(໒໑) ໑. ກິມິລວຄ຺ໂຄ

໑. ກິມິລສຸຕ຺ຕວຓ຺ຓນາ

໒໐໑. ປຎ຺ຈມສ຺ສ ປຐເມ ກິມິລາຍນ຺ຕິ ເອວໍນາມເກ ນຄເຣ. ນິຈຸລວເນຕິ ມຸຈລິນ຺ທວເນ. ເອຕທໂວຈາຕິ ອຍໍ ກິຣ ເຖໂຣ ຕສ຺ມິໍເຍວ ນຄເຣ ເສຏ຺ຐິປຸຕ຺ໂຕ ສຕ຺ຖຸ ສນ຺ຕິເກ ປພ຺ພຊິຕ຺ວາ ປຸພ຺ເພນິວາສຎາຓໍ ປຏິລຠິ. ໂສ ອຕ຺ຕນາ ນິວຸຕ຺ຖໍ ຂນ຺ຘສນ຺ຕານໍ ອນຸສ຺ສຣນ຺ໂຕ ກສ຺ສປທສພລສ຺ສ ສາສໂນສກ຺ກນກາເລ ປພ຺ພຊິຕ຺ວາ ຈຕູສຸ ປຣິສາສຸ ສາສເນ ອຄາຣວໍ ກໂຣນ຺ຕີສຸ ນິສ຺ເສຓິໍ ພນ຺ຘິຕ຺ວາ ປພ຺ພຕໍ ອາຣຸຍ຺ຫ ຕຕ຺ຖ ສມຓຘມ຺ມໍ ກຕ຺ວາ ອຕ຺ຕໂນ ນິວຸຕ຺ຖຠາວໍ ອທ຺ທສ. ໂສ ‘‘ສຕ຺ຖາຣໍ ອຸປສງ຺ກມິຕ຺ວາ ຕໍ ກາຣຓໍ ປຸຈ຺ຉິສ຺ສາມີ’’ຕິ ເອຕໍ ‘‘ໂກ ນຸ ໂຂ, ຠນ຺ເຕ’’ຕິອາທິວຈນໍ ອໂວຈ.

ສຕ຺ຖຣິ ອຄາຣວາ ວິຫຣນ຺ຕິ ອປ຺ປຕິສ຺ສາຕິ ສຕ຺ຖຣິ ຄາຣວຎ຺ເຈວ ເຊຏ຺ຐກຠາວຎ຺ຈ ອນຸປຏ຺ຐເປຕ຺ວາ ວິຫຣນ຺ຕິ. ເສເສສຸປິ ເອເສວ ນໂຍ. ຕຕ຺ຖ ເຈຕິຍງ຺ຄຓາທີສຸ ຉຕ຺ຕໍ ຘາເຣຕ຺ວາ ອຸປາຫນາ ອາຣຸຍ຺ຫ ວິຈຣນ຺ໂຕ ນານປ຺ປກາຣຎ຺ຈ ນິຣຕ຺ຖກກຖໍ ກເຖນ຺ໂຕ ສຕ຺ຖຣິ ອຄາຣໂວ ວິຫຣຕິ ນາມ. ຘມ຺ມສ຺ສວນຄ຺ເຄ ປນ ນິສີທິຕ຺ວາ ນິທ຺ທາຍນ຺ໂຕ ເຈວ ນານປ຺ປກາຣຎ຺ຈ ນິຣຕ຺ຖກກຖໍ ກເຖນ຺ໂຕ ຘມ຺ເມ ອຄາຣໂວ ວິຫຣຕິ ນາມ. ສງ຺ຆມຊ຺ເຌ ພາຫາວິກ຺ເຂປກໍ ນານຕ຺ຕກຖໍ ກເຖນ຺ໂຕ ເຖຣນວມຊ຺ຌິເມສຸ ຈ ຈິຕ຺ຕີກາຣໍ ອກໂຣນ຺ໂຕ ສງ຺ເຆ ອຄາຣໂວ ວິຫຣຕິ ນາມ. ສິກ຺ຂໍ ອປຣິປູເຣນ຺ໂຕ ສິກ຺ຂາຍ ອຄາຣໂວ ວິຫຣຕິ ນາມ. ອຎ຺ຎມຎ຺ຎໍ ກລຫຠຓ຺ຑນາທີນິ ກໂຣນ຺ໂຕ ອຎ຺ຎມຎ຺ຎໍ ອຄາຣໂວ ວິຫຣຕິ ນາມ. ທຸຕິຍໍ ອຸຕ຺ຕານຕ຺ຖເມວ.

