຄາຫກປຣິເຍສນວເສນ ທານໍ ວາ ປຓິຘາຍວເສນ ທານໍ ວາ ວິຈິນິຕ຺ວາ ເທຕິ.

໘. ສປ຺ປຸຣິສສຸຕ຺ຕວຓ຺ຓນາ

໓໘. ອຏ຺ຐເມ ອຕ຺ຖາຍາຕິ ອຕ຺ຖຕ຺ຖາຍ. ຫິຕາຍ ສຸຂາຍາຕິ ຫິຕຕ຺ຖາຍ ສຸຂຕ຺ຖາຍ. ປຸພ຺ພເປຕານນ຺ຕິ ປຣໂລກຄຕານໍ ຎາຕີນໍ. ອິມສ຺ມິໍ ສຸຕ຺ເຕ ອນຸປ຺ປນ຺ເນ ພຸທ຺ເຘ ຈກ຺ກວຕ຺ຕິຣາຊາໂນ ໂພຘິສຕ຺ຕາ ປຈ຺ເຈກພຸທ຺ຘາ ລພ຺ຠນ຺ຕິ, ພຸທ຺ຘກາເລ ພຸທ຺ຘາ ເຈວ ພຸທ຺ຘສາວກາ ຈ. ຍຖາວຸຕ຺ຕານຎ຺ຫິ ເອເຕສໍ ອຕ຺ຖາຍ ຫິຕາຍ ສຸຂາຍ ສໍວຕ຺ຕນ຺ຕິ. ພຫຸນ຺ນໍ ວຕ ອຕ຺ຖາຍ, ສປ຺ປຎ຺ໂຎ ຆຣມາວສນ຺ຕິ ສປ຺ປຎ຺ໂຎ ຆເຣ ວສນ຺ໂຕ ພຫູນໍ ວຕ ອຕ຺ຖາຍ ໂຫຕິ. ປຸພ຺ເພຕິ ປຐເມວ. ປຸພ຺ເພກຕມນຸສ຺ສຣນ຺ຕິ ມາຕາປິຕູນໍ ປຸພ຺ພກາຣຄຸເຓ ອນຸສ຺ສຣນ຺ໂຕ. ສຫຘມ຺ເມນາຕິ ສກາຣເຓນ ປຈ຺ຈຍປູຊເນນ ປູເຊຕິ. ອປເຈ ພ຺ຣຫ຺ມຈາຣໂຍຕິ ພ຺ຣຫ຺ມຈາຣິໂນ ອປຈຍຕິ, ນີຈວຸຕ຺ຕິຕໍ ເນສໍ ອາປຊ຺ຊຕິ. ເປສໂລຕິ ປິຍສີໂລ.

໙. ອຠິສນ຺ທສຸຕ຺ຕວຓ຺ຓນາ

໓໙. ນວເມ ທານານີຕິ ເຈຕນາທານານິ. ອຄ຺ຄຎ຺ຎານີຕິອາທີນໍ ອຕ຺ໂຖ ເຫຏ຺ຐາ ວຸຕ຺ໂຕເຍວ.

