(໘) ໓. ໂຍຘາຊີວວຄ຺ໂຄ

໑. ປຐມເຈໂຕວິມຸຕ຺ຕິຜລສຸຕ຺ຕວຓ຺ຓນາ

໗໑. ຕຕິຍສ຺ສ ປຐເມ ຍໂຕ ໂຂ, ຠິກ຺ຂເວຕິ ເຫຏ຺ຐາ ວຸຕ຺ຕນເຍນ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ຕສ຺ສ ຠິກ຺ຂຸໂນ ອິທານິ ວຓ຺ຓຠຓນຕ຺ຖໍ ອິທໍ ອາຣທ຺ຘໍ. ຕຕ຺ຖ ຍໂຕ ໂຂຕິ ຍທາ ໂຂ. ອຸກ຺ຂິຕ຺ຕປລິໂຆຕິ ອວິຊ຺ຊາປລິຆໍ ອຸກ຺ຂິປິຕ຺ວາ ອປເນຕ຺ວາ ຐິໂຕ. ສໍກິຓ຺ຓປຣິໂຂຕິ ສໍສາຣປຣິຂໍ ສໍກິຣິຕ຺ວາ ວິນາເສຕ຺ວາ ຐິໂຕ. ອພ຺ພູຬ຺ເຫສິໂກຕິ ຕຓ຺ຫາສງ຺ຂາຕໍ ເອສິກາຖມ຺ຠໍ ອພ຺ພຸຍ຺ຫ ລຸຎ຺ຈິຕ຺ວາ ຐິໂຕ. ນິຣຄ຺ຄໂຬຕິ ນີວຣຓກວາຏໍ ອຸຄ຺ຆາເຏຕ຺ວາ ຐິໂຕ. ປນ຺ນທ຺ຘໂຊ ປນ຺ນຠາໂຣຕິ ມານທ຺ຘຊຎ຺ຈ ຂນ຺ຘາຠິສງ຺ຂາຣກິເລສຠາຣຎ຺ຈ ປາເຕຕ຺ວາ ໂອຕາເຣຕ຺ວາ ຐິໂຕ. ວິສໍຍຸຕ຺ໂຕຕິ ວຏ຺ເຏນ ວິສໍຍຸຕ຺ໂຕ. ເສສໍ ປາຬິນເຍເນວ ເວທິຕພ຺ພໍ. ເອຕ຺ຕາວຕາ ຠຄວຕາ ມຄ຺ເຄນ ກິເລເສ ເຂເປຕ຺ວາ ນິໂຣຘສຍນວຣຄຕສ຺ສ ນິພ຺ພານາຣມ຺ມຓໍ ຜລສມາປຕ຺ຕິໍ ອປ຺ເປຕ຺ວາ ວິຫຣໂຕ ຂີຓາສວສ຺ສ ກາໂລ ທສ຺ສິໂຕ.