໓. ອສ຺ສາຊານີຍສຸຕ຺ຕວຓ຺ຓນາ

໒໐໓-໒໐໔. ຕຕິເຍ ອຊ຺ຊເວນາຕິ ອຸຊຸຠາເວນ ອວງ຺ກຄມເນນ. ຊເວນາຕິ ປທຊເວນ. ມທ຺ທເວນາຕິ ສຣີຣມຸທຸຕາຍ. ຂນ຺ຕິຍາຕິ ອຘິວາສນກ຺ຂນ຺ຕິຍາ. ໂສຣຈ຺ເຈນາຕິ ສຸຈິສີລຕາຍ. ຠິກ຺ຂຸວາເຣ ອຊ຺ຊວນ຺ຕິ ຎາຓສ຺ສ ອຸຊຸກຄມນໍ. ຊໂວຕິ ສູຣໍ ຫຸຕ຺ວາ ຎາຓສ຺ສ ຄມນຠາໂວ. ມທ຺ທວນ຺ຕິ ສີລມທ຺ທວໍ. ຂນ຺ຕີຕິ ອຘິວາສນກ຺ຂນ຺ຕິເຍວ. ໂສຣຈ຺ຈໍ ສຸຈິສີລຕາເຍວ. ຈຕຸຕ຺ເຖ ປຎ຺ຈ ພລານິ ມິສ຺ສການິ ກຖິຕານິ.

໕. ເຈໂຕຂິລສຸຕ຺ຕວຓ຺ຓນາ

໒໐໕. ປຎ຺ຈເມ ເຈໂຕຂິລາຕິ ຈິຕ຺ຕສ຺ສ ຖທ຺ຘຠາວາ, ກຈວຣຠາວາ, ຂາຓຸກຠາວາ. ສຕ຺ຖຣິ ກງ຺ຂຕີຕິ ສຕ຺ຖຸ ສຣີເຣ ວາ ຄຸເຓ ວາ ກງ຺ຂຕິ. ສຣີເຣ ກງ຺ຂມາໂນ ‘‘ທ຺ວຕ຺ຕິໍສວຣປຸຣິສລກ຺ຂຓປຏິມຓ຺ຑິຕໍ ນາມ ສຣີຣໍ ອຕ຺ຖິ ນຸ ໂຂ ນຕ຺ຖີ’’ຕິ ກງ຺ຂຕິ, ຄຸເຓ ກງ຺ຂມາໂນ ‘‘ອຕີຕານາຄຕປຈ຺ຈຸປ຺ປນ຺ນຊານນສມຕ຺ຖໍ ສພ຺ພຎ຺ຎຸຕຎ຺ຎາຓໍ ອຕ຺ຖິ ນຸ ໂຂ ນຕ຺ຖີ’’ຕິ ກງ຺ຂຕິ. ວິຈິກິຈ຺ຉຕີຕິ ວິຈິນນ຺ໂຕ ກິຈ຺ຉຕິ, ທຸກ຺ຂໍ ອາປຊ຺ຊຕິ, ວິນິຈ຺ເຉຕຸໍ ນ ສກ຺ໂກຕິ. ນາຘິມຸຈ຺ຈຕີຕິ ເອວເມຕນ຺ຕິ ອຘິໂມກ຺ຂໍ ນ ປຏິລຠຕິ. ນ ສມ຺ປສີທຕີຕິ ຄຸເຓສຸ ໂອຕຣິຕ຺ວາ ນິພ຺ພິຈິກິຈ຺ຉຠາເວນ ປສີທິຕຸໍ ອນາວິໂລ ຠວິຕຸໍ ນ ສກ຺ໂກຕິ. ອາຕປ຺ປາຍາຕິ ກິເລສສນ຺ຕາປກວີຣິຍກຣຓຕ຺ຖາຍ. ອນຸໂຍຄາຍາຕິ ປຸນປ຺ປຸນໍ ໂຍຄາຍ. ສາຕຈ຺ຈາຍາຕິ ສຕຕກິຣິຍາຍ. ປຘານາຍາຕິ ປທຫນຕ຺ຖາຍ. ອຍໍ ປຐໂມ ເຈໂຕຂິໂລຕິ ອຍໍ ສຕ຺ຖຣິ ວິຈິກິຈ຺ຉາສງ຺ຂາໂຕ ປຐໂມ ຈິຕ຺ຕສ຺ສ ຖທ຺ຘຠາໂວ ເອວເມຕສ຺ສ ຠິກ຺ຂຸໂນ ອປ຺ປຫີໂນ ໂຫຕິ.

