(໑໔) ໔. ຣາຊວຄ຺ໂຄ

໑. ປຐມຈກ຺ການຸວຕ຺ຕນສຸຕ຺ຕວຓ຺ຓນາ

໑໓໑. ຈຕຸຕ຺ຖສ຺ສ ປຐເມ ຘມ຺ເມນາຕິ ທສກຸສລຘມ຺ເມນ. ຈກ຺ກນ຺ຕິ ອາຓາຈກ຺ກໍ. ອຕ຺ຖຎ຺ຎູຕິ ຣຊ຺ຊຕ຺ຖໍ ຊານາຕິ. ຘມ຺ມຎ຺ຎູຕິ ປເວຓິຘມ຺ມໍ ຊານາຕິ. ມຕ຺ຕຎ຺ຎູຕິ ທຓ຺ເຑ ວາ ພລມ຺ຫິ ວາ ປມາຓໍ ຊານາຕິ. ກາລຎ຺ຎູຕິ ຣຊ຺ຊສຸຂານຸຠວນກາລໍ, ວິນິຈ຺ຉຍກຣຓກາລໍ, ຊນປທຈາຣິກາກາລຎ຺ຈ ຊານາຕິ. ປຣິສຎ຺ຎູຕິ ອຍໍ ປຣິສາ ຂຕ຺ຕິຍປຣິສາ, ອຍໍ ພ຺ຣາຫ຺ມຓເວສ຺ສສຸທ຺ທສມຓປຣິສາຕິ ຊານາຕິ.

ຕຖາຄຕວາເຣ ອຕ຺ຖຎ຺ຎູຕິ ປຎ຺ຈ ອຕ຺ເຖ ຊານາຕິ. ຘມ຺ມຎ຺ຎູຕິ ຈຕ຺ຕາໂຣ ຘມ຺ເມ ຊານາຕິ. ມຕ຺ຕຎ຺ຎູຕິ ຈຕູສຸ ປຈ຺ຈເຍສຸ ປຏິຄ຺ຄຫຓປຣິໂຠຄມຕ຺ຕໍ ຊານາຕິ. ກາລຎ຺ຎູຕິ ອຍໍ ກາໂລ ປຏິສລ຺ລີນສ຺ສ, ອຍໍ ສມາປຕ຺ຕິຍາ, ອຍໍ ຘມ຺ມເທສນາຍ, ອຍໍ ຊນປທຈາຣິກາຍາຕິ ເອວໍ ກາລໍ ຊານາຕິ. ປຣິສຎ຺ຎູຕິ ອຍໍ ປຣິສາ ຂຕ຺ຕິຍປຣິສາ…ເປ… ອຍໍ ສມຓປຣິສາຕິ ຊານາຕິ. ອນຸຕ຺ຕຣນ຺ຕິ ນວຫິ ໂລກຸຕ຺ຕຣຘມ຺ເມຫິ ອນຸຕ຺ຕຣໍ. ຘມ຺ມຈກ຺ກນ຺ຕິ ເສຏ຺ຐຈກ຺ກໍ.

໒. ທຸຕິຍຈກ຺ການຸວຕ຺ຕນສຸຕ຺ຕວຓ຺ຓນາ

໑໓໒. ທຸຕິເຍ ປິຕຣາ ປວຕ຺ຕິຕໍ ຈກ຺ກນ຺ຕິ ຈກ຺ກວຕ຺ຕິມ຺ຫິ ປພ຺ພຊິເຕ ວາ ກາລກເຕ ວາ ຈກ຺ກຣຕນໍ ສຕ຺ຕາຫມຕ຺ຕໍ ຐຕ຺ວາ ອນ຺ຕຣຘາຍຕິ, ກຖເມສ ຕໍ ອນຸປ຺ປວຕ຺ເຕຕິ ນາມ? ປິຕຸ ປເວຓິຍໍ ຐຕ຺ວາ ຈກ຺ກວຕ຺ຕິວຕ຺ຕໍ ປູເຣຕ຺ວາ ຈກ຺ກວຕ຺ຕິຣຊ຺ຊໍ ກາເຣນ຺ໂຕປິ ປິຕຣາ ປວຕ຺ຕິຕເມວ ອນຸປ຺ປວຕ຺ເຕຕິ ນາມ.

