໘. ປຈລາຍມານສຸຕ຺ຕວຓ຺ຓນາ

໖໑. ອຏ຺ຐເມ ປຈລາຍມາໂນຕິ ຕໍ ຄາມໍ ອຸປນິສ຺ສາຍ ເອກສ຺ມິໍ ວນສຓ຺ເຑ ສມຓຘມ຺ມໍ ກໂຣນ຺ໂຕ ສຕ຺ຕາຫໍ ຈງ຺ກມນວີຣິເຍນ ນິມ຺ມຖິຕຕ຺ຕາ ກິລນ຺ຕຄຕ຺ໂຕ ຈງ຺ກມນໂກຏິຍໍ ປຈລາຍມາໂນ ນິສິນ຺ໂນ ໂຫຕິ. ປຈລາຍສິ ໂນຕິ ນິທ຺ທາຍສິ ນຸ. ອນຸມຊ຺ຊິຕ຺ວາຕິ ປຣິມຊ຺ຊິຕ຺ວາ. ອາໂລກສຎ຺ຎນ຺ຕິ ມິທ຺ຘວິໂນທນອາໂລກສຎ຺ຎໍ. ທິວາສຎ຺ຎນ຺ຕິ ທິວາຕິສຎ຺ຎໍ. ຍຖາ ທິວາ ຕຖາ ຣຕ຺ຕິນ຺ຕິ ຍຖາ ທິວາ ອາໂລກສຎ຺ຎາ ອຘິຏ຺ຐິຕາ, ຕຖາ ນໍ ຣຕ຺ຕິມ຺ປິ ອຘິຏ຺ຐເຫຍ຺ຍາສິ. ຍຖາ ຣຕ຺ຕິໍ ຕຖາ ທິວາຕິ ຍຖາ ຈ ເຕ ຣຕ຺ຕິໍ ອາໂລກສຎ຺ຎາ ອຘິຏ຺ຐິຕາ, ຕຖາ ນໍ ທິວາປິ ອຘິຏ຺ຐເຫຍ຺ຍາສິ. ສປ຺ປຠາສນ຺ຕິ ທິພ຺ພຈກ຺ຂຸຎາຓຕ຺ຖາຍ ສໂຫຠາສໍ. ປຈ຺ຉາປຸເຣສຎ຺ຎີຕິ ປຸຣໂຕ ຈ ປຈ຺ຉໂຕ ຈ ອຠິຫຣຓສຎ຺ຎາຍ ສຎ຺ຎາວາ. ອນ຺ໂຕຄເຕຫິ ອິນ຺ທ຺ຣິເຍຫີຕິ ພຫິ ອວິກ຺ຂິຕ຺ເຕຫິ ອນ຺ໂຕ ອນຸປວິຏ຺ເຐເຫວ ປຎ຺ຈຫິ ອິນ຺ທ຺ຣິເຍຫິ. ມິທ຺ຘສຸຂນ຺ຕິ ນິທ຺ທາສຸຂໍ. ເອຕ຺ຕເກນ ຐາເນນ ຠຄວາ ເຖຣສ຺ສ ມິທ຺ຘວິໂນທນກມ຺ມຏ຺ຐານໍ ກເຖສິ. ໂສຓ຺ຑນ຺ຕິ ມານໂສຓ຺ຑໍ. ກິຈ຺ຈກຣຓີຍານີຕິ ເອຕ຺ຖ ອວສ຺ສໍ ກຕ຺ຕພ຺ພານິ ກິຈ຺ຈານິ, ອິຕຣານິ ກຣຓີຍານິ. ມງ຺ກຸຠາໂວຕິ ນິຕ຺ເຕຊຕາ ໂທມນສ຺ສຕາ. ເອຕ຺ຕເກນ ຐາເນນ ສຕ຺ຖາຣາ ເຖຣສ຺ສ ຠິກ຺ຂາຈາຣວຕ຺ຕໍ ກຖິຕໍ.

