(໙) ໔. ເຖຣວຄ຺ໂຄ

໑. ຣຊນີຍສຸຕ຺ຕວຓ຺ຓນາ

໘໑. ຈຕຸຕ຺ຖສ຺ສ ປຐເມ ຣຊນີເຍສູຕິ ຣາຄສ຺ສ ປຈ຺ຈເຍສຸ ອາຣມ຺ມເຓສຸ. ເສເສສຸປິ ເອເສວ ນໂຍ.

໒. ວີຕຣາຄສຸຕ຺ຕວຓ຺ຓນາ

໘໒. ທຸຕິເຍ ມກ຺ຂີຕິ ຄຸຓມກ຺ຂໂກ. ປຬາສີຕິ ຍຸຄຄ຺ຄາຫລກ຺ຂເຓນ ປຬາເສນ ສມນ຺ນາຄໂຕ.

໓. ກຸຫກສຸຕ຺ຕວຓ຺ຓນາ

໘໓. ຕຕິເຍ ກຸຫໂກຕິ ຕີຫິ ກຸຫນວຕ຺ຖູຫິ ສມນ຺ນາຄໂຕ. ລປໂກຕິ ລາຠສນ຺ນິສ຺ສິຕາຍ ລປນາຍ ສມນ຺ນາຄໂຕ. ເນມິຕ຺ຕິໂກຕິ ນິມິຕ຺ຕກິຣິຍກາຣໂກ. ນິປ຺ເປສິໂກຕິ ນິປ຺ເປສນກຕາຍ ສມນ຺ນາຄໂຕ. ລາເຠນ ຈ ລາຠໍ ນິຊິຄີສິຕາຕິ ລາເຠນ ລາຠຄເວສໂກ. ສຸກ຺ກປກ຺ໂຂ ວຸຕ຺ຕວິປລ຺ລາສວເສນ ເວທິຕພ຺ໂພ. ຈຕຸຕ຺ຖໍ ອຸຕ຺ຕານເມວ.

໕. ອກ຺ຂມສຸຕ຺ຕວຓ຺ຓນາ

໘໕. ປຎ຺ຈເມ ອກ຺ຂໂມ ໂຫຕິ ຣູປານນ຺ຕິ ຣູປາຣມ຺ມຓານໍ ອນຘິວາສໂກ ໂຫຕິ, ຕທາຣມ຺ມເຓຫິ ຣາຄາທີຫິ ອຠິຠຸຍ຺ຍຕິ. ເອເສວ ນໂຍ ສພ຺ພຕ຺ຖ.

໖. ປຏິສມ຺ຠິທາປ຺ປຕ຺ຕສຸຕ຺ຕວຓ຺ຓນາ

໘໖. ຉຏ຺ເຐ ອຕ຺ຖປຏິສມ຺ຠິທາປ຺ປຕ຺ໂຕຕິ ປຎ຺ຈສຸ ອຕ຺ເຖສຸ ປເຠທຄຕໍ ຎາຓໍ ປຕ຺ໂຕ. ຘມ຺ມປຏິສມ຺ຠິທາປ຺ປຕ຺ໂຕຕິ ຈຕຸພ຺ພິເຘ ຘມ຺ເມ ປເຠທຄຕໍ ຎາຓໍ ປຕ຺ໂຕ. ນິຣຸຕ຺ຕິປຏິສມ຺ຠິທາປ຺ປຕ຺ໂຕຕິ ຘມ຺ມນິຣຸຕ຺ຕີສຸ ປເຠທຄຕໍ ຎາຓໍ ປຕ຺ໂຕ. ປຏິຠານປຏິສມ຺ຠິທາປ຺ປຕ຺ໂຕຕິ ເຕສຸ ຕີສຸ ຎາເຓສຸ ປເຠທຄຕໍ ຎາຓໍ ປຕ຺ໂຕ. ໂສ ປນ ຕານິ ຕີຓິ ຎາຓາເນວ ຊານາຕິ, ນ ເຕສໍ ກິຈ຺ຈໍ ກໂຣຕິ. ອຸຈ຺ຈາວຈານີຕິ ມຫນ຺ຕຂຸທ຺ທການິ. ກິໍກຣຓີຍານີຕິ ອິຕິ ກຕ຺ຕພ຺ພານິ.

