(໑໕) ໕. ຕິກຓ຺ຑກີວຄ຺ໂຄ

໑. ອວຊານາຕິສຸຕ຺ຕວຓ຺ຓນາ

໑໔໑. ປຎ຺ຈມສ຺ສ ປຐເມ ສໍວາເສນາຕິ ເອກໂຕວາເສນ. ອາເທຍ຺ຍມຸໂຂຕິ ອາທິຍນມຸໂຂ, ຄຫຓມຸໂຂຕິ ອຕ຺ໂຖ. ຕເມນໍ ທຕ຺ວາ ອວຊານາຕີຕິ ‘‘ອຍໍ ທິນ຺ນໍ ປຏິຄ຺ຄເຫຕຸເມວ ຊານາຕີ’’ຕິ ເອວໍ ອວມຎ຺ຎຕິ. ຕເມນໍ ສໍວາເສນ ອວຊານາຕີຕິ ອປ຺ປມຕ຺ຕເກ ກິສ຺ມິຎ຺ຈິເທວ ກຸຊ຺ຌິຕ຺ວາ ‘‘ຊານາມຫໍ ຕຍາ ກຕກມ຺ມໍ, ເອຕ຺ຕກໍ ອທ຺ຘານໍ ອຫໍ ກິໍ ກໂຣນ຺ໂຕ ວສິໍ, ນນຸ ຕຸຍ຺ຫເມວ ກຕາກຕໍ ວີມໍສນ຺ໂຕ’’ຕິອາທີນິ ວຕ຺ຕາ ໂຫຕິ. ອຖ ອິຕໂຣ ‘‘ອທ຺ຘາ ໂກຈິ ມຍ຺ຫໍ ໂທໂສ ຠວິສ຺ສຕີ’’ຕິ ກິຎ຺ຈິ ປຏິປ຺ຜຣິຕຸໍ ນ ສກ຺ໂກຕິ. ຕໍ ຂິປ຺ປຎ຺ເຎວ ອຘິມຸຈ຺ຈິຕາ ໂຫຕີຕິ ຕໍ ວຓ຺ຓໍ ວາ ອວຓ຺ຓໍ ວາ ສີຆເມວ ສທ຺ທຫຕິ. ສທ຺ທຫນຏ຺ເຐນ ຫິ ອາທາເນນ ເອສ ອາທິຍນມຸໂຂຕິ ວຸຕ຺ໂຕ. ອາເຘຍ຺ຍມຸໂຂຕິ ປາຬິຍາ ປນ ຐປິຕມຸໂຂຕິ ອຕ຺ໂຖ. ມຄ຺ເຄ ຂຏອາວາໂຏ ວິຍ ອາຄຕາຄຕໍ ອຸທກໍ ວຓ຺ຓໍ ວາ ອວຓ຺ຓໍ ວາ ສທ຺ທຫນວເສນ ສມ຺ປຏິຈ຺ຉິຕຸໍ ຐປິຕມຸໂຂຕິ ວຸຕ຺ຕໍ ໂຫຕິ.

ອິຕ຺ຕຣສທ຺ໂຘຕິ ປຣິຕ຺ຕກສທ຺ໂຘ. ກຸສລາກຸສເລ ຘມ຺ເມ ນ ຊານາຕີຕິອາທີສຸ ກຸສເລ ຘມ຺ເມ ‘‘ອິເມ ກຸສລາ’’ຕິ ນ ຊານາຕິ, ອກຸສເລ ຘມ຺ເມ ‘‘ອິເມ ອກຸສລາ’’ຕິ ນ ຊານາຕິ. ຕຖາ ສາວຊ຺ເຊ ສໂທສຘມ຺ເມ ‘‘ອິເມ ສາວຊ຺ຊາ’’ຕິ, ອນວຊ຺ເຊ ຈ ນິທ຺ໂທສຘມ຺ເມ ‘‘ອິເມ ອນວຊ຺ຊາ’’ຕິ, ຫີເນ ຫີນາຕິ, ປຓີເຕ ປຓີຕາຕິ. ກຓ຺ຫສຸກ຺ກສປ຺ປຏິຠາເຄຕິ ‘‘ອິເມ ກຓ຺ຫາ ສຸກ຺ເກ ປຏິພາເຫຕ຺ວາ ຐິຕຕ຺ຕາ ສປ຺ປຏິຠາຄາ ນາມ, ອິເມ ຈ ສຸກ຺ກາ ກຓ຺ເຫ ປຏິພາຫິຕ຺ວາ ຐິຕຕ຺ຕາ ສປ຺ປຏິຠາຄາ’’ຕິ ນ ຊານາຕິ.

