(໒໒) ໒. ອກ຺ໂກສກວຄ຺ໂຄ

໑. ອກ຺ໂກສກສຸຕ຺ຕວຓ຺ຓນາ

໒໑໑. ທຸຕິຍສ຺ສ ປຐເມ ອກ຺ໂກສກປຣິຠາສໂກຕິ ທສຫິ ອກ຺ໂກສວຕ຺ຖູຫິ ອກ຺ໂກສໂກ, ຠຍທສ຺ສເນນ ປຣິຠາສໂກ. ຉິນ຺ນປຣິປນ຺ໂຖຕິ ໂລກຸຕ຺ຕຣປຣິປນ຺ຖສ຺ສ ຉິນ຺ນຕ຺ຕາ ຉິນ຺ນປຣິປນ຺ໂຖ. ໂຣຄາຕງ຺ກນ຺ຕິ ໂຣໂຄເຍວ ກິຈ຺ຉຊີວິກາຍາວຫນໂຕ ໂຣຄາຕງ຺ໂກ ນາມ.

໒. ຠຓ຺ຑນກາຣກສຸຕ຺ຕວຓ຺ຓນາ

໒໑໒. ທຸຕິເຍ ອຘິກຣຓກາຣໂກຕິ ຈຕຸນ຺ນໍ ອຘິກຣຓານໍ ອຎ຺ຎຕຣສ຺ສ ກາຣໂກ. ອນຘິຄຕນ຺ຕິ ປຸພ຺ເພ ອປ຺ປຕ຺ຕວິເສສໍ.

໓. ສີລສຸຕ຺ຕວຓ຺ຓນາ

໒໑໓. ຕຕິເຍ ທຸສ຺ສີໂລຕິ ອສີໂລ ນິສ຺ສີໂລ. ສີລວິປນ຺ໂນຕິ ວິປນ຺ນສີໂລ ຠິນ຺ນສໍວໂຣ. ປມາທາຘິກຣຓນ຺ຕິ ປມາທກາຣຓາ. ອິທຎ຺ຈ ສຸຕ຺ຕໍ ຄຫຏ຺ຐານໍ ວເສນ ອາຄຕໍ, ປພ຺ພຊິຕານມ຺ປິ ປນ ລພ຺ຠເຕວ. ຄຫຏ຺ໂຐ ຫິ ເຍນ ເຍນ ສິປ຺ປຏ຺ຐາເນນ ຊີວິກໍ ກປ຺ເປຕິ, ຍທິ ກສິຍາ, ຍທິ ວຓິຊ຺ຊາຍ, ປາຓາຕິປາຕາທິວເສນ ປມຕ຺ໂຕ ຕໍ ຕໍ ຍຖາກາລໍ ສມ຺ປາເທຕຸໍ ນ ສກ຺ໂກຕິ, ອຖສ຺ສ ມູລໍ ວິນສ຺ສຕິ. ມາຆາຕກາເລປິ ປາຓາຕິປາຕໍ ອທິນ຺ນາທານາທີນິ ຈ ກໂຣນ຺ໂຕ ທຓ຺ຑວເສນ ມຫຕິໍ ໂຠຄຊານິໍ ນິຄຈ຺ຉຕິ. ປພ຺ພຊິໂຕ ທຸສ຺ສີໂລ ປມາທກາຣຓາ ສີລໂຕ ພຸທ຺ຘວຈນໂຕ ຌານໂຕ ສຕ຺ຕອຣິຍຘນໂຕ ຈ ຊານິໍ ນິຄຈ຺ຉຕິ. ຄຫຏ຺ຐສ຺ສ ‘‘ອສຸໂກ ອສຸກກຸເລ ຊາໂຕ ທຸສ຺ສີໂລ ປາປຘມ຺ໂມ ປຣິຈ຺ຈຕ຺ຕອິຘໂລກປຣໂລໂກ ສລາກຠຕ຺ຕມຕ຺ຕມ຺ປິ ນ ເທຕີ’’ຕິ ຈຕຸປຣິສມຊ຺ເຌ ປາປໂກ ກິຕ຺ຕິສທ຺ໂທ ອພ຺ຠຸຄ຺ຄຈ຺ຉຕິ. ປພ຺ພຊິຕສ຺ສ ‘‘ອສຸໂກ ນາສກ຺ຂິ ສີລໍ ຣກ຺ຂິຕຸໍ ພຸທ຺ຘວຈນໍ ຄເຫຕຸໍ, ເວຊ຺ຊກມ຺ມາທີຫິ ຊີວຕິ, ຉຫິ ອຄາຣເວຫິ ສມນ຺ນາຄໂຕ’’ຕິ ເອວໍ ອພ຺ຠຸຄ຺ຄຈ຺ຉຕິ.

