(໖) ໑. ນີວຣຓວຄ຺ໂຄ

໑. ອາວຣຓສຸຕ຺ຕວຓ຺ຓນາ

໕໑. ທຸຕິຍສ຺ສ ປຐເມ ອາວຣຓວເສນ ອາວຣຓາ. ນີວຣຓວເສນ ນີວຣຓາ. ເຈໂຕ ອຊ຺ຌາຣຸຫນ຺ຕີຕິ ເຈຕໂສ ອຊ຺ຌາຣຸຫາ. ວິປສ຺ສນາປຎ຺ຎຎ຺ຈ ມຄ຺ຄປຎ຺ຎຎ຺ຈ ອຸປ຺ປຕ຺ຕິນິວາຣຓຏ຺ເຐນ ທຸພ຺ພລໍ ກໂຣນ຺ຕີຕິ ປຎ຺ຎາຍ ທຸພ຺ພລີກຣຓາ. ຍາ ວາ ເອເຕຫິ ສທ຺ຘິໍ ໂວກິຓ຺ຓາ ປຎ຺ຎາ ອຸປ຺ປຊ຺ຊຕິ, ຕໍ ທຸພ຺ພລໍ ກໂຣນ຺ຕີຕິປິ ປຎ຺ຎາຍ ທຸພ຺ພລີກຣຓາ. ອພລາຍາຕິ ປຎ຺ຈນີວຣຓປຣິໂຍນທ຺ຘຕ຺ຕາ ອປຄຕພລາຍ. ອຸຕ຺ຕຣິ ວາ ມນຸສ຺ສຘມ຺ມາ ອລມຣິຍຎາຓທສ຺ສນວິເສສນ຺ຕິ ທສກຸສລກມ຺ມປຖສງ຺ຂາຕາ ມນຸສ຺ສຘມ຺ມາ ອຸຕ຺ຕຣິ ອຣິຍຠາວໍ ກາຕຸໍ ສມຕ຺ຖໍ ຎາຓທສ຺ສນວິເສສໍ. ຫາຣຫາຣິນີຕິ ຫຣິຕພ຺ພໍ ຫຣິຕຸໍ ສມຕ຺ຖາ. ນງ຺ຄລມຸຂານີຕິ ມາຕິກາມຸຂານິ. ຕານິ ຫິ ນງ຺ຄລສຣິກ຺ຂກຕ຺ຕາ ນງ຺ຄເລຫິ ຈ ຂຕຕ຺ຕາ ນງ຺ຄລມຸຂານີຕິ ວຸຈ຺ຈນ຺ຕິ.

ເອວເມວ ໂຂຕິ ເອຕ຺ຖ ໂສຕໍ ວິຍ ວິປສ຺ສນາຎາຓໍ ທຏ຺ຐພ຺ພໍ, ອຸຠໂຕ ນງ຺ຄລມຸຂານໍ ວິວຣຓກາໂລ ວິຍ ຉສຸ ທ຺ວາເຣສຸ ສໍວຣສ຺ສ ວິສ຺ສຏ຺ຐກາໂລ, ມຊ຺ເຌນທິຍາ ຣຸກ຺ຂປາເທ ໂກຏ຺ເຏຕ຺ວາ ປລາລຕິຓມຕ຺ຕິກາຫິ ອາວຣເຓ ກເຕ ອຸທກສ຺ສ ວິກ຺ຂິຕ຺ຕວິສຏພ຺ຍາທິຓ຺ຓກາໂລ ວິຍ ປຎ຺ຈຫິ ນີວຣເຓຫິ ປຣິໂຍນທ຺ຘກາໂລ, ເອວໍ ອາວຣເຓ ກເຕ ວິຫຕເວຄສ຺ສ ອຸທກສ຺ສ ຕິຓປລາລາທີນິ ປຣິກຑ຺ຒິຕ຺ວາ ສມຸທ຺ທໍ ປາປຸຓິຕຸໍ ອສມຕ຺ຖກາໂລ ວິຍ ວິປສ຺ສນາຎາເຓນ ສພ຺ພາກຸສເລ ວິທ຺ຘໍເສຕ຺ວາ ນິພ຺ພານສາຄຣໍ ປາປຸຓິຕຸໍ ອສມຕ຺ຖກາໂລ ເວທິຕພ຺ໂພ. ສຸກ຺ກປກ຺ເຂ ວຸຕ຺ຕວິປລ຺ລາເສນ ໂຍຊນາ ກາຕພ຺ພາ. ອິມສ຺ມິໍ ສຸຕ຺ເຕ ວຏ຺ຏວິວຏ຺ຏໍ ກຖິຕໍ. ທຸຕິຍໍ ອຸຕ຺ຕານຕ຺ຖເມວ.