ຍຖາ ຫິ ທ຺ເວ ນຄຣານິ ເອກໍ ໂຈຣນຄຣໍ ເອກໍ ເຂມນຄຣໍ. ອຖ ເອກສ຺ສ ມຫາໂຍຘສ຺ສ ເອວໍ ຠເວຍ຺ຍ – ‘‘ຍາວິມໍ ໂຈຣນຄຣໍ ຕິຏ຺ຐຕິ, ຕາວ ເຂມນຄຣໍ ຠຍໂຕ ນ ມຸຈ຺ຈຕິ, ໂຈຣນຄຣໍ ອນຄຣໍ ກຣິສ຺ສາມີ’’ຕິ ສນ຺ນາຫໍ ກຕ຺ວາ ຂຄ຺ຄໍ ຄເຫຕ຺ວາ ໂຈຣນຄຣໍ ອຸປສງ຺ກມິຕ຺ວາ ນຄຣທ຺ວາເຣ ອຸສ຺ສາປິເຕ ເອສິກາຖມ຺ເຠ ຂຄ຺ເຄນ ຉິນ຺ທິຕ຺ວາ ສທ຺ຘິໍ ທ຺ວາຣພາຫາຫິ ກວາຏໍ ຠິນ຺ທິຕ຺ວາ ປລິຆໍ ອຸກ຺ຂິປິຕ຺ວາ ປາກາຣໍ ຠິນ຺ທິຕ຺ວາ ປຣິຂໍ ວິກິຣິຕ຺ວາ ນຄຣໂສຠຕ຺ຖາຍ ອຸສ຺ສິເຕ ຘເຊ ປາເຕຕ຺ວາ ນຄຣໍ ອຄ຺ຄິນາ ຌາເປຕ຺ວາ ເຂມນຄຣໍ ປວິສິຕ຺ວາ ປາສາທໍ ອາຣຸຍ຺ຫ ຎາຕິຄຓປຣິວຸໂຕ ສຸຣສໂຠຊນໍ ຠຸຎ຺ເຊຍ຺ຍ. ເອວໍ ໂຈຣນຄຣໍ ວິຍ ສກ຺ກາໂຍ, ເຂມນຄຣໍ ວິຍ ນິພ຺ພານໍ, ມຫາໂຍໂຘ ວິຍ ໂຍຄາວຈໂຣ. ຕສ຺ເສວໍ ໂຫຕິ – ‘‘ຍາວ ສກ຺ກາຍວຏ຺ຏໍ ວຏ຺ຏຕິ, ຕາວ ທ຺ວຕ຺ຕິໍສກມ຺ມກາຣຓາອຏ຺ຐນວຸຕິໂຣຄປຎ຺ຈວີສຕິມຫາຠເຍຫິ ປຣິມຸຈ຺ຈນໍ ນຕ຺ຖີ’’ຕິ. ໂສ ມຫາໂຍໂຘ ສນ຺ນາຫໍ ວິຍ ສີລສນ຺ນາຫໍ ກຕ຺ວາ ປຎ຺ຎາຂຄ຺ຄໍ ຄເຫຕ຺ວາ ຂຄ຺ເຄນ ເອສິກາຖມ຺ເຠ ວິຍ ອຣຫຕ຺ຕມຄ຺ເຄນ ຕຓ຺ເຫສິກໍ ລຸຎ຺ຈິຕ຺ວາ, ໂສ ໂຍໂຘ ສທ຺ວາຣພາຫກໍ ນຄຣກວາຏໍ ວິຍ ປຎ຺ໂຈຣມ຺ຠາຄິຍສໍໂຍຊນອຄ຺ຄຬໍ ອຸຄ຺ຆາເຏຕ຺ວາ, ໂສ ໂຍໂຘ ປລິຆໍ ວິຍ ອວິຊ຺ຊາປລິຆໍ ອຸກ຺ຂິປິຕ຺ວາ, ໂສ ໂຍໂຘ ປາກາຣໍ ຠິນ຺ທນ຺ໂຕ ປຣິຂໍ ວິຍ ກມ຺ມາຠິສງ຺ຂາຣໍ ຠິນ຺ທນ຺ໂຕ ຊາຕິສໍສາຣປຣິຂໍ ວິກິຣິຕ຺ວາ, ໂສ ໂຍໂຘ ນຄຣໍ ໂສຠຕ຺ຖາຍ ອຸສ຺ສາປິຕທ຺ຘເຊ ວິຍ ມານທ຺ຘເຊ ປາເຕຕ຺ວາ ສກ຺ກາຍນຄຣໍ ຌາເປຕ຺ວາ, ໂສ ໂຍໂຘ ເຂມນຄເຣ ອຸປຣິປາສາເທ ສຸໂຠຊນໍ ວິຍ ກິເລສປຣິນິພ຺ພານນຄຣໍ ປວິສິຕ຺ວາ ອມຕໍ ນິໂຣຘາຣມ຺ມຓໍ ຜລສມາປຕ຺ຕິສຸຂໍ ອນຸຠວມາໂນ ກາລໍ ວີຕິນາເມຕິ.

໒. ທຸຕິຍເຈໂຕວິມຸຕ຺ຕິຜລສຸຕ຺ຕວຓ຺ຓນາ

໗໒. ທຸຕິເຍ ອນິຈ຺ຈສຎ຺ຎາຕິ ຂນ຺ຘປຎ຺ຈກໍ ຫຸຕ຺ວາ ອຠາວາກາເຣນ ອນິຈ຺ຈນ຺ຕິ ອຸປ຺ປຊ຺ຊນກສຎ຺ຎາ. ອນິຈ຺ເຈ ທຸກ຺ຂສຎ຺ຎາຕິ ຍທນິຈ຺ຈໍ, ຕໍ ປຏິປີຬນາກາເຣນ ທຸກ຺ຂນ຺ຕິ ອຸປ຺ປຊ຺ຊນກສຎ຺ຎາ. ທຸກ຺ເຂ ອນຕ຺ຕສຎ຺ຎາຕິ ຍໍ ທຸກ຺ຂໍ, ຕໍ ອວສວຕ຺ຕນາກາເຣນ ອນຕ຺ຕາຕິ ອຸປ຺ປຊ຺ຊນກສຎ຺ຎາ. ເສສໍ ເຫຏ຺ຐາ ວຸຕ຺ຕນຍເມວ. ອິເມສຸ ປນ ທ຺ວີສຸປິ ສຸຕ຺ເຕສຸ ວິປສ຺ສນາຜລໍ ນາມ ກຖິຕນ຺ຕິ.

໓. ປຐມຘມ຺ມວິຫາຣີສຸຕ຺ຕວຓ຺ຓນາ

໗໓. ຕຕິເຍ ທິວສໍ ອຕິນາເມຕີຕິ ທິວສໍ ອຕິກ຺ກາເມຕິ. ຣິຎ຺ຈຕິ ປຏິສລ຺ລານນ຺ຕິ ເອກີຠາວໍ ວິສ຺ສຊ຺ເຊຕິ. ເທເສຕີຕິ ກເຖຕິ ປກາເສຕິ. ຘມ຺ມປຎ຺ຎຕ຺ຕິຍາຕິ ຘມ຺ມສ຺ສ ປຎ຺ຎາປນາຍ. ຘມ຺ມໍ ປຣິຍາປຸຓາຕີຕິ ນວງ຺ຄວເສນ ຈຕຸສຈ຺ຈຘມ຺ມໍ ປຣິຍາປຸຓາຕິ ວຬຎ຺ເຊຕິ ກເຖຕິ. ນ ຣິຎ຺ຈຕິ ປຏິສລ຺ລານນ຺ຕິ ເອກີຠາວໍ ນ ວິສ຺ສຊ຺ເຊຕິ. ອນຸຍຸຎ຺ຊຕິ ອຊ຺ຌຕ຺ຕໍ ເຈໂຕສມຖນ຺ຕິ ນິຍກຊ຺ຌຕ຺ເຕ ຈິຕ຺ຕສມາຘິໍ ອາເສວຕິ ຠາເວຕິ, ສມຖກມ຺ມຏ຺ຐາເນ ຍຸຕ຺ຕປ຺ປຍຸຕ຺ໂຕ ໂຫຕິ.

