(໒໓) ໓. ທີຆຈາຣິກວຄ຺ໂຄ
໑. ປຐມທີຆຈາຣິກສຸຕ຺ຕວຓ຺ຓນາ
໒໒໑. ຕຕິຍສ຺ສ ປຐເມ ອນວຕ຺ຖຈາຣິກນ຺ຕິ ອວວຕ຺ຖິຕຈາຣິກໍ. ສຸຕໍ ນ ປຣິໂຍທເປຕີຕິ ຍມ຺ປິສ຺ສ ສຸຕໍ ອຕ຺ຖິ, ຕໍ ປຣິໂຍທເປຕຸໍ ນ ສກ຺ໂກຕິ. ສຸເຕເນກຈ຺ເຈນ ອວິສາຣໂທ ໂຫຕີຕິ ໂຖກໂຖເກນ ສຸເຕນ ວິຊ຺ຊມາເນນາປິ ຎາເຓນ ໂສມນສ຺ສປ຺ປຕ຺ໂຕ ນ ໂຫຕິ. ສມວຕ຺ຖຈາເຣຕິ ສມວຕ຺ຖິຕຈາເຣ. ທຸຕິຍໍ ອຸຕ຺ຕານຕ຺ຖເມວ.
໓-໔. ອຕິນິວາສສຸຕ຺ຕາທິວຓ຺ຓນາ
໒໒໓-໒໒໔. ຕຕິເຍ ພຫຸຠຓ຺ໂຑຕິ ພຫຸປຣິກ຺ຂາໂຣ. ພຫຸເຠສຊ຺ໂຊຕິ ສປ຺ປິນວນີຕາທີນໍ ພຫຸຕາຍ ພຫຸເຠສຊ຺ໂຊ. ພ຺ຍຕ຺ໂຕຕິ ພ຺ຍາສຕ຺ໂຕ. ສໍສຏ຺ໂຐຕິ ປຎ຺ຈວິເຘນ ສໍສຄ຺ເຄນ ສໍສຏ຺ໂຐ ຫຸຕ຺ວາ. ອນນຸໂລມິເກນາຕິ ສາສນສ຺ສ ອນນຸຈ຺ຉວິເກນ. ຈຕຸຕ຺ເຖ ວຓ຺ຓມຈ຺ຉຣີຕິ ຄຸຓມຈ຺ຉຣີ. ຘມ຺ມມຈ຺ຉຣີຕິ ປຣິຍຕ຺ຕິມຈ຺ຉຣີ.
໕-໖. ກຸລູປກສຸຕ຺ຕາທິວຓ຺ຓນາ
໒໒໕-໒໒໖. ປຎ຺ຈເມ ອນາມນ຺ຕຈາເຣ ອາປຊ຺ຊຕີຕິ ‘‘ນິມນ຺ຕິໂຕ ສຠຕ຺ໂຕ ສມາໂນ ສນ຺ຕໍ ຠິກ຺ຂຸໍ ອນາປຸຈ຺ຉາ ປຸເຣຠຕ຺ຕໍ ວາ ປຈ຺ຉາຠຕ຺ຕໍ ວາ ກຸເລສຸ ຈາຣິຕ຺ຕໍ ອາປຊ຺ເຊຍ຺ຍາ’’ຕິ ສິກ຺ຂາປເທ (ປາຣາ. ໒໙໔) ວຸຕ຺ຕໍ ອາປຕ຺ຕິໍ ອາປຊ຺ຊຕິ. ຣໂຫ ນິສຊ຺ຊາຍາຕິອາທີນິປິ ເຕສໍ ເຕສໍ ສິກ຺ຂາປທານໍ ວເສນ ເວທິຕພ຺ພານິ. ຉຏ຺ເຐ ອຕິເວລນ຺ຕິ ອຕິກ຺ກນ຺ຕປມາຓກາລໍ. ສຕ຺ຕມໍ ອຸຕ຺ຕານເມວ.