໒. ອາຣຠຕິສຸຕ຺ຕວຓ຺ຓນາ

໑໔໒. ທຸຕິເຍ ອາຣຠຕິ ຈ ວິປ຺ປຏິສາຣີ ຈ ໂຫຕີຕິ ອາປຕ຺ຕິວີຕິກ຺ກມນວເສນ ອາຣຠຕິ ເຈວ, ຕປ຺ປຈ຺ຈຍາ ຈ ວິປ຺ປຏິສາຣີ ໂຫຕິ. ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິນ຺ຕິ ອຣຫຕ຺ຕສມາຘິຎ຺ເຈວ ອຣຫຕ຺ຕຜລຎາຓຎ຺ຈ. ນປ຺ປຊານາຕີຕິ ອນຘິຄຕຕ຺ຕາ ນ ຊານາຕິ. ອາຣຠຕິ ນ ວິປ຺ປຏິສາຣີ ໂຫຕີຕິ ອາປຕ຺ຕິໍ ອາປຊ຺ຊຕິ, ວຸຏ຺ຐິຕຕ຺ຕາ ປນ ນ ວິປ຺ປຏິສາຣີ ໂຫຕິ. ນາຣຠຕິ ວິປ຺ປຏິສາຣີ ໂຫຕີຕິ ສກິໍ ອາປຕ຺ຕິໍ ອາປຊ຺ຊິຕ຺ວາ ຕໂຕ ວຸຏ຺ຐາຍ ປຈ຺ຉາ ກິຎ຺ຈາປິ ນາປຊ຺ຊຕິ, ວິປ຺ປຏິສາຣໍ ປນ ວິໂນເທຕຸໍ ນ ສກ຺ໂກຕິ. ນາຣຠຕິ ນ ວິປ຺ປຏິສາຣີ ໂຫຕີຕິ ນ ເຈວ ອາປຕ຺ຕິໍ ອາປຊ຺ຊຕິ, ນ ຈ ວິປ຺ປຏິສາຣີ ໂຫຕິ. ຕຎ຺ຈ ເຈໂຕວິມຸຕ຺ຕິໍ…ເປ… ນິຣຸຊ຺ຌນ຺ຕີຕິ ອຣຫຕ຺ຕໍ ປນ ອປ຺ປຕ຺ໂຕ ໂຫຕິ. ປຎ຺ຈມນເຍນ ຂີຓາສໂວ ກຖິໂຕ.

ອາຣມ຺ຠຊາຕິ ອາປຕ຺ຕິວີຕິກ຺ກມສມ຺ຠວາ. ວິປ຺ປຏິສາຣຊາຕິ ວິປ຺ປຏິສາຣໂຕ ຊາຕາ. ປວຑ຺ຒນ຺ຕີຕິ ປຸນປ຺ປຸນໍ ອຸປ຺ປຊ຺ຊເນນ ວຑ຺ຒນ຺ຕິ. ອາຣມ຺ຠເຊ ອາສເວ ປຫາຍາຕິ ວີຕິກ຺ກມສມ຺ຠເວ ອາສເວ ອາປຕ຺ຕິເທສນາຍ ວາ ອາປຕ຺ຕິວຸຏ຺ຐາເນນ ວາ ປຊຫິຕ຺ວາ. ປຏິວິໂນເທຕ຺ວາຕິ ສຸທ຺ຘນ຺ເຕ ຐິຕຠາວປຈ຺ຈເວກ຺ຂເຓນ ນີຫຣິຕ຺ວາ. ຈິຕ຺ຕໍ ປຎ຺ຎຎ຺ຈ ຠາເວຕູຕິ ວິປສ຺ສນາຈິຕ຺ຕຎ຺ຈ ຕໍສມ຺ປຍຸຕ຺ຕໍ ປຎ຺ຎຎ຺ຈ ຠາເວຕຸ. ເສສໍ ອິມິນາ ອຸປາເຍເນວ ເວທິຕພ຺ພນ຺ຕິ.