ຘມ຺ເມຕິ ປຣິຍຕ຺ຕິຘມ຺ເມ ຈ ປຏິເວຘຘມ຺ເມ ຈ. ປຣິຍຕ຺ຕິຘມ຺ເມ ກງ຺ຂມາໂນ ‘‘ເຕປິຏກໍ ພຸທ຺ຘວຈນໍ ຈຕຸຣາສີຕິຘມ຺ມກ຺ຂນ຺ຘສຫສ຺ສານີຕິ ວທນ຺ຕິ, ອຕ຺ຖິ ນຸ ໂຂ ເອຕໍ ນຕ຺ຖີ’’ຕິ ກງ຺ຂຕິ. ປຏິເວຘຘມ຺ເມ ກງ຺ຂມາໂນ ‘‘ວິປສ຺ສນານິສ຺ສນ຺ໂທ ມຄ຺ໂຄ ນາມ, ມຄ຺ຄນິສ຺ສນ຺ທໍ ຜລໍ ນາມ, ສພ຺ພສງ຺ຂາຣປຏິນິສ຺ສຄ຺ໂຄ ນິພ຺ພານໍ ນາມາຕິ ວທນ຺ຕິ, ຕໍ ອຕ຺ຖິ ນຸ ໂຂ ນຕ຺ຖີ’’ຕິ ກງ຺ຂຕິ. ສງ຺ເຆ ກງ຺ຂຕີຕິ ‘‘ອຸຊຸປ຺ປຏິປນ຺ໂນ’’ຕິອາທີນໍ ປທານໍ ວເສນ ‘‘ເອວຣູປໍ ປຏິປທໍ ປຏິປນ຺ໂນ ຈຕ຺ຕາໂຣ ມຄ຺ຄຏ຺ຐາ ຈຕ຺ຕາໂຣ ຜລຏ຺ຐາຕິ ອຏ຺ຐນ຺ນໍ ປຸຄ຺ຄລານໍ ສມູຫຠູໂຕ ສງ຺ໂຆ ນາມ ອຕ຺ຖິ ນຸ ໂຂ ນຕ຺ຖີ’’ຕິ ກງ຺ຂຕິ. ສິກ຺ຂາຍ ກງ຺ຂມາໂນ ‘‘ອຘິສີລສິກ຺ຂາ ນາມ ອຘິຈິຕ຺ຕອຘິປຎ຺ຎາສິກ຺ຂາ ນາມາຕິ ວທນ຺ຕິ, ສາ ອຕ຺ຖິ ນຸ ໂຂ ນຕ຺ຖີ’’ຕິ ກງ຺ຂຕິ. ອຍໍ ປຎ຺ຈໂມຕິ ອຍໍ ສພ຺ຣຫ຺ມຈາຣີສຸ ໂກປສງ຺ຂາໂຕ ປຎ຺ຈໂມ ຈິຕ຺ຕສ຺ສ ຖທ຺ຘຠາໂວ ກຈວຣຠາໂວ ຂາຓຸກຠາໂວ.