໓. ປຘານິຍງ຺ຄສຸຕ຺ຕວຓ຺ຓນາ

໕໓. ຕຕິເຍ ປຘານິຍງ຺ຄານີຕິ ປຘານໍ ວຸຈ຺ຈຕິ ປທຫນຠາໂວ, ປຘານມສ຺ສ ອຕ຺ຖີຕິ ປຘານິໂຍ, ປຘານິຍສ຺ສ ຠິກ຺ຂຸໂນ ອງ຺ຄານີຕິ ປຘານິຍງ຺ຄານິ. ສທ຺ໂຘຕິ ສທ຺ຘາຍ ສມນ຺ນາຄໂຕ. ສທ຺ຘາ ປເນສາ ອາຄມສທ຺ຘາ ອຘິຄມສທ຺ຘາ ໂອກປ຺ປນສທ຺ຘາ ປສາທສທ຺ຘາຕິ ຈຕຸພ຺ພິຘາ. ຕຕ຺ຖ ສພ຺ພຎ຺ຎຸໂພຘິສຕ຺ຕານໍ ສທ຺ຘາ, ອຠິນີຫາຣໂຕ ປຏ຺ຐາຍ ອາຄຕຕ຺ຕາ ອາຄມສທ຺ຘາ ນາມ. ອຣິຍສາວການໍ ປຏິເວເຘນ ອຘິຄຕຕ຺ຕາ ອຘິຄມສທ຺ຘາ ນາມ. ພຸທ຺ໂຘ ຘມ຺ໂມ ສງ຺ໂຆຕິ ວຸຕ຺ເຕ ອຈລຠາເວນ ໂອກປ຺ປນໍ ໂອກປ຺ປນສທ຺ຘາ ນາມ. ປສາທຸປ຺ປຕ຺ຕິ ປສາທສທ຺ຘາ ນາມ. ອິຘ ໂອກປ຺ປນສທ຺ຘາ ອຘິປ຺ເປຕາ. ໂພຘິນ຺ຕິ ຈຕຸມຄ຺ຄຎາຓໍ. ຕໍ ສຸປ຺ປຏິວິທ຺ຘໍ ຕຖາຄເຕນາຕິ ສທ຺ທຫຕິ. ເທສນາສີສເມວ ເຈຕໍ, ອິມິນາ ປນ ອງ຺ເຄນ ຕີສຸປິ ຣຕເນສຸ ສທ຺ຘາ ອຘິປ຺ເປຕາ. ຍສ຺ສ ຫິ ພຸທ຺ຘາທີສຸ ປສາໂທ ພລວາ, ຕສ຺ສ ປຘານວີຣິຍໍ ອິຊ຺ຌຕິ.

