໑. ຘນວຄ຺ໂຄ

໑-໕. ປຐມປິຍສຸຕ຺ຕາທິວຓ຺ຓນາ

໑-໕. ສຕ຺ຕກນິປາຕສ຺ສ ປຐເມ ອນວຎ຺ຎຕ຺ຕິກາໂມຕິ ອຠິຎ຺ຎາຕຠາວກາໂມ. ຕຕິເຍ ໂຍນິໂສ ວິຈິເນ ຘມ຺ມນ຺ຕິ ອຸປາເຍນ ຈຕຸສຈ຺ຈຘມ຺ມໍ ວິຈິນາຕິ. ປຎ຺ຎາຍຕ຺ຖໍ ວິປສ຺ສຕີຕິ ສຫວິປສ຺ສນາຍ ມຄ຺ຄປຎ຺ຎາຍ ສຈ຺ຈຘມ຺ມໍ ວິປສ຺ສຕິ. ປຊ຺ໂຊຕສ຺ເສວາຕິ ທີປສ຺ເສວ. ວິໂມກ຺ໂຂ ໂຫຕິ ເຈຕໂສຕິ ຕສ຺ສ ອິເມຫິ ພເລຫິ ສມນ຺ນາຄຕສ຺ສ ຂີຓາສວສ຺ສ ທີປນິພ຺ພານໍ ວິຍ ຈຣິມກຈິຕ຺ຕສ຺ສ ວຕ຺ຖາຣມ຺ມເຓຫິ ວິໂມກ຺ໂຂ ໂຫຕິ, ຄຕຏ຺ຐານໍ ນ ປຎ຺ຎາຍຕິ. ຈຕຸຕ຺ເຖ ສທ຺ໂຘ ໂຫຕີຕິອາທີນິ ປຎ຺ຈກນິປາເຕ ວຓ຺ຓິຕາເນວ. ປຎ຺ຈເມ ຘນານີຕິ ອທາລິທ຺ທິຍກຣຓຏ຺ເຐນ ຘນານິ.

໗. ອຸຄ຺ຄສຸຕ຺ຕວຓ຺ຓນາ

໗. ສຕ຺ຕເມ ອຸຄ຺ໂຄ ຣາຊມຫາມຕ຺ໂຕຕິ ປເສນທິໂກສລສ຺ສ ມຫາອມຈ຺ໂຈ. ອຸປສງ຺ກມີຕິ ຠຸຕ຺ຕປາຕຣາໂສ ອຸປສງ຺ກມິ. ອຑ຺ໂຒຕິ ນິຘານຄເຕນ ຘເນນ ອຑ຺ໂຒ. ມິຄາໂຣ ໂຣຫເຓຍ຺ໂຍຕິ ໂຣຫຓເສຏ຺ຐິໂນ ນຕ຺ຕາຣໍ ມິຄາຣເສຏ຺ຐິໍ ສນ຺ຘາເຍວມາຫ. ມຫທ຺ຘໂນຕິ ວຬຎ຺ຊນຘເນນ ມຫທ຺ຘໂນ. ມຫາໂຠໂຄຕິ ອຸປໂຠຄປຣິໂຠຄຠຓ຺ຑສ຺ສ ມຫນ຺ຕຕາຍ ມຫາໂຠໂຄ. ຫິຣຎ຺ຎສ຺ສາຕິ ສຸວຓ຺ຓສ຺ເສວ. ສຸວຓ຺ຓາເມວ ຫິສ຺ສ ໂກຏິສງ຺ຂ຺ຍໍ ອໂຫສິ. ຣູປິຍສ຺ສາຕິ ເສສສ຺ສ ຕຏ຺ຏກສຣກອຕ຺ຖຣຓປາວຸຣຓາທິໂນ ປຣິໂຠຄປຣິກ຺ຂາຣສ຺ສ ປມາຓສງ຺ຂາເນ ວາໂທເຍວ ນຕ຺ຖິ.

໘. ສໍໂຍຊນສຸຕ຺ຕວຓ຺ຓນາ

໘. ອຏ຺ຐເມ ອນຸນຍສໍໂຍຊນນ຺ຕິ ກາມຣາຄສໍໂຍຊນໍ. ສພ຺ພາເນວ ເຈຕານິ ພນ຺ຘນຏ຺ເຐນ ສໍໂຍຊນານີຕິ ເວທິຕພ຺ພານິ. ອິມສ຺ມິໍ ສຸຕ຺ເຕ ວຏ຺ຏເມວ ກຖິຕໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຘນວຄ຺ໂຄ ປຐໂມ.