(໑໖) ໖. ອເຈລກວຄ຺ຄວຓ຺ຓນາ

໑໕໗-໑໖໓. ອິໂຕ ປເຣສຸ ອາຄາຬ຺ຫາ ປຏິປທາຕິ ຄາຬ຺ຫາ ກກ຺ຂຬາ ໂລຠວເສນ ຖິຣຄ຺ຄຫຓາ. ນິຊ຺ຌາມາຕິ ອຕ຺ຕກິລມຖານຸໂຍຄວເສນ ສຸຏ຺ຐຸ ຌາມາ ສນ຺ຕຕ຺ຕາ ປຣິຕຕ຺ຕາ. ມຊ຺ຌິມາຕິ ເນວ ກກ຺ຂຬາ ນ ຌາມາ ມຊ຺ເຌ ຠວາ. ອເຈລໂກຕິ ນິຈ຺ເຈໂລ ນຄ຺ໂຄ. ມຸຕ຺ຕາຈາໂຣຕິ ວິສ຺ສຏ຺ຐາຈາໂຣ, ອຸຈ຺ຈາຣກມ຺ມາທີສຸ ໂລກິຍກຸລປຸຕ຺ຕາຈາເຣນ ວິຣຫິໂຕ ຐິຕໂກວ ອຸຈ຺ຈາຣໍ ກໂຣຕິ, ປສ຺ສາວໍ ກໂຣຕິ, ຂາທຕິ ຠຸຎ຺ຊຕິ. ຫຕ຺ຖາປເລຂໂນຕິ ຫຕ຺ເຖ ປິຓ຺ຑມ຺ຫິ ນິຏ຺ຐິເຕ ຊິວ຺ຫາຍ ຫຕ຺ຖໍ ອປເລຂຕິ, ອຸຈ຺ຈາຣມ຺ປິ ກຕ຺ວາ ຫຕ຺ຖສ຺ມິໍເຍວ ທຓ຺ຑກສຎ຺ຎີ ຫຸຕ຺ວາ ຫຕ຺ເຖນ ອປເລຂຕິ. ຠິກ຺ຂາຍ ຄຫຓຕ຺ຖໍ ‘‘ເອຫິ, ຠທນ຺ເຕ’’ຕິ ວຸຕ຺ໂຕ ນ ເອຕີຕິ ນ ເອຫິຠທນ຺ຕິໂກ. ‘‘ເຕນ ຫິ ຕິຏ຺ຐ, ຠນ຺ເຕ’’ຕິ ວຸຕ຺ໂຕປິ ນ ຕິຏ຺ຐຕີຕິ ນ ຕິຏ຺ຐຠທນ຺ຕິໂກ. ຕທຸຠຍມ຺ປິ ກິຣ ໂສ ‘‘ເອຕສ຺ສ ວຈນໍ ກຕໍ ຠວິສ຺ສຕີ’’ຕິ ນ ກໂຣຕິ. ອຠິຫຏນ຺ຕິ ປຸເຣຕຣໍ ຄເຫຕ຺ວາ ອາຫຏຠິກ຺ຂໍ. ອຸທ຺ທິສ຺ສກຕນ຺ຕິ ອິທໍ ຕຸມ຺ເຫ ອຸທ຺ທິສ຺ສ ກຕນ຺ຕິ ເອວມາໂຣຈິຕຠິກ຺ຂໍ. ນິມນ຺ຕນນ຺ຕິ ‘‘ອສຸກໍ ນາມ ກຸລໍ ວາ ວີຖິໍ ວາ ຄາມໍ ວາ ປວິເສຍ຺ຍາຖາ’’ຕິ ເອວໍ ນິມນ຺ຕິຕຠິກ຺ຂມ຺ປິ ນ ສາທິຍຕິ ນ ຄຓ຺ຫາຕິ. ນ ກຸມ຺ຠິມຸຂາຕິ ກຸມ຺ຠິໂຕ ອຸທ຺ຘຣິຕ຺ວາ ທີຍມານໍ ຠິກ຺ຂມ຺ປິ ນ ຄຓ຺ຫາຕິ. ນ ກໂຬປິມຸຂາຕິ ກໂຬປີຕິ ອຸກ຺ຂລິ ວາ ປຈ຺ຉິ ວາ, ຕໂຕປິ ນ ຄຓ຺ຫາຕິ. ກສ຺ມາ? ‘‘ກຸມ຺ຠິກໂຬປິໂຍ ມໍ ນິສ຺ສາຍ ກຏຈ຺ຉຸນາ ປຫາຣໍ ລຠນ຺ຕີ’’ຕິ. ນ ເອຬກມນ຺ຕຣນ຺ຕິ ອຸມ຺ມາຣໍ ອນ຺ຕຣໍ ກຕ຺ວາ ທີຍມານໍ ນ ຄຓ຺ຫາຕິ. ກສ຺ມາ? ‘‘ອຍໍ ມໍ ນິສ຺ສາຍ ອນ຺ຕຣກຣຓໍ ລຠຕີ’’ຕິ. ທຓ຺ຑມຸສເລສຸປິ ເອເສວ ນໂຍ. ທ຺ວິນ຺ນນ຺ຕິ ທ຺ວີສຸ ຠຸຎ຺ຊມາເນສຸ ເອກສ຺ມິໍ ອຸຏ຺ຐາຍ ເທນ຺ເຕ ນ ຄຓ຺ຫາຕິ. ກສ຺ມາ? ກພຬນ຺ຕຣາໂຍ ໂຫຕີຕິ.