ອປ຺ປາພາໂຘຕິ ອໂຣໂຄ. ອປ຺ປາຕງ຺ໂກຕິ ນິທ຺ທຸກ຺ໂຂ. ສມເວປາກິນິຍາຕິ ສມວິປາກິນິຍາ. ຄຫຓິຍາຕິ ກມ຺ມຊເຕໂຊຘາຕຸຍາ. ນາຕິສີຕາຍ ນາຈ຺ຈຸຓ຺ຫາຍາຕິ ອຕິສີຕລຄ຺ຄຫຓິໂກ ຫິ ສີຕຠີຣຸໂກ ໂຫຕິ, ອຈ຺ຈຸຓ຺ຫຄ຺ຄຫຓິໂກ ອຸຓ຺ຫຠີຣຸໂກ, ເຕສໍ ປຘານໍ ນ ອິຊ຺ຌຕິ, ມຊ຺ຌິມຄ຺ຄຫຓິກສ຺ສ ອິຊ຺ຌຕິ. ເຕນາຫ – ມຊ຺ຌິມາຍ ປຘານກ຺ຂມາຍາຕິ. ຍຖາຠູຕໍ ອຕ຺ຕານໍ ອາວິກຕ຺ຕາຕິ ຍຖາຠູຕໍ ອຕ຺ຕໂນ ອຄຸຓໍ ປກາເສຕາ. ອຸທຍຕ຺ຖຄາມິນິຍາຕິ ອຸທຍຎ຺ຈ ອຕ຺ຖຎ຺ຈ ຄນ຺ຕຸໍ ປຣິຈ຺ຉິນ຺ທິຕຸໍ ສມຕ຺ຖາຍ. ເອເຕນ ປຎ຺ຎາສລກ຺ຂຓປຣິຄ຺ຄາຫກໍ ອຸທຍພ຺ພຍຎາຓໍ ວຸຕ຺ຕໍ. ອຣິຍາຍາຕິ ປຣິສຸທ຺ຘາຍ. ນິພ຺ເພຘິກາຍາຕິ ອນິພ຺ພິທ຺ຘປຸພ຺ເພ ໂລຠກ຺ຂນ຺ຘາທໂຍ ນິພ຺ພິຊ຺ຌິຕຸໍ ສມຕ຺ຖາຍ. ສມ຺ມາ ທຸກ຺ຂກ຺ຂຍຄາມິນິຍາຕິ ຕທງ຺ຄວເສນ ກິເລສານໍ ປຫີນຕ຺ຕາ ຍໍ ທຸກ຺ຂໍ ຂີຍຕິ, ຕສ຺ສ ທຸກ຺ຂສ຺ສ ຂຍຄາມິນິຍາ. ອິຕິ ສພ຺ເພຫິປິ ອິເມຫິ ປເທຫິ ວິປສ຺ສນາປຎ຺ຎາວ ກຖິຕາ. ທຸປ຺ປຎ຺ຎສ຺ສ ຫິ ປຘານໍ ນ ອິຊ຺ຌຕິ.

໔. ສມຍສຸຕ຺ຕວຓ຺ຓນາ

໕໔. ຈຕຸຕ຺ເຖ ປຘານາຍາຕິ ວີຣິຍກຣຓຕ຺ຖາຍ. ນ ສຸກຣໍ ອຸຎ຺ເຉນ ປຄ຺ຄເຫນ ຍາເປຕຸນ຺ຕິ ນ ສກ຺ກາ ໂຫຕິ ປຕ຺ຕໍ ຄເຫຕ຺ວາ ອຸຎ຺ຉາຈຣິຍາຍ ຍາເປຕຸໍ. ອິມສ຺ມິມ຺ປິ ສຸຕ຺ເຕ ວຏ຺ຏວິວຏ຺ຏເມວ ກຖິຕໍ.

໕. ມາຕາປຸຕ຺ຕສຸຕ຺ຕວຓ຺ຓນາ

໕໕. ປຎ຺ຈເມ ປຣິຍາທາຍ ຕິຏ຺ຐຕີຕິ ປຣິຍາທິຍິຕ຺ວາ ຄເຫຕ຺ວາ ເຂເປຕ຺ວາ ຕິຏ຺ຐຕິ. ອຸຄ຺ຆາຕິຕາຕິ ອຸທ຺ຘຸມາຕາ.