ຫິເຕສິນາຕິ ຫິຕໍ ເອສນ຺ເຕນ. ອນຸກມ຺ປເກນາຕິ ອນຸກມ຺ປມາເນນ. ອນຸກມ຺ປໍ ອຸປາທາຍາຕິ ອນຸກມ຺ປໍ ຈິຕ຺ເຕນ ປຣິຄ຺ຄເຫຕ຺ວາ, ປຏິຈ຺ຈາຕິປິ ວຸຕ຺ຕໍ ໂຫຕິ. ກຕໍ ໂວ ຕໍ ມຍາຕິ ຕໍ ມຍາ ອິເມ ປຎ຺ຈ ປຸຄ຺ຄເລ ເທເສນ຺ເຕນ ຕຸມ຺ຫາກໍ ກຕໍ. ເອຕ຺ຕກເມວ ຫິ ອນຸກມ຺ປກສ຺ສ ສຕ຺ຖຸ ກິຈ຺ຈໍ ຍທິທໍ ອວິປຣີຕຘມ຺ມເທສນາ, ອິໂຕ ປຣໍ ປນ ປຏິປຕ຺ຕິ ນາມ ສາວການໍ ກິຈ຺ຈໍ. ເຕນາຫ – ເອຕານິ ຠິກ຺ຂຸ ຣຸກ຺ຂມູລານິ…ເປ… ອມ຺ຫາກໍ ອນຸສາສນີຕິ. ຕຕ຺ຖ ຈ ຣຸກ຺ຂມູລານີຕິ ອິມິນາ ຣຸກ຺ຂມູລເສນາສນໍ ທສ຺ເສຕິ. ສຸຎ຺ຎາຄາຣານີຕິ ອິມິນາ ຊນວິວິຕ຺ຕຏ຺ຐານໍ. ອຸຠເຍນາປິ ຈ ໂຍຄານຸຣູປໍ ເສນາສນມາຈິກ຺ຂຕິ, ທາຍຊ຺ຊໍ ນິຍ຺ຍາເຕຕິ. ຌາຍຖາຕິ ອາຣມ຺ມຓູປນິຊ຺ຌາເນນ ອຏ຺ຐຕິໍສາຣມ຺ມຓານິ, ລກ຺ຂຓູປນິຊ຺ຌາເນນ ຈ ອນິຈ຺ຈາທິໂຕ ຂນ຺ຘາຍຕນາທີນິ ອຸປນິຊ຺ຌາຍຖ, ສມຖຎ຺ຈ ວິປສ຺ສນຎ຺ຈ ວຑ຺ເຒຖາຕິ ວຸຕ຺ຕໍ ໂຫຕິ. ມາ ປມາທຕ຺ຖາຕິ ມາ ປມຊ຺ຊິຕ຺ຖ. ມາ ປຈ຺ຉາ ວິປ຺ປຏິສາຣິໂນ ອຫຸວຕ຺ຖາຕິ ເຍ ຫິ ປຸພ຺ເພ ທຫຣກາເລ ອາໂຣຄ຺ຍກາເລ ສຕ຺ຕສປ຺ປາຍາທິສມ຺ປຕ຺ຕິກາເລ ສຕ຺ຖຸ ສມ຺ມຸຂີຠາວກາເລ ຈ ໂຍນິໂສມນສິກາຣວິຣຫິຕາ ຣຕ຺ຕິນ຺ທິວໍ ມງ຺ກຸລຠຕ຺ຕາ ຫຸຕ຺ວາ ເສຍ຺ຍສຸຂມິທ຺ຘສຸຂມນຸຍຸຕ຺ຕາ ປມຊ຺ຊນ຺ຕິ, ເຕ ປຈ຺ຉາ ຊຣາກາເລ ໂຣຄກາເລ ມຣຓກາເລ ວິປຕ຺ຕິກາເລ ສຕ຺ຖຸ ປຣິນິພ຺ພານກາເລ ຈ ຕໍ ປຸພ຺ເພ ປມາທວິຫາຣໍ ອນຸສ຺ສຣນ຺ຕາ ສປ຺ປຏິສນ຺ຘິກາລກິຣິຍຎ຺ຈ ຠາຣິຍໍ ສມ຺ປສ຺ສມານາ ວິປ຺ປຏິສາຣິໂນ ໂຫນ຺ຕິ. ຕຸມ຺ເຫ ປນ ຕາທິສາ ມາ ອຫຸວຕ຺ຖາຕິ ເອຕມຕ຺ຖໍ ທສ຺ເສນ຺ໂຕ ອາຫ – ‘‘ມາ ປຈ຺ຉາ ວິປ຺ປຏິສາຣິໂນ ອຫຸວຕ຺ຖາ’’ຕິ. ອຍໍ ໂວ ອມ຺ຫາກໍ ອນຸສາສນີຕິ ອຍໍ ອມ຺ຫາກໍ ສນ຺ຕິກາ ‘‘ຌາຍຖ ມາ ປມາທຕ຺ຖາ’’ຕິ ຕຸມ຺ຫາກໍ ອນຸສາສນີ, ໂອວາໂທຕິ ວຸຕ຺ຕໍ ໂຫຕິ.