ອວິສາຣໂທຕິ ຄຫຏ຺ໂຐ ຕາວ ‘‘ອວສ຺ສໍ ພຫູນໍ ສນ຺ນິປາຕຏ຺ຐາເນ ໂກຈິ ມມ ກມ຺ມໍ ຊານິສ຺ສຕິ, ອຖ ມໍ ນິຄ຺ຄຓ຺ຫິສ຺ສນ຺ຕິ ວາ, ຣາຊກຸລສ຺ສ ວາ ທສ຺ສນ຺ຕີ’’ຕິ ສຠໂຍ ອຸປສງ຺ກມຕິ. ມງ຺ກຸຠູໂຕ ຈ ປຕິຕກ຺ຂນ຺ໂຘ ອໂຘມຸໂຂ ອງ຺ຄຸຏ຺ຐເກນ ຠູມິໍ ກສນ຺ໂຕ ນິສີທຕິ, ວິສາຣໂທ ຫຸຕ຺ວາ ກເຖຕຸໍ ນ ສກ຺ໂກຕິ. ປພ຺ພຊິໂຕປິ ‘‘ພຫູ ຠິກ຺ຂູ ສນ຺ນິປຕິຕາ, ອວສ຺ສໍ ໂກຈິ ມມ ກມ຺ມໍ ຊານິສ຺ສຕິ, ອຖ ເມ ອຸໂປສຖມ຺ປິ ປວາຣຓມ຺ປິ ຐເປຕ຺ວາ ສາມຎ຺ຎາ ຈາເວຕ຺ວາ ນິກ຺ກຑ຺ຒິສ຺ສນ຺ຕີ’’ຕິ ສຠໂຍ ອຸປສງ຺ກມຕິ, ວິສາຣໂທ ຫຸຕ຺ວາ ກເຖຕຸໍ ນ ສກ຺ໂກຕິ. ເອກຈ຺ໂຈ ປນ ທຸສ຺ສີໂລປິ ທປ຺ປິໂຕ ວິຍ ຈຣຕິ, ໂສປິ ອຊ຺ຌາສເຍນ ມງ຺ກຸ ໂຫຕິເຍວ.

ສມ຺ມູຬ຺ໂຫ ກາລໍ ກໂຣຕີຕິ ຕສ຺ສ ຫິ ມຣຓມຎ຺ເຈ ນິປນ຺ນສ຺ສ ທຸສ຺ສີລກມ຺ມໍ ສມາທາຍ ວຕ຺ຕິຕຏ຺ຐານໍ ອາປາຖໍ ອາຄຈ຺ຉຕິ. ໂສ ອຸມ຺ມີເລຕ຺ວາ ອິຘໂລກໍ ປສ຺ສຕິ, ນິມ຺ມີເລຕ຺ວາ ປຣໂລກໍ. ຕສ຺ສ ຈຕ຺ຕາໂຣ ອປາຍາ ອຸປຏ຺ຐຫນ຺ຕິ, ສຕ຺ຕິສເຕນ ສີເສ ປຫຣິຍມາໂນ ວິຍ ໂຫຕິ. ໂສ ‘‘ວາເຣຖ ວາເຣຖາ’’ຕິ ວິຣວນ຺ໂຕ ມຣຕິ. ເຕນ ວຸຕ຺ຕໍ – ‘‘ສມ຺ມູຬ຺ໂຫ ກາລໍ ກໂຣຕີ’’ຕິ. ປຎ຺ຈມປທໍ ອຸຕ຺ຕານເມວ. ອານິສໍສກຖາ ວຸຕ຺ຕວິປຣິຍາເຍນ ເວທິຕພ຺ພາ.