໗. ສີລວນ຺ຕສຸຕ຺ຕວຓ຺ຓນາ

໘໗. ສຕ຺ຕມໍ ອຸຕ຺ຕານຕ຺ຖເມວ. ສີລໍ ປເນຕ຺ຖ ຂີຓາສວສີລເມວ, ພາຫຸສຈ຺ຈມ຺ປິ ຂີຓາສວພາຫຸສຈ຺ຈເມວ, ວາຈາປິ ຂີຓາສວສ຺ສ ກລ຺ຍາຓວາຈາວ, ຌານານິປິ ກິຣິຍຊ຺ຌານາເນວ ກຖິຕານີຕິ ເວທິຕພ຺ພານິ.

໘. ເຖຣສຸຕ຺ຕວຓ຺ຓນາ

໘໘. ອຏ຺ຐເມ ເຖໂຣຕິ ຖິຣຠາວປ຺ປຕ຺ໂຕ. ຣຕ຺ຕຎ຺ຎູຕິ ປພ຺ພຊິຕທິວສໂຕ ປຏ຺ຐາຍ ອຕິກ຺ກນ຺ຕານໍ ພຫູນໍ ຣຕ຺ຕີນໍ ຎາຕາ. ຎາໂຕຕິ ປຎ຺ຎາໂຕ ປາກໂຏ. ຍສສ຺ສີຕິ ຍສນິສ຺ສິໂຕ. ມິຈ຺ຉາທິຏ຺ຐິໂກຕິ ອຍາຖາວທິຏ຺ຐິໂກ. ສທ຺ຘມ຺ມາ ວຸຏ຺ຐາເປຕ຺ວາຕິ ທສກຸສລກມ຺ມປຖຘມ຺ມໂຕ ວຸຏ຺ຐາເປຕ຺ວາ. ອສທ຺ຘມ຺ເມ ປຕິຏ຺ຐາເປຕີຕິ ອກຸສລກມ຺ມປເຖສຸ ປຕິຏ຺ຐາເປຕິ.

໙. ປຐມເສຂສຸຕ຺ຕວຓ຺ຓນາ

໘໙. ນວເມ ເສຂສ຺ສາຕິ ສິກ຺ຂກສ຺ສ ສກຣຓີຍສ຺ສ. ປຣິຫານາຍາຕິ ອຸປຣິຄຸເຓຫິ ປຣິຫານຕ຺ຖາຍ. ກມ຺ມາຣາມຕາຕິ ນວກມ຺ເມ ຣມນກຠາໂວ. ຠສ຺ສາຣາມຕາຕິ ອາລາປສລ຺ລາເປ ຣມນກຠາໂວ. ນິທ຺ທາຣາມຕາຕິ ນິທ຺ທາຍເນ ຣມນກຠາໂວ. ສງ຺ຄຓິກາຣາມຕາຕິ ຄຓສງ຺ຄຓິກາຍ ຣມນກຠາໂວ. ຍຖາວິມຸຕ຺ຕໍ ຈິຕ຺ຕໍ ນ ປຈ຺ຈເວກ຺ຂຕີຕິ ຍຖາ ຍໍ ຈິຕ຺ຕໍ ວິມຸຕ຺ຕໍ, ເຍ ຈ ໂທສາ ປຫີນາ, ຄຸຓາ ຈ ປຏິລທ຺ຘາ, ເຕ ປຈ຺ຈເວກ຺ຂິຕ຺ວາ ອຸປຣິຄຸຓປຏິລາຠາຍ ວາຍາມໍ ນ ກໂຣຕີຕິ ອຕ຺ໂຖ. ອິຕິ ອິມສ຺ມິໍ ສຸຕ຺ເຕ ສຕ຺ຕນ຺ນໍ ເສຂານໍ ອຸປຣິຄຸເຓຫິ ປຣິຫານິກາຣຓຎ຺ຈ ວຸທ຺ຘິກາຣຓຎ຺ຈ ກຖິຕໍ. ຍຎ຺ຈ ນາມ ເສຂສ຺ສ ປຣິຫານກາຣຓໍ, ຕໍ ປຸຖຸຊ຺ຊນສ຺ສ ປຐມເມວ ໂຫຕີຕິ.