ອສິຫຕ຺ເຖນາຕິ ສີສຈ຺ເຉທນຕ຺ຖາຍ ອສິໍ ອາທາຍ ອາຄເຕນາປິ. ປິສາເຈນາຕິ ຂາທິຕຸໍ ອາຄຕຍກ຺ເຂນາປິ. ອາສີເທຕິ ຆຏ຺ເຏຍ຺ຍ. ມຎ຺ຊຸນາຕິ ມຸທຸເກນ. ກາໂມຆວຸຬ຺ຫານນ຺ຕິ ກາໂມເຆນ ວຸຬ຺ຫານໍ ກຑ຺ຒິຕານໍ. ກາລໍ ຄຕິ ຠວາຠວນ຺ຕິ ວຏ຺ຏກາລໍ ຄຕິຎ຺ຈ ປຸນປ຺ປຸນພ຺ຠເວ ຈ. ປຸຣກ຺ຂຕາຕິ ປຸເຣຈາຣິກາ ປຸຣໂຕ ຄຕາເຍວ. ເຍ ຈ ກາເມ ປຣິຎ຺ຎາຍາຕິ ເຍ ປຓ຺ຑິຕາ ທຸວິເຘປິ ກາເມ ຕີຫິ ປຣິຎ຺ຎາຫິ ປຣິຊານິຕ຺ວາ. ຈຣນ຺ຕິ ອກຸໂຕຠຍາຕິ ຂີຓາສວານໍ ກຸໂຕຈິ ຠຍໍ ນາມ ນຕ຺ຖິ, ຕສ຺ມາ ເຕ ອກຸໂຕຠຍາ ຫຸຕ຺ວາ ຈຣນ຺ຕິ. ປາຣງ຺ຄຕາຕິ ປາຣໍ ວຸຈ຺ຈຕິ ນິພ຺ພານໍ, ຕໍ ອຸປຄຕາ, ສຈ຺ຉິກຕ຺ວາ ຐິຕາຕິ ອຕ຺ໂຖ. ອາສວກ຺ຂຍນ຺ຕິ ອຣຫຕ຺ຕໍ. ອິມສ຺ມິໍ ສຸຕ຺ເຕ ວຏ຺ຏເມວ ກເຖຕ຺ວາ ຄາຖາສຸ ວຏ຺ຏວິວຏ຺ຏໍ ກຖິຕໍ.

໖. ອຸປຊ຺ຌາຍສຸຕ຺ຕວຓ຺ຓນາ

໕໖. ຉຏ຺ເຐ ມຘຸຣກຊາໂຕຕິ ສຎ຺ຊາຕຄຣຸຠາໂວ. ທິສາ ຈ ເມ ນ ປກ຺ຂາຍນ຺ຕີຕິ ຈຕສ຺ໂສ ທິສາ ຈ ອນຸທິສາ ຈ ມຍ຺ຫໍ ນ ອຸປຏ຺ຐຫນ຺ຕີຕິ ວທຕິ. ຘມ຺ມາ ຈ ມໍ ນປ຺ປຏິຠນ຺ຕີຕິ ສມຖວິປສ຺ສນາຘມ຺ມາປິ ເມ ນ ອຸປຏ຺ຐຫນ຺ຕິ. ອນຠິຣໂຕ ຈ ພ຺ຣຫ຺ມຈຣິຍໍ ຈຣາມີຕິ ອຸກ຺ກຓ຺ຐິໂຕ ຫຸຕ຺ວາ ພ຺ຣຫ຺ມຈຣິຍວາສໍ ວສາມິ. ເຍນ ຠຄວາ ເຕນຸປສງ຺ກມີຕິ ຕສ຺ສ ກຖໍ ສຸຕ຺ວາ ‘‘ພຸທ຺ຘເວເນຍ຺ຍປຸຄ຺ຄໂລ ອຍ’’ນ຺ຕິ ຕໍ ກາຣຓໍ ຠຄວໂຕ ອາໂຣເຈຕຸໍ ອຸປສງ຺ກມິ. ອວິປສ຺ສກສ຺ສ ກຸສລານໍ ຘມ຺ມານນ຺ຕິ ກຸສລຘມ຺ເມ ອວິປສ຺ສນ຺ຕສ຺ສ, ອເນສນ຺ຕສ຺ສ ອຄເວສນ຺ຕສ຺ສາຕິ ອຕ຺ໂຖ. ໂພຘິປກ຺ຂິຍານໍ ຘມ຺ມານນ຺ຕິ ສຕິປຏ຺ຐານາທີນໍ ສຕ຺ຕຕິໍສຘມ຺ມານໍ.