ອິທານິ ຠສ຺ເສ ປຣິຍນ຺ຕກາຣິຕາຍ ສມາທເປຕຸໍ ຕສ຺ມາຕິຫາຕິອາທິມາຫ. ຕຕ຺ຖ ວິຄ຺ຄາຫິກກຖນ຺ຕິ ‘‘ນ ຕ຺ວໍ ອິມໍ ຘມ຺ມວິນຍໍ ອາຊານາສີ’’ຕິອາທິນຍປ຺ປວຕ຺ຕາ ວິຄ຺ຄາຫິກກຖາ. ນາຫໍ ໂມຄ຺ຄລ຺ລານາຕິອາທິ ປາປມິຕ຺ຕສໍສຄ຺ຄວິວຊ຺ຊນຕ຺ຖໍ ວຸຕ຺ຕໍ. ກິຕ຺ຕາວຕາ ນຸ ໂຂຕິ ກິຕ຺ຕເກນ ນຸ ໂຂ. ຕຓ຺ຫາສງ຺ຂຍວິມຸຕ຺ໂຕ ໂຫຕີຕິ ຕຓ຺ຫາສງ຺ຂເຍ ນິພ຺ພາເນ ຕໍ ອາຣມ຺ມຓໍ ກຕ຺ວາ ວິມຸຕ຺ຕຈິຕ຺ຕຕາຍ ຕຓ຺ຫາສງ຺ຂຍວິມຸຕ຺ໂຕ ນາມ ສໍຂິຕ຺ເຕນ ກິຕ຺ຕາວຕາ ໂຫຕິ. ຍາຍ ປຏິປຕ຺ຕິຍາ ຕຓ຺ຫາສງ຺ຂຍວິມຸຕ຺ໂຕ ໂຫຕິ, ຕເມວ ຂີຓາສວສ຺ສ ຠິກ຺ຂຸໂນ ປຸພ຺ພຠາຄປຏິປທໍ ສໍຂິຕ຺ເຕນ ເທເສຖາຕິ ປຸຈ຺ຉຕິ. ອຈ຺ຈນ຺ຕນິຏ຺ໂຐຕິ ຂຍວຍສງ຺ຂາຕໍ ອນ຺ຕໍ ອຕີຕາຕິ ອຈ຺ຈນ຺ຕາ, ອຈ຺ຈນ຺ຕາ ນິຏ຺ຐາ ອສ຺ສາຕິ ອຈ຺ຈນ຺ຕນິຏ຺ໂຐ, ເອກນ຺ຕນິຏ຺ໂຐ ສຕຕນິຏ຺ໂຐຕິ ອຕ຺ໂຖ. ອຈ຺ຈນ຺ຕໂຍຄກ຺ເຂມີຕິ ອຈ຺ຈນ຺ຕໍ ໂຍຄກ຺ເຂມີ, ນິຈ຺ຈໂຍຄກ຺ເຂມີຕິ ອຕ຺ໂຖ. ອຈ຺ຈນ຺ຕພ຺ຣຫ຺ມຈາຣີຕິ ອຈ຺ຈນ຺ຕໍ ພ຺ຣຫ຺ມຈາຣີ, ນິຈ຺ຈພ຺ຣຫ຺ມຈາຣີຕິ ອຕ຺ໂຖ. ອຈ຺ຈນ຺ຕໍ ປຣິໂຍສານມສ຺ສາຕິ ປຸຣິມນເຍເນວ ອຈ຺ຈນ຺ຕປຣິໂຍສາໂນ. ເສຏ຺ໂຐ ເທວມນຸສ຺ສານນ຺ຕິ ເທວານຎ຺ຈ ມນຸສ຺ສານຎ຺ຈ ເສຏ຺ໂຐ ອຸຕ຺ຕໂມ. ເອວຣູໂປ ຠິກ຺ຂຸ ກິຕ຺ຕາວຕາ ໂຫຕິ, ສງ຺ເຂເປເນວ ຕສ຺ສ ປຏິປຕ຺ຕິໍ ກເຖຖາຕິ ຍາຈຕິ.