໑໐. ທຸຕິຍເສຂສຸຕ຺ຕວຓ຺ຓນາ

໙໐. ທສເມ ວິຍຕ຺ໂຕຕິ ພ຺ຍຕ຺ໂຕ ເຉໂກ. ກິໍກຣຓີເຍສູຕິ ອິຕິ ກຕ຺ຕພ຺ເພສຸ. ເຈໂຕສມຖນ຺ຕິ ສມາຘິກມ຺ມຏ຺ຐານໍ. ອນນຸໂລມິເກນາຕິ ສາສນສ຺ສ ອນນຸຈ຺ຉວິເກນ. ອຕິກາເລນາຕິ ອຕິປາໂຕວ. ອຕິທິວາຕິ ທິວາ ວຸຈ຺ຈຕິ ມຊ຺ຌນ຺ຫິໂກ, ຕໍ ອຕິກ຺ກມິຕ຺ວາ. ອາຠິສລ຺ເລຂິກາຕິ ອຕິວິຍ ກິເລສສລ຺ເລຂິກາ. ເຈໂຕວິວຣຓສປ຺ປາຍາຕິ ຈິຕ຺ຕວິວຣຓສງ຺ຂາຕານໍ ສມຖວິປສ຺ສນານໍ ສປ຺ປາຍາ. ອປ຺ປິຈ຺ຉກຖາຕິ ອປ຺ປິຈ຺ຉາ ໂຫຖາຕິ ກຖນກຖາ. ສນ຺ຕຸຏ຺ຐິກຖາຕິ ຈຕູຫິ ປຈ຺ຈເຍຫິ ສນ຺ຕຸຏ຺ຐາ ໂຫຖາຕິ ກຖນກຖາ. ປວິເວກກຖາຕິ ຕີຫິ ວິເວເກຫິ ວິວິຕ຺ຕາ ໂຫຖາຕິ ກຖນກຖາ. ອສໍສຄ຺ຄກຖາຕິ ປຎ຺ຈວິເຘນ ສໍສຄ຺ເຄນ ອສໍສຏ຺ຐາ ໂຫຖາຕິ ກຖນກຖາ. ວີຣິຍາຣມ຺ຠກຖາຕິ ທຸວິຘໍ ວີຣິຍໍ ອາຣຠຖາຕິ ກຖນກຖາ. ສີລກຖາທີສຸ ສີລໍ ອາຣພ຺ຠ ກຖາ ສີລກຖາ. ສມາຘິໍ ອາຣພ຺ຠ, ປຎ຺ຎໍ ອາຣພ຺ຠ, ປຎ຺ຈວິຘໍ ວິມຸຕ຺ຕິໍ ອາຣພ຺ຠ, ເອກູນວີສຕິປຈ຺ຈເວກ຺ຂຓສງ຺ຂາຕໍ ວິມຸຕ຺ຕິຎາຓທສ຺ສນໍ ອາຣພ຺ຠ ກຖາ ວິມຸຕ຺ຕິຎາຓທສ຺ສນກຖາ. ນ ນິກາມລາຠີຕິອາທີສຸ ນ ອິຈ຺ຉິຕິຈ຺ຉິຕລາຠີ, ທຸກ຺ຂລາຠີ ນ ວິປຸລລາຠີຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ເຖຣວຄ຺ໂຄ ຈຕຸຕ຺ໂຖ.