໓. ຘມ຺ມຣາຊາສຸຕ຺ຕວຓ຺ຓນາ

໑໓໓. ຕຕິຍໍ ຕິກນິປາເຕ ວຸຕ຺ຕນຍເມວ. ເສວິຕພ຺ພາເສວິຕພ຺ເພ ປເນຕ຺ຖ ປຈ຺ຉິມປທທ຺ວຍເມວ ວິເສໂສ. ຕຕ຺ຖ ສມ຺ມາອາຊີໂວ ເສວິຕພ຺ໂພ, ມິຈ຺ຉາອາຊີໂວ ນ ເສວິຕພ຺ໂພ. ສປ຺ປາໂຍ ຄາມນິຄໂມ ເສວິຕພ຺ໂພ, ອສປ຺ປາໂຍ ນ ເສວິຕພ຺ໂພ.

໔. ຍສ຺ສໍທິສໍສຸຕ຺ຕວຓ຺ຓນາ

໑໓໔. ຈຕຸຕ຺ເຖ ອຸຠໂຕຕິ ທ຺ວີຫິປິ ປກ຺ເຂຫິ. ມາຕິໂຕ ຈ ປິຕິໂຕ ຈາຕິ ຍສ຺ສ ຫິ ມາຕາ ຂຕ຺ຕິຍາ, ມາຕຸມາຕາ ຂຕ຺ຕິຍາ, ຕສ຺ສາປິ ມາຕາ ຂຕ຺ຕິຍາ. ປິຕາ ຂຕ຺ຕິໂຍ, ປິຕຸປິຕາ ຂຕ຺ຕິໂຍ, ຕສ຺ສປິ ປິຕາ ຂຕ຺ຕິໂຍ. ໂສ ອຸຠໂຕ ສຸຊາໂຕ ມາຕິໂຕ ຈ ປິຕິໂຕ ຈ. ສໍສຸທ຺ຘຄຫຓິໂກຕິ ສໍສຸທ຺ຘາຍ ມາຕຸກຸຈ຺ຉິຍາ ສມນ຺ນາຄໂຕ. ‘‘ສມເວປາກິນິຍາ ຄຫຓິຍາ’’ຕິ ເອຕ຺ຖ ປນ ກມ຺ມຊເຕໂຊຘາຕຸ ຄຫຓີຕິ ວຸຈ຺ຈຕິ. ຍາວ ສຕ຺ຕມາ ປິຕາມຫຍຸຄາຕິ ເອຕ຺ຖ ປິຕຸປິຕາ ປິຕາມໂຫ, ປິຕາມຫສ຺ສ ຍຸຄໍ ປິຕາມຫຍຸຄໍ. ຍຸຄນ຺ຕິ ອາຍຸປ຺ປມາຓໍ ວຸຈ຺ຈຕິ. ອຠິລາປມຕ຺ຕເມວ ເຈຕໍ, ອຕ຺ຖໂຕ ປນ ປິຕາມໂຫເຍວ ປິຕາມຫຍຸຄໍ. ຕໂຕ ອຸທ຺ຘໍ ສພ຺ເພປິ ປຸພ຺ພປຸຣິສາ ປິຕາມຫຄ຺ຄຫເຓເນວ ຄຫິຕາ. ເອວໍ ຍາວ ສຕ຺ຕໂມ ປຸຣິໂສ, ຕາວ ສໍສຸທ຺ຘຄຫຓິໂກ, ອຖ ວາ ອກ຺ຂິຕ຺ໂຕ ອນຸປກ຺ກຸຏ຺ໂຐ ຊາຕິວາເທນາຕິ ທສ຺ເສຕິ. ອກ຺ຂິຕ຺ໂຕຕິ ‘‘ອປເນຖ ເອຕໍ, ກິໍ ອິມິນາ’’ຕິ ເອວໍ ອກ຺ຂິຕ຺ໂຕ ອນວກ຺ຂິຕ຺ໂຕ. ອນຸປກ຺ກຸຏ຺ໂຐຕິ ນ ອຸປກ຺ກຸຏ຺ໂຐ ນ ອກ຺ໂກສໍ ວາ ນິນ຺ທໍ ວາ ປຕ຺ຕປຸພ຺ໂພ. ເກນ ກາຣເຓນາຕິ? ຊາຕິວາເທນ, ‘‘ອິຕິປິ ຫີນຊາຕິໂກ ເອໂສ’’ຕິ ເອວຣູເປນ ວຈເນນາຕິ ອຕ຺ໂຖ.