ນ ຄພ຺ຠິນິຍາຕິອາທີສຸ ປນ ຄພ຺ຠິນິຍາ ກຸຈ຺ຉິຍໍ ທາຣໂກ ກິລມຕິ, ປາຍນ຺ຕິຍາ ທາຣກສ຺ສ ຂີຣນ຺ຕຣາໂຍ ໂຫຕິ, ປຸຣິສນ຺ຕຣຄຕາຍ ຣຕິອນ຺ຕຣາໂຍ ໂຫຕີຕິ ນ ຄຓ຺ຫາຕິ. ນ ສງ຺ກິຕ຺ຕີສູຕິ ສງ຺ກິຕ຺ເຕຕ຺ວາ ກຕຠຕ຺ເຕສຸ. ທຸພ຺ຠິກ຺ຂສມເຍ ກິຣ ອເຈລກສາວກາ ອເຈລການໍ ອຕ຺ຖາຍ ຕໂຕ ຕໂຕ ຕຓ຺ຑຸລາທີນິ ສມາທເປຕ຺ວາ ຠຕ຺ຕໍ ປຈນ຺ຕິ, ອຸກ຺ກຏ຺ຐາເຈລໂກ ຕໂຕ ນ ປຏິຄ຺ຄຓ຺ຫາຕິ. ນ ຍຕ຺ຖ ສາຕິ ຍຕ຺ຖ ສຸນໂຂ ‘‘ປິຓ຺ຑໍ ລຠິສ຺ສາມີ’’ຕິ ອຸປຏ຺ຐິໂຕ ໂຫຕິ, ຕຕ຺ຖ ຕສ຺ສ ອທຕ຺ວາ ອາຫຏໍ ນ ຄຓ຺ຫາຕິ. ກສ຺ມາ? ເອຕສ຺ສ ປິຓ຺ຑນ຺ຕຣາໂຍ ໂຫຕີຕິ. ສຓ຺ຑສຓ຺ຑຈາຣິນີຕິ ສມູຫສມູຫຈາຣິນີ. ສເຈ ຫິ ອເຈລກໍ ທິສ຺ວາ ‘‘ອິມສ຺ສ ຠິກ຺ຂໍ ທສ຺ສາມາ’’ຕິ ມນຸສ຺ສາ ຠຕ຺ຕເຄຫໍ ປວິສນ຺ຕິ, ເຕສຸ ຈ ປວິສນ຺ເຕສຸ ກໂຬປິມຸຂາທີສຸ ນິລີນາ ມກ຺ຂິກາ ອຸປ຺ປຕິຕ຺ວາ ສຓ຺ຑສຓ຺ຑາ ຈຣນ຺ຕິ, ຕໂຕ ອາຫຏໍ ຠິກ຺ຂໍ ນ ຄຓ຺ຫາຕິ. ກສ຺ມາ? ‘‘ມໍ ນິສ຺ສາຍ ມກ຺ຂິການໍ ໂຄຈຣນ຺ຕຣາໂຍ ຊາໂຕ’’ຕິ.