໗. ອຠິຓ຺ຫປຈ຺ຈເວກ຺ຂິຕພ຺ພຐານສຸຕ຺ຕວຓ຺ຓນາ

໕໗. ສຕ຺ຕເມ ຊຣາຘມ຺ໂມມ຺ຫີຕິ ຊຣາສຠາໂວ ອມ຺ຫິ. ຊຣໍ ອນຕີໂຕຕິ ຊຣໍ ອນຕິກ຺ກນ຺ໂຕ, ອນ຺ໂຕຊຣາຍ ເອວ ຈຣາມິ. ເສສປເທສຸປິ ເອເສວ ນໂຍ. ກມ຺ມສ຺ສໂກຕິອາທີສຸ ກມ຺ມໍ ມຍ຺ຫໍ ສກໍ ອຕ຺ຕໂນ ສນ຺ຕກນ຺ຕິ ກມ຺ມສ຺ສໂກ ອມ຺ຫິ. ກມ຺ມສ຺ສ ທາຍາໂທຕິ ກມ຺ມທາຍາໂທ, ກມ຺ມໍ ມຍ຺ຫໍ ທາຍຊ຺ຊໍ ສນ຺ຕກນ຺ຕິ ອຕ຺ໂຖ. ກມ຺ມໍ ມຍ຺ຫໍ ໂຍນິ ກາຣຓນ຺ຕິ ກມ຺ມໂຍນິ. ກມ຺ມໍ ມຍ຺ຫໍ ພນ຺ຘູຕິ ກມ຺ມພນ຺ຘຸ, ກມ຺ມຎາຕໂກຕິ ອຕ຺ໂຖ. ກມ຺ມໍ ມຍ຺ຫໍ ປຏິສຣຓໍ ປຕິຏ຺ຐາຕິ ກມ຺ມປຏິສຣໂຓ. ຕສ຺ສ ທາຍາໂທ ຠວິສ຺ສາມີຕິ ຕສ຺ສ ກມ຺ມສ຺ສ ທາຍາໂທ ເຕນ ທິນ຺ນຜລປຏິຄ຺ຄາຫໂກ ຠວິສ຺ສາມີຕິ ອຕ຺ໂຖ. ໂຍພ຺ພນມໂທຕິ ໂຍພ຺ພນໍ ອາຣພ຺ຠ ອຸປ຺ປນ຺ນມໂທ. ເສເສສຸປິ ເອເສວ ນໂຍ. ມຄ຺ໂຄ ສຎ຺ຊາຍຕີຕິ ໂລກຸຕ຺ຕຣມຄ຺ໂຄ ສຎ຺ຊາຍຕິ. ສໍໂຍຊນານິ ສພ຺ພໂສ ປຫີຍນ຺ຕີຕິ ທສ ສໍໂຍຊນານິ ສພ຺ພໂສ ປຫີຍນ຺ຕິ. ອນຸສຍາ ພ຺ຍນ຺ຕີໂຫນ຺ຕີຕິ ສຕ຺ຕ ອນຸສຍາ ວິຄຕນ຺ຕາ ປຣິຈ຺ຉິນ຺ນາ ປຣິວຏຸມາ ໂຫນ຺ຕິ. ເອວເມຕ຺ຖ ເຫຏ຺ຐາ ປຎ຺ຈສຸ ຐາເນສຸ ວິປສ຺ສນາ ກຖິຕາ, ອິເມສຸ ປຎ຺ຈສຸ ໂລກຸຕ຺ຕຣມຄ຺ໂຄ.

