(໑໑) ໑. ວລາຫກວຄ຺ໂຄ

໑-໒. ວລາຫກສຸຕ຺ຕທ຺ວຍວຓ຺ຓນາ

໑໐໑-໒. ຕຕິຍປຓ຺ຓາສກສ຺ສ ປຐເມ ວລາຫກາຕິ ເມຆາ. ຠາສິຕາ ໂຫຕິ ໂນ ກຕ຺ຕາຕິ ‘‘ອິທຎ຺ຈິທຎ຺ຈ ກຣິສ຺ສາມີ’’ຕິ ເກວລໍ ຠາສຕິເຍວ, ນ ກໂຣຕິ. ກຕ຺ຕາ ໂຫຕິ ໂນ ຠາສິຕາຕິ ອກເຖຕ຺ວາວ ‘‘ອິທຎ຺ຈິທຎ຺ຈ ມຍາ ກາຕຸໍ ວຏ຺ຏຕີ’’ຕິ ກຕ຺ຕາ ໂຫຕິ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ. ທຸຕິຍໍ ອຸຕ຺ຕານຕ຺ຖເມວ.

໓. ກຸມ຺ຠສຸຕ຺ຕວຓ຺ຓນາ

໑໐໓. ຕຕິເຍ ກຸມ຺ຠາຕິ ຆຏາ. ຕຸຈ຺ໂຉ ປິຫິໂຕຕິ ຣິຕ຺ຕໂກ ປິຫິຕມຸໂຂ. ປູໂຣ ວິວໂຏຕິ ອຸທກປຸຓ຺ໂຓ ອປາຣຸຕມຸໂຂ. ເສສທ຺ວເຍປິ ເອເສວ ນໂຍ.

໔. ອຸທກຣຫທສຸຕ຺ຕວຓ຺ຓນາ

໑໐໔. ຈຕຸຕ຺ເຖ ອຸຕ຺ຕາໂນ ຄມ຺ຠີໂຣຠາໂສຕິອາທີສຸ ປຸຣາຓປຓ຺ຓຣສສມ຺ຠິນ຺ນວຓ຺ໂຓ ກາຬອຸທໂກ ຄມ຺ຠີໂຣຠາໂສ ນາມ, ອຈ຺ຉວິປ຺ປສນ຺ນມຓິວຓ຺ຓອຸທໂກ ອຸຕ຺ຕາໂນຠາໂສ ນາມ.

໕-໖. ອມ຺ພສຸຕ຺ຕວຓ຺ຓນາ

໑໐໕-໖. ປຎ຺ຈເມ ອາມໍ ປກ຺ກວຓ຺ຓີຕິ ອາມກໍ ຫຸຕ຺ວາ ໂອໂລເກນ຺ຕານໍ ປກ຺ກສທິສໍ ຂາຍຕິ. ເອວໍ ສພ຺ພປທານິ ທຏ຺ຐພ຺ພານິ. ຉຏ຺ຐໍ ອຸຕ຺ຕານຕ຺ຖເມວ.

໗. ມູສິກສຸຕ຺ຕວຓ຺ຓນາ

໑໐໗. ສຕ຺ຕເມ ໂຍ ອາວາຏໍ ຂຓຕິ, ນ ຈ ຕຕ຺ຖ ວສຕິ, ໂສ ຄາຘໍ ກຕ຺ຕາ ໂນ ວສິຕາຕິ ວຸຈ຺ຈຕິ. ຂນ຺ຕາຕິປິ ປາໂຐ. ອິມິນາ ນເຍນ ສພ຺ພປທານິ ເວທິຕພ຺ພານິ.

໘. ພລີພທ຺ທສຸຕ຺ຕວຓ຺ຓນາ

໑໐໘. ອຏ຺ຐເມ ໂຍ ອຕ຺ຕໂນ ໂຄຄຓໍ ມທ຺ທຕິ, ນ ປຣໂຄຄຓໍ, ອຍໍ ສຄວຈຓ຺ໂຑ ໂນ ປຣຄວຈຓ຺ໂຑຕິ ເອວໍ ສພ຺ພປທານິ ເວທິຕພ຺ພານິ. ອຸພ຺ເພເຊຕາ ໂຫຕີຕິ ຆຏ຺ເຏຕ຺ວາ ວິຊ຺ຌິຕ຺ວາ ອຸພ຺ເພຄປຕ຺ຕໍ ກໂຣຕິ.

໙. ຣຸກ຺ຂສຸຕ຺ຕວຓ຺ຓນາ

໑໐໙. ນວເມ ເຜຄ຺ຄຸ ເຜຄ຺ຄຸປຣິວາໂຣຕິ ນິສ຺ສາໂຣ ເຜຄ຺ຄຸຣຸກ຺ໂຂ ເຜຄ຺ຄຸຣຸກ຺ເຂເຫວ ປຣິວຸໂຕ. ສາຣປຣິວາໂຣຕິ ຂທິຣາທີຫິ ສາຣຣຸກ຺ເຂເຫວ ປຣິວຸໂຕ. ເອສ ນໂຍ ສພ຺ພຕ຺ຖ.

໑໐. ອາສີວິສສຸຕ຺ຕວຓ຺ຓນາ

໑໑໐. ທສເມ ອາຄຕວິໂສ ນ ໂຆຣວິໂສຕິ ຍສ຺ສ ວິສໍ ອາຄຈ຺ຉຕິ, ໂຆຣໍ ປນ ນ ໂຫຕິ, ຈິຣກາລໍ ນ ປີເຬຕິ. ເສສປເທສຸປິ ເອເສວ ນໂຍຕິ.

ວລາຫກວຄ຺ໂຄ ປຐໂມ.