໔. ທຸຕິຍຘມ຺ມວິຫາຣີສຸຕ຺ຕວຓ຺ຓນາ

໗໔. ຈຕຸຕ຺ເຖ ອຸຕ຺ຕຣິ ຈສ຺ສ ປຎ຺ຎາຍ ອຕ຺ຖໍ ນປ຺ປຊານາຕີຕິ ຕໂຕ ປຣິຍຕ຺ຕິໂຕ ອຸຕ຺ຕຣິ ຕສ຺ສ ຘມ຺ມສ຺ສ ສຫວິປສ຺ສນາຍ ມຄ຺ຄປຎ຺ຎາຍ ອຕ຺ຖໍ ນປ຺ປຊານາຕິ, ຈຕ຺ຕາຣິ ສຈ຺ຈານິ ນ ປສ຺ສຕິ ນປ຺ປຏິວິຊ຺ຌຕີຕິ ອຕ຺ໂຖ. ເສສວາເຣສຸປິ ເອເສວ ນໂຍ. ເອວເມເຕສຸ ທ຺ວີສຸປິ ສຸຕ຺ເຕສຸ ພຫຸສ຺ສຸຕຠິກ຺ຂຸ ວິປສ຺ສນາກມ຺ມິໂກ ໂສຕາປນ຺ໂນ ສກທາຄາມີ ອນາຄາມີ ຂີຓາສໂວຕິ ຉ ຊນາ ຘມ຺ມວິຫາຣິໂນ ນາມາຕິ ເວທິຕພ຺ພາ.

໕. ປຐມໂຍຘາຊີວສຸຕ຺ຕວຓ຺ຓນາ

໗໕. ປຎ຺ຈເມ ໂຍຘາຊີວາຕິ ຍຸທ຺ຘູປຊີວິໂນ. ຣຊຄ຺ຄນ຺ຕິ ຫຕ຺ຖິອສ຺ສາທີນໍ ປາທປ຺ປຫາຣຠິນ຺ນາຍ ຠູມິຍາ ອຸຄ຺ຄຕໍ ຣຊກ຺ຂນ຺ຘໍ. ນ ສນ຺ຖມ຺ຠຕີຕິ ສນ຺ຖມ຺ຠິຕ຺ວາ ຐາຕຸໍ ນ ສກ຺ໂກຕິ. ສຫຕິ ຣຊຄ຺ຄນ຺ຕິ ຣຊກ຺ຂນ຺ຘໍ ທິສ຺ວາປິ ອຘິວາເສຕິ. ຘຊຄ຺ຄນ຺ຕິ ຫຕ຺ຖິອສ຺ສທີນໍ ປິຏ຺ເຐສຸ ວາ ຣເຖສຸ ວາ ອຸສ຺ສາປິຕານໍ ຘຊານໍ ອຄ຺ຄໍ. ອຸສ຺ສາຣຓນ຺ຕິ ຫຕ຺ຖິອສ຺ສຣຖານຎ຺ເຈວ ພລກາຍສ຺ສ ຈ ອຸຈ຺ຈາສທ຺ທມຫາສທ຺ທໍ. ສມ຺ປຫາເຣຕິ ສມາຄເຕ ອປ຺ປມຕ຺ຕເກປິ ປຫາເຣ. ຫຎ຺ຎຕີຕິ ວິຫຎ຺ຎຕິ ວິຆາຕໍ ອາປຊ຺ຊຕິ. ພ຺ຍາປຊ຺ຊຕີຕິ ວິປຕ຺ຕິໍ ອາປຊ຺ຊຕິ, ປກຕິຠາວໍ ຊຫຕິ. ສຫຕິ ສມ຺ປຫາຣນ຺ຕິ ທ຺ເວ ຕໂຍ ປຫາເຣ ປຕ຺ວາປິ ສຫຕິ ອຘິວາເສຕິ. ຕເມວ ສງ຺ຄາມສີສນ຺ຕິ ຕໍເຍວ ຊຍກ຺ຂນ຺ຘາວາຣຏ຺ຐານໍ. ອຊ຺ຌາວສຕີຕິ ສຕ຺ຕາຫມຕ຺ຕໍ ອຠິຠວິຕ຺ວາ ອາວສຕິ. ກິໍ ກາຣຓາ? ລທ຺ຘປຫາຣານໍ ປຫາຣຊຄ຺ຄນຕ຺ຖຎ຺ເຈວ ກຕກມ຺ມານໍ ວິເສສໍ ຎຕ຺ວາ ຐານນ຺ຕຣທານຕ຺ຖຎ຺ຈ ອິສ຺ສຣິຍສຸຂານຸຠວນຕ຺ຖຎ຺ຈ.