໑໐. ທຸຈ຺ຈຣິຕວິປາກສຸຕ຺ຕວຓ຺ຓນາ

໔໐. ທສເມ ປາຓາຕິປາໂຕຕິ ປາຓາຕິປາຕເຈຕນາ. ສພ຺ພລຫຸໂສຕິ ສພ຺ພລຫຸໂກ. ອປ຺ປາຍຸກສໍວຕ຺ຕນິໂກຕິ ເຕນ ປຣິຕ຺ຕເກນ ກມ຺ມວິປາເກນ ອປ຺ປາຍຸໂກ ໂຫຕິ, ທິນ຺ນມຕ຺ຕາຍ ວາ ປຏິສນ຺ຘິຍາ ວິລີຍຕິ ມາຕຸກຸຈ຺ຉິໂຕ ນິກ຺ຂນ຺ຕມຕ຺ເຕ ວາ. ເອວຣູໂປ ຫິ ນ ອຎ຺ຎສ຺ສ ກສ຺ສຈິ ນິສ຺ສນ຺ໂທ, ປາຓາຕິປາຕສ຺ເສວ ຄຕມຄ຺ໂຄ ເອໂສຕິ. ໂຠຄພ຺ຍສນສໍວຕ຺ຕນິໂກຕິ ຍຖາ ກາກຓິກາມຕ຺ຕມ຺ປິ ຫຕ຺ເຖ ນ ຕິຏ຺ຐຕິ, ເອວໍ ໂຠຄພ຺ຍສນໍ ສໍວຕ຺ເຕຕິ. ສປຕ຺ຕເວຣສໍວຕ຺ຕນິໂກ ໂຫຕີຕິ ສຫ ສປຕ຺ເຕຫິ ເວຣໍ ສໍວຕ຺ເຕຕິ. ຕສ຺ສ ຫິ ສປຕ຺ຕາ ຈ ພຫຸກາ ໂຫນ຺ຕິ. ໂຍ ຈ ນໍ ປສ຺ສຕິ, ຕສ຺ມິໍ ເວຣເມວ ອຸປ຺ປາເທຕິ ນ ນິພ຺ພາຍຕິ. ເອວຣູໂປ ຫິ ປຣສ຺ສ ຣກ຺ຂິຕໂຄປິຕຠຓ຺ເຑ ອປຣາຘສ຺ສ ນິສ຺ສນ຺ໂທ.

ອຠູຕພ຺ຠກ຺ຂານສໍວຕ຺ຕນິໂກ ໂຫຕີຕິ ອຠູເຕນ ອພ຺ຠກ຺ຂານໍ ສໍວຕ຺ເຕຕິ, ເຍນ ເກນຈິ ກຕໍ ຕສ຺ເສວ ອຸປຣິ ປຕຕິ. ມິຕ຺ເຕຫິ ເຠທນສໍວຕ຺ຕນິໂກຕິ ມິຕ຺ເຕຫິ ເຠທໍ ສໍວຕ຺ເຕຕິ. ຍໍ ຍໍ ມິຕ຺ຕໍ ກໂຣຕິ, ໂສ ໂສ ຠິຊ຺ຊຕິເຍວ. ອມນາປສທ຺ທສໍວຕ຺ຕນິໂກຕິ ອມນາປສທ຺ທໍ ສໍວຕ຺ເຕຕິ. ຍາ ສາ ວາຈາ ກຓ຺ຏກາ ກກ຺ກສາ ກຏຸກາ ອຠິສຊ຺ຊນີ ມມ຺ມຈ຺ເຉທິກາ, ຄຕຄຕຏ຺ຐາເນ ຕເມວ ສຸຓາຕິ, ມນາປສທ຺ທສວນໍ ນາມ ນ ລຠຕິ. ເອວຣູໂປ ຜຣຸສວາຈາຍ ຄຕມຄ຺ໂຄ ນາມ. ອນາເທຍ຺ຍວາຈາສໍວຕ຺ຕນິໂກຕິ ອຄ຺ຄເຫຕພ຺ພວຈນຕໍ ສໍວຕ຺ເຕຕິ, ‘‘ຕ຺ວໍ ກສ຺ມາ ກເຖສິ, ໂກ ຫິ ຕວ ວຈນໍ ຄເຫສ຺ສຕີ’’ຕິ ວຕ຺ຕພ຺ພຕໍ ອາປຊ຺ຊຕິ. ອຍໍ ສມ຺ຜປ຺ປລາປສ຺ສ ຄຕມຄ຺ໂຄ. ອຸມ຺ມຕ຺ຕກສໍວຕ຺ຕນິໂກ ໂຫຕີຕິ ອຸມ຺ມຕ຺ຕກຠາວໍ ສໍວຕ຺ເຕຕິ. ເຕນ ຫິ ມນຸສ຺ໂສ ອຸມ຺ມຕ຺ໂຕ ວາ ຂິຕ຺ຕຈິຕ຺ໂຕ ວາ ເອຬມູໂຄ ວາ ໂຫຕິ. ອຍໍ ສຸຣາປານສ຺ສ ນິສ຺ສນ຺ໂທ. ອິມສ຺ມິໍ ສຸຕ຺ເຕ ວຏ຺ຏເມວ ກຖິຕນ຺ຕິ.

ທານວຄ຺ໂຄ ຈຕຸຕ຺ໂຖ.