໓. ສາຣນ຺ທທສຸຕ຺ຕວຓ຺ຓນາ

໑໔໓. ຕຕິເຍ ກາມາຘິມຸຕ຺ຕານນ຺ຕິ ວຕ຺ຖຸກາມກິເລສກາເມສຸ ອຘິມຸຕ຺ຕານໍ. ຘມ຺ມານຸຘມ຺ມປ຺ປຏິປນ຺ໂນຕິ ນວໂລກຸຕ຺ຕຣຘມ຺ມຕ຺ຖາຍ ສຫສີລກໍ ປຸພ຺ພຠາຄປ຺ປຏິປທໍ ປຏິປນ຺ໂນ ປຏິປຕ຺ຕິປູຣໂກ ປຸຄ຺ຄໂລ ທຸລ຺ລໂຠ ໂລກສ຺ມິໍ.

໔. ຕິກຓ຺ຑກີສຸຕ຺ຕວຓ຺ຓນາ

໑໔໔. ຈຕຸຕ຺ເຖ ອປ຺ປຏິກູເລຕິ ອປ຺ປຏິກູລາຣມ຺ມເຓ. ປຏິກູລສຎ຺ຎີຕິ ປຏິກູລນ຺ຕິ ເອວໍສຎ຺ຎີ. ເອສ ນໂຍ ສພ຺ພຕ຺ຖ. ກຖໍ ປນາຍໍ ເອວໍ ວິຫຣຕີຕິ? ອິຏ຺ຐສ຺ມິໍ ວຕ຺ຖຸສ຺ມິໍ ປນ ອສຸຠາຍ ວາ ຜຣຕິ, ອນິຈ຺ຈໂຕ ວາ ອຸປສໍຫຣຕິ. ເອວໍ ຕາວ ອປ຺ປຏິກູເລ ປຏິກູລສຎ຺ຎີ ວິຫຣຕິ. ອນິຏ຺ຐສ຺ມິໍ ວຕ຺ຖຸສ຺ມິໍ ເມຕ຺ຕາຍ ວາ ຜຣຕິ, ຘາຕຸໂຕ ວາ ອຸປສໍຫຣຕິ. ເອວໍ ປຏິກູເລ ອປ຺ປຏິກູລສຎ຺ຎີ ວິຫຣຕິ. ອຸຠຍສ຺ມິໍ ປນ ປຸຣິມນຍສ຺ສ ຈ ປຈ຺ຉິມນຍສ຺ສ ຈ ວເສນ ຕຕິຍຈຕຸຕ຺ຖວາຣາ ວຸຕ຺ຕາ, ຉຬງ຺ຄຸເປກ຺ຂາວເສນ ປຎ຺ຈໂມ. ຉຬງ຺ຄຸເປກ຺ຂາ ເຈສາ ຂີຓາສວສ຺ສ ອຸເປກ຺ຂາສທິສາ, ນ ປນ ຂີຓາສວຸເປກ຺ຂາ. ຕຕ຺ຖ ອຸເປກ຺ຂໂກ ວິຫເຣຍ຺ຍາຕິ ມຊ຺ຌຕ຺ຕຠາເວ ຐິໂຕ ວິຫເຣຍ຺ຍ. ກ຺ວຈນີຕິ ກິສ຺ມິຎ຺ຈິ ອາຣມ຺ມເຓ. ກຕ຺ຖຈີຕິ ກິສ຺ມິຎ຺ຈິ ປເທເສ. ກິຎ຺ຈນຕິ ໂກຈິ ອປ຺ປມຕ຺ຕໂກປິ. ອິຕິ ອິມສ຺ມິໍ ສຸຕ຺ເຕ ປຎ຺ຈສຸ ຐາເນສຸ ວິປສ຺ສນາວ ກຖິຕາ. ຕໍ ອາຣທ຺ຘວິປສ຺ສໂກ ຠິກ຺ຂຸ ກາຕຸໍ ສກ຺ໂກຕິ, ຎາຓວາ ປຎ຺ຎຸຕ຺ຕໂຣ ພຫຸສ຺ສຸຕສມໂຓປິ ກາຕຸໍ ສກ຺ໂກຕິ. ໂສຕາປນ຺ນສກທາຄາມິອນາຄາມິໂນ ກາຕຸໍ ສກ຺ໂກນ຺ຕິເຍວ, ຂີຓາສເວ ວຕ຺ຕພ຺ພເມວ ນຕ຺ຖີຕິ. ປຎ຺ຈມໍ ອຸຕ຺ຕານເມວ.