ອິທານິ ຍສ຺ມາ ສຕ຺ຖຸ ໂຍຘາຊີເວຫິ ກິຈ຺ຈໍ ນຕ຺ຖິ, ອິມສ຺ມິໍ ປນ ສາສເນ ຕຖາຣູເປ ປຎ຺ຈ ປຸຄ຺ຄເລ ທສ຺ເສຕຸໍ ອິທໍ ໂອປມ຺ມໍ ອາຠຕໍ. ຕສ຺ມາ ເຕ ປຸຄ຺ຄເລ ທສ຺ເສນ຺ໂຕ ເອວເມວ ໂຂຕິອາທິມາຫ. ຕຕ຺ຖ ສໍສີທຕີຕິ ມິຈ຺ຉາວິຕກ຺ກສ຺ມິໍ ສໍສີທຕິ ອນຸປ຺ປວິສຕິ. ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸນ຺ຕິ ພ຺ຣຫ຺ມຈຣິຍວາສໍ ອນຸປຈ຺ຉິຊ຺ຊມານໍ ໂຄເປຕຸໍ ນ ສກ຺ໂກຕິ. ສິກ຺ຂາທຸພ຺ພລ຺ຍໍ ອາວິກຕ຺ວາຕິ ສິກ຺ຂາຍ ທຸພ຺ພລຠາວໍ ປກາເສຕ຺ວາ. ກິມສ຺ສ ຣຊຄ຺ຄສ຺ມິນ຺ຕິ ກິໍ ຕສ຺ສ ປຸຄ຺ຄລສ຺ສ ຣຊຄ຺ຄໍ ນາມາຕິ ວທຕິ. ອຠິຣູປາຕິ ອຠິຣູປວຕີ. ທສ຺ສນີຍາຕິ ທສ຺ສນໂຍຄ຺ຄາ. ປາສາທິກາຕິ ທສ຺ສເນເນວ ຈິຕ຺ຕປ຺ປສາທາວຫາ. ປຣມາຍາຕິ ອຸຕ຺ຕມາຍ. ວຓ຺ຓໂປກ຺ຂຣຕາຍາຕິ ສຣີຣວຓ຺ເຓນ ເຈວ ອງ຺ຄສຓ຺ຐາເນນ ຈ. ອູຫສຕີຕິ ອວຫສຕິ. ອຸລ຺ລປຕີຕິ ກເຖຕິ. ອຸຊ຺ຌຄ຺ຆຕີຕິ ປາຓິໍ ປຫຣິຕ຺ວາ ມຫາຫສິຕໍ ຫສຕິ. ອຸປ຺ປຓ຺ເຑຕີຕິ ອຸປ຺ປຓ຺ຑນກຖໍ ກເຖຕິ. ອຠິນິສີທຕີຕິ ອຠິຠວິຕ຺ວາ ສນ຺ຕິເກ ວາ ເອກາສເນ ວາ ນິສີທຕິ. ທຸຕິຍປເທປິ ເອເສວ ນໂຍ. ອຊ຺ໂຌຕ຺ຖຣຕີຕິ ອວຕ຺ຖຣຕິ. ວິນິເວເຐຕ຺ວາ ວິນິໂມເຈຕ຺ວາຕິ ຄຫິຕຏ຺ຐານໂຕ ຕສ຺ສາ ຫຕ຺ຖໍ ວິນິພ຺ເພເຐຕ຺ວາ ເຈວ ໂມເຈຕ຺ວາ ຈ. ເສສເມຕ຺ຖ ອຸຕ຺ຕານຕ຺ຖເມວາຕິ. ອິມສ຺ມິໍ ສຸຕ຺ເຕ ວຏ຺ຏວິວຏ຺ຏໍ ກຖິຕໍ.

໖. ທຸຕິຍໂຍຘາຊີວສຸຕ຺ຕວຓ຺ຓນາ

໗໖. ຉຏ຺ເຐ ອສິຈມ຺ມໍ ຄເຫຕ຺ວາຕິ ອສິຎ຺ຈ ຈມ຺ມຎ຺ຈ ຄເຫຕ຺ວາ. ຘນຸກລາປໍ ສນ຺ນຍ຺ຫິຕ຺ວາຕິ ຘນຸຎ຺ຈ ສຣກລາປຎ຺ຈ ສນ຺ນຍ຺ຫິຕ຺ວາ. ວິຍູຬ຺ຫນ຺ຕິ ຍຸທ຺ຘສນ຺ນິເວສເວເສນ ຐິຕໍ. ສງ຺ຄາມໍ ໂອຕຣຕີຕິ ມຫາຍຸທ຺ຘໍ ໂອຕຣຕິ. ອຸສ຺ສຫຕິ ວາຍມຕີຕິ ອຸສ຺ສາຫຎ຺ຈ ວາຍາມຎ຺ຈ ກໂຣຕິ. ຫນນ຺ຕີຕິ ຆາເຕນ຺ຕິ. ປຣິຍາປາເທນ຺ຕີຕິ ປຣິຍາປາທຍນ຺ຕິ. ອຸປລິກ຺ຂນ຺ຕີຕິ ວິຊ຺ຌນ຺ຕິ. ອປເນນ຺ຕີຕິ ສກເສນໍ ຄເຫຕ຺ວາ ຄຈ຺ຉນ຺ຕິ. ອປເນຕ຺ວາ ຎາຕການໍ ເນນ຺ຕີຕິ ສກເສນໍ ເນຕ຺ວາ ຕໂຕ ຎາຕການໍ ສນ຺ຕິກໍ ເນນ຺ຕິ. ນີຍມາໂນຕິ ອຕ຺ຕໂນ ເຄຫໍ ວາ ເສສຎາຕິສນ຺ຕິກໍ ວາ ນິຍ຺ຍມາໂນ. ອຸປຏ຺ຐຫນ຺ຕິ ປຣິຈຣນ຺ຕີຕິ ປຫາຣໂສຘນວຓກປ຺ປນາທີນິ ກໂຣນ຺ຕາ ຊຄ຺ຄນ຺ຕິ ໂຄປຍນ຺ຕິ.