ຖຸໂສທກນ຺ຕິ ສພ຺ພສສ຺ສສມ຺ຠາເຣຫິ ກຕໂສວີຣກໍ. ເອຕ຺ຖ ຈ ສຸຣາປານເມວ ສາວຊ຺ຊໍ, ອຍໍ ປນ ສພ຺ເພສຸ ສາວຊ຺ຊສຎ຺ຎີ. ເອກາຄາຣິໂກຕິ ໂຍ ເອກສ຺ມິໍເຍວ ເຄເຫ ຠິກ຺ຂໍ ລຠິຕ຺ວາ ນິວຕ຺ຕຕິ. ເອກາໂລປິໂກຕິ ເອເກເນວ ອາໂລເປນ ຍາເປຕິ. ທ຺ວາຄາຣິກາທີສຸປິ ເອເສວ ນໂຍ. ເອກິສ຺ສາປິ ທຕ຺ຕິຍາຕິ ເອກາຍ ທຕ຺ຕິຍາ. ທຕ຺ຕິ ນາມ ເອກາ ຂຸທ຺ທກປາຕິ ໂຫຕິ, ຍຕ຺ຖ ອຄ຺ຄຠິກ຺ຂໍ ປກ຺ຂິປິຕ຺ວາ ຐເປນ຺ຕິ. ເອກາຫິກນ຺ຕິ ເອກທິວສນ຺ຕຣິກໍ. ອທ຺ຘມາສິກນ຺ຕິ ອທ຺ຘມາສນ຺ຕຣິກໍ. ປຣິຍາຍຠຕ຺ຕໂຠຊນນ຺ຕິ ວາຣຠຕ຺ຕໂຠຊນໍ, ເອກາຫວາເຣນ ທ຺ວີຫວາເຣນ ສຕ຺ຕາຫວາເຣນ ອທ຺ຘມາສວາເຣນາຕິ ເອວໍ ທິວສວາເຣນ ອາຠຕຠຕ຺ຕໂຠຊນໍ. ສາກຠກ຺ໂຂຕິອາທີນິ ວຸຕ຺ຕຕ຺ຖາເນວ.

ອຸພ຺ຠຏ຺ຐໂກຕິ ອຸທ຺ຘໍ ຐິຕໂກ. ອຸກ຺ກຸຏິກປ຺ປຘານມນຸຍຸຕ຺ໂຕຕິ ອຸກ຺ກຸຏິກວີຣິຍມນຸຍຸຕ຺ໂຕ, ຄຈ຺ຉນ຺ໂຕປິ ອຸກ຺ກຸຏິໂກວ ຫຸຕ຺ວາ ອຸປ຺ປຕິຕ຺ວາ ອຸປ຺ປຕິຕ຺ວາ ຄຈ຺ຉຕິ. ກຓ຺ຏກາປສ຺ສຍິໂກຕິ ອຍກຓ຺ຏເກ ວາ ປກຕິກຓ຺ຏເກ ວາ ຠູມິຍໍ ໂກຏ຺ເຏຕ຺ວາ ຕຕ຺ຖ ຈມ຺ມໍ ອຕ຺ຖຣິຕ຺ວາ ຐານຈງ຺ກມາທີນິ ກໂຣຕິ. ເສຍ຺ຍນ຺ຕິ ສຍນ຺ໂຕປິ ຕຕ຺ເຖວ ເສຍ຺ຍໍ ກປ຺ເປຕິ. ສາຍໍ ຕຕິຍມສ຺ສາຕິ ສາຍຕຕິຍກໍ. ປາໂຕ ມຊ຺ຌນ຺ຫິເກ ສາຍນ຺ຕິ ທິວສສ຺ສ ຕິກ຺ຂຕ຺ຕຸໍ ‘‘ປາປໍ ປວາເຫສ຺ສາມີ’’ຕິ ອຸທໂກໂຣຫນານຸໂຍຄໍ ອນຸຍຸຕ຺ໂຕ ວິຫຣຕິ.

ກາເຍ ກາຍານຸປສ຺ສີຕິອາທີນິ ເຫຏ຺ຐາ ເອກກນິປາຕວຓ຺ຓນາຍໍ ວຸຕ຺ຕນເຍເນວ ເວທິຕພ຺ພານິ. ອຍໍ ວຸຈ຺ຈຕິ, ຠິກ຺ຂເວ, ມຊ຺ຌິມາ ປຏິປທາຕິ, ຠິກ຺ຂເວ, ອຍໍ ກາມສຸຂລ຺ລິການຸໂຍຄຎ຺ຈ ອຕ຺ຕກິລມຖານຸໂຍຄຎ຺ຈາຕິ ທ຺ເວ ອນ຺ເຕ ອນຸປຄຕາ, ສສ຺ສຕຸຈ຺ເຉທນ຺ເຕຫິ ວາ ວິມຸຕ຺ຕາ ມຊ຺ຌິມາ ປຏິປທາຕິ ເວທິຕພ຺ພາ.

ອເຈລກວຄ຺ໂຄ ຉຏ຺ໂຐ.