໖. ອນິຈ຺ຈານຸປສ຺ສີສຸຕ຺ຕວຓ຺ຓນາ

໑໖. ຉຏ຺ເຐ ອນິຈ຺ຈາຕິ ເອວໍ ປຎ຺ຎາຍ ຜຣນ຺ໂຕ ອນຸປສ຺ສຕີຕິ ອນິຈ຺ຈານຸປສ຺ສີ. ອນິຈ຺ຈາຕິ ເອວໍ ສຎ຺ຎາ ອສ຺ສາຕິ ອນິຈ຺ຈສຎ຺ຎີ. ອນິຈ຺ຈາຕິ ເອວໍ ຎາເຓນ ປຏິສໍເວທິຕາ ອສ຺ສາຕິ ອນິຈ຺ຈປຏິສໍເວທີ. ສຕຕນ຺ຕິ ສພ຺ພກາລໍ. ສມິຕນ຺ຕິ ຍຖາ ປຸຣິມຈິຕ຺ເຕນ ປຈ຺ຉິມຈິຕ຺ຕໍ ສມິຕໍ ສມຸປຄຕໍ ຆຏ຺ຏິຕໍ ໂຫຕິ, ເອວໍ. ອພ຺ໂພກິຓ຺ຓນ຺ຕິ ນິຣນ຺ຕຣໍ ອຎ຺ເຎນ ເຈຕສາ ອສໍມິສ຺ສໍ. ເຈຕສາ ອຘິມຸຈ຺ຈມາໂນຕິ ຈິຕ຺ເຕນ ສນ຺ນິຏ຺ຐາປຍມາໂນ. ປຎ຺ຎາຍ ປຣິໂຍຄາຫມາໂນຕິ ວິປສ຺ສນາຎາເຓນ ອນຸປວິສມາໂນ.

ອປຸພ຺ພໍ ອຈຣິມນ຺ຕິ ອປຸເຣ ອປຈ຺ຉາ ເອກກ຺ຂເຓເຍວ. ອິຘ ສມສີສີ ກຖິໂຕ. ໂສ ຈຕຸພ຺ພິໂຘ ໂຫຕິ ໂຣຄສມສີສີ, ເວທນາສມສີສີ, ອິຣິຍາປຖສມສີສີ, ຊີວິຕສມສີສີຕິ. ຕຕ຺ຖ ຍສ຺ສ ອຎ຺ຎຕເຣນ ໂຣເຄນ ຜຸຏ຺ຐສ຺ສ ສໂຕ ໂຣຄວູປສໂມ ຈ ອາສວກ຺ຂໂຍ ຈ ເອກປ຺ປຫາເຣເນວ ໂຫຕິ, ອຍໍ ໂຣຄສມສີສີ ນາມ. ຍສ຺ສ ປນ ອຎ຺ຎຕຣໍ ເວທນໍ ເວທຍໂຕ ເວທນາວູປສໂມ ຈ ອາສວກ຺ຂໂຍ ຈ ເອກປ຺ປຫາເຣເນວ ໂຫຕິ, ອຍໍ ເວທນາສມສີສີ ນາມ. ຍສ຺ສ ປນ ຐານາທີສຸ ອິຣິຍາປເຖສຸ ອຎ຺ຎຕຣສມງ຺ຄິໂນ ວິປສ຺ສນ຺ຕສ຺ສ ອິຣິຍາປຖສ຺ສ ປຣິໂຍສານຎ຺ຈ ອາສວກ຺ຂໂຍ ຈ ເອກປ຺ປຫາເຣເນວ ໂຫຕິ, ອຍໍ ອິຣິຍາປຖສມສີສີ ນາມ. ຍສ຺ສ ປນ ອຸປກ຺ກມໂຕ ວາ ສຣສໂຕ ວາ ຊີວິຕປຣິຍາທານຎ຺ຈ ອາສວກ຺ຂໂຍ ຈ ເອກປ຺ປຫາເຣເນວ ໂຫຕິ, ອຍໍ ຊີວິຕສມສີສີ ນາມ. ອຍມິຘ ອຘິປ຺ເປໂຕ. ຕຕ຺ຖ ກິຎ຺ຈາປິ ອາສວປຣິຍາທານໍ ມຄ຺ຄຈິຕ຺ເຕນ, ຊີວິຕປຣິຍາທານໍ ຈຸຕິຈິຕ຺ເຕນ ໂຫຕີຕິ ອຸຠິນ຺ນໍ ເອກກ຺ຂເຓ ສມ຺ຠໂວ ນາມ ນຕ຺ຖິ. ຍສ຺ມາ ປນສ຺ສ ອາສເວສຸ ຂີຓມຕ຺ເຕສຸ ປຈ຺ຈເວກ຺ຂຓວາຣານນ຺ຕຣເມວ ຊີວິຕປຣິຍາທານໍ ຄຈ຺ຉຕິ, ອນ຺ຕຣໍ ນ ປຎ຺ຎາຍຕິ, ຕສ຺ມາ ເອວໍ ວຸຕ຺ຕໍ.

ອນ຺ຕຣາປຣິນິພ຺ພາຍີຕິ ໂຍ ປຎ຺ຈສຸ ສຸທ຺ຘາວາເສສຸ ຍຕ຺ຖ ກຕ຺ຖຈິ ອຸປ຺ປນ຺ໂນ ນິພ຺ພຕ຺ຕກ຺ຂເຓ ວາ ໂຖກໍ ອຕິກ຺ກມິຕ຺ວາ ວາ ເວມຊ຺ເຌ ຐຕ຺ວາ ວາ ອຣຫຕ຺ຕໍ ປາປຸຓາຕິ, ຕສ຺ເສຕໍ ນາມໍ. ອຸປຫຈ຺ຈປຣິນິພ຺ພາຍີຕິ ໂຍ ຕຕ຺ເຖວ ອາຍຸເວມຊ຺ຌໍ ອຕິກ຺ກມິຕ຺ວາ ອຣຫຕ຺ຕໍ ປາປຸຓາຕິ. ອສງ຺ຂາຣປຣິນິພ຺ພາຍີຕິ ໂຍ ເຕສໍເຍວ ປຸຄ຺ຄລານໍ ອສງ຺ຂາເຣເນວ ອປ຺ປໂຍເຄນ ກິເລເສ ເຂເປຕິ. ສສງ຺ຂາຣປຣິນິພ຺ພາຍີຕິ ໂຍ ສສງ຺ຂາເຣນ ສປ຺ປໂຍເຄນ ກິເລເສ ເຂເປຕິ. ອຸທ຺ຘໍໂສໂຕ ອກນິຏ຺ຐຄາມີຕິ ໂຍ ເຫຏ຺ຐາ ຈຕູສຸ ສຸທ຺ຘາວາເສສຸ ຍຕ຺ຖ ກຕ຺ຖຈິ ນິພ຺ພຕ຺ຕິຕ຺ວາ ຕໂຕ ຈຸໂຕ ອນຸປຸພ຺ເພນ ອກນິຏ຺ເຐ ອຸປ຺ປຊ຺ຊິຕ຺ວາ ອຣຫຕ຺ຕໍ ປາປຸຓາຕິ.