ອຣກ຺ຂິເຕເນວ ກາເຍນາຕິ ອຣກ຺ຂິເຕນ ກາຍທ຺ວາເຣນ. ອຣກ຺ຂິຕາຍ ວາຈາຍາຕິ ອຣກ຺ຂິເຕນ ວຈີທ຺ວາເຣນ. ອຣກ຺ຂິເຕນ ຈິຕ຺ເຕນາຕິ ອຣກ຺ຂິເຕນ ມໂນທ຺ວາເຣນ. ອນຸປຏ຺ຐິຕາຍ ສຕິຍາຕິ ສຕິໍ ສຸປຏ຺ຐິຕໍ ອກຕ຺ວາ. ອສໍວຸເຕຫິ ອິນ຺ທ຺ຣິເຍຫີຕິ ມນຈ຺ຉຏ຺ເຐຫິ ອິນ຺ທ຺ຣິເຍຫິ ອປິຫິເຕຫິ ອໂຄປິເຕຫິ. ຣາໂຄ ຈິຕ຺ຕໍ ອນຸທ຺ຘໍເສຕີຕິ ຣາໂຄ ອຸປ຺ປຊ຺ຊມາໂນວ ສມຖວິປສ຺ສນາຈິຕ຺ຕໍ ຘໍເສຕິ, ທູເຣ ຂິປຕິ. ຣາຄປຣິຍຸຏ຺ຐິໂຕມ຺ຫິ, ອາວຸໂສ, ຣາຄປເຣໂຕຕິ ອຫໍ, ອາວຸໂສ, ຣາເຄນ ຣຕ຺ໂຕ, ຣາເຄນ ອນຸຄໂຕ.

ອຏ຺ຐິກງ຺ກລູປມາຕິອາທີສຸ ອຏ຺ຐິກງ຺ກລູປມາ ອປ຺ປສ຺ສາທຏ຺ເຐນ. ມໍສເປສູປມາ ພຫຸສາຘາຣຓຏ຺ເຐນ. ຕິຓຸກ຺ກູປມາ ອນຸທຫນຏ຺ເຐນ. ອງ຺ຄາຣກາສູປມາ ມຫາຠິຕາປຏ຺ເຐນ. ສຸປິນກູປມາ ອິຕ຺ຕຣປຈ຺ຈຸປຏ຺ຐານຏ຺ເຐນ. ຍາຈິຕກູປມາ ຕາວກາລິກຏ຺ເຐນ. ຣຸກ຺ຂຜລູປມາ ສພ຺ພງ຺ຄປຈ຺ຈງ຺ຄປລິຠຎ຺ຊນຏ຺ເຐນ. ອສິສູນູປມາ ອຘິກຸຏ຺ຏນຏ຺ເຐນ. ສຕ຺ຕິສູລູປມາ ວິນິວິຊ຺ຌນຏ຺ເຐນ. ສປ຺ປສິຣູປມາ ສາສງ຺ກສປ຺ປຏິຠຍຏ຺ເຐນ. ອຸສ຺ສຫິສ຺ສາມີຕິ ອຸສ຺ສາຫໍ ກຣິສ຺ສາມິ. ຘາຣຍິສ຺ສາມີຕິ ສມຓຠາວໍ ຘາຣຍິສ຺ສາມິ. ອຠິຣມິສ຺ສາມີຕິ ອຠິຣຕິໍ ອຸປ຺ປາເທສ຺ສາມິ ນ ອຸກ຺ກຓ຺ຐິສ຺ສາມິ. ເສສເມຕ຺ຖ ອຸຕ຺ຕານຕ຺ຖເມວ. ອິມສ຺ມິໍ ສຸຕ຺ເຕ ວຏ຺ຏວິວຏ຺ຏໍ ກຖິຕນ຺ຕິ.

໗. ປຐມອນາຄຕຠຍສຸຕ຺ຕວຓ຺ຓນາ

໗໗. ສຕ຺ຕເມ ອາຣຎ຺ຎເກນາຕິ ອຣຎ຺ຎວາສິນາ. ອປ຺ປຕ຺ຕສ຺ສາຕິ ອສມ຺ປຕ຺ຕສ຺ສ ຌານວິປສ຺ສນາມຄ຺ຄຜລປ຺ປເຠທສ຺ສ ວິເສສສ຺ສ ປຕ຺ຕິຍາ. ເສສປເທສຸປິ ເອເສວ ນໂຍ. ໂສ ມມສ຺ສ ອນ຺ຕຣາໂຍຕິ ໂສ ມມ ຊີວິຕນ຺ຕຣາໂຍ ຈ ພ຺ຣຫ຺ມຈຣິຍນ຺ຕຣາໂຍ ຈ, ປຸຖຸຊ຺ຊນກາລກິຣິຍໍ ກໂຣນ຺ຕສ຺ສ ສຄ຺ຄນ຺ຕຣາໂຍ ຈ ມຄ຺ຄນ຺ຕຣາໂຍ ຈ ຠເວຍ຺ຍ. ຫນ຺ທາຕິ ວວສ຺ສຄ຺ຄຕ຺ເຖ ນິປາໂຕ. ວີຣິຍໍ ອາຣຠາມີຕິ ທຸວິຘມ຺ປິ ວີຣິຍໍ ກໂຣມິ. ສຕ຺ຖກາຕິ ສຕ຺ຖໍ ວິຍ ສນ຺ຘິພນ຺ຘນຈ຺ເຉທກວາຕາ. ວາເຬຫີຕິ ກກ຺ຂເຬຫິ. ມາຓເວຫີຕິ ໂຈເຣຫິ. ກຕກມ຺ເມຫິ ວາ ອກຕກມ຺ເມຫິ ວາຕິ ເອຕ຺ຖ ໂຈຣິກໍ ກຕ຺ວາ ນິກ຺ຂນ຺ຕາ ກຕກມ຺ມາ ນາມ, ໂຈຣິກໍ ກາຕຸໍ ຄຈ຺ຉນ຺ຕາ ອກຕກມ຺ມາ ນາມ. ຕຕ຺ຖ ກຕກມ຺ມາ ກມ຺ມສ຺ສ ນິປ຺ຜນ຺ນຕ຺ຕາ ສຕ຺ຕານໍ ຄລໂລຫິຕໍ ຄເຫຕ຺ວາ ເທວຕານໍ ພລິໍ ກໂຣນ຺ຕິ, ອກຕກມ຺ມາ ‘‘ເອວໍ ໂນ ກມ຺ມໍ ນິປ຺ຜຊ຺ຊິສ຺ສຕີ’’ຕິ ປຐມຕຣໍ ກໂຣນ຺ຕິ. ອິທໍ ສນ຺ຘາຍ ເຕ ມໍ ຊີວິຕາ ໂວໂຣເປຍ຺ຍຸນ຺ຕິ ວຸຕ຺ຕໍ. ວາຬາ ອມນຸສ຺ສາຕິ ກກ຺ຂຬາ ທຸຏ຺ຐາ ຍກ຺ຂາທໂຍ ອມນຸສ຺ສາ.

໘. ທຸຕິຍອນາຄຕຠຍສຸຕ຺ຕວຓ຺ຓນາ

໗໘. ອຏ຺ຐເມ ປຸຣາ ມໍ ໂສ ຘມ຺ໂມ ອາຄຈ຺ຉຕີຕິ ຍາວ ໂສ ຘມ຺ໂມ ມໍ ນ ອຸປຄຈ຺ຉຕິ, ຕາວ ອຫໍ ປຸເຣຕຣເມວ ວີຣິຍໍ ອາຣຠາມີຕິ ອຕ຺ໂຖ. ຂີໂຣທກີຠູຕາຕິ ຂີໂຣທກໍ ວິຍ ຠູຕາ ເອກີຠາວໍ ອຸປຄຕາ. ປິຍຈກ຺ຂູຫີຕິ ເມຕ຺ຕຈກ຺ຂູຫິ.

໙. ຕຕິຍອນາຄຕຠຍສຸຕ຺ຕວຓ຺ຓນາ

໗໙. ນວເມ ຘມ຺ມສນ຺ໂທສາ ວິນຍສນ຺ໂທໂສຕິ ຘມ຺ມສນ຺ໂທເສນ ວິນຍສນ຺ໂທໂສ ໂຫຕິ. ກຖໍ ປນ ຘມ຺ມສ຺ມິໍ ທຸສ຺ສນ຺ເຕ ວິນໂຍ ທຸສ຺ສຕິ ນາມ? ສມຖວິປສ຺ສນາຘມ຺ເມສຸ ຄພ຺ຠໍ ອຄ຺ຄຓ຺ຫນ຺ເຕສຸ ປຎ຺ຈວິໂຘ ວິນໂຍ ນ ໂຫຕິ, ເອວໍ ຘມ຺ເມ ທຸສ຺ສນ຺ເຕ ວິນໂຍ ທຸສ຺ສຕິ. ທຸສ຺ສີລສ຺ສ ປນ ສໍວຣວິນໂຍ ນາມ ນ ໂຫຕິ, ຕສ຺ມິໍ ອສຕິ ສມຖວິປສ຺ສນາ ຄພ຺ຠໍ ນ ຄຓ຺ຫາຕິ. ເອວໍ ວິນຍສນ຺ໂທເສນປິ ຘມ຺ມສນ຺ໂທໂສ ເວທິຕພ຺ໂພ. ອຠິຘມ຺ມກຖນ຺ຕິ ສີລາທິອຸຕ຺ຕມຘມ຺ມກຖໍ. ເວທລ຺ລກຖນ຺ຕິ ເວທປຏິສໍຍຸຕ຺ຕໍ ຎາຓມິສ຺ສກກຖໍ. ກຓ຺ຫຘມ຺ມໍ ໂອກ຺ກມມານາຕິ ຣນ຺ຘຄເວສິຕາຍ ອຸປາຣມ຺ຠປຣິເຍສນວເສນ ກາຬກຘມ຺ມໍ ໂອກ຺ກມມານາ. ອປິຈ ທຸຏ຺ຐຈິຕ຺ເຕນ ປຸຄ຺ຄລໍ ຆຏ຺ເຏນ຺ຕາປິ ຕໍ ກຓ຺ຫຘມ຺ມໍ ອຕ຺ຕໂນ ທຫນ຺ຕາປິ ລາຠສກ຺ກາຣຕ຺ຖໍ ກເຖນ຺ຕາປິ ກຓ຺ຫຘມ຺ມໍ ໂອກ຺ກມນ຺ຕິເຍວ.