໖. ວິນິພນ຺ຘສຸຕ຺ຕວຓ຺ຓນາ

໒໐໖. ຉຏ຺ເຐ ເຈຕໂສວິນິພນ຺ຘາຕິ ຈິຕ຺ຕໍ ວິນິພນ຺ຘິຕ຺ວາ ມຸຏ຺ຐິຍໍ ກຕ຺ວາ ວິຍ ຄຓ຺ຫນ຺ຕີຕິ ເຈຕໂສວິນິພນ຺ຘາ. ກາເມຕິ ວຕ຺ຖຸກາເມປິ ກິເລສກາເມປິ. ກາເຍຕິ ອຕ຺ຕໂນ ກາເຍ. ຣູເປຕິ ພຫິທ຺ຘາຣູເປ. ຍາວທຕ຺ຖນ຺ຕິ ຍຕ຺ຕກໍ ອິຈ຺ຉຕິ, ຕຕ຺ຕກໍ. ອຸທຣາວເທຫກນ຺ຕິ ອຸທຣປູຣໍ. ຕຎ຺ຫິ ອຸທຣໍ ອວເທຫນໂຕ ອຸທຣາວເທຫກນ຺ຕິ ວຸຈ຺ຈຕິ. ເສຍ຺ຍສຸຂນ຺ຕິ ມຎ຺ຈປີຐສຸຂໍ, ອຸຕຸສຸຂໍ ວາ. ປສ຺ສສຸຂນ຺ຕິ ຍຖາ ສມ຺ປຣິວຕ຺ຕກໍ ສຍນ຺ຕສ຺ສ ທກ຺ຂິຓປສ຺ສ ວາມປສ຺ສານໍ ສຸຂໍ ໂຫຕິ, ເອວໍ ອຸປ຺ປນ຺ນສຸຂໍ. ມິທ຺ຘສຸຂນ຺ຕິ ນິທ຺ທາສຸຂໍ. ອນຸຍຸຕ຺ໂຕຕິ ຍຸຕ຺ຕປ຺ປຍຸຕ຺ໂຕ ວິຫຣຕິ. ປຓິຘາຍາຕິ ປຕ຺ຖຍິຕ຺ວາ. ສີເລນາຕິອາທີສຸ ສີລນ຺ຕິ ຈຕຸປາຣິສຸທ຺ຘິສີລໍ. ວຕນ຺ຕິ ວຕສມາທານໍ. ຕໂປຕິ ຕປຈຣຓໍ. ພ຺ຣຫ຺ມຈຣິຍນ຺ຕິ ເມຖຸນວິຣຕິ. ເທໂວ ວາ ຠວິສ຺ສາມີຕິ ມເຫສກ຺ຂເທໂວ ວາ ຠວິສ຺ສາມິ. ເທວຎ຺ຎຕໂຣ ວາຕິ ອປ຺ເປສກ຺ຂເທເວສຸ ວາ ອຎ຺ຎຕໂຣຕິ.

໗-໘. ຍາຄຸສຸຕ຺ຕາທິວຓ຺ຓນາ

໒໐໗-໒໐໘. ສຕ຺ຕເມ ວາຕໍ ອນຸໂລເມຕີຕິ ວາຕໍ ອນຸໂລເມຕ຺ວາ ຫຣຕິ. ວຕ຺ຖິໍ ໂສເຘຕີຕິ ຘມນິໂຍ ສຸທ຺ຘາ ກໂຣຕິ. ອາມາວເສສໍ ປາເຈຕີຕິ ສເຈ ອາມາວເສສກໍ ໂຫຕິ, ຕໍ ປາເຈຕິ. ອຏ຺ຐເມ ອຈກ຺ຂຸສ຺ສນ຺ຕິ ນ ຈກ຺ຂູນໍ ຫິຕໍ, ຈກ຺ຂຸໍ ວິສຸທ຺ຘໍ ນ ກໂຣຕິ.

໙. ຄີຕສ຺ສຣສຸຕ຺ຕວຓ຺ຓນາ

໒໐໙. ນວເມ ອາຍຕເກນາຕິ ທີເຆນ, ປຣິປຸຓ຺ຓປທພ຺ຍຎ຺ຊນກໍ ຄາຖາວຕ຺ຕຎ຺ຈ ວິນາເສຕ຺ວາ ປວຕ຺ເຕນ. ສຣກຸຕ຺ຕິມ຺ປິ ນິກາມຍມານສ຺ສາຕິ ເອວໍ ຄີຕສ຺ສໂຣ ກາຕພ຺ໂພຕິ ສຣກິຣິຍໍ ປຕ຺ຖຍມານສ຺ສ. ສມາຘິສ຺ສ ຠງ຺ໂຄ ໂຫຕີຕິ ສມຖວິປສ຺ສນາຈິຕ຺ຕສ຺ສ ວິນາໂສ ໂຫຕິ.

໑໐. ມຸຏ຺ຐສ຺ສຕິສຸຕ຺ຕວຓ຺ຓນາ

໒໑໐. ທສເມ ທຸກ຺ຂໍ ສຸປຕີຕິ ນານາວິຘໍ ສຸປິນໍ ປສ຺ສນ຺ໂຕ ທຸກ຺ຂໍ ສຸປຕິ. ທຸກ຺ຂໍ ປຏິພຸຊ຺ຌຕີຕິ ປຏິພຸຊ຺ຌນ຺ໂຕປິ ອຸຕ຺ຕສິຕ຺ວາ ສໂລມຫໍໂສ ປຏິພຸຊ຺ຌຕິ. ອິມສ຺ມິໍ ສຸຕ຺ເຕ ສຕິສມ຺ປຊຎ຺ຎໍ ມິສ຺ສກໍ ກຖິຕໍ.

ກິມິລວຄ຺ໂຄ ປຐໂມ.