໕. ປາຣິຈ຺ຉຕ຺ຕກສຸຕ຺ຕວຓ຺ຓນາ

໖໙. ປຎ຺ຈເມ ປນ຺ນປລາໂສຕິ ປຕິຕປລາໂສ. ຊາລກຊາໂຕຕິ ສຎ຺ຊາຕປຕ຺ຕປຸປ຺ຜຊາໂລ. ຕສ຺ສ ຫິ ປຕ຺ຕຊາລຎ຺ຈ ປຸປ຺ຜຊາລຎ຺ຈ ສເຫວ ນິກ຺ຂມຕິ. ຂາຣກຊາໂຕຕິ ປາຏິເຍກ຺ກໍ ສຎ຺ຊາເຕນ ສຸວິຠຕ຺ເຕນ ປຕ຺ຕຊາລເກນ ຈ ປຸປ຺ຜຊາລເກນ ຈ ສມນ຺ນາຄໂຕ. ກຸຏຸມລກຊາໂຕຕິ ສຎ຺ຊາຕມກຸໂຬ. ໂກຣກຊາໂຕຕິ ອວິກສິເຕຫິ ມຫາກຸຈ຺ຉີຫິ ສມ຺ຠິນ຺ນມຸເຂຫິ ປຸປ຺ເຜຫິ ສມນ຺ນາຄໂຕ. ສພ຺ພປາລິຜຸລ຺ໂລຕິ ສພ຺ພາກາເຣນ ສຸປຸປ຺ຜິໂຕ. ທິພ຺ເພ ຈຕ຺ຕາໂຣ ມາເສຕິ ທິພ຺ເພນ ອາຍຸນາ ຈຕ຺ຕາໂຣ ມາເສ. ມນຸສ຺ສຄຓນາຍ ປນ ຕານິ ທ຺ວາທສ ວສ຺ສສຫສ຺ສານິ ໂຫນ຺ຕິ. ປຣິຈາເຣນ຺ຕີຕິ ອິໂຕ ຈິໂຕ ຈ ອິນ຺ທ຺ຣິຍານິ ຈາເຣນ຺ຕິ, ກີຬນ຺ຕິ ຣມນ຺ຕີຕິ ອຕ຺ໂຖ.

ອາຠາຍ ຜຸຏໍ ໂຫຕີຕິ ຕຕ຺ຕກໍ ຐານໍ ໂອຠາເສນ ຜຸຏໍ ໂຫຕິ. ເຕສຎ຺ຫິ ປຸປ຺ຜານໍ ພາລສູຣິຍສ຺ສ ວິຍ ອາຠາ ໂຫຕິ, ປຕ຺ຕານິ ປຓ຺ຓຈ຺ຉຕ຺ຕປ຺ປມາຓານິ, ອນ຺ໂຕ ມຫາຕຸມ຺ພມຕ຺ຕາ ເຣຓຸ ໂຫຕິ. ປຸປ຺ຜິເຕ ປນ ປາຣິຈ຺ຉຕ຺ຕເກ ອາໂຣຫນກິຈ຺ຈໍ ວາ ອງ຺ກຸສກໍ ຄເຫຕ຺ວາ ນມນກິຈ຺ຈໍ ວາ ປຸປ຺ຜາຫຣຓຕ຺ຖໍ ຈງ຺ໂຄຏກກິຈ຺ຈໍ ວາ ນຕ຺ຖິ, ກນ຺ຕນກວາໂຕ ອຸຏ຺ຐຫິຕ຺ວາ ປຸປ຺ຜານິ ວຓ຺ຏໂຕ ກນ຺ຕຕິ, ສມ຺ປຏິຈ຺ຉນກວາໂຕ ສມ຺ປຏິຈ຺ຉຕິ, ປເວສນກວາໂຕ ສຸຘມ຺ມໍ ເທວສຠໍ ປເວເສຕິ, ສມ຺ມຊ຺ຊນກວາໂຕ ປຸຣາຓປຸປ຺ຜານິ ນີຫຣຕິ, ສນ຺ຖຣຓກວາໂຕ ປຕ຺ຕກຓ຺ຓິກເກສຣານິ ຣຎ຺ເຊນ຺ໂຕ ສນ຺ຖຣຕິ. ມຊ຺ຌຏ຺ຐາເນ ຘມ຺ມາສນໍ ໂຫຕິ ໂຍຊນປ຺ປມາໂຓ ຣຕນປລ຺ລງ຺ໂກ ອຸປຣິ ຕິໂຍຊເນນ ເສຕຈ຺ຉຕ຺ເຕນ ຘາຣິຍມາເນນ, ຕທນນ຺ຕຣໍ ສກ຺ກສ຺ສ ເທວຣຎ຺ໂຎ ອາສນໍ ອຕ຺ຖຣິຍຕິ, ຕໂຕ ເຕຕ຺ຕິໍສາຍ ເທວປຸຕ຺ຕານໍ, ຕໂຕ ອຎ຺ເຎສໍ ມເຫສກ຺ຂານໍ ເທວານໍ, ອຎ຺ຎຕຣເທວຕານໍ ປຸປ຺ຜກຓ຺ຓິກາວ ອາສນໍ ໂຫຕິ. ເທວາ ເທວສຠໍ ປວິສິຕ຺ວາ ນິສີທນ຺ຕິ. ຕໂຕ ປຸປ຺ເຜຫິ ເຣຓຸວຏ຺ຏິ ອຸຄ຺ຄນ຺ຕ຺ວາ ອຸປຣິກຓ຺ຓິກໍ ອາຫຈ຺ຈ ນິປຕມານາ ເທວຕານໍ ຕິຄາວຸຕປ຺ປມາຓໍ ອຕ຺ຕຠາວໍ ລາຂາຣສປຣິກມ຺ມສຊ຺ຊິຕໍ ວິຍ ສຸວຓ຺ຓຈຸຓ຺ຓປິຎ຺ຊຣໍ ວິຍ ກໂຣຕິ. ເອກຈ຺ເຈ ເທວາ ເອເກກໍ ປຸປ຺ຜໍ ຄເຫຕ຺ວາ ອຎ຺ຎມຎ຺ຎໍ ປຫຣນ຺ຕາປິ ກີຬນ຺ຕິເຍວ. ປຫຣຓກາເລປິ ມຫາຕຸມ຺ພປ຺ປມາຓາ ເຣຓຸ ນິກ຺ຂມິຕ຺ວາ ສຣີຣໍ ປຠາສມ຺ປນ຺ເນຫິ ຄນ຺ຘຈຸຓ຺ເຓຫິ ສຎ຺ຊຕມໂນສິລາຣາຄໍ ວິຍ ກໂຣຕິ. ເອວໍ ສາ ກີຬາ ຈຕູຫິ ມາເສຫິ ປຣິໂຍສານໍ ຄຈ຺ຉຕິ. ອຍມານຸຠາໂວຕິ ອຍໍ ອນຸຜຣິຕຸໍ ອານຸຠາໂວ.

