(໑໐) ໕. ກກຸຘວຄ຺ໂຄ

໑-໒. ສມ຺ປທາສຸຕ຺ຕທ຺ວຍວຓ຺ຓນາ

໙໑-໙໒. ປຎ຺ຈມສ຺ສ ປຐເມ ປຎ຺ຈ ສມ຺ປທາ ມິສ຺ສິກາ ກຖິຕາ. ທຸຕິເຍ ປຸຣິມາ ຈຕສ຺ໂສ ມິສ຺ສິກາ, ປຎ຺ຈມີ ໂລກິກາວ.

໓. ພ຺ຍາກຣຓສຸຕ຺ຕວຓ຺ຓນາ

໙໓. ຕຕິເຍ ອຎ຺ຎາພ຺ຍາກຣຓານີຕິ ອຣຫຕ຺ຕພ຺ຍາກຣຓານິ. ມນ຺ທຕ຺ຕາຕິ ມນ຺ທຠາເວນ ອຎ຺ຎາເຓນ. ໂມມູຫຕ຺ຕາຕິ ອຕິມູຬ຺ຫຠາເວນ. ອຎ຺ຎໍ ພ຺ຍາກໂຣຕີຕິ ອຣຫຕ຺ຕໍ ປຕ຺ໂຕສ຺ມີຕິ ກເຖຕິ. ອິຈ຺ຉາປກໂຕຕິ ອິຈ຺ຉາຍ ອຠິຠູໂຕ. ອຘິມາເນນາຕິ ອຘິຄຕມາເນນ. ສມ຺ມເທວາຕິ ເຫຕຸນາ ນເຍນ ກາຣເຓເນວ.

໔-໕. ຜາສຸວິຫາຣສຸຕ຺ຕາທິວຓ຺ຓນາ

໙໔-໙໕. ຈຕຸຕ຺ເຖ ຜາສຸວິຫາຣາຕິ ສຸຂວິຫາຣາ. ປຎ຺ຈເມ ອກຸປ຺ປນ຺ຕິ ອຣຫຕ຺ຕໍ.

໖. ສຸຕຘຣສຸຕ຺ຕວຓ຺ຓນາ

໙໖. ຉຏ຺ເຐ ອປ຺ປຏ຺ໂຐຕິ ອປ຺ປສມາຣມ຺ໂຠ. ອປ຺ປກິຈ຺ໂຈຕິ ອປ຺ປກຣຓີໂຍ. ສຸຠໂຣຕິ ສຸເຂນ ຠຣິຕພ຺ໂພ ສຸໂປໂສ. ສຸສນ຺ໂຕໂສຕິ ຕີຫິ ສນ຺ໂຕເສຫິ ສຸຏ຺ຐຸ ສນ຺ໂຕໂສ. ຊີວິຕປຣິກ຺ຂາເຣສູຕິ ຊີວິຕສມ຺ຠາເຣສຸ. ອປ຺ປາຫາໂຣຕິ ມນ຺ທາຫາໂຣ. ອໂນທຣິກຕ຺ຕນ຺ຕິ ນ ໂອທຣິກຠາວໍ ອມຫຄ຺ຆສຠາວໍ ອນຸຍຸຕ຺ໂຕ. ອປ຺ປມິທ຺ໂຘຕິ ນ ພຫຸນິທ຺ໂທ. ສຕ຺ຕມຏ຺ຐມານິ ອຸຕ຺ຕານຕ຺ຖານິ.