໘. ອຸສ຺ສູຣຠຕ຺ຕສຸຕ຺ຕວຓ຺ຓນາ
໒໒໘. ອຏ຺ຐເມ ອຸສ຺ສູຣຠຕ຺ເຕຕິ ອຕິທິວາປຈນຠຕ຺ເຕ. ນ ກາເລນ ປຏິປູເຊນ຺ຕີຕິ ຍາຄຸກາເລ ຍາຄຸໍ, ຂຊ຺ຊກກາເລ ຂຊ຺ຊກໍ, ໂຠຊນກາເລ ໂຠຊນໍ ອປຈນ຺ຕາ ຍຸຕ຺ຕປ຺ປຍຸຕ຺ຕກາລສ຺ສ ອຕິນາມິຕຕ຺ຕາ ນ ກາເລນ ປຏິປູເຊນ຺ຕິ, ອຕ຺ຕໂນ ຈິຕ຺ເຕເນວ ເທນ຺ຕິ ນາມ. ຕໂຕ ເຕປິ ເຕສຸ ອຕ຺ຕໂນ ເຄຫໍ ອາຄເຕສຸ ຕເຖວ ກໂຣນ຺ຕິ. ກຸລປເວຓິຍາ ອາຄຕາ ພລິປຏິຄ຺ຄາຫິກາ ເທວຕາປິ ຍຸຕ຺ຕປ຺ປຍຸຕ຺ຕກາເລນ ລາຠໍ ລຠມານາເຍວ ຣກ຺ຂນ຺ຕິ ໂຄປຍນ຺ຕິ ປີຬໍ ອກຕ຺ວາ. ອກາເລ ລຠມານາ ປນ ‘‘ອິເມ ອມ຺ເຫສຸ ອນາທຣາ’’ຕິ ອາຣກ຺ຂໍ ນ ກໂຣນ຺ຕິ.
ສມຓພ຺ຣາຫ຺ມຓາປິ ‘‘ເອເຕສໍ ເຄເຫ ໂຠຊນເວລາຍ ໂຠຊນໍ ນ ໂຫຕິ, ຐິຕມຊ຺ຌນ຺ຫິເກ ເທນ຺ຕີ’’ຕິ ມງ຺ຄລາມງ຺ຄເລສຸ ກາຕພ຺ພໍ ນ ກໂຣນ຺ຕິ. ວິມຸຂາ ກມ຺ມໍ ກໂຣນ຺ຕີຕິ ‘‘ປາໂຕ ກິຎ຺ຈິ ນ ລຠາມ, ຂຸທາຍ ປຏິປີຬິຕາ ກມ຺ມໍ ກາຕຸໍ ນ ສກ຺ໂກມາ’’ຕິ ກມ຺ມໍ ວິສ຺ສຊ຺ເຊຕ຺ວາ ນິສີທນ຺ຕິ. ອໂນຊວນ຺ຕໍ ໂຫຕີຕິ ອກາເລ ຠຸຕ຺ຕໍ ໂອຊໍ ຫຣິຕຸໍ ນ ສກ຺ໂກຕິ. ສຸກ຺ກປກ຺ໂຂ ວຸຕ຺ຕວິປລ຺ລາເສນ ເວທິຕພ຺ໂພ.
໙. ປຐມກຓ຺ຫສປ຺ປສຸຕ຺ຕວຓ຺ຓນາ
໒໒໙. ນວເມ ສຠີຣູຕິ ສນິທ຺ໂທ ມຫານິທ຺ທໍ ນິທ຺ທາຍຕິ. ສປ຺ປຏິຠໂຍຕິ ຕໍ ນິສ຺ສາຍ ຠຍໍ ອຸປ຺ປຊ຺ຊຕິ, ຕສ຺ມາ ສປ຺ປຏິຠໂຍ. ມິຕ຺ຕທຸພ຺ຠີຕິ ປານໂຠຊນທາຍກມ຺ປິ ມິຕ຺ຕໍ ທຸພ຺ຠຕິ ຫິໍສຕິ. ມາຕຸຄາເມປິ ເອເສວ ນໂຍ.
໑໐. ທຸຕິຍກຓ຺ຫສປ຺ປສຸຕ຺ຕວຓ຺ຓນາ
໒໓໐. ທສເມ ໂຆຣວິໂສຕິ ກກ຺ຂຬວິໂສ. ທຸຊ຺ຊິວ຺ໂຫຕິ ທ຺ວິຘາ ຠິນ຺ນຊິວ຺ໂຫ. ໂຆຣວິສຕາຕິ ໂຆຣວິສຕາຍ. ເສສທ຺ວເຍປິ ເອເສວ ນໂຍ.
ທີຆຈາຣິກວຄ຺ໂຄ ຕຕິໂຍ.