໘. ອຄ຺ຄິກ຺ຂນ຺ໂຘປມສຸຕ຺ຕວຓ຺ຓນາ

໗໒. ອຏ຺ຐມໍ ອຕ຺ຖຸປ຺ປຕ຺ຕິຍໍ ກຖິຕໍ. ອຕ຺ຖຸປ຺ປຕ຺ຕິ ປນສ຺ສ ເຫຏ຺ຐາ ຈູຬຈ຺ຉຣາສງ຺ຆາຕສຸຕ຺ຕວຓ຺ຓນາຍ (ອ. ນິ. ອຏ຺ຐ. ໑.໑.໕໑ ອາທໂຍ) ວິຕ຺ຖາຣິຕາ ເອວ. ປສ຺ສຖ ໂນຕິ ປສ຺ສຖ ນຸ. ອາລິງ຺ຄິຕ຺ວາຕິ ອຸປຄູຫິຕ຺ວາ. ອຸປນິສີເທຍ຺ຍາຕິ ສມີເປ ນິສ຺ສາຍ ນິສີເທຍ຺ຍ. ອຸປນິປຊ຺ເຊຍ຺ຍາຕິ ອຸປຄນ຺ຕ຺ວາ ນິປຊ຺ເຊຍ຺ຍ. ອາໂຣຈຍາມີຕິ ອາຈິກ຺ຂາມິ. ປຏິເວທຍາມີຕິ ປຏິເວເທຕ຺ວາ ຊານາເປຕ຺ວາ ກເຖມິ. ວາລຣຊ຺ຊຸຍາຕິ ອສ຺ສວາລໂຄວາເລຫິ ວຏ຺ຏິຕຣຊ຺ຊຸຍາ. ປຈ຺ໂຈຣສ຺ມິນ຺ຕິ ອຸຣມຊ຺ເຌ. ເຜຓຸທ຺ເທຫກນ຺ຕິ ເຜຓໍ ອຸທ຺ເທຫິຕ຺ວາ, ອຸສ຺ສາເທຕ຺ວາຕິ ອຕ຺ໂຖ. ອຕ຺ຕຕ຺ຖນ຺ຕິ ອຕ຺ຕໂນ ທິຏ຺ຐຘມ຺ມິກສມ຺ປຣາຍິກໂລກິຍໂລກຸຕ຺ຕຣໍ ອຕ຺ຖໍ. ປຣຕ຺ໂຖຠຍຕ຺ເຖສຸປິ ເອເສວ ນໂຍ. ເສສເມຕ຺ຖ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ຈູຬຈ຺ຉຣາສງ຺ຆາຕສຸຕ຺ຕສ຺ສ (ອ. ນິ. ໑.໕໑ ອາທໂຍ) ອຕ຺ຖຸປ຺ປຕ຺ຕິຍໍ ກຖິຕເມວ. ອິທຎ຺ຈ ປນ ສຸຕ຺ຕໍ ກເຖຕ຺ວາ ສຕ຺ຖາ ຈູຬຈ຺ຉຣາສງ຺ຆາຕສຸຕ຺ຕໍ ກເຖສິ. ນວມໍ ອຸຕ຺ຕານຕ຺ຖເມວ.