ອິທານິ ຍສ຺ມາ ນ ສຕ຺ຖາ ປາຣິຈ຺ຉຕ຺ຕເກນ ອຕ຺ຖິໂກ, ເຕນ ປນ ສທ຺ຘິໍ ອຸປເມຕ຺ວາ ສຕ຺ຕ ອຣິຍສາວເກ ທສ຺ເສຕຸກາໂມ, ຕສ຺ມາ ເຕ ທສ຺ເສຕຸໍ ເອວເມວ ໂຂຕິອາທິມາຫ. ຕຕ຺ຖ ປພ຺ພຊ຺ຊາຍ ເຈເຕຕີຕິ ປພ຺ພຊິສ຺ສາມີຕິ ຈິນ຺ເຕຕິ. ເທວານໍວາຕິ ເທວານໍ ວິຍ. ຍາວ ພ຺ຣຫ຺ມໂລກາ ສທ຺ໂທ ອພ຺ຠຸຄ຺ຄຈ຺ຉຕີຕິ ປຖວິຕລໂຕ ຍາວ ພ຺ຣຫ຺ມໂລກາ ສາຘຸກາຣສທ຺ເທນ ສພ຺ພໍ ເອກສທ຺ທເມວ ໂຫຕິ. ອຍມານຸຠາໂວຕິ ອຍໍ ຂີຓາສວສ຺ສ ຠິກ຺ຂຸໂນ ອນຸຜຣຓານຸຠາໂວ. ອິມສ຺ມິໍ ສຸຕ຺ເຕ ຈຕຸປາຣິສຸທ຺ຘິສີລໍ ປພ຺ພຊ຺ຊານິສ຺ສິຕໍ ໂຫຕິ, ກສິຓປຣິກມ຺ມໍ ປຐມຊ຺ຌານສນ຺ນິສ຺ສິຕໍ, ວິປສ຺ສນາຍ ສທ຺ຘິໍ ຕໂຍ ມຄ຺ຄາ ຕີຓິ ຈ ຜລານິ ອຣຫຕ຺ຕມຄ຺ຄສນ຺ນິສ຺ສິຕານິ ໂຫນ຺ຕິ. ເທສນາຍ ເຫຏ຺ຐໂຕ ວາ ອຸປຣິໂຕ ວາ ອຸຠຍໂຕ ວາ ປຣິຈ຺ເຉໂທ ໂຫຕິ, ອິຘ ປນ ອຸຠຍໂຕ ປຣິຈ຺ເຉໂທ. ເຕເນຕໍ ວຸຕ຺ຕໍ. ສງ຺ເຂປໂຕ ປເນຕ຺ຖ ວຏ຺ຏວິວຏ຺ຏໍ ກຖິຕນ຺ຕິ ເວທິຕພ຺ພໍ.