ອິທານິ ຄາຖາຫິ ກູຏໍ ຄຓ຺ຫນ຺ໂຕ ພ຺ຍາຘິຘມ຺ມາຕິອາທິມາຫ. ຕຕ຺ຖ ຎຕ຺ວາ ຘມ຺ມໍ ນິຣູປຘິນ຺ຕິ ອຸປຘິຣຫິຕໍ ອຣຫຕ຺ຕມຄ຺ຄໍ ຎຕ຺ວາ. ສພ຺ເພ ມເທ ອຠິໂຠສ຺ມີຕິ ສພ຺ເພ ອິເມ ຕໂຍປິ ມເທ ອຘິຠວິໍ, ອຕິກ຺ກມ຺ມ ຐິໂຕສ຺ມີຕິ ອຕ຺ໂຖ. ເນກ຺ຂມ຺ມໍ ທຏ຺ຐຸ ເຂມໂຕຕິ ປພ຺ພຊ຺ຊໍ ເຂມໂຕ ທິສ຺ວາ. ຕສ຺ສ ເມ ອຫຸ ອຸສ຺ສາໂຫ, ນິພ຺ພານໍ ອຠິປສ຺ສໂຕຕິ ຕສ຺ສ ມຍ຺ຫໍ ນິພ຺ພານໍ ອຠິປສ຺ສນ຺ຕສ຺ສ ວາຍາໂມ ອໂຫສິ. ອນິວຕ຺ຕິ ຠວິສ຺ສາມີຕິ ປພ຺ພຊ຺ຊໂຕ ອນິວຕ຺ຕິໂກ ຠວິສ຺ສາມິ, ພ຺ຣຫ຺ມຈຣິຍວາສໂຕ ອນິວຕ຺ຕິໂກ, ສພ຺ພຎ຺ຎຸຕຎ຺ຎາຓໂຕ ອນິວຕ຺ຕິໂກ ຠວິສ຺ສາມິ. ພ຺ຣຫ຺ມຈຣິຍປຣາຍໂຓຕິ ມຄ຺ຄພ຺ຣຫ຺ມຈຣິຍປຣາຍໂຓ. ອິມິນາ ໂລກຸຕ຺ຕໂຣ ອຏ຺ຐງ຺ຄິໂກ ມຄ຺ໂຄ ກຖິໂຕຕິ.

໘. ລິຈ຺ຉວິກຸມາຣກສຸຕ຺ຕວຓ຺ຓນາ

໕໘. ອຏ຺ຐເມ ສຊ຺ຊານິ ຘນູນີຕິ ສຊິຍານິ ອາໂຣປິຕຘນູນິ. ອທ຺ທສູຕິ ອທ຺ທສໍສຸ. ຠວິສ຺ສນ຺ຕິ ວຊ຺ຊີຕິ ວຑ຺ຒິສ຺ສນ຺ຕິ ວຊ຺ຊິຣາຊາໂນ. ອປານຸຠາຕິ ອວຑ຺ຒິນິສ຺ສິຕາ ມານຖທ຺ຘາ. ປຈ຺ຉາລິຍໍ ຂິປນ຺ຕີຕິ ປຈ຺ຉໂຕ ຄນ຺ຕ຺ວາ ປິຏ຺ຐິໍ ປາເທນ ປຫຣນ຺ຕິ. ຣຏ຺ຐິກສ຺ສາຕິອາທີສຸ ຣຏ຺ຐໍ ຠຸຎ຺ຊຕີຕິ ຣຏ຺ຐິໂກ. ປິຕຣາ ທຕ຺ຕໍ ສາປເຕຍ຺ຍໍ ຠຸຎ຺ຊຕີຕິ ເປຕ຺ຕນິໂກ. ເສນາຍ ປຕິ ເຊຏ຺ຐໂກຕິ ເສນາປຕິໂກ. ຄາມຄາມຓິກສ຺ສາຕິ ຄາມານໍ ຄາມຓິກສ຺ສ, ຄາມສາມິກສ຺ສາຕິ ອຕ຺ໂຖ. ປູຄຄາມຓິກສ຺ສາຕິ ຄຓເຊຏ຺ຐກສ຺ສ. ກຸເລສູຕິ ເຕສຸ ເຕສຸ ກຸເລສຸ. ປຈ຺ເຈກາຘິປຈ຺ຈໍ ກາເຣນ຺ຕີຕິ ປຈ຺ເຈກໍ ເຊຏ຺ຐກຏ຺ຐານໍ ກາເຣນ຺ຕິ. ກລ຺ຍາເຓນ ມນສາ ອນຸກມ຺ປນ຺ຕີຕິ ສຸນ຺ທເຣນ ຈິຕ຺ເຕນ ອນຸຄ຺ຄຓ຺ຫນ຺ຕິ. ເຂຕ຺ຕກມ຺ມນ຺ຕສາມນ຺ຕສພ຺ໂຍຫາເຣຕິ ເຍ ຈ ອຕ຺ຕໂນ ເຂຕ຺ຕກມ຺ມນ຺ຕານໍ ສາມນ຺ຕາ ອນນ຺ຕຣກ຺ເຂຕ຺ຕສາມິໂນ, ເຕ ຈ ຣຊ຺ຊຸທຓ຺ເຑຫິ ຠູມິປ຺ປມາຓຄ຺ຄາຫເກ ສພ຺ໂພຫາເຣ ຈ. ພລິປຏິຄ຺ຄາຫິກາ ເທວຕາຕິ ກຸລປ຺ປເວຓິຍາ ອາຄຕາ ອາຣກ຺ຂເທວຕາ. ສກ຺ກໂຣຕີຕິ ຕາ ເທວຕາ ອຄ຺ຄຍາຄຸຠຕ຺ຕາທີຫິ ສກ຺ກໂຣຕິ.