ອຑ຺ໂຒຕິອາທີສຸ ໂຍ ໂກຈິ ອຕ຺ຕໂນ ສນ຺ຕເກນ ວິຠເວນ ອຑ຺ໂຒ ໂຫຕິ. ອິຘ ປນ ນ ເກວລໍ ອຑ຺ໂຒເຍວ, ມຫທ຺ຘໂນ ມຫຕາ ອປຣິມາຓສງ຺ເຂນ ຘເນນ ສມນ຺ນາຄໂຕຕິ ອຕ຺ໂຖ. ປຎ຺ຈກາມຄຸຓວເສນ ມຫນ຺ຕາ ອຸຬາຣາ ໂຠຄາ ອສ຺ສາຕິ ມຫາໂຠໂຄ. ປຣິປຸຓ຺ຓໂກສໂກຏ຺ຐາຄາໂຣຕິ ໂກໂສ ວຸຈ຺ຈຕິ ຠຓ຺ຑາຄາຣໍ, ນິທຫິຕ຺ວາ ຐປິເຕນ ຘເນນ ປຣິປຸຓ຺ຓໂກໂສ, ຘຎ຺ເຎນ ຈ ປຣິປຸຓ຺ຓໂກຏ຺ຐາຄາໂຣຕິ ອຕ຺ໂຖ. ອຖ ວາ ຈຕຸພ຺ພິໂຘ ໂກໂສ ຫຕ຺ຖີ ອສ຺ສາ ຣຖາ ຣຏ຺ຐນ຺ຕິ, ຕິວິຘໍ ໂກຏ຺ຐາຄາຣໍ ຘນໂກຏ຺ຐາຄາຣໍ ຘຎ຺ຎໂກຏ຺ຐາຄາຣໍ ວຕ຺ຖໂກຏ຺ຐາຄາຣນ຺ຕິ. ຕໍ ສພ຺ພມ຺ປິ ປຣິປຸຓ຺ຓມສ຺ສາຕິ ປຣິປຸຓ຺ຓໂກສໂກຏ຺ຐາຄາໂຣ. ອສ຺ສວາຍາຕິ ກສ຺ສຈິ ພຫຸມ຺ປິ ຘນໍ ເທນ຺ຕສ຺ສ ເສນາ ນ ສຸຓາຕິ, ສາ ອນສ຺ສວາ ນາມ ໂຫຕິ. ກສ຺ສຈິ ອເທນ຺ຕສ຺ສາປິ ສຸຓາຕິເຍວ, ອຍໍ ອສ຺ສວາ ນາມ. ໂອວາທປຏິກຣາຍາຕິ ‘‘ອິທໍ ໂວ ກຕ຺ຕພ຺ພ, ອິທໍ ນ ກຕ຺ຕພ຺ພ’’ນ຺ຕິ ທິນ຺ນໂອວາທກຣາຍ. ປຓ຺ຑິໂຕຕິ ປຓ຺ຑິຈ຺ເຈນ ສມນ຺ນາຄໂຕ. ພ຺ຍຕ຺ໂຕຕິ ປຎ຺ຎາເວຍ຺ຍຕ຺ຕິເຍນ ຍຸຕ຺ໂຕ. ເມຘາວີຕິ ຐານຸປ຺ປຕ຺ຕິກປຎ຺ຎາຍ ສມນ຺ນາຄໂຕ. ປຏິພໂລຕິ ສມຕ຺ໂຖ. ອຕ຺ເຖ ຈິນ຺ເຕຕຸນ຺ຕິ ວຑ຺ຒິອຕ຺ເຖ ຈິນ຺ເຕຕຸໍ. ໂສ ຫິ ປຈ຺ຈຸປ຺ປນ຺ນອຕ຺ຖວເສເນວ ‘‘ອຕີເຕປິ ເອວໍ ອເຫສຸໍ, ອນາຄເຕປິ ເອວໍ ຠວິສ຺ສນ຺ຕີ’’ຕິ ຈິນ຺ເຕຕິ. ວິຊິຕາວີນນ຺ຕິ ວິຊິຕວິຊຍານໍ, ມຫນ຺ເຕນ ວາ ວິຊເຍນ ສມນ຺ນາຄຕານໍ. ວິມຸຕ຺ຕຈິຕ຺ຕານນ຺ຕິ ປຎ຺ຈຫິ ວິມຸຕ຺ຕີຫິ ວິມຸຕ຺ຕມານສານໍ.