໔. ພຫຸຠາຓິສຸຕ຺ຕວຓ຺ຓນາ

໒໑໔. ຈຕຸຕ຺ເຖ ພຫຸຠາຓິສ຺ມິນ຺ຕິ ປຎ຺ຎາຍ ອປຣິຈ຺ຉິນ຺ທິຕ຺ວາ ພຫຸໍ ຠຓນ຺ເຕ. ມນ຺ຕຠາຓິສ຺ມິນ຺ຕິ ມນ຺ຕາ ວຸຈ຺ຈຕິ ປຎ຺ຎາ, ຕາຍ ປຣິຈ຺ຉິນ຺ທິຕ຺ວາ ຠຓນ຺ເຕ.

໕. ປຐມອກ຺ຂນ຺ຕິສຸຕ຺ຕວຓ຺ຓນາ

໒໑໕. ປຎ຺ຈເມ ເວຣພຫຸໂລຕິ ປຸຄ຺ຄລເວເຣນປິ ອກຸສລເວເຣນປິ ພຫຸເວໂຣ. ວຊ຺ຊພຫຸໂລຕິ ໂທສພຫຸໂລ.

໖. ທຸຕິຍອກ຺ຂນ຺ຕິສຸຕ຺ຕວຓ຺ຓນາ

໒໑໖. ຉຏ຺ເຐ ລຸທ຺ໂທຕິ ທາຣຸໂຓ ກກ຺ຂໂຬ. ວິປ຺ປຏິສາຣີຕິ ມງ຺ກຸຠາເວນ ສມນ຺ນາຄໂຕ.

໗.ປຐມອປາສາທິກສຸຕ຺ຕວຓ຺ຓນາ

໒໑໗. ສຕ຺ຕເມ ອປາສາທິເກຕິ ອປາສາທິເກຫິ ກາຍກມ຺ມາທີຫິ ສມນ຺ນາຄເຕ. ປາສາທິເກຕິ ປສາທາວເຫ ປຣິສຸທ຺ຘສມາຈາເຣ. ອຏ຺ຐມນວມານິ ອຸຕ຺ຕານຕ຺ຖາເນວ.

໑໐. ມຘຸຣາສຸຕ຺ຕວຓ຺ຓນາ

໒໒໐. ທສເມ ປຎ຺ຈິເມ, ຠິກ຺ຂເວ, ອາທີນວາ ມຘຸຣາຍນ຺ຕິ ເອກໍ ສມຍໍ ຠຄວາ ຠິກ຺ຂຸສງ຺ຆປຣິວຸໂຕ ຈາຣິກໍ ຈຣມາໂນ ມຘຸຣານຄຣໍ ສມ຺ປາປຸຓິຕ຺ວາ ອນ຺ໂຕນຄຣໍ ປວິສິຕຸໍ ອາຣຠິ. ອເຖກາ ມິຈ຺ຉາທິຏ຺ຐິກາ ຍກ຺ຂິນີ ອເຈລາ ຫຸຕ຺ວາ ທ຺ເວ ຫຕ຺ເຖ ປສາເຣຕ຺ວາ ຊິວ຺ຫໍ ນິລ຺ລາເລຕ຺ວາ ທສພລສ຺ສ ປຸຣໂຕ ອຏ຺ຐາສິ. ສຕ຺ຖາ ອນ຺ໂຕນຄຣໍ ອປ຺ປວິສິຕ຺ວາ ຕໂຕວ ນິກ຺ຂມິຕ຺ວາ ວິຫາຣໍ ອຄມາສິ. ມຫາຊໂນ ຂາທນີຍໂຠຊນີຍຎ຺ເຈວ ສກ຺ກາຣສມ຺ມານຎ຺ຈ ອາທາຍ ວິຫາຣໍ ຄນ຺ຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ທານໍ ອທາສິ. ສຕ຺ຖາ ຕສ຺ສ ນຄຣສ຺ສ ນິຄ຺ຄຓ຺ຫນຕ຺ຖາຍ ອິມໍ ສຸຕ຺ຕໍ ອາຣຠິ. ຕຕ຺ຖ ວິສມາຕິ ນ ສມຕລາ. ພຫຸຣຊາຕິ ວາຕປຫຣຓກາເລ ອຸທ຺ຘເຕນ ຣຊກ຺ຂນ຺ເຘນ ປຣິໂຍນທ຺ຘາ ວິຍ ໂຫຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອກ຺ໂກສກວຄ຺ໂຄ ທຸຕິໂຍ.