໖. ມິຕ຺ຕສຸຕ຺ຕວຓ຺ຓນາ

໑໔໖. ຉຏ຺ເຐ ກມ຺ມນ຺ຕໍ ກາເຣຕີຕິ ເຂຕ຺ຕາທິກມ຺ມນ຺ຕໍ ກາເຣຕິ. ອຘິກຣຓໍ ອາທິຍຕີຕິ ຈຕ຺ຕາຣິ ອຘິກຣຓານິ ອາທິຍຕິ. ປາໂມກ຺ເຂສຸ ຠິກ຺ຂູສູຕິ ທິສາປາໂມກ຺ເຂສຸ ຠິກ຺ຂູສຸ. ປຏິວິຣຸທ຺ໂຘ ໂຫຕີຕິ ປຈ຺ຈນີກຄ຺ຄາຫິຕາຍ ວິຣຸທ຺ໂຘ ໂຫຕິ. ອນວຕ຺ຖຈາຣິກນ຺ຕິ ອນວຕ຺ຖານຈາຣິກໍ.

໗. ອສປ຺ປຸຣິສທານສຸຕ຺ຕວຓ຺ຓນາ

໑໔໗. ສຕ຺ຕເມ ອສກ຺ກຈ຺ຈໍ ເທຕີຕິ ນ ສກ຺ກຣິຕ຺ວາ ສຸຈິໍ ກຕ຺ວາ ເທຕິ. ອຈິຕ຺ຕີກຕ຺ວາ ເທຕີຕິ ອຈິຕ຺ຕີກາເຣນ ອຄາຣວວເສນ ເທຕິ. ອປວິທ຺ຘໍ ເທຕີຕິ ນ ນິຣນ຺ຕຣໍ ເທຕິ, ອຖ ວາ ຉຑ຺ເຑຕຸກາໂມ ວິຍ ເທຕິ. ອນາຄມນທິຏ຺ຐິໂກ ເທຕີຕິ ກຕສ຺ສ ນາມ ຜລໍ ອາຄມິສ຺ສຕີຕິ ນ ເອວໍ ອາຄມນທິຏ຺ຐິໍ ນ ອຸປ຺ປາເທຕ຺ວາ ເທຕິ.