໕-໖. ປຕ຺ຖນາສຸຕ຺ຕທ຺ວຍວຓ຺ຓນາ

໑໓໕-໑໓໖. ປຎ຺ຈເມ ເນຄມຊານປທສ຺ສາຕິ ນິຄມວາສິໂນ ຈ ຣຏ຺ຐວາສິໂນ ຈ ຊນສ຺ສ. ຫຕ຺ຖິສ຺ມິນ຺ຕິອາທີຫິ ຫຕ຺ຖິອສ຺ສຣຖຖຣຸຘນຸເລຂມຸທ຺ທາຄຓນາທີນິ ໂສຬສ ມຫາສິປ຺ປານິ ທສ຺ສິຕານິ. ອນວໂຍຕິ ສມຕ຺ໂຖ ປຣິປຸຓ຺ໂຓ. ເສສເມຕ຺ຖ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ. ຉຏ຺ເຐ ໂອປຣຊ຺ຊນ຺ຕິ ອຸປຣາຊຠາວໍ.

໗. ອປ຺ປໍສຸປຕິສຸຕ຺ຕວຓ຺ຓນາ

໑໓໗. ສຕ຺ຕເມ ປຸຣິສາຘິປ຺ປາຍາຕິ ອສ຺ສທ຺ຘມ຺ມວເສນ ປຸຣິເສ ອຸປ຺ປນ຺ນາຘິປ຺ປາຍາ ປຸຣິສຊ຺ຌາສຍາ. ອາທານາຘິປ຺ປາໂຍຕິ ອິທານິ ຄເຫຕຸໍ ສກ຺ຂິສ຺ສາມິ, ອິທານິ ສກ຺ຂິສ຺ສາມີຕິ ເອວໍ ຄຫຓາຘິປ຺ປາໂຍ. ວິສໍໂຍຄາຘິປ຺ປາໂຍຕິ ອິທານິ ນິພ຺ພານໍ ປາປຸຓິສ຺ສາມິ, ອິທານິ ປາປຸຓິສ຺ສາມີຕິ ເອວໍ ນິພ຺ພານຊ຺ຌາສໂຍ.

໘. ຠຕ຺ຕາທກສຸຕ຺ຕວຓ຺ຓນາ

໑໓໘. ອຏ຺ຐເມ ຠຕ຺ຕາທໂກຕິ ຠຕ຺ຕກ຺ຂາທໂກ, ພຫຸຠຕ຺ຕຠຸຎ຺ໂຊຕິ ອຕ຺ໂຖ. ໂອກາສຜຣໂຓຕິ ໂອກາສໍ ຜຣິຕ຺ວາ ອຎ຺ເຎສໍ ສມ຺ພາຘໍ ກຕ຺ວາ ຐາເນນ ໂອກາສຜຣໂຓ. ຕຕ຺ຖ ຕຕ຺ຖ ລຓ຺ຑໍ ສາເຣຕິ ປາເຕຕີຕິ ລຓ຺ຑສາຣໂຓ. ເອຕ຺ຕກາ ຫຕ຺ຖີຕິ ຄຓນກາເລ ສລາກໍ ຄຓ຺ຫາຕີຕິ ສລາກຄ຺ຄາຫີ. ນິສີທນສຍນວເສນ ມຎ຺ຈປີຐໍ ມທ຺ທຕີຕິ ມຎ຺ຈປີຐມທ຺ທໂນ. ຠິກ຺ຂຸຄຓນກາເລ ສລາກໍ ຄຓ຺ຫາຕີຕິ ສລາກຄ຺ຄາຫີ.