ກິຈ຺ຈກໂຣຕິ ອຸປ຺ປນ຺ນານໍ ກິຈ຺ຈານໍ ກາຣໂກ. ເຍ ຈສ຺ສ ອນຸຊີວິໂນຕິ ເຍ ຈ ເອຕໍ ອຸປນິສ຺ສາຍ ຊີວນ຺ຕິ. ອຸຠິນ຺ນຎ຺ເຈວ ອຕ຺ຖາຍາຕິ ອຸຠິນ຺ນມ຺ປິ ຫິຕຕ຺ຖາຍ ປຏິປນ຺ໂນ ໂຫຕີຕິ ອຕ຺ໂຖ. ປຸພ຺ພເປຕານນ຺ຕິ ປຣໂລກຄຕານໍ. ທິຏ຺ເຐ ຘມ຺ເມ ຈ ຊີວຕນ຺ຕິ ເຍ ຈ ທິຏ຺ເຐ ຘມ຺ເມ ຊີວນ຺ຕິ. ອິຕິ ປທທ຺ວເຍນາປິ ອຕີຕປຈ຺ຈຸປ຺ປນ຺ເນ ຎາຕໂຍ ທສ຺ເສຕິ. ວິຕ຺ຕິສຎ຺ຊນໂນຕິ ຕຸຏ຺ຐິຊນໂນ. ຆຣມາວສນ຺ຕິ ຆຣາວາສໍ ວສນ຺ໂຕ. ປຸຊ຺ໂຊ ໂຫຕິ ປສໍສິໂຍຕິ ປູເຊຕພ຺ໂພ ຈ ປສໍສິຕພ຺ໂພ ຈ ໂຫຕີຕິ.

໙-໑໐. ວຸຑ຺ຒປພ຺ພຊິຕສຸຕ຺ຕທ຺ວຍວຓ຺ຓນາ

໕໙-໖໐. ນວເມ ນິປຸໂຓຕິ ສຓ຺ໂຫ ສຸຂຸມກາຣຓຎ຺ຎູ. ອາກປ຺ປສມ຺ປນ຺ໂນຕິ ສມຓາກປ຺ເປນ ສມ຺ປນ຺ໂນ. ທສເມ ປທກ຺ຂິຓຄ຺ຄາຫີຕິ ທິນ຺ໂນວາທໍ ປທກ຺ຂິຓໂຕ ຄຓ຺ຫນ຺ໂຕ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ນີວຣຓວຄ຺ໂຄ ປຐໂມ.