໔. ຫິມວນ຺ຕສຸຕ຺ຕວຓ຺ຓນາ

໒໔. ຈຕຸຕ຺ເຖ ປທາເລຍ຺ຍາຕິ ຠິນ຺ເທຍ຺ຍ. ຉວາຍາຕິ ລາມິກາຍ. ສມາຘິສ຺ສ ສມາປຕ຺ຕິກຸສໂລ ໂຫຕີຕິ ອາຫາຣສປ຺ປາຍອຸຕຸສປ຺ປາຍານິ ປຣິຄ຺ຄເຫຕ຺ວາ ສມາຘິໍ ສມາປຊ຺ຊິຕຸໍ ກຸສໂລ ໂຫຕິ ເຉໂກ ສມຕ຺ໂຖ ປຏິພໂລ. ສມາຘິສ຺ສ ຐິຕິກຸສໂລຕິ ສມາຘິສ຺ສ ຐິຕິຍໍ ກຸສໂລ, ສມາຘິໍ ຐເປຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ວຸຏ຺ຐານກຸສໂລຕິ ສມາຘິສ຺ສ ວຸຏ຺ຐາເນ ກຸສໂລ, ຍຖາປຣິຈ຺ເຉເທນ ວຸຏ຺ຐາຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ກລ຺ລິຕກຸສໂລຕິ ສມາຘິສ຺ສ ກລ຺ລຕາຍ ກຸສໂລ, ສມາຘິຈິຕ຺ຕໍ ຫາເສຕຸໍ ກລ຺ລໍ ກາຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ໂຄຈຣກຸສໂລຕິ ສມາຘິສ຺ສ ອສປ຺ປາເຍ ອນຸປກາຣເກ ຘມ຺ເມ ວຊ຺ເຊຕ຺ວາ ສປ຺ປາເຍ ອຸປກາຣເກ ເສວນ຺ໂຕປິ, ‘‘ອຍໍ ສມາຘິນິມິຕ຺ຕາຣມ຺ມໂຓ ອຍໍ ລກ຺ຂຓາຣມ຺ມໂຓ’’ຕິ ຊານນ຺ໂຕປິ ສມາຘິສ຺ສ ໂຄຈຣກຸສໂລ ນາມ ໂຫຕິ. ສມາຘິສ຺ສ ອຠິນີຫາຣກຸສໂລຕິ ອຸປຣິອຸປຣິສມາປຕ຺ຕິສມາປຊ຺ຊນຕ຺ຖາຍ ປຐມຊ຺ຌານາທິສມາຘິໍ ອຠິນີຫຣິຕຸໍ ສກ຺ໂກນ຺ໂຕ ສມາຘິສ຺ສ ອຠິນີຫາຣກຸສໂລ ນາມ ໂຫຕິ. ໂສ ປຐມຊ຺ຌານາ ວຸຏ຺ຐາຍ ທຸຕິຍໍ ສມາປຊ຺ຊຕິ, ທຸຕິຍຊ຺ຌານາ…ເປ… ຕຕິຍຊ຺ຌານາ ວຸຏ຺ຐາຍ ຈຕຸຕ຺ຖໍ ສມາປຊ຺ຊຕີຕິ.