໙. ອກ຺ຂມສຸຕ຺ຕວຓ຺ຓນາ

໑໓໙. ນວເມ ຫຕ຺ຖິກາຍນ຺ຕິ ຫຕ຺ຖິຆຏໍ. ເສເສສຸປິ ເອເສວ ນໂຍ. ສງ຺ຄາເມ ອວຈຣນ຺ຕີຕິ ສງ຺ຄາມາວຈຣາ. ເອກິສ຺ສາ ວາ ຕິໂຓທກທຕ຺ຕິຍາ ວິມານິໂຕຕິ ເອກທິວສໍ ເອເກນ ຕິໂຓທກທາເນນ ວິມານິໂຕ, ເອກທິວສມຕ຺ຕໍ ອລທ຺ຘຕິໂຓທໂກຕິ ອຕ຺ໂຖ. ອິໂຕ ປຣມ຺ປິ ເອເສວ ນໂຍ. ນ ສກ຺ໂກຕິ ຈິຕ຺ຕໍ ສມາທຫິຕຸນ຺ຕິ ອາຣມ຺ມເຓ ຈິຕ຺ຕໍ ສມ຺ມາ ຐເປຕຸໍ ນ ສກ຺ໂກຕິ. ເສສເມຕ຺ຖ ອຸຕ຺ຕານເມວ. ອິມສ຺ມິໍ ປນ ສຸຕ຺ເຕ ວຏ຺ຏວິວຏ຺ຏໍ ກຖິຕນ຺ຕິ ເວທິຕພ຺ພໍ.

໑໐. ໂສຕສຸຕ຺ຕວຓ຺ຓນາ

໑໔໐. ທສເມ ທຸຣຸຕ຺ຕານນ຺ຕິ ນ ສຸຏ຺ຐຸ ວຸຕ຺ຕານໍ ໂທສວເສນ ປວຕ຺ຕິຕານໍ ຜຣຸສວຈນານໍ. ທຸຣາຄຕານນ຺ຕິ ທຸກ຺ຂຸປ຺ປາທນາກາເຣນ ໂສຕທ຺ວາຣໍ ອາຄຕານໍ. ວຈນປຖານນ຺ຕິ ວຈນານໍ. ທຸກ຺ຂານນ຺ຕິ ທຸກ຺ຂມານໍ. ຕິພ຺ພານນ຺ຕິ ພຫລານໍ ຕາປນສຠາວານໍ ວາ. ຂຣານນ຺ຕິ ຜຣຸສານໍ. ກຏຸການນ຺ຕິ ຕິຂິຓານໍ. ອສາຕານນ຺ຕິ ອມຘຸຣານໍ. ອມນາປານນ຺ຕິ ມນໍ ອປ຺ປາຍິຕຸໍ ວຑ຺ເຒຕຸໍ ອສມຕ຺ຖານໍ. ປາຓຫຣານນ຺ຕິ ຊີວິຕຫຣານໍ. ຍາ ສາ ທິສາຕິ ສພ຺ພສງ຺ຂາຣສມຖາທິວເສນ ທິສ຺ສຕິ ອປທິສ຺ສຕີຕິ ນິພ຺ພານໍ ທິສາຕິ ເວທິຕພ຺ພໍ. ຍສ຺ມາ ປນ ຕໍ ອາຄມ຺ມ ສພ຺ເພ ສງ຺ຂາຣາ ສມຖໍ ຄຈ຺ຉນ຺ຕິ, ຕສ຺ມາ ສພ຺ພສງ຺ຂາຣສມໂຖຕິ ວຸຕ຺ຕໍ. ເສສໍ ສພ຺ພຕ຺ຖ ອຸຕ຺ຕານເມວ. ອິມສ຺ມິໍ ປນ ສຸຕ຺ເຕ ສີລສມາຘິປຎ຺ຎາ ມິສ຺ສິກາ ກຖິຕາຕິ.

ຣາຊວຄ຺ໂຄ ຈຕຸຕ຺ໂຖ.