ສຸກ຺ກປກ຺ເຂ ຈິຕ຺ຕີກຕ຺ວາ ເທຕີຕິ ເທຍ຺ຍຘມ຺ເມ ຈ ທກ຺ຂິເຓຍ຺ເຍສຸ ຈ ຈິຕ຺ຕີກາຣໍ ອຸປຏ຺ຐເປຕ຺ວາ ເທຕິ. ຕຕ຺ຖ ເທຍ຺ຍຘມ຺ມໍ ປຓີຕໍ ໂອຊວນ຺ຕໍ ກຕ຺ວາ ເທນ຺ໂຕ ເທຍ຺ຍຘມ຺ເມ ຈິຕ຺ຕີກາຣໍ ອຸປຏ຺ຐເປຕິ ນາມ. ປຸຄ຺ຄລໍ ວິຈິນິຕ຺ວາ ເທນ຺ໂຕ ທກ຺ຂິເຓຍ຺ເຍສຸ ຈິຕ຺ຕີກາຣໍ ອຸປຏ຺ຐເປຕິ ນາມ. ສຫຕ຺ຖາ ເທຕີຕິ ອາຓຕ຺ຕິຍາ ປຣຫຕ຺ເຖນ ອທຕ຺ວາ ‘‘ອນມຕຄ຺ເຄ ສໍສາເຣ ວິຈຣນ຺ເຕນ ເມ ຫຕ຺ຖປາທານໍ ອລທ຺ຘກາລສ຺ສ ປມາຓໍ ນາມ ນຕ຺ຖິ, ວຏ຺ຏໂມກ຺ຂໍ ຠວນິສ຺ສຣຓໍ ກຣິສ຺ສາມີ’’ຕິ ສຫຕ຺ເຖເນວ ເທຕິ. ອາຄມນທິຏ຺ຐິໂກຕິ ‘‘ອນາຄຕຠວສ຺ສ ປຈ຺ຈໂຍ ຠວິສ຺ສຕີ’’ຕິ ກມ຺ມຎ຺ຈ ວິປາກຎ຺ຈ ສທ຺ທຫິຕ຺ວາ ເທຕີຕິ.

໘. ສປ຺ປຸຣິສທານສຸຕ຺ຕວຓ຺ຓນາ

໑໔໘. ອຏ຺ຐເມ ສທ຺ຘາຍາຕິ ທານຎ຺ຈ ທານຜລຎ຺ຈ ສທ຺ທຫິຕ຺ວາ. ກາເລນາຕິ ຍຸຕ຺ຕປ຺ປຕ຺ຕກາເລນ. ອນຄ຺ຄຫິຕຈິຕ຺ໂຕຕິ ອຄ຺ຄຫິຕຈິຕ຺ໂຕ ມຸຕ຺ຕຈາໂຄ ຫຸຕ຺ວາ. ອນຸປຫຈ຺ຈາຕິ ອນຸປຆາເຕຕ຺ວາ ຄຸເຓ ອມກ຺ເຂຕ຺ວາ. ກາລາຄຕາ ຈສ຺ສ ອຕ຺ຖາ ປຈຸຣາ ໂຫນ຺ຕີຕິ ອຕ຺ຖາ ອາຄຈ຺ຉມານາ ວໂຍວຸຑ຺ຒກາເລ ອນາຄນ຺ຕ຺ວາ ຍຸຕ຺ຕປ຺ປຕ຺ຕກາເລ ປຐມວຍສ຺ມິໍເຍວ ອາຄຈ຺ຉນ຺ຕິ ເຈວ ພຫູ ຈ ໂຫນ຺ຕິ.

໙. ປຐມສມຍວິມຸຕ຺ຕສຸຕ຺ຕວຓ຺ຓນາ

໑໔໙. ນວເມ ສມຍວິມຸຕ຺ຕສ຺ສາຕິ ອປ຺ປິຕປ຺ປິຕກ຺ຂເຓເຍວ ວິກ຺ຂມ຺ຠິເຕຫິ ກິເລເສຫິ ວິມຸຕ຺ຕຕ຺ຕາ ສມຍວິມຸຕ຺ຕິສງ຺ຂາຕາຍ ໂລກິຍວິມຸຕ຺ຕິຍາ ວິມຸຕ຺ຕຈິຕ຺ຕສ຺ສ. ທສມໍ ອຸຕ຺ຕານຕ຺ຖເມວ.

ຕິກຓ຺ຑກີວຄ຺ໂຄ ປຎ຺ຈໂມ.