ສພ຺ເພ ຘມ຺ມາ ນາລໍ ອຠິນິເວສາຍາຕິ ເອຕ຺ຖ ສພ຺ເພ ຘມ຺ມາ ນາມ ປຎ຺ຈກ຺ຂນ຺ຘາ ທ຺ວາທສາຍຕນານິ ອຏ຺ຐາຣສ ຘາຕຸໂຍ, ເຕ ສພ຺ເພປິ ຕຓ຺ຫາທິຏ຺ຐິວເສນ ອຠິນິເວສາຍ ນາລໍ ນ ປຣິຍຕ຺ຕາ ນ ສມຕ຺ຕາ ນ ຍຸຕ຺ຕາ. ກສ຺ມາ? ຄຫິຕາກາເຣນ ອຕິຏ຺ຐນໂຕ. ເຕ ຫິ ນິຈ຺ຈາ ສຸຂາ ອຕ຺ຕາຕິ ຄຫິຕາປິ ອນິຈ຺ຈາ ທຸກ຺ຂາ ອນຕ຺ຕາວ ສມ຺ປຊ຺ຊນ຺ຕິ. ຕສ຺ມາ ນາລໍ ອຠິນິເວສາຍ. ອຠິຊານາຕີຕິ ອນິຈ຺ຈໍ ທຸກ຺ຂໍ ອນຕ຺ຕາຕິ ຎາຕປຣິຎ຺ຎາຍ ອຠິຊານາຕິ. ປຣິຊານາຕີຕິ ຕເຖວ ຕີຣຓປຣິຎ຺ຎາຍ ປຣິຊານາຕິ. ຍໍກິຎ຺ຈິ ເວທນນ຺ຕິ ອນ຺ຕມໂສ ປຎ຺ຈວິຎ຺ຎາຓສມ຺ປຍຸຕ຺ຕໍ ຍໍກິຎ຺ຈິ ອປ຺ປມຕ຺ຕກມ຺ປິ ເວທນໍ ອນຸຠວຕິ. ອິມິນາ ຠຄວາ ເຖຣສ຺ສ ເວທນາວເສນ ຈ ວິນິວຏ຺ເຏຕ຺ວາ ອຣູປປຣິຄ຺ຄຫໍ ທສ຺ເສສິ.

ອນິຈ຺ຈານຸປສ຺ສີຕິ ອນິຈ຺ຈໂຕ ອນຸປສ຺ສນ຺ໂຕ. ວິຣາຄານຸປສ຺ສີຕິ ເອຕ຺ຖ ທ຺ເວ ວິຣາຄາ ຂຍວິຣາໂຄ ຈ ອຈ຺ຈນ຺ຕວິຣາໂຄ ຈ. ຕຕ຺ຖ ສງ຺ຂາຣານໍ ຂຍໍ ຂຍໂຕ ປສ຺ສນາ ວິປສ຺ສນາປິ, ອຈ຺ຈນ຺ຕວິຣາຄໍ ນິພ຺ພານໍ ວິຣາຄໂຕ ທສ຺ສນມຄ຺ຄຎາຓມ຺ປິ ວິຣາຄານຸປສ຺ສນາ. ຕທຸຠຍສມງ຺ຄິປຸຄ຺ຄໂລ ວິຣາຄານຸປສ຺ສີ ນາມ. ຕໍ ສນ຺ຘາຍ ວຸຕ຺ຕໍ – ‘‘ວິຣາຄານຸປສ຺ສີ’’ຕິ, ວິຣາຄໂຕ ອນຸປສ຺ສນ຺ໂຕຕິ ອຕ຺ໂຖ. ນິໂຣຘານຸປສ຺ສິມ຺ຫິປິ ເອເສວ ນໂຍ. ນິໂຣໂຘປິ ຫິ ຂຍນິໂຣໂຘ ອຈ຺ຈນ຺ຕນິໂຣໂຘຕິ ທຸວິໂຘເຍວ. ປຏິນິສ຺ສຄ຺ຄານຸປສ຺ສີຕິ ເອຕ຺ຖ ປຏິນິສ຺ສຄ຺ໂຄ ວຸຈ຺ຈຕິ ໂວສ຺ສຄ຺ໂຄ. ໂສ ຈ ປຣິຈ຺ຈາຄໂວສ຺ສຄ຺ໂຄ ປກ຺ຂນ຺ທນໂວສ຺ສຄ຺ໂຄຕິ ທຸວິໂຘ ໂຫຕິ. ຕຕ຺ຖ ປຣິຈ຺ຈາຄໂວສ຺ສຄ຺ໂຄຕິ ວິປສ຺ສນາ. ສາ ຫິ ຕທງ຺ຄວເສນ ກິເລເສ ຈ ຂນ຺ເຘ ຈ ໂວສ຺ສຊຕິ. ປກ຺ຂນ຺ທນໂວສ຺ສຄ຺ໂຄຕິ ມຄ຺ໂຄ. ໂສ ຫິ ນິພ຺ພານໍ ອາຣມ຺ມຓໂຕ ປກ຺ຂນ຺ທຕິ. ທ຺ວີຫິປິ ວາ ກາຣເຓຫິ ໂສ ໂວສ຺ສຄ຺ໂຄເຍວ, ສມຸຈ຺ເຉທວເສນ ຂນ຺ຘານໍ ກິເລສານຎ຺ຈ ໂວສ຺ສຊນໂຕ ນິພ຺ພາເນ ຈ ປກ຺ຂນ຺ທນໂຕ. ຕສ຺ມາ ກິເລເສ ຈ ຂນ຺ເຘ ຈ ປຣິຈ຺ຈຊຕີຕິ ປຣິຈ຺ຈາຄໂວສ຺ສຄ຺ໂຄ. ນິໂຣຘາຍ ນິພ຺ພານຘາຕຸຍາ ຈິຕ຺ຕໍ ປກ຺ຂນ຺ທຕີຕິ ປກ຺ຂນ຺ທນໂວສ຺ສຄ຺ໂຄຕິ ອຸຠຍມ຺ເປຕໍ ມຄ຺ເຄ ສເມຕິ. ຕທຸຠຍສມງ຺ຄີ ປຸຄ຺ຄໂລ ອິມາຍ ປຏິນິສ຺ສຄ຺ຄານຸປສ຺ສນາຍ ສມນ຺ນາຄຕຕ຺ຕາ ປຏິນິສ຺ສຄ຺ຄານຸປສ຺ສີ ນາມ ໂຫຕິ. ຕໍ ສນ຺ຘາເຍຕໍ ວຸຕ຺ຕໍ. ນ ກິຎ຺ຈິ ໂລເກ ອຸປາທິຍຕີຕິ ກິຎ຺ຈິ ເອກມ຺ປິ ສງ຺ຂາຣຄຕໍ ຕຓ຺ຫາວເສນ ນ ອຸປາທິຍຕິ ນ ຄຓ຺ຫາຕິ ນ ປຣາມສຕິ. ອນຸປາທິຍໍ ນ ປຣິຕສ຺ສຕີຕິ ອຄ຺ຄຓ຺ຫນ຺ໂຕ ຕຓ຺ຫາປຣິຕສ຺ສນາຍ ນ ປຣິຕສ຺ສຕິ. ປຈ຺ຈຕ຺ຕໍເຍວ ປຣິນິພ຺ພາຍຕີຕິ ສຍເມວ ກິເລສປຣິນິພ຺ພາເນນ ປຣິນິພ຺ພາຍຕິ. ຂີຓາ ຊາຕີຕິອາທິນາ ປນສ຺ສ ປຈ຺ຈເວກ຺ຂຓາ ທສ຺ສິຕາ. ອິຕິ ຠຄວາ ສໍຂິຕ຺ເຕນ ຂີຓາສວສ຺ສ ປຸພ຺ພຠາຄປ຺ປຏິປທໍ ປຸຈ຺ຉິໂຕ ສໍຂິຕ຺ເຕເນວ ກເຖສິ. ອິທໍ ປນ ສຸຕ຺ຕໍ ເຖຣສ຺ສ ໂອວາໂທປິ ອໂຫສິ ວິປສ຺ສນາປິ. ໂສ ອິມສ຺ມິໍເຍວ ສຸຕ຺ເຕ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ໂຕຕິ.