໑໐. ທຸຕິຍມຣຓສ຺ສຕິສຸຕ຺ຕວຓ຺ຓນາ

໒໐. ທສເມ ປຕິຄຕາຍາຕິ ປຏິປນ຺ນາຍ. ອິຕິ ປຏິສຎ຺ຈິກ຺ຂຕີຕິ ເອວໍ ປຈ຺ຈເວກ຺ຂຕິ. ໂສ ມມສ຺ສ ອນ຺ຕຣາໂຍຕິ ເອຕ຺ຖ ຕິວິໂຘ ອນ຺ຕຣາໂຍ ຊີວິຕນ຺ຕຣາໂຍ, ສມຓຘມ຺ມນ຺ຕຣາໂຍ, ປຸຖຸຊ຺ຊນກາລກິຣິຍໍ ກໂຣນ຺ຕສ຺ສ ສຄ຺ຄນ຺ຕຣາໂຍ ເຈວ ມຄ຺ຄນ຺ຕຣາໂຍ ຈາຕິ. ຕໍ ສພ຺ພມ຺ປິ ສນ຺ຘາເຍວມາຫ. ພ຺ຍາປຊ຺ເຊຍ຺ຍາຕິ ອຊິຓ຺ຓກາທິວເສນ ວິປຊ຺ເຊຍ຺ຍ. ອຘິມຕ຺ໂຕຕິ ພລວາ. ຉນ຺ໂທຕິ ກຕ຺ຕຸກມ຺ຍຕາຉນ຺ໂທ. ວາຍາໂມຕິ ປໂຍຄວີຣິຍໍ. ອຸສ຺ສາໂຫຕິ ອຸສ຺ສາປນວີຣິຍໍ. ອຸສ຺ໂສຬ຺ຫີຕິ ສມ຺ປາທນວີຣິຍໍ. ອປ຺ປຏິວານີຕິ ອນຸກ຺ກຓ຺ຐນາ ອປ຺ປຏິສງ຺ຆຣຓາ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສາຣຓີຍວຄ຺ໂຄ ທຸຕິໂຍ.