໙. ສີຫສຸຕ຺ຕວຓ຺ຓນາ

໙໙. ນວເມ ສກ຺ກຈ຺ຈຎ຺ເຎວ ເທຕິ ໂນ ອສກ຺ກຈ຺ຈນ຺ຕິ ອນວຎ຺ຎາຍ ອວິຣຊ຺ຌິຕ຺ວາວ ເທຕິ, ໂນ ອວຎ຺ຎາຍ ວິຣຊ຺ຌິຕ຺ວາ. ມາ ເມ ໂຍຄ຺ຄປໂຖ ນສ຺ສາຕິ ມຍາ ກຕໂຍຄ຺ຄປໂຖ ມຍ຺ຫໍ ມາ ນສ຺ສຕຸ, ‘‘ເອໂກ ສີໂຫ ອຸຏ຺ຐາຍ ພິຬາຣໍ ປຫຣນ຺ໂຕ ວິຣຊ຺ຌິຕ຺ວາ ປຫຣີ’’ຕິ ເອວໍ ວຕ຺ຕາໂຣ ມາ ໂຫນ຺ຕູຕິ ອຕ຺ໂຖ. ອນ຺ນຠາຣເນສາທານນ຺ຕິ ເອຕ຺ຖ ອນ຺ນໍ ວຸຈ຺ຈຕິ ຍວຠຕ຺ຕໍ, ຕໍ ຠາໂຣ ເອເຕສນ຺ຕິ ອນ຺ນຠາຣາ. ຍາຈການໍ ເອຕໍ ນາມໍ. ເນສາທາ ວຸຈ຺ຈນ຺ຕິ ສາກຸຓິກາ. ອິຕິ ສພ຺ພປຈ຺ຉິມາຍ ໂກຏິຍາ ເອເຕສໍ ຍາຈກເນສາທານມ຺ປິ ສກ຺ກຈ຺ຈເມວ ເທເສຕິ.

໑໐. ກກຸຘເຖຣສຸຕ຺ຕວຓ຺ຓນາ

໑໐໐. ທສເມ ອຕ຺ຕຠາວປຏິລາໂຠຕິ ສຣີຣປຏິລາໂຠ. ທ຺ເວ ວາ ຕີຓິ ວາ ມາຄຘການິ ຄາມກ຺ເຂຕ຺ຕານີຕິ ເອຕ຺ຖ ມາຄຘິກໍ ຄາມກ຺ເຂຕ຺ຕໍ ອຕ຺ຖິ ຂຸທ຺ທກໍ, ອຕ຺ຖິ ມຊ຺ຌິມໍ, ອຕ຺ຖິ ມຫນ຺ຕໍ. ຂຸທ຺ທກໍ ຄາມກ຺ເຂຕ຺ຕໍ ອິໂຕ ຈຕ຺ຕາລີສໍ ອຸສຠານິ, ອິໂຕ ຈຕ຺ຕາລີສນ຺ຕິ ຄາວຸຕໍ ໂຫຕິ, ມຊ຺ຌິມໍ ອິໂຕ ຄາວຸຕໍ, ອິໂຕ ຄາວຸຕນ຺ຕິ ອຑ຺ຒໂຍຊນໍ ໂຫຕິ, ມຫນ຺ຕໍ ອິໂຕ ທິຍຑ຺ຒຄາວຸຕໍ, ອິໂຕ ທິຍຑ຺ຒຄາວຸຕນ຺ຕິ ຕິຄາວຸຕໍ ໂຫຕິ. ເຕສຸ ຂຸທ຺ທເກນ ຄາມກ຺ເຂຕ຺ເຕນ ຕີຓິ, ຂຸທ຺ທເກນ ຈ ມຊ຺ຌິເມນ ຈ ທ຺ເວ ຄາມກ຺ເຂຕ຺ຕານິ ຕສ຺ສ ອຕ຺ຕຠາໂວ. ຕິຄາວຸຕຎ຺ຫິສ຺ສ ສຣີຣໍ. ປຣິຫຣິສ຺ສາມີຕິ ປຏິຊຄ຺ຄິສ຺ສາມິ ໂຄປຍິສ຺ສາມິ. ຣກ຺ຂສ຺ເສຕນ຺ຕິ ຣກ຺ຂສ຺ສຸ ເອຕໍ. ໂມຆປຸຣິໂສຕິ ຕຸຈ຺ຉປຸຣິໂສ. ນາສ຺ສສ຺ສາຕິ ນ ເອຕສ຺ສ ຠເວຍ຺ຍ. ສມຸທາຈເຣຍ຺ຍາມາຕິ ກເຖຍ຺ຍາມ. ສມ຺ມນ຺ນຕີຕິ ສມ຺ມານໍ ກໂຣຕິ. ຍໍ ຕຸໂມ ກຣິສ຺ສຕິ ຕຸໂມວ ເຕນ ປຎ຺ຎາຍິສ຺ສຕີຕິ ຍໍ ເອສ ກຣິສ຺ສຕິ, ເອໂສວ ເຕນ ກມ຺ເມນ ປາກໂຏ ຠວິສ຺ສຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ກກຸຘວຄ຺ໂຄ ປຎ຺ຈໂມ.