ຄມ຺ຠີຣາຕິ ປາຬິຄມ຺ຠີຣາ. ຄມ຺ຠີຣຕ຺ຖາຕິ ອຕ຺ຖຄມ຺ຠີຣາ. ໂລກຸຕ຺ຕຣາຕິ ໂລກຸຕ຺ຕຣຘມ຺ມທີປກາ. ສຸຎ຺ຎຕາປຏິສໍຍຸຕ຺ຕາຕິ ຂນ຺ຘຘາຕຸອາຍຕນປຈ຺ຈຍາກາຣປຏິສໍຍຸຕ຺ຕາ. ນ ອຎ຺ຎາ ຈິຕ຺ຕໍ ອຸປຏ຺ຐເປສ຺ສນ຺ຕີຕິ ຊານນຕ຺ຖາຍ ຈິຕ຺ຕໍ ນ ຐເປສ຺ສນ຺ຕິ. ອຸຄ຺ຄເຫຕພ຺ພໍ ປຣິຍາປຸຓິຕພ຺ພນ຺ຕິ ອຸຄ຺ຄເຫຕພ຺ເພ ຈ ວຬຎ຺ເຊຕພ຺ເພ ຈ. ກວິຕາຕິ ສິໂລກາທິພນ຺ຘນວເສນ ກວີຫິ ກຕາ. ກາເວຍ຺ຍາຕິ ຕສ຺ເສວ ເວວຈນໍ. ພາຫິຣກາຕິ ສາສນໂຕ ພຫິທ຺ຘາ ຐິຕາ. ສາວກຠາສິຕາຕິ ພາຫິຣສາວເກຫິ ຠາສິຕາ. ເສສເມຕ຺ຖ ເຫຏ຺ຐາ ວຸຕ຺ຕນຍຕ຺ຕາ ສຸວິຎ຺ເຎຍ຺ຍຕ຺ຕາ ຈ ອຸຕ຺ຕານຕ຺ຖເມວ.

໑໐. ຈຕຸຕ຺ຖອນາຄຕຠຍສຸຕ຺ຕວຓ຺ຓນາ

໘໐. ທສເມ ກລ຺ຍາຓກາມາຕິ ສຸນ຺ທຣກາມາ. ຣສຄ຺ຄານີຕິ ອຸຕ຺ຕມຣສານິ. ສໍສຏ຺ຐາ ວິຫຣິສ຺ສນ຺ຕີຕິ ປຎ຺ຈວິເຘນ ສໍສຄ຺ເຄນ ສໍສຏ຺ຐາ ວິຫຣິສ຺ສນ຺ຕິ. ສນ຺ນິຘິກາຣປຣິໂຠຄນ຺ຕິ ສນ຺ນິຘິກຕສ຺ສ ປຣິໂຠຄໍ. ໂອຬາຣິກມ຺ປິ ນິມິຕ຺ຕນ຺ຕິ ເອຕ຺ຖ ປຖວິໍ ຂຓນ຺ໂຕປິ ຂຓາຫີຕິ ອາຓາເປນ຺ໂຕປິ ປຖວິຍໍ ໂອຬາຣິກໍ ນິມິຕ຺ຕໍ ກໂຣຕິ ນາມ. ຕິຓກຏ຺ຐສາຂາປລາສໍ ຉິນ຺ທນ຺ໂຕປິ ຉິນ຺ທາຕິ ອາຓາເປນ຺ໂຕປິ ຫຣິຕຄ຺ເຄ ໂອຬາຣິກໍ ນິມິຕ຺ຕໍ ກໂຣຕິ ນາມ. ອາຊີວຕ຺ຖາຍ ປຓ຺ຓນິວາປອາທີນິ ຄາຫາເປນ຺ໂຕ ຜລານິ ໂອຈິນນ຺ເຕ ວາ ໂອຈິນາເປນ຺ເຕນ ວຕ຺ຕພ຺ພເມວ ນຕ຺ຖິ. ອິເມສຸ ຈຕູສຸ ສຸຕ຺ເຕສຸ ສຕ຺ຖາຣາ ສາສເນ ວຸທ຺ຘິປຣິຫານິ ກຖິຕາຕິ.

ໂຍຘາຊີວວຄ຺ໂຄ